1-2. (1) Ntakhara heeni nnanwerya oloca wi hanri mukhatiihu vaavaa nnahoolelaahu makacamiho? (2) Tiheeni nnahaalaahu woona mmwaha yoola?

 VAAVAA nnahoolelaahu makacamiho oovila, nnanwerya wiisoona moomalela wi nri mukhatiihu ntoko wi nri mmwaaceya mukhaani veeri va ephareya, variyari va echeku etokweene nave nihinawerya ophwanya mukhalelo ori woothene wa okhumamo. Mwawiihiiha, hanri mukhatiihu. Tiithi ahu a wirimu oosivela onnoona makacamiho nnahoolelaahu nave onnaniroromeliha onikhaviherya. Yehova onnavaha yoororomeliha yeela yoosivela wa alapeli awe oororomeleya: ‘Kinamookhaviherya.’—Yes. 41:10, PMM.

² Mmwaha yoola nnahaala woona mukhalelo Yehova onanikhaviheryeiye (1) moorweela wa onihoolela, (2) onivahererya ichu sinanthowa, (3) onikhapelela ni (4) onihakararya. Yehova onnanroromeliha wi moohipwacha makacamiho nnahoolelaahu mookumini, owo harwa anicuwala. Owo harwa aninyanyala. Mwawiihiiha, hiyaano hanri mukhatiihu.

YEHOVA ONNANIHOOLELA

3-4. Yehova onanihoolela hai? (Salmu 48:14)

³ Mwaalakhanye Salmu 48:14. Yehova hanaweherya wi niihooleleke mukhatiihu. Ti mwawiihai owo onaahooleleiye alapeli awe oororomeleya olelo? Mukhalelo mmoha oneereiyeno yeeyo ori moorweela wa Masu awe, Piipiliya. (Sal. 119:105) Orweela Mmasu awe ooveereliwa, Yehova onnanikhaviherya opaka soolakelela ni winnuwiha mikhalelo saphaama seiho inakumiherya ohakalala otokweene hiihaano ni okumi woohimala omwaahiyu. a Ntoko yootakiherya, owo onnanihusiha ohikuha mathowa, okhala oororomeleya mu soothene ni waasivela akina ovinyerya vathi va murima. (Sal. 37:8; Ahe. 13:18; 1 Pet. 1:22 ) Vaavaa nnooniheryaahu mikhalelo seiha saphaama, ninnakhala asitiithi, atheli ni asinthamwene aphaama.

⁴ Ohiya yeeyoru, Yehova oophitaanyerya Mmasu awe saweereya seeparipari sa achu yaawo yaarino makacamiho ni miyoonelo soolikana ni sawihu. (1 Ako. 10:13; Tiy. 5:17) Waalakhanya saweereya sa okumi wa achu yaala ni opharihela muteko yeeyo nnahuseryaahu, ninnaphura mmikhalelo miili. Woopacerya, ninniiwexexa wi hanri mukhatiihu, akina tho yaahikhalano makacamiho oolikana nave yaahiwerya ovilela nnikhaviheryo na Yehova. (1 Pet. 5:9) Nave wanaawiili, ninnahuserya ovootha saweeha sahu.—Aro. 15:4.

5. Taani Yehova onaaphariheleiye wi enihooleleke?

⁵ Yehova onnaapharihela tho anna ni arokora wi enihooleleke. b Ntoko yootakiherya, ooweherya a ekulucu wiiliwiili annaxekurya miloko wi enilipihe. Miyaha saya sinnalipiha nroromelo nahu nave sinnanikhaviherya okhapelela wiiwanana wahu. (Saw. 15:40–16:5) Atokweene tho a mmulokoni annuukhuwa ntakhara okhala phaama wa mulaleeryi ti mulaleeryi. (1 Pet. 5:2, 3) Asitiithi annaahusiha anamwane aya omusivela Yehova, mukhalelo wa opaka soolakelela mwa miruku ni okhalano sookhovelela saphaama. (Mas. 22:6) Nave athiyana Eekristu awiichwelavo annaakhaviherya asimwali moorweela wa waavaha yootakiherya yaphaama, ikano ni nlipiho.—Titu 2:3-5.

6. Tiheeni nnaphwanelaahu weera wi niphure ni ohoolela wa Yehova?

⁶ Yehova oopaka makupa awe moorweela wa ovahererya ohoolela yoowo nnachunaahu. Nni nooniherye hai wi ninnathamalela yeeyo owo opankeiye wa hiyaano? Masiposipo 3:5, 6 oni: “Omuroromeleke Yehova ni murimaa woothene; ohiroromeleke osuwela waa.” Nneeraahuno yeeyo, “owo onarwa ookolola iphiro [sahu],” eyo tiwi, owo onahaala onikhaviherya osepa makacamiho mancipale ni okhalano ekumi yoohakalalihaxa. Ninnamuthamalela vancipale Yehova moorweela wa onisuwela phaama ni onisivela ophiyerya onivaha ikano seiho mmoha ti mmoha a hiyaano onachuneiye!—Sal. 32:8.

YEHOVA ONNANIVAHERERYA ICHU SINANTHOWA

7. Mmikhalelo taani Yehova onanivaheiye ichu sinanthowa? (Afilipi 4:19)

⁷ Mwaalakhanye Afilipi 4:19. Ohiya pahiru onihoolela omunepani, Yehova tho onnareeliha wiilipixerya wahu ya okhalano yoolya, yoowara, ni nipuro na okhalavo nenlo nnachunaahu. (Mat. 6:33; 2 Ate. 3:12) Eparipari wi nnanwerya wuukhuwa ni soothowa sahu soomwiilini, nyenya Yehova onnanceenyerya ohikhala awuukhuwaxa. (Mat. 6:25) Ntakhara heeni? Nthowa nawi Tiithi ahu harwa aanyanyala alapeli awe oororomeleya mu ilukuluku sa othoiwa. (Mat. 6:8; Ahe. 13:5) Nnanwerya ororomela moomalela masu awe vaavaa owo olonceiye wi onahaala onivahererya ichu sinanthowa.

8. Yehova aamukhavihenrye hai Tavite?

⁸ Moone mukhalelo Yehova aamukhavihenryeiye Tavite. Variyari va iyaakha soovila seiho Tavite aahoolenleiye ntoko mulipa oochawa, Yehova aahimvahererya owo vamoha ni alopwana awe ichu seiho yaachunaaya wi ekhale akumi. Uupuwelelaka vooloca sa okhapelela wa Yehova mu iyaakha sincipale, Tavite oorepa: “Kaari mmiravo nave vano kohuuluvala, nyenya nkintonko omoona muchu awookololowa anyanyaliwe, naari mano anaawe evekavekaka yoolya.” (Sal. 37:25) Mwawooneya, variyari va okumi anyu, nyuwaano tho mohoona wi Yehova, moosivela aahaavahererya ichu alapeli awe awiiveleela.

9. Mmahiku ahu, Yehova onaavahererya hai achu awe ichu inaathowa variyari va ipahu? (Moone tho iruku.)

 ⁹ Yehova tho onnavahererya alapeli awe ichu inaathowa mu ilukuluku sa ipahu sa maphacuwelo. Ntoko yootakiherya, vaavaa yaakhumelenlaaya etala mu nsana noopacerya, Akristu a ilapo sincipale yaahirumiha soovaha wa anna ni arokora oothoiwa. (Saw. 11:27-30; Aro. 15:25, 26) Achu a Muluku olelo tho annooniherya murima mmohamoha wa okhala a mahala. Vaavaa eneereyaaya epahu ya maphacuwelo, Yehova moosivela onnaaceenyerya alapeli awe ovahererya soothowa ntoko yoolya, maahi, soowara ni murece wa yaawo anakhala mmukuma yoowo ophacuweliwe. Makhuuru a oteka annarehererya ipa vamoha ni Ipa sa Omwene inananre. Nave alapeli a Yehova tawaakuveya ovahererya nikhaviheryo na mmuupuweloni ni noomunepani wa yaawo eyeleenle ichu saya. c

10-11. Tiheeni muhusenryaanyu ni yaweereya ya Borys?

¹⁰ Yehova tho onnaavahererya ichu inaathowa mwa mahala wa yaawo nlelo ahinamulapela. Mmukhalelo mmohamoha, ninnamutakiherya Yehova moorweela wa waavya mukhalelo wa okhala ooreera murima ni yaawo ahinamurumeela. (Aka. 6:10) Wiiliwiili eyo ennakumiherya onaamoona waphaama. Moone yaweereya ya Borys, tireitore a exikola yoowo onakhala o Ukraniya. Naamwi Borys ahiri Namoona a Yehova, ilukuluku soothene aanaakhaliha mooreera murima anaxikola awe yaawo yaari Anamoona a Yehova nave aanooniherya ncicimiho  wa soororomela saya. Vaavaa Borys aalakelenleiye ochawa mmukuma yoowo aakhaleiyewo nthowa na ekhoco ni oya mmakupa makina ookhapeleleya a elapo yeeyo, annihu yaahimukhaviherya. Voocharela, aahiphwanyeya va Yawuupuxerya ya okhwa wa Kristu. Uupuwelelaka vooloca sa yaweereya awe, Borys oriye: “Anamoona a Yehova yaari ooreera murima nave yaahikikhapelela. Kinnaathamalela vancipale.”

¹¹ Hiyaano tho nnanwerya otakiherya ikharari sa Tiithi ahu a wirimu moorweela wa wooniherya osivela wa oothoiwa, moohipwacha waakhanle wi annamurumeela Muluku naari hooye. (Luka 6:31, 36) Nnaweherya wi wiilipixerya wahu wa waasivela achu onahaala waaceenyerya awo ochuna ohuserya sincipale vooloca sa Yehova. (1 Pet. 2:12) Moohipwacha yookhumelela ene, nnanwerya okhalano ohakalala otokweene mu ovaha.—Saw. 20:35.

YEHOVA ONNANIKHAPELELA

12. Okhapelela taani Yehova onaroromeliheiye wa achu awe ntoko nikhuuru? (Salmu 91:1, 2, 14)

¹² Mwaalakhanye Salmu 91:1, 2, 14. Mmahiku ahu, Yehova onnanroromeliha onivaha okhapelela woomunepani. Owo harwa eemererya wi Satana ananarihe malapelo eeparipari. (Yoh. 17:15) Variyari va “yoohooxa etokotoko” nnanwerya ororomela moomalela wi Yehova onahaala waakhwaniherya soororomeliha sawe sa waakhapelela achu awe ohiya pahiru omunepani, nyenya tho omwiilini.—Wup. 7:9, 14.

13. Mmukhalelo taani Yehova onamukhapeleleiye mmoha ti mmoha a hiyaano?

¹³ Yehova onamukhapelela hai muchu ti muchu vameekheiye? Orweela wa Masu awe, Yehova onnanikhaviherya osuwela yaphaama ni yoonanara. (Ahe. 5:14) Vaavaa nnapharihelaahu yeeyo nihusenryaahu Mpiipiliyani, ninnakhapelela onthamwene ahu ni yoowo nave tho ninnapaka soolakelela saphaama seiyo sinanikhaviherya okhalano ekumi yaphaama ni yoohakalaliha. (Sal. 91:4) Ohiya yeeyoru, Yehova onnavahererya okhapelela moorweela wa muloko. (Yes. 32:1, 2) Moorweela wa orukureryiwa ni yaawo anamusivela Yehova ni anakhala mwawiiwanana ni malakiheryo awe, hiyaano ninnaakhela nlipiho nave ninnakhala oolipiheya wi nsepe ovolowela woopahula.—Mas. 13:20.

14. (1) Ntakhara heeni Muluku hananikhapelela mmakacamiho oothene? (2) Ororomela taani Salmu 9:10 onanivaheiye? (Moone enoota.)

¹⁴ Ikwaha ikina Yehova aanaakhapelela alapeli awe akhalai mmakupa oomwiilini. Nyenya owo heerano ilukuluku soothene. Ikwaha ikina oothene ahu sinnaniphacuwela “ichu soohiwehereryeya.” (Ekl. 9:11) Yehova tho, aaheemererya wi alapeli awe akina ehoolele wiikariwa ophiyerya tho okhwa, wi yooniherye wi Satana nawoothe. (Yupu 2:4-6; Mat. 23:34) Eyo tho enneereya olelo. Naamwi Yehova ahivinhakavo makacamiho ahu, nnanwerya ororomela wi owo harwa aanyanyala yaawo anamusivela. d—Sal. 9:10.

YEHOVA ONNANIHAKARARYA

15. Ti mwawiihai Yehova onanihakararyeiye orweela wa nivekelo, Masu awe ni mithukumano? (2 Akorintu 1:3, 4)

¹⁵ Mwaalakhanye 2 Akorintu 1:3, 4. Ikwaha ikina ninnakhala oothanana, awuukhuwa naari okhala oonyeenyeya. Akhweya nyuwaano munnahoolela mukhalelo woonyeenyeiha hiihaano yoowo onaweerihaani wiisoona omeekha. Apwanne ookhala oniiwexexa mukhalelo muniisoonaanyu? Yehova onniiwexexa. Tahi wi pahiru owo onamoona osooseya ni wiicela wahu, nyenya tho ‘onnanihakararya mu saweeha sahu soothene.’ Mwawiihai? Vaavaa nnavekelaahu wa Yehova orweela  vathi va murima, owo onnanivaha “murecele wa Muluku yoowo opwanhe wiiwexexa woothene.” (Afi. 4:6, 7) Nave tho ninnaphwanya ohakararya vaavaa nnaalakhanyaahu Masu a Yehova Mpiipiliyani. Mmasu yaawo, Yehova onnanleela mukhalelo onansiveleiye, owo onnanihusiha okhala a miruku nave onnanivaha ewehereryo. Ninnaphwanya tho ohakararya mmithukumano, mwemmo nnahuseryaahumo ichu soolipiha sa Mpiipiliyani nave tho weiwo nnakhalaahu vamoha ni anna ni arokora yaawo ananisivela.

16. Tiheeni muhusenryaanyu ni yaweereya ya Nathan ni Priscilla?

¹⁶ Wi nlikanyihe mukhalelo Yehova onavaheiye nihakararyo ni nlipiho moorweela wa Masu awe, moone yaweereya ya Nathan ni Priscilla, yaawo anakhala o Estatu Unitu. Mu iyaakha sincipale muculi, yaahilakelela othaamela weiwo waariwo othowa otokweene wa alaleeryi a Omwene. Nathan ooloca: “Naanaroromela wi Yehova aahaala oreeliha wiilipixerya wahu.” Nto emanle ophiya mu ekulucu aya evyaani, yaahihoolela makacamiho a okumi oohiwehereryeya ni makacamiho a ophwanya ikhorowa. Ohoolo waya mutheli aahikookela owaani, weiwo nlelo aatitelenleiye ohoolela nikacamiho na ophwanya ikhorowa. Nathan ooloca: “Miyaano kaaniikoha ntakhara heeni Muluku haanireelinhe mmukhalelo yoowo nuupuwelaahu wi aahaala weerano. Ophiyerya tho wi kaahipacerya wiikoha waakhanle wi kaahipaka echu yooheseya.” Moovira wa elukuluku, Nathan ni Priscilla yaahisuwela wi Muluku haanyanyanle mu elukuluku ya othoiwa. Nathan ooloca: “Variyari va ilukuluku seihe soovila, Piipiliya aahikhala ntoko nthamwene a miruku yoowo onavaha nlipiho ni ohoolela. Otikitheryeya mmukhalelo Yehova onikhavihenryeiye ovilela makacamiho yaala, ohiya otikitheryeya mu makacamiho yaawo, woonooniherya wi Yehova onahaala otitelela onikhaviherya oomwaahiyu.”

17. Ti mwawiihai murokora Helga aakhenleiye nihakararyo? (Moone tho eruku.)

¹⁷ Anna ni arokora ahu ananwerya onivaha nihakararyo nawaaceererya. Mwawiihai? Moone yootakiherya ya Helga, yoowo onakhala o  Hunkriya. Mu iyaakha sincipale, owo aahikhalano makacamiho oovila yaawo yaamweerinhe wiisoona ohikhala echweenevo. Nyenya vaavaa onuupuweleiye sa muculi, owo onnoona wi Yehova aanamuhakararya moorweela wa anna ni arokora a mmulokoni. Owo ooloca: “Yehova aanakikhaviherya vaavaa ooneiye wi ikuru saka saanamala wa nthowa na olapa muteko woomwiilini, omukhapelela mwana aka awiiceliwa ni makacamiho makina. Hinaavo nihiku nimoharu mano variyari va iyaakha 30 ivinre owo ahaakhwanihenryeiye yoororomeliha awe ya okihakararya. Ikwaha sincipale onnakilipiha orweela wa masu aphaama a achu akina. Ikwaha sincipale kaanaakhela michaka, ekaarata naari masu oothamalela mu elukuluku kaachunaaka.”

18. Nni naahakararye hai akina?

¹⁸ Nookhalano ekari ya omutakiherya Muluku ahu moorweela wa waahakararya akina. Nni neereno hai? Nnanwerya waawiriyana moopixa murima, oloca ni yaawo mmukhalelo woohakararya ni waakhaviherya mmukhalelo wawooneya. (Mas. 3:27) Ninniilipixerya wi naahakararye oothene yaale anahooxeya, ophitaanyerya yaale nlelo ahinamurumeela Muluku. Vaavaa amwaacamani ahu anakhalaaya oothanana, awiiceliwa naari awuukhuwa, ninnaaleela Masu a Mpiipiliyani oolipiha. Vaavaa nnamutakiheryaahu Yehova, “Muluku a ohakararya woothene,” nnanwerya ohiya pahiru waakhaviherya anna ovilela saweeha, nyenya tho akhweya nnahaala waakhaviherya yaale ahinamurumeela Muluku okhalano nchuno na ohuserya sincipale vooloca sa yoowo.—Mat. 5:16.

ILUKULUKU SOOTHENE YEHOVA ORI MMAKUPA AHU

19. Ti mwawiihai Yehova onanikhapeleleiye nave nni nimutakiherye hai?

¹⁹ Yehova onnaakhapelela oothene yaawo anamusivela. Owo hanannyanyala vaavaa nnakhalaahuno makacamiho. Hiiha ntoko tiithi naari mai onamukhapeleleiye mwaana moosivela, Yehova onnaakhapelela alapeli awe oororomeleya. Owo onnanihoolela, onnanivaha ichu sinanthowa, onnanikhapelela nave onnanihakararya. Ninnamutakiherya Tiithi ahu oosivela a wirimu vaavaa nnaakhaviheryaahu ni waalipiha akina variyari va makacamiho aya. Naamwi nihoolelaka makacamiho ni soonyeenyeiha, nnaphwanela ororomela wi Yehova ori ni hiyaano. Chiryene owo oororomeliha: “Ohoove, miyo kiri ni weyo.” (Yes. 41:10, PMM) Yoolaiherya yeela ennaroromeliha wi, ni Yehova hiyaano hanri meekhiihu.