1-2. Echu taani eri yoochuneyaxa wa Yehova, nave tiheeni owo onanceenyeryeiye weera?

 APWANNE mohintoko wuupuwela wi, emoha wa ichu soochuneyaxa wa Yehova ori mukhalelo nnaakhalihaahu akina? Yesu oohusiha wi nnaphwanela omusivelaka mwaacamani ahu hiiha ntoko nniisivelaahu. (Mat. 22:37-39) Eyo enaphitaanyerya okhala ooreera murima ophiyerya wa yaale ahinamurumeela Yehova. Vaavaa nnooniheryaahu oreera murima, ninnamutakiherya Muluku ahu yoowo ‘onakumiha nsuwa nawe wa achu oonanara murima ni aphaama nave onarupiha epula wa awookololowa ni oohookololowa.’—Mat. 5:45.

² Yehova onnaasivela achu oothene, nyenya owo ookhalano osivela wavameekhaaya wa yaale aneerano sawookololowa. (Yoh. 14:21) Owo onachuna wi nikhale ntoko yoowo. Wanthowa na yeeyo, owo onnanceenyerya okhalano “osivela weeparipari” ni “niphwanya” wa anna ni arokora ahu. (1 Pet. 4:8; Aro. 12:10) Masu yaala analoca sa osivela yoowo nnakhalaahuno wa muchu aveemusini vahu naari wa nthamwene avamurimani.

3. Tiheeni nnaphwanelaahu wuupuwela vooloca sa osivela?

³ Osivela ori ntoko efoloori yeeyo enachuna okhapeleliwa wi yinnuwe. Murummwa Paulo aahivaha nceenyeryo nla wa Akristu: “Osivela wanyu wonna otitelele.” (Ahe. 13:1) Yehova onachuna wi osivela wahu ntakhara annihu otitelele winnuwa. Mmwaha yoola nnahaala woona ntakhara heeni nnaphwanelaahu olipiha onthamwene ahu wa annihu ni mukhalelo nneeraahu ntitelele weerano yeeyo.

 NTAKHARA HEENI NNAPHWANELAAHU OWAACAMELA ANNIHU?

4. Tiheeni nnaphwanelaahu weera wi ntitelele ovaha esisapo wiiwanana wahu ni annihu? (Salmu 133:1) (Moone tho iruku.)

⁴ Mwaalakhanye Salmu 133:1. Hiyaano ninneemererya ni yeeyo mulipa oomurepa Salmu olonceiye wi “ti yaphaama” nave “ti yoohakalaliha” okhala asinthamwene a yaale anamurumeela Yehova. Nyenya yookhalavo yawoopiha. Muupuwele sa muchu yoowo mahiku oothene onavira va nipuro orivo mwiri mutokweene ni wooreera. Moovira wa elukuluku, owo onammaala ovaha esisapo oreera wa mwiri yoole. Mmukhalelo mmohamoha, hiyaano ninnakhala ni annihu mu ikwaha sincipale va esumana. Tiheeni nnaphwanelaahu opaka wi eyo eheereye? Osivela yoowo nnoonaahu wa annihu onahaala winnuwa wakhala wi ninnamaliha elukuluku nuupuwelelaka mukhalelo mmoha ti mmoha a yaawo oryeiye oochuneya wa muloko ni wa hiyaano.

5. Tiheeni enahaala weereya vaavaa achu anoonaaya osivela yoowo orivovo variyari vahu?

⁵ Akina yaawo enaphwanyeya mmithukumano sahu mu ekwaha aya yoopacerya, ennakhala ootikhiniheyaxa ni osivela yoowo nryaahuno wa mukina ni mukhwaawe. Nave ikwaha ikina eyo ennaakhwanela wa awo osuwela wi hiyaano na Akristu eeparipari. Yesu aaloca: “Oothene enarwa esuwela wi mwa oohuserya aka moorweela mwa ela: Mwakhalano osivela mukina ni mukhwaawe.” (Yoh. 13:35) Moone yootakiherya emoha ya Chaithra aahuserya mu exikola ya vasulu, yoowo aamuhuserya Piipiliya ni Anamoona a Yehova. Owo aaheemererya nwopelo wi aphwanyeye va muthukumano wa muceche. Nivinre nihiku noopacerya, owo aahiloca wa muhusiha awe: “Asitiithi aka hayintonko okikhupaarela. Nyenya va muthukumano anyu wa muceche, miyaano kookhupaareliwa ikwaha 52 pahiru mu nihiku nimoha!  Kohoona osivela wa Yehova moorweela wa anna nave kinachuna opaka makupa a emusi yeela.” Chaithra aahititelela oya vahoolo nave aahipatisiwa mu eyaakha ya 2024. Eyo enooniherya wi, ikwaha sincipale, vaavaa achu yaawo enooniherya nchuno enoonaaya miteko sahu saphaama ophitaanyerya osivelana wahu, awo ennaceenyeryeya omurumeelaka Yehova.—Mat. 5:16.

6. Ntakhara heeni onthamwene woolipa ni annihu onanwerya onikhapelela?

⁶ Okhalano onthamwene woolipa ni anna vamoha ni arokora ahu onanwerya okhala nchawelo wa hiyaano. Paulo aahaaceenyerya Akristu: “Mutitelele olipihana mukina ni mukhwaawe nihiku ti nihiku . . . wi ahikhale mwa nyuwo oni akhale ooturuwa moorweela wa owokiwa ni owerya wa yoocheka.” (Ahe. 3:13) Ikwaha ikina, ninnakhala ooceecheya ophiyerya nipacerya opheruwa mu ephiro ya Yehova. Nyenya munna mmoha onanwerya woona yeeyo, nave Yehova onanwerya ompharihela wi anivahe nikhaviheryo nenlo nnachunaahu. (Sal. 73:2, 17, 23) Mweeparipari, nikhaviheryo ni nlipiho nenlo ninnakhala phaama wa hiyaano.

7. Ti mwawiihai osivela onanikhaviheryaaya okhalano wiiwanana? (Akolose 3:13, 14)

⁷ Hiyaano nnapaka makupa a achu yaawo aniilipixerya wi yooniherye osivela wa mukina ni mukhwaawe, nave eyo ennanruuhela mareeliho mancipale. (1 Yoh. 4:11) Ntoko yootakiherya, osivela onnanikhaviherya ‘otitelela ovilelana mukina ni mukhwaawe,’ yeeyo enaruuhela wiiwanana yoowo orivovo. (Mwaalakhanye Akolose 3:13, 14; Aef. 4:2-6) Mukhalelo woosivela ni murecele yoowo nryaahuno mmithukumano sahu eri echu emoharu pahi. Hinaavo nikhuuru nikina na veelaponi nnawerya okhalano yeeyo.

MUCICIMIHANEKE MUKINA NI MUKHWAAWE

8. Ti mwawiihai Yehova onanikhaviheryeiye okhalano wiiwanana?

⁸ Wiiwanana yoowo orivovo variyari va anna mu elapo yoothene, eri echu yootikhiniha ya Yehova. Nthowa nawi na achu oohiphaameya. (1 Ako. 12:25) Piipiliya onaloca wi ‘ninnahusihiwa ni Muluku wi nsivelaneke mukina ni mukhwaawe.’ (1 Ate. 4:9) Naari wi Mmasu awe, Yehova onnanleela xaxaxa yeeyo nnaphwanelaahu weera wi nikhaleno onthamwene woolipaxa wa mukina ni mukhwaawe. Wi ‘nihusihiwe ni Muluku’, nnaphwanela ohuserya moomaaleleya yeeyo owo onaloceiye ni opharihela muteko. (Ahe. 4:12; Tiy. 1:25) Nave ti yeeyo ene Anamoona a Yehova aniilipixeryaaya opaka.

9. Tiheeni enavolowelavo ocicimihana mukina ni mukhwaawe? (Aroma 12:9-13)

⁹ Ti mwawiihai Piipiliya onanihusiheiye okhalano onthamwene woolipaxa wa mukina ni mukhwaawe? Ntoko yootakiherya, moone yeeyo Paulo aalonceiye mu Aroma 12:9-13. (Mwaalakhanye.) Echu yoochuneya wa masu a Paulo tiwi nnaphwanela ‘opaceryihaka ocicimihana mukina ni mukhwaawe.’ Eyo enavolowela opaceryiha wooniherya “niphwanya”, naari wi osivela wa annihu. Nnanwerya weerano yeeyo mmikhalelo soohiyanahiyana, ntoko yootakiherya nikhalaka oolevelela, oowaakhela aleco ni amahala. (Aef. 4:32) Nyuwaano hamunaphwanela oweherya wi munna awaacameleeni toko. Moohiyana, munoona hai ‘opaceryiha’ olipiha onthamwene anyu ni yoowo? Mwawiihiiha, nyuwaano munahaala woona wi Yesu aaloca eparipari vaavaa aalonceiye: “Wookhalavo ohakalala wawaaca mu ovaha, opwaha mu waakhela.”—Saw. 20:35.

10. Nni niwerye hai “ocicimihana mukina ni mukhwaawe” mmukhalelo woowetha? (Moone tho eruku.)

¹⁰ Ti yoohakalaliha wi amanle oloca vooloca sa opaceryiha waacicimiha akina, Paulo aaloca: “Mukhaleke oowetha, ohiya ooporora.” Muchu oowetha ta mvai. Owo onnalapa moowetha wa miteko sawe seiyo onaakheleiye nave onniilipixerya waakhwaniha seiho. Masiposipo 3:27, 28 onnavaha nceenyeryo: “Ohooceele oweerela  yaphaama yaale onaphwanelaawe oweerela, wakhala wi wookhalano owerya wa waakhaviherya.” Mwawiihiiha, vaavaa nnoonaahu wi ookhala onachuna nikhaviheryo, ninnakhala ooreheryeya weeravo echu. Hannahiya weerano yeeyo nuupuwelaka wi nnahaala weerano nihiku nikina naari wuupuwela wi muchu mukina tonahaala ovaha nikhaviheryo nenlo.—1 Yoh. 3:17, 18.

11. Mukhalelo taani mukina wa waacicimiha annihu?

¹¹ Mukhalelo mukina wa waacicimiha annihu ori ohilekela waalevelela vaavaa awo anannyenyeihaaya. Aefesu 4:26 oni: “Muhihiye wi nsuwa nneele nlelo muri oonyeenyeyeene.” Ntakhara heeni eyo ti yoochuneya? Nthowa nawi, ntoko eversikulu ya 27 enatharihaaya, eyo yaanwerya ‘omvaha nipuro Musaserya’. Nave hiyaano noosuwela wi Mpiipiliyani, Yehova onnanceenyerya ikwaha sincipale olevelelanaka mukina ni mukhwaawe. Akolose 3:13 olonce wi nnaphwanela ‘otitelela . . . olevelelana mukina ni mukhwaawe ni murima woothene.’ Ohiya muculi soohesa sa muchu, ori mukhalelo mmoha wa olipiha nimakelo nahu na onthamwene ni yoowo. Vaavaa nneeraahuno yeeyo ‘ninnakhapelela omoha wa munepa mu olucelelana wa murecele.’ (Aef. 4:3) Mwa mukwasu, olevelela onanwerya okhaviherya wiiwanana ni murecele wa achu a Yehova.

12. Ti mwawiihai Yehova onanikhaviheryeiye waalevelela akina?

¹² Eparipari wi onamukhala woovila omulevelela muchu yoowo oninyeenyeihale. Nyenya nnikhaviheryo na munepa waweela wa Muluku, eyo ti yooweryeya. Amanle oloca wi nnaphwanela okhalano “niphwanya mukina ni mukhwaawe” ni ‘okhala oowetha,’ Piipiliya onnanceenyerya: “Mukhaleke oolucuwa mwa munepa.” (Aro. 12:11.) Eyo enataphulela wi munepa wa Muluku onanwerya onikhaviherya wooniherya osivela wa annihu ni waalevelela yaawo ni murima woothene. Mwawiihiiha, nnaphwanela otitelela waavya nikhaviheryo na Yehova wi niwerye weerano yeeyo.—Luka 11:13.

“OHIKHALEVO OKAWANYEYA MWA NYUWO”

13. Tiheeni yaahaala weeriha okawanya muloko?

¹³ Mmarehereryo a Yehova, ninnaaphwanyamo “achu a mukhalelo woothene” orukurerya elapo. (1 Tim. 2:3, 4) Muchu ti muchu ophwiiwale  mmukhalelo woohiyana ni saweereya soohiyana sa mookumini. Eyo ennathariha ntakhara heeni nnaphwanelaahu opaka soolakelela soohiyana mu miyaha sa achu, ntoko mukhalelo wa mawarelo ni wiirehererya wahu naari soothanla sahu ntoko mathatelo ni mukhalelo wa oloola. Naahikhalano ephoole, ohiyana wuuwu onanwerya okawanya muloko. (Aro. 14:4; 1 Ako. 1:10) Nyenya Yehova onnanihusiha wi muchu oosivela hanatitelela wi soothanla sawe iri saphaama opwaha sa akina.—Afi. 2:3.

14. Tiheeni ilukuluku soothene nnaphwanelaahu wiilipixerya wi neere, nave ntakhara heeni?

¹⁴ Hiyaano tho nnanwerya oruuha wiiwanana mmulokoni moorweela wa weerano ichu mmukhalelo yoowo onaahakalaliha ni waalipiha akina. (1 Ate. 5:11) Mwahiihaanoru, achu ancipale yaawo yaaceechen’ye naari yaaviihiwe mmulokoni, aakookela mmulokoni. Nave hiyaano ninnawaakhela ni matata oomeeli! (2 Ako. 2:8) Moone yeeyo murokora mmoha yoowo aaceechen’ye mu iyaakha khumi nave akookela mmulokoni. Owo ooloca: “Achu oothene yaanakixeleliha ni wooniherya ohakalala wa miyaano.” (Saw. 3:19) Ti mwawiihai saweera seiha savakhaani sa oreera murima saamweerinhaaya murokora wiisoona? Owo ooloca: “Waakhala ntoko wi Yehova aakikookiherya mu ephiro yoohakalala.” Vaavaa ilukuluku soothene nniilipixeryaahu wi naalipihe akina, nnanwerya ophariheliwa ni Kristu wi naahakararye yaale ‘ari oovelavela ni oohokoliwa’.—Mat. 11:28, 29.

15. Tiheeni enahaala okhaviheryaxa wi nikhaleno wiiwanana ni annihu? (Moone tho eruku.)

¹⁵ Yeeyo nnalocaahu tho enanwerya okhaviherya  wi nikhaleno wiiwanana ni annihu. Yupu 12:11 oni: “Apwanne maaru hanalawiha masu, hiihaa ntoko nlumi nnalawihaaya yoolya?” Ehaakumve okaiwa yoolya, mulipa awaapeya phaama ilukuluku soothene onnalawiha wi oone waakhanle wi ennasiva. Mmukhalelo mmohamoha tho, nihaakumve oloca echu nnaphwanela wuupuwelela phaama. (Sal. 141:3) Nnaphwanela ororomela wi yeeyo nnayaahu oloca enahaala waahakararya, waalipiha nave wi ti ‘yamphurelo wa yaale anawiriyana.’—Aef. 4:29.

16. Taani xaxaxa onaphwanela okhalano ekaasoope wa yeeyo onaloceiye?

¹⁶ Xaxaxa wa alopwana athenle ni asitiithi enaphwanela okhalano ekaasoope wa yeeyo enalocaaya. Awo enaphwanela olocaka mmukhalelo onahaala olipiha emusi aya. (Ako. 3:19, 21; Titu 2:4) Atokweene tho yaawo erino murici wa orumeela ntoko akukhula, enaphwanela ohakalaliha ni ohakararya ipucepuche sa Yehova. (Yes. 32:1, 2; Aka. 6:1) Ilukuluku soothene nnaphwanela wuupuwelelaka yeeyo Masiposipo 15:23 onaloceiye: “Ti waphaama masu ene elociwe mu elukuluku yoophwanelela!”

OSIVELA “MU SAWEERA NI MWEEPARIPARI”

17. Nni naasivele hai annihu orweela vathi va murima?

¹⁷ Murummwa Yohani onnanceenyerya okhalano “osivela, ohiya ni masu naari ni nlumi, nyenya mu saweera ni mweeparipari.” (1 Yoh. 3:18) Nnachuna waasivelaka anna ni arokora orweela vathi va murima. Nni neereno hai yeeyo? Vaavaa nnavirihaahu elukuluku yincipale ni annihu, nnahaala okhala awaacameleyaxa wa yaawo nave osivela wahu wa mukina ni mukhwaawe onahaala okhala woolipaxa. Mwawiihiiha, mwaavye ekari wi mukhale vamoha ni anna, ntoko yotakiherya mmithukumano ni mmuteko woolaleerya. Nave tho mwaavye elukuluku wi mwaaxekurye. Vaavaa nneeraahuno yeeyo, ennakhala yawooneya wi ‘nnahusihiwa ni Muluku wi nsivelaneke mukina ni mukhwaawe.’ (1 Ate. 4:9) Ohiya yeeyoru, nnahaala otitelela woona wi “ti yaphaama nave ti yoohakalaliha anna okhala vamoha mwawiiwanana!”—Sal. 133:1.