Awo Ahoona Osivela mu Saweera
YOMARA ni asinna awe—Marselo ni Hiver—anakhala mu epooma ekhaani yo Kwatemala. Yomara aapacerya omuhuserya Piipiliya ni Anamoona a Yehova nave voocharela asinna awe yaapacerya ohuserya tho. Nyenya naahikhalavo nikacamiho. Ooraaru yaari evaasi nave hiyaawerya waalakhanya ni ikatha. Mwawiihiiha, muhusiha aya a Piipiliya aanaalakhanya iparakrafo ni iversikulu sa Mpiipiliyani wa yaawo.
Ophiya mmithukumano sa muloko naari nikacamiho nikina. Mukhataaya pahiru, hiyaawerya opaka mukwaha wa aminutu 40 wi ephiye o Empa ya Omwene yawaacamela. Nyenya anna a mmulokoni yaahipaka marehereryo wi yaakhaviheryeke awo ophiya mmithukumano soothene. Nave vaavaa yaapacenryaaya waakhela makupa a anaxikola ntakhara mithukumano sa veeri va esumana, anna yaanaakhaviherya awo ohicuwala mukhalelo wa opaka makupa aya.
Mu Maiyu a 2019, mithukumano sa muloko saahipaceryiwa opakiwa mu epooma aya. Voocharela, mutheli mmoha yoowo ari piyoneero a elukuluku yoothene aahithaamela epooma yeele. Awo yaahilakelela waahusiha oothene yaale orepa ni waalakhanya ni ikatha, naamwi mutheli ole ahaasuwenle mukhalelo wa weerano yeeyo. Awo yaaya o epiipiliyoteka wi yahuserye waalakhanya ni ikatha ni ohuserya mukhalelo wa opharihela yeeyo wi yaahusihe akina.
Marselo avahaka naakhulo variyari va mithukumano sa muloko
Mu miyeeri savakhaani, alipa eevaasi yaale yaanawerya orepa ni waalakhanya ni ikatha mookhweya, nave ntoko yookhumelela awo yaahikhalano onthamwene woolipa ni Yehova. a Vano Yomara, Marselo ni Hiver anarumeela ntoko mapiyoneero a elukuluku yoothene. Marselo murummwa oorumeela. Isumana soothene, awo anakhala ooweiwa mmiteko soomunepani. Mvai aya ntakhara omurumeela Yehova onnaaceenyerya akina weerano emohamoha.
Alipa eevaasi yaala araru annathamalela nikhaviheryo noosivela na muloko. Yomara ooloca: “Mu ekwaha yoopacerya naasuwenlaahu Anamoona a Yehova, awo yaahinooniherya osivela weeparipari Weekristu.” Marselo ohaaceererya: “Hiyaano nookhalano asinthamwene aphaama a mmuloko ahu, nave ninnapaka makupa a emusi yoosivela ni yawiiwanana orukurerya elapo.” Yomara ni asinna awe annawehererya moohakalala woona nihiku nenlo Yehova onahaaleiye weeriha elapo okhala parataiso.—Sal. 37:10, 11; Yes. 35:5.
a Eproxura erino muru Aprender a ler braile epakiwe wi yaakhaviherye yaale ari eevaasi naari ahinoona phaama ohuserya mukhalelo wa orepa ni waalakhanya elocelo ya ikatha.
