APWANNE munnawerya woona wi achu ancipale mu elapo anuupuwela wi aakhalano owerya wa okhalano mirici, ophwanelela naari okhalihiwa wavameekhaaya? Naamwi ekhalihiwaka mmukhalelo wavameekhaaya, awo nlelo anuupuwela wi annaphwanelela okhalano mirici mikina. Muupuwelo yoola onathipeleya mmikhalelo sa nrima naari wiisivela ni ohithamalela seiho inooniherya mahiku ookuchula.—2 Tim. 3:2.

Mweeparipari, ovinyerya khalai yaakhalavo achu a mukhalelo yoola wa nrima naari wiisivela. Ntoko yootakiherya, Atamu ni Eva yaahilakelela othanla mukhataaya yeeyo eri yaphaama ni yoonanara, nave ekhalano sookhumelela soowaawa. Mu iyaakha masaneene, Mwene Usiya o Yuta, uupuwela wi ahikhalano owerya wa opaha sawunkhela mu empa ya Yehova, nyenya aahiiwoka vancipale. (2 Math. 26:​18, 19) Mmukhalelo mmohamoha, Afarisi ni Asatuki yaaneemererya wi yaakhalano ophwanelela wa waakhela okhalihiwa wavameekhaaya wa Muluku pahiru wa nthowa na okhala a muyareriwo wa Aparahamu.—Mat. 3:9.

Hiyaano nrukureryiwe ni achu a nrimaxa, nave mukhalelo aya onanwerya onivolowela. (Aka. 5:26) Nnanwerya opacerya wuupuwela wi nookhalano ophwanelela wa waakhela murici vyakala naari waakhela okhalihiwa wavameekhaaya. Nni niwerye hai osepa mukhalelo yoola wa wuupuwela? Voopacerya, nnaphwanela wiiwexexa moonelo wa Yehova vooloca sa mwaha. Vocharela, malakiheryo a Mpiipiliyani enamunikhaviherya.

Yehova onnalakelela yeeyo nnaphwanelaahu waakhela. Muthokororye sootakiherya savakhaani:

•   Veechokoni, mulopwana othenle onaphwanela waakhela ncicimiho wa amwaariye, nave muthiyana onaphwanela waakhela osivela wa aiyawe. (Aef. 5:33) Atheli anaphwanela waakhelaka osivela wavameekhaya wa mukina ni mukhwaawe. (1 Ako. 7:3) Asitiithi anaweherya wi anaaya ewiiweleleke, nave anamwane annaweherya waakhela osivela ni ncicimiho na asitiithi aya.—2 Ako. 12:14; Aef. 6:2.

• Mmulokoni, atokweene a mavyakelo annaphwanela waakhela ncicimiho nahu. (1 Ate. 5:12) Mwawiihiiha, atokweene a mmulokoni hiyaano owerya wa ovareryelaka yeeyo anna ni arokora aya aneeraaya.—1 Pet. 5:​2, 3.

• Muluku ohaavaha alamuleli owerya wa ovekaka mixokho ni waakhelaka ncicimiho wa achu yaawo anaalamulelaaya.—Aro. 13:​1, 6, 7.

Yehova moosivela onnanivaha sincipale opwaha seiho nnaphwanelaahu waakhela. Wa nthowa na ohiphaameya wahu, ninnaphwanela okhwa. (Aro. 6:23) Naamwiihiiha, Yehova onnanivaha mareeliho mancipale wa nthowa na osivela wawe woororomeleya. (Sal. 103:​10, 11) Mareeliho vyakala naari murici nnaakhelaahu wa yoowo, owo onnanivaha nthowa na mahala awe matokweene.—Aro. 12:​6-8; Aef. 2:8.

Mwiikasoopeke ni mikhalelo sa elapo. Moohisuwela, nnawerya opacerya wuupuwela wi na achu oophwanelelaxa waapwaha akina. Yesu aahooniherya mukhalelo yoola wa wuupuwela wa achu a elapo onahaalaaya okhala wookhweya okhumelela, moorweela wa opharihela niphwanaphwaniho na anamalapa yaawo yaakhenle etenaariyu emoha. Anamalapa akina yaapacenrye olapa wooxiixelo ene nave yaalampe nihiku noothene ni nsuwa nene; nave akina yaalampe pahiru ewora emoha. Nikhuuru noopacerya nuupuwela wi yaakhalano ophwanelela wa waakhela ikhorowa sawaacaxa wa nthowa na muteko yaphanraaya. (Mat. 20:​1-16) Atharihaka sa niphwanaphwaniho nenla, Yesu aahooniherya wa oomucharaawe wi yaaphwanela waakhwaneliwaka ni yeeyo Muluku onasiveliweiye waavaha.

Mukhaleke oothamalela, nave muhiweheryeke ichu sa akina. (1 Ate. 5:18) Mmutakiherye murummwa Paulo yowo aahivenke nikhawiheryo na ichu soomwiilini wa anna o Korintu, naamwi aarino ophwanelela wa weerano yeeyo. (1 Ako. 9:​11-14) Nnaphwanela othamalelaka mareeliho eri oothene nnaakhelaahu ni osepa munepa wookhinyererya.

 Mukhale awiiyeviha. Wakhala wi muchu onnuupuwelaxa sa yene mukhateiye, onnapacerya wiisoonaka wi ookhalano owerya wa okhalano sincipale opwaha seiyo oreiyeno. Wiiyeviha onamunikhaviherya osepa okhalano muupuwelo yoola wootakhala.

Mulipa a miririmu Taniyeli ohooniherya yootakiherya yaphaama ya wooniherya wiiyeviha. Mu emusi aayariweiyemo, oreera wawe, masuwelelo awe ni mavyakelo awe, yaanwerya omweeriha wiisoonaka wi aakhalano ophwanelela wa waakhela okhalihiwa wavameekhaya ni mirici seiyo aakhenleiye. (Tan. 1:​3, 4, 19, 20) Naamwiihiiha, Taniyeli aahititelela okhala awiiyeviha, nave mukhalelo yoola waahimweeriha okhala asisapo wa Yehova.—Tan. 2:30; 10:​11, 12.

Nnaphwanela okhooca munepa yoola wa nrima yoowo ori wawunlaana mu elapo yeela. Ohiya yeeyoru, ntitelele okhala oohakalala ni mareeliho ari oothene yaawo Yehova onanivaheiye moorweela wa mahala awe matokweene.