1. Ti mwawiihai okumi ahu oryaaya wasisapo wa Yehova?

 MWAANYIHERYE wi nthamwene anyu ohoovahaani empa yoopintaariwa. Eyo yookhalano makupa makina enaacuwa nave malantha makina aathorowa. Moohipwacha makacamiho yaala, owalamela wa empa yeela ti ya atoolare amilyawu. Moohikhwa minikwa, munahaala othamalela ni okhapelela empa yeela. Moolikana, Yehova oonivaha yamahala yasisapo, yamahala ya okumi. Mweeparipari, Yehova ohooniherya mukhalelo onavaheiye esisapo okumi ahu moorweela wa omvaha Mwanawe ntoko mukucho wa woopola ntakhara hiyo.—Yoh. 3:16.

2. Ntoko enooniheryiwaaya mu 2 Akorintu 7:1, tiheeni Yehova onaweheryeiye wa hiyo?

² Yehova Ehime ya okumi. (Sal. 36:9) Murummwa Paulo aaheemererya eparipari yeela vaavaa aalonceiye wi: “Moorweela wa yoowo, nookhalano okumi, ninniitannya nave nookhala.” (Saw. 17:25, 28) Mwawiihiiha, hiyaano nnanwerya oloca wi okumi ahu yamahala yoorweela wa Muluku. Moosivela owo onnanivahererya yeeyo nnachunaahu wi ntitelele okhala. (Saw. 14:15-17) Nyenya Yehova hanakhapelela okumi ahu mootikhiniha. Ohiya yeeyo, owo onachuna wi nipakeke yeeyo nnaweryaahu wi ntitelele okhala phaama ni otitelela omurumeela yoowo. (Mwaalakhanye 2 Akorintu 7:1.) Ntakhara heeni nnaphwanelaahu okhapelela okhala wahu phaama ni okumi ahu, nave ti mwawiihai nneeraahu neereno yeeyo?

3. Nthowa taani nimoha nnaneeriha wiilipixerya otitelela okhapelela okumi ahu?

³ Nthowa nimoha nnaneeriha wiilipixerya otitelela okhapelela okhala wahu phaama ti nawi nnanwerya omurumeela Yehova  ophiyerya vaavaa nnaweryelaahuvo. (Mar. 12:30) Ninnachuna oveleela ‘mwiili ahu ntoko mukucho mukumi, waweela ni waweemereryeya wa Muluku,’ mwawiihiiha ninnasepa othanla opaka ichu seiho nnasuwelaahu wi sinahaala onanariha okumi ahu. (Aro. 12:1) Mweeparipari, moohipwacha wiilipixerya wahu, haniwerya weeriha wi nihiiceliwe. Nyenya ninnapaka yeeyo nnaweryaahu woona wi nnachuna omooniherya Tiithi ahu a wirimu wi ninnathamalela yamahala ya okumi.

4. Tiheeni Mwene Tavite aachuneiye weera?

⁴ Mwene Tavite aahithariha ntakhara heeni aavaheiye esisapo yamahala ya okumi yeeyo Muluku aamvanheiye, vaavaa aarempeiye: “Yoopucula taani enahawela orwa kakhwa, kineeraaka kamorele munihiyeni? Muchu athatuwale nchupi onamoothamalaani nyuwo, nari oloca sa wookololowa wanyu?” (Sal. 30:9, PMM) Tavite akhweya aarempe masu yaala omakuchuwelo wa okumi awe. Nyenya owo aari oolakelela otitelela okhala mukumi waakhanle wooweryeya wi atitelele omurumeela Yehova. Moohikhwa minikwa, oothene ahu nookhalano yoolakelela emohamoha.

5. Moohipwacha wiiceliwa naari wuuluvala, tiheeni nnaphwanelaahu weera?

⁵ Wakhala wi ninniiceliwa naari nohuuluvala, akhweya hannawerya opaka ichu sincipale seiho naaweryaahu opaka khalai. Ntoko yookhumelela, nnanwerya okhala oohaleeliheya ni oothanana. Nyenya nihirwe nivelavele okhapelela ni opwacha okumi ahu. Ntakhara heeni? Woona wi moohipwacha wuuluvala naari wiiceliwa, nnanwerya omuhakalaliha Yehova, hiihaa ntoko Mwene Tavite eenreiye. Ennanihakararya osuwela wi na asisapo wa Muluku ahu naamwi niiceliwaka naari nuuluvanle! (Mat. 10:29-31) Naamwi nikhwile, moohilekela owo onahaala oniviiha mookhwani. (Yupu 14:14, 15) Vaavaa nryaahu akumi, ninnachuna opaka yeeyo nnaweryaahu wi nikhapelele okumi ahu ni okhala wahu phaama.

6. Tiheeni Yehova onaweheryeiye wa hiyo vooloca sa yeeyo nnalyaahu ni owurya?

⁶ Naamwi Piipiliya ahiri liivuru onaloca mukhalelo wa wiikhapelela naari yeeyo nnaphwanelaahu olya, owo onnanleela sincipale vooloca sa mukhalelo Yehova onuupuweleiye vooloca sa ichu seiho. Ntoko yootakiherya, owo onnanlopola wi ‘niviihevo sookacamiha’ seiho saahaala onanariha mwiili ahu. (Ekl. 11:10, PMM) Piipiliya onnaloca wi hannaphwanela olyaaka moopwahererya naari owuryaxa soowurya soohapaliha. Ichu seiho sinanwerya onanariha okumi ahu nave ophiyerya tho oniipha. (Mas. 23:20) Yehova onaweherya wi nikhale oophimelela vaavaa nnalakelelaahu yeeyo nnahaalaahu olya ni owurya ni mukhalelo wa weerano.—1 Ako. 6:12; 9:25.

7. Ti mwawiihai ekano enaphwanyeya mu Masiposipo 2:11 enanikhaviheryaaya opaka soolakelela saphaama vooloca sa okhala wahu phaama?

⁷ Nnanwerya opaka soolakelela seiho sinahaala wooniherya omuthamalela wahu vancipale Muluku ntakhara yamahala ya okumi moorweela wa opharihela mavyakelo ahu a wuupuwela. (Sal. 119:99, 100; mwaalakhanye Masiposipo 2:11, PMM.) Ntoko yootakiherya, nnaphwanela wuupuwelaka mwawiiseela vooloca sa yeeyo nnahaalaahu olya. Wakhala wi ninnasiveliwa ni yoolya nnasuwelaahu wi ennanruuhela makacamiho a okumi, nnaphwanela osepa olya yeeyo. Hiyaano tho ninnooniherya okhala a miruku vaavaa nniilipixeryaahu okona mwawaakhwanela, ovyakiha mwiili wiiliwiili, okhalano yookhovelela  yaphaama ya esipanti ni otitelela ovela ni orehererya empa ahu.

8. Tiheeni Piipiliya onanihusiheiye sa muupuwelo wa Yehova vooloca sa waasepa aasitenti?

⁸ Yehova aahaavaha Aisarayeli Malamulo vooloca sa mukhalelo awo yaaphwanelaaya wiikhapelela orweela wa aasitenti atokweene yaawo yaahaala weereya owaani ni vaavaa awo yaalapaaya. (Muk. 21:28, 29; Malam. 22:8) Vaavaa muchu aamwiipheiye muchu mukina moohilakelela, owo aanakhalano sookhumelela soowaawa. (Malam. 19:4, 5) Nlamulo naanaloca wi wakhala wi alopwana ennawana ni emphoreiha muthiyana orupanle nave ayara ehiphiyenrye elukuluku awe, awo yaaphwanela olakiwa. (Muk. 21:22, 23) Soorepa sinnahiya mookwakwaleya wi Yehova onachuna wi nipakeke owetha wahu wi naasepe aasitenti.

9. Tiheeni nnaphwanelaahu weera wi naasepe aasitenti? (Moone tho iruku.)

⁹ Hiyaano ninnooniherya wi ninnathamalela yamahala ya Muluku ya okumi moorweela wa otitelela okhala awiikhapelela owaani ni omutekoni. Ntoko yootakiherya, wakhala wi ninnachuna oriha ichu soophoreiha, sawiipha  naari ikininu, nnahaala weerano yeeyo mmukhalelo ohinahaala waahooxa akina. Nave tho nnaphwanela ororomela wi anamwane hewerya ophwanya ichu seiho. Nnaphwanela okhalano ekaasoope vaavaa nniiseelaahu mooro, nnaapeyaahu maahi, vaavaa nnapharihelaahu ikaruma sawoopiha, ohiya pahiru moorweela wa orakamela seiho nyenya tho vaavaa nnapharihelaahu seiho. Hannaphwanela weeciha ekaaro ahu nri awaakanyeryeya mmuupuweloni, nihapaliwe naari nrino ikhove, nave hannaphwanela ompharihela telefoni neecihaka ekaaro naari echu ekina.

10. Tiheeni nnaphwanelaahu weera ehaakumve ni variyari va epahu?

¹⁰ Ilukuluku ikina, haniwerya osepa mikhalelo sawoopiha sineereya. Ela eparipari xaxaxa vaavaa ineereyaaya ipahu sa maphacuwelo, ireca soomwaramwaxeya ni ichu sa nlala. Nyenya, vaavaa enakhumelelaaya epahu, nnanwerya otitelela okhapelela okumi ahu ophiyerya vaavaa nnaweryelaahuvo ni okophola mu yawoopiha moorweela wa wiiwelela nlamulo na okhuma mmukuma yoowo ovoloweliwe ni epahu ni malamulo makina a alamuleli. (Aro. 13:1, 5-7) Ipahu ikina nnanwerya oleeliwa woosiilo, mwawiihiiha nnaphwanela ochariha ohoolela vyakala nnavahiwaahu ni ahooleli a vanipuroni wi onikhaviherye wiirehererya ntakhara epahu. Ntoko yootakiherya, onamukhala wamphurelo okhapelela maahi ni yoolya ehinuuca ni ikaruma ikina sawiikhaviheryano.

11. Wakhala wi ereca yooravihana yoomwaramwaxeya weiwo nnakhalaahuwo, tiheeni nnaphwanelaahu weera?

¹¹ Tiheeni nnaphwanelaahu weera wakhala wi ereca yooravihana yoomwaramwaxeya weiwo nnakhalaahuwo? Hiyaano nnaphwanela wiiwelela ohoolela wa alamuleli, ntoko onawa mata, orakamelana, waawara amaskara nave wakhala wooweryeya okhala owaani. Vaavaa nneeraahuno ichu seiha, ninnooniherya wi ninnathamalela vancipale yamahala ya okumi yeeyo Muluku onivanheiye.

12. Ti mwawiihai nlakiheryo nnaphwanyeya mu Masiposipo 14:15 nnanikhaviheryaaya okhalano ephoole vaavaa nniiwaahu ichu seiho sinalociwa variyari va ipahu?

¹² Variyari va ipahu soohiwehereryeya, nnanwerya wiiwa ichu sihiri seeparipari orweela wa asinthamwene, amwaacamani, mu araatiyu ni mu televisau. Ohiya weemererya “soothene inalociwa,” nnaphwanela owiriyana moopwacha sooleeliherya soororomeleya sa alamuleli ni matotore. (Mwaalakhanye Masiposipo 14:15.) Nikhuuru Noolamulela ni ifiliyale ninniilipixerya wi ephwanye sooleeliherya soororomeleya ehaakumve ovaha ohoolela vooloca sa mithukumano sa muloko ni muteko woolaleerya. (Ahe. 13:17) Moorweela wa ochariha ohoolela yoola, ninniikhapelela nave ninnaakhapelela akina orweela wa yawoopiha. Hiyaano tho ninnaakhaviherya akina okhalano moonelo woophwanelela vooloca sa Anamoona a Yehova.—1 Pet. 2:12.

13. Nni nooniherye hai wi ninnavaha esisapo yamahala ya okumi vaavaa onalociwaaya mwaha wa nikhami?

¹³ Achu ancipale annasuwela wi Anamoona a Yehova anneemererya wi nikhami ti naweela. Hiyaano ninniiwelela nlamulo na Yehova vooloca sa nikhami moorweela wa oheemererya ovahiwa naari ovaha nenlo, naamwi variyari va oloola woohiwehereryeya. (Saw. 15:28, 29) Nyenya, ela henataphulela wi nnachuna okhwa. Moohiyana, hiyaano ninnavaha esisapo yamahala ya okumi yeeyo Muluku onivanheiye. Hiyaano ninnaavya  nikhaviheryo wa matotore yaawo ari ooreheryeya wi evahererye oloola woophwanelela ohinavolowela ovahiwa nikhami.

14. Nni niwerye hai ovukulela mikhalelo seiho saahaala oneeriha ochuna oloola wookacamiha?

¹⁴ Wakhala wi ninnakhapelela okumi ahu moorweela wa opaka ichu seiho nthokoronryaahu mmwaha yoola, akhweya hokhala woochuneya wooperariwa naari opaka oloola wookacamiha. Nnanwerya ovukulela mikhalelo saahaala oneeriha ochuna oloola wawaakuveya moorweela wa otitelela wiikhapelela owaani ni mmapuro nnalapaahumo ni moorweela wa wiiwelela malamulo a mmuxeweni.

15. (1) Ntakhara heeni oryaaya woochuneya orepela etukumentu ya nikhami mwawaakuveya? (Moone tho eruku.) (2) Ntoko yooniheryiwaaya mu exilema, ti mwawiihai nneeraahu nooniherye soolakelela sahu vooloca sa oloola onaphariheliwa nikhami?

¹⁵ Woona wi ninnathamalela yamahala ya okumi, hiyaano ninnarepela ekartawu (diretivas antecipadas) nave ninniilipixerya wi neecekeno ilukuluku soothene. b Moorweela wa etukumentu yeela, ninnooniherya moonelo ahu vooloca sa ovahiwa nikhami ni oloola okina. Apwanne moorepela etukumentu anyu hiihaanoru? Wakhala wi munnachuna orepela etukumentu anyu, mweereno yeeyo mwawaakuveya.  Wooniherya moonelo anyu mookwakwaleya moorweela wa orepela onahaala wookhaviheryaani waakhela oloola mwawaakuveya. Owo tho onahaala onikhaviherya ohaakhela oloola naari mirece seiho siri sawoopiha wa hiyo. c

16. Tiheeni nnaphwanelaahu weera wakhala wi ninnakhwa minikwa vooloca sa mukhalelo wa orepela etukumentu ya nikhami?

¹⁶ Moohipwacha naari amiravo naari naarino okumi waphaama, oothene ahu nnanwerya waapaka aasitenti naari wiiceliwa. (Ekl. 9:11) Mwawiihiiha, enamukhala ya miruku orepela etukumentu ya nikhami. Waakhanle wi munnakhwa minikwa vooloca sa mukhalelo wa orepela etukumentu yeela, mwaaveke atokweene a mmulokoni wi yookhaviheryeeni. Awo anahaala wookhaviheryaani wiiwexexa mukhalelo wa orepela etukumentu yeeyo, nyenya awo hepaka soolakelela vooloca sa oloola ntakhara nyuwo. Owo murici anyu. (Aka. 6:4, 5) Nyenya, awo ananwerya wookhaviheryaani wiiwexexa sooleeliherya sinaphwanyeya va etukumentu ni wookhaviheryaani vaavaa munarepelaanyu yeeyo.

17. Ti mwawiihai nneeraahu nooniherye wi naachu oophimelela vooloca sa okumi?

¹⁷ Soolakelela sahu sincipale vooloca sa okumi ni oloola sinathipeleya wa yeeyo nnahuseryaahu Mpiipiliyani. (Saw. 24:16; 1 Tim. 3:9) Vaavaa nnapakaahu soolakelela ni othokororya seiho ni akina, nnaphwanela opharihela nlakiheryo nnaphwanyeya mu Afilipi 4:5, nenlo nni: “Wiichacala wanyu osuweliwe ni achu oothene.” Vaavaa nnakhalaahu oophimelela, ilukuluku soothene hinikhala awuukhuwa vooloca sa okumi ahu, nave hineererya oweeriha akina okhalano moonelo mmohamoha ni wawihu vooloca sa okumi. Ninnaasivela ni waacicimiha anna ni arokora ahu, naamwi soolakelela anapakaaya sikhalaka soohiyana ni sawihu.—Aro. 14:10-12.

18. Nni nooniherye hai othamalela wahu ntakhara yamala ya okumi?

¹⁸ Ninnooniherya othamalela wahu wa Yehova, yoowo ori Ehime ya okumi, moorweela wa okhapelela okumi ahu ni omvaha yoowo owetha wahu. (Wup. 4:11) Olelo, nnanwerya wiiceliwa ni ohoolela ipahu. Nyenya tahi mukhalelo yoola Mpatuxa ahu onachuneiye wi nikhaleke. Moohilekela owo onahaala onivaha ekumi yoohimala ohirivo soohooxa ni okhwa. (Wup. 21:4) Niwehereryaka elukuluku yeeyo, ti waphaama okhala akumi ni omurumeela Tiithi ahu oosivela a wirimu, Yehova!