1-2. Ti mwawiihai nneeraahu niwerye ochariha manaani a Yesu? Mphwanaphwanihe.

MWAANYIHERYE wi muri mu nikhuuru na achu nenlo nneeca mutakhwani orimo miina. Nto muchu osuwenle mphiro onnoohoolelaani. Vaavaa oneeceiye, owo onnahiya mphito, naari onnahiya inaani mutakhwani mwemmwe. Vakina vaya hamunawerya omoona yoowo onoohoolelaani! Nyenya hamunakhala awuukhuwa. Ohiya yeeyo, nyuwaano ni achu yaawo muryaanyuno vamoha munnachara inaani sa muchu yoowo onoohoolelaani vakhiviru khiviru!

² Elapo yeela yoonanara nnakhalaahumo eri ntoko ntakhwa nenla nawoopiha. Nave Akristu eeparipari ari ntoko nikhuuru nenlo nneeca vamoha. Moohakalaliha, Yehova oonivahererya muhooleli oophaameya—Mwanawe, Yesu Kristu, yoowo nnaphwanelaahu ochariha manaani awe. (1 Ped. 2:21) Mwawiiwanana ni ereferensiya emoha ya Piipiliya, iva Petru omulikanyinhe Yesu ni muhooleli. Moolikana ni muhooleli yoowo onahiya mphito, Yesu oonihiyerya mphito naari manaani, wi niwerye ochara. Hankooni nthokororye makoho mararu vooloca sa ochara manaani awe: Enataphulela eheeni ochara manaani a Yesu? Ntakhara heeni ninnaphwanela weerano? Ti mwawiihai nneeraahu neereno?

3. Enataphulela eheeni ochara manaani a muchu?

³ Enataphulela eheeni ochara manaani a muchu? Mpiipiliyani masu awi “weeca” naari “manaani” mu ikwaha ikina enaahiwa yeeyo muchu eenreiye mookumini mwawe. (Map. 6:9; Masi. 4:26) Yootakiherya yeeyo muchu otikithenryeiye enanwerya olikanyihiwa ni mphito, naari manaani, yaawo muchu onahiyeiye muculi vaavaa oneeceiye. Mwawiihiiha ochara manaani a muchu  enataphulela ochariha yootakiherya awe, eyo tiwi, omutakiherya yoowo.

4. Enataphulela eheeni ochara manaani a Yesu?

⁴ Enataphulela eheeni ochara manaani a Yesu? Mmasu ookhweya, enataphulela ochariha yootakiherya awe. Mu yoorepa ya mwaha ahu, murummwa Petru onaloca xaxaxa yootakiherya yaphaama Yesu otikithenryeiye vooloca sa ovilela makacamiho; naamwi irivo mikhalelo mincipale mummo nnaphwanelaahu omutakiherya Yesu. (1 Ped. 2:18-25) Chiryene, Yesu mu okumi awe woothene, eyo tiwi, echu eri yoothene owo aalonceiye ni aapankeiye, yootakiherya wa hiyaano wi ncharihe.

5. Apwanne achu oohiphaameya ananwerya ochariha yootakiherya yoophaameya ya Yesu? Mutharihe.

⁵ Ntoko achu oohiphaameya, apwanne nnanwerya ochariha yootakiherya ya Yesu? Chiryene, nnanwerya. Petru halonce wi nnaphwanela ochariha yootakiherya ya Yesu moophaameya. Ohiya yeeyo, owo olonce wi ‘nicharachare manani a Yesu.’ Wakhala wi ninnachariha phaama sene manaani awe nipakaka owetha ophiyerya nnaweryelaahuvo ntoko achu oohiphaameya, nnahaala wiiwelela masu a murummwa Yohani awi: ‘Ninnaphwanela weeca ntoko yoowo [Yesu] eenceiye.’—1 Yoh. 2:6, BNM.

6-7. Ntakhara heeni nnanwerya oloca wi ochariha manaani a Yesu onamunaacameliha wa Yehova?

⁶ Ochara manaani a Yesu onanwerya onaacameliha wa Yehova. Ntakhara heeni nnalocaahu hiihaa? Yoopacerya, Yesu ootikitherya yootakiherya yaphaama vooloca sa mukhalelo nnaphwanelaahu okhala wi nimucicimihe Muluku. (Yoh. 8:29) Mwawiihiiha moorweela wa ochara manaani a Yesu nnahaala omucicimiha Yehova. Nave nnahaala ororomela wi Tiithi ahu awirimu onahaala owaacamela yaale aniilipixerya wi ekhale asinthamwene awe.—Tiy. 4:8.

⁷ Yanaawiili, Yesu aanaatakiherya Atiithi awe moophaameya. Tinthowa nene Yesu aalonceiye: “Yoowo onakoona miyo, onnawoona  Atiithi.” (Yoh. 14:9) Nnanwerya otakiherya mikhalelo sa Yesu ni mukhalelo aakhaliheiye akina. Ntoko yootakiherya, owo aahooniherya ikharari wa mulipa a mareca, aahooniherya oreera murima wa muthiyana iiceliwa ereca etokweene, nave aahooniherya niphwanya wa yaale yaayeleenle oosiveliwa aya mookhwani. Vaavaa nnamutakiheryaahu Yesu, nnamutakiherya Yehova. (Mar. 1:40, 41; 5:25-34; Yoh. 11:33-35) Vaavaa nnatakiheryaahu mikhalelo sa Yehova, ninnalipiha onthamwene ahu ni yoowo.

8. Mutharihe ntakhara heeni ochariha manaani a Yesu enamunikhaviherya “ovootha” elapo?

⁸ Ochariha manaani a Yesu onnanikhaviherya ohikhala awaakanyeryeya ni elapo yeela yoonanara. Mu ohiyu awe wookuchula veelaponi yavathi, Yesu aawerya oloca wi: “Miyo koovootha elapo yavathi.” (Yoh. 16:33) Eyo enataphulela wi owo heemerenrye muupuwelo, soolakelela, ni saweera sa achu a mweelaponi simvolowele. Yesu haacuwanle nthowa naamweerinhe orwa veelaponi yavathi—weeliha nsina na Yehova. Hanka vooloca sa hiyaano? Mu elapo yeela, sookhalamo ichu sincipale seiho inii iwerye onaakanyerya, nyenya wakhala wi noomutakiherya Yesu nnahaala otitelela otikitheryeya mu weera yookhwela ya Yehova nave hiyotho nnahaala “ovootha” elapo.—1 Yoh. 5:5.

9. Tiheeni nnaphwanelaahu weera wi ntitelele weeca mu ephiro ya wookumini woohimala?

⁹ Ochariha manaani a Yesu enamunihoolela wookumini woohimala. Vaavaa mmiravo a muhakhu aakonheiye vooloca sa yeeyo aaphwaneleiye weera wi aakhele ekumi yoohimala, Yesu aamwaakhula: “Orwe, okichareke.” (Mat. 19:16-21) Wa Ayuta akina yaawo yahaamuroromela wi aari Kristu, Yesu aahi: “Ipucepuche saka . . . sinnakichara. Kinnavaha seiyo okumi woohimala.” (Yoh. 10:24-29) Wa Nikotemu, mutokweene o Sineetriyu yoowo aarino nchuno wa mahusiheryo a Yesu, Yesu aaloca wi: “Oothene yaawo anamuroromela,” anahaala ‘okhalano okumi woohimala.’ (Yoh. 3:16) Ninnooniherya nroromelo mwa Yesu moorweela wa opharihela muteko yeeyo aahusinheiye ni otakiherya yeeyo aapankeiye. Wakhala wi noheerano yeeyo, nnahaala otitelela weeca mu ephiro ya ekumi yoohimala.—Mat. 7:14.

10. Tiheeni nnaphwanelaahu weera wi nimusuwele phaama Yesu? (Yoh. 17:3)

¹⁰ Nihaakumve opacerya ochara manaani a Yesu, nnaphwanela omusuwela yoowo. (Mwaalakhanye Yohani 17:3.) ‘Omusuwela’ Yesu eri echu nnaphwanelaahu otitelela weerano. Nnaphwanela otitelela ohuserya sincipale vooloca sa yoowo, eyo tiwi, mikhalelo sawe, muupuwelo awe, ni malakiheryo awe. Moohipwacha elukuluku nimalinhaahu mu eparipari nnaphwanela otitelela wiilipixerya wi nimusuwele Yehova ni Mwanawe.

11. Tiheeni aliivuru axexe a Michaka analocaaya?

 ¹¹ Wi anikhaviherye omusuwela Mwanawe, moosivela Yehova ohaaphitaanyerya aliivuru axexe a Michaka Mmasu awe. Aliivuru a Michaka annathariha miyaha ni saweereya sa okumi wa Yesu ni muteko awe. Saweereya seiha sinnanleela yeeyo Yesu aalonceiye, sinnooniherya yeeyo aapakeiye, nave sinnathariha moonelo awe. Aliivuru yaala axexe annanikhaviherya ‘wuupuwelela’ yootakiherya ya Yesu. (Ahe. 12:3) Mweeparipari, awo annathariha manaani yaawo Yesu ohin’yeiye. Mwawiihiiha, moorweela wa waahuserya aliivuru yaala a Michaka, nnanwerya omusuwela phaameene Yesu. Ntoko yookhumelela, nnahaala ochariha manaani awe vakhivirukhiviru.

12. Nni niwerye hai ophuravo moorweela wa aliivuru yaala a Michaka?

¹² Wi niphurevo vancipale orweela wa aliivuru yaala a Michaka, nnaphwanela opaka sincipale ohiya pahiru owaalakhanya. Nnaphwanela waavya elukuluku wi naahuserye moomaaleleya ni wuupuwelela mwawiiseela yeeyo naalakhannyaahu. (Mulikanyihe ni Yosuwa 1:8.) Hankooni nthokororye mikhalelo miili inahaala onikhaviherya wuupuwelela ni opharihela yeeyo nnaalakhanyaahu mu aliivuru yaala.

13. Muni mweerihe hai saweereya sa mu okumi wa Yesu okhala seeparipari wa nyuwo?

¹³ Mukhalelo woopacerya, mwiihele mu saweereya inalociwa mu aliivuru a Michaka. Mwaanyiherye moonaka, mwiiwaka, ni otannyeya murima ni yeeyo eneereya. Wi nwerye weerano yeela, mpake otholathola mu soolaleeryiwa inavahereryiwa ni marehereryo a Yehova. Muthokororye mwaha ene, eyo tiwi, saweererya seiho seeren’ye woopaceryani naari seeren’ye ohoolo waya wa yaweereya yeeyo munahuseryaanyu. Mutholathole sooleeliherya sincipale vooloca sa achu ni mapuro analociwa mu yaweereya. Mulikanyihe yaweereya munahuseryaanyu ni yaweereya emohamoha mu liivuru mukina a Michaka. Ikwaha ikina liivuru a Michaka onnaphitaanyerya sooleeliherya ikina soochuneya seiho liivuru mukina ohilonceiye.

14-15. Tiheeni nnaphwanelaahu weera wi nipharihele yeeyo nihusenryaahu orweela mu saweererya sa mookumini wa Yesu?

 ¹⁴ Wanaawiili, mpharihele saweereya sa aliivuru a Michaka mu okumi anyu. (Yoh. 13:17) Mmanle ohuserya mwawiiseela saweererya sa mu aliivuru a Michaka mwiikohe: ‘Mu yoohuserya yeela, apwanne nookhalamo nihusiheryo kinaphwanelaaka opharihela mookumini mwaka? Kinii kipharihele hai yaweereya yeela wi kimukhaviherye muchu mukina?’ Mweererye omuupuwela muchu yoowo mmusuwenlaanyu, nave voocharela, moosivela ni mweepewe mmuleele yeeyo muhusenryaanyu.

¹⁵ Hankooni nthokororye yootakiherya vooloca sa mukhalelo nneeraahu nipharihele mikhalelo seiha miili. Nnahaala othokororya yaweereya ya naamukhweli yoowo Yesu aamonneiye mu empa ya Muluku.

16. Mutharihe yaweereya enalociwa mu Marko 12:41.

¹⁶ Mwiihele mu yaweereya yeeyo. (Mwaalakhanye Marko 12:41.) Mwaanyiherye yeeyo yeeren’ye. Naari nihiku na 11 a Nisani, eyaakha ya 33 E.K.—ehalaka mahiku vakhaani wi Yesu akhwe. Yesu aanamaliha elukuluku yincipale nihiku ti nihiku ahusihaka mu empa ya Muluku, nyenya ahooleli a malapelo yaanamwiica. Voopaceryani akina a yaawo yaanaakaaha owerya wawe. Akina yaaneererya ompakela makoho yaawo yuupuwelaaya wi haahaala owerya waakhula. (Mar. 11:27-33; 12:13-34) Voocharela Yesu aaya makupa makina a empa ya Muluku. Owo aawerya woona ikaaxa sa sooveleela, woona wi akhweya owo aari mu nipuro nenlo niichaniwa nipuro na Othoriha na Athiyana. Owo aakiraathi nave aanaavarerya achu yaawo yaahela sooveleela saya mu ikaaxa seihe. Owo aanawoona alipa a muhakhu ancipale evonyeryakamo ikhorowa saya sawaaca. Akhweya owo aaniiwa onyakula wa ikhorowa seiho saamorela mu ikaaxa.

17. Tiheeni naamukhweli oohaawa yoowo onalociwa mu Marko 12:42 enreiye?

¹⁷ Mwaalakhanye Marko 12:42. Voocharela, Yesu aamoona muthiyana mmoha. Owo aari “naamukhwele oohaawa.” (Luka 21:2) Okumi waari woovilaxa wa yoowo; nave akhweya haarino ikhorowa sincipale wi athumeno ichu soochuneya mu okumi awe. Nyenya owo aaya mu ekaaxa emoha nave moovitheya aarihelamo ikhorowa piili sa esisapo yavakhaani, seiho akhweya sahaanyakunle vaavaa aavonyenryeiye mu ekaaxa. Yesu aasuwela yeeyo aavanheiye. Owo aavonyeryamo ikhorowa piili sa lepta, sa esisapo yavakhaani seiho saaphariheliwa mu elukuluku yeele. Iha hisaari ikhorowa saakhwana othumano ephera emoha, palame yoowo aari ookhweya aatumihiwa ntakhara yoolya.

18. Mwawiiwanana ni Marko 12:43, 44, tiheeni Yesu aalonceiye sa yoovaha ya naamukhweli oohaawa?

¹⁸ Mwaalakhanye Marko 12:43, 44. Yesu aahitannyeya murima ni naamukhweli yoola. Mwawiihiiha aawiichana oohuserya awe amuthoonyaka naamukhweli yoole, aahi: “Naamukhwele ola oohaawa, torihenlemo sincipale waapwaha achu akina oothene.” Voocharela owo aathariha: “Yaawo [xaxaxa achu a muhakhu] oothene avanhe ikhorowa saahanle mu waacano waya, nto naamukhwele ola ovanhe soothene aareiyeno mu ohaawa wawe, sawiikhaviheryano.” Vaavaa naamukhweli ola oororomeleya aavanheiye soothene seiho aahanleiyeno mu nihiku nenle, owo aanaroromela wi Yehova aahaala omukhapelela.—Sal. 26:3.

19. Nihusiheryo taani noochuneya nnahuseryaahu orweela wa masu a Yesu vooloca sa naamukhweli oohaawa?

¹⁹ Mpharihele yaweereya mu okumi anyu. Mwiikohe, ‘Nihusiheryo taani kinahuseryaaka moorweela wa masu a Yesu vooloca sa naamukhweli oohaawa?’ Muupuwele vooloca sa  naamukhweli. Hisaavo minikwa wi owo aanachuna omvaha sincipale Yehova. Nyenya owo aapaka yeeyo aaweryeiye; aahimvaha Yehova yeeyo aareiyeno. Nave Yesu aahisuwela wi yoovaha awe yaari yoochuneyaxa vamiithoni va Atiithi awe. Nla nihusiheryo noochuneyaxa wa hiyaano. Yehova onnahakalala vaavaa nnamvahaahu yeeyo nnaweryaahu, eyo ti wi, wiiveleela ni murima ahu woothene mmuteko awe. (Mat. 22:37; Kol. 3:23) Yehova onnahakalala vaavaa onanooneiye nipakaka soothene nnaweryaahu! Nlakiheryo nenla ninnaphariheleya mu waaca wa elukuluku ni ikuru nnapharihelaahu mmalapelo ahu, ophitaanyerya muteko woolaleerya ni mithukumano.

20. Nni nipharihele hai nihusiheryo nnarweela mu yaweereya ya naamukhweli? Mvahe yootakiherya.

²⁰ Nni nipharihele hai nihusiheryo nnarweela mu yaweereya ya naamukhweli? Mweererye owuupuwela yaawo eni elipiheye wakhala wi moowuupuserya wi Yehova onnahakalala ni yeeyo anaweryaaya opaka ntakhara yoowo. Ntoko yootakiherya, apwanne moomusuwela murokora yoowo ori awunnuwelavo ohirino ikuru nave tho akhweya yoowo oniisoona ohikhala echweenevo nthowa nawi hanawerya opaka sincipale mmuteko woolaleerya ntoko eereleiye khalai? Naari munnamuupuwela munna yoowo orino ereca yootitelela ori ooceecheya, nthowa nawi hanawerya ophiya mmithukumano soothene? Mwaakhaviherye achu si yaala moorweela wa oloca masu “aphaama, oolipiha.” (Éfe. 4:29) Muuke ni yaawo mahusiheryo oolipiha muhusenryaanyu orweela mu yaweereya ya naamukhweli oohaawa. Masu anyu oolipiha ananwerya owuupuserya wi Yehova onnahakalala vaavaa nnamvahaahu yeeyo nnaweryaahu. (Masi. 15:23; 1 Tes. 5:11) Wakhala wi munnawerya waathamalela akina ntakhara yeeyo anaweryaaya opaka, moohipwacha waakhanle wi ekhaani munnachariha manaani a Yesu vakhivirukhiviru.

21. Tiheeni mulakelenlaanyu weera?

²¹ Ninnathamalela vancipale woona wi aliivuru a Michaka annavaha sooleeliherya sincipale vooloca sa okumi wa Yesu nave annanikhaviherya omutakiherya ni ochariha manaani awe vakhivirukhiviru! Munoona hai waapharihela aliivuru a Michaka mu yoohuserya ya muchu mukhateiye naari mu Malapelo Eechoko? Muupuwele wi naariki niphurevo vancipale orweela wa yoohuserya ntoko yeela, nnaphwanela weeriha wi saweereya iho ikhale seeparipari mookumini mwahu ni opharihela seiho. Nnaphwanela otakiherya yeeyo Yesu eenreiye, nyenya tho nnaphwanela ochariha yeeyo olonceiye. Mmwaha onacharela, nnahaala othokororya yeeyo nnahuseryaahu orweela wa masu ookuchula a Yesu ahaakumve okhwa.