MWAHA WOOHUSERYA 34
NCIPO 107 Yootakiherya ya Muluku ya Osivela
Atokweene Anooniherya Hai Osivela ni Ikharari wa Alipa Oocheka
“Muluku, mu mahala awe onneererya wookeriha woorukunuxani murima.”—ARO. 2:4.
IPONTU SA VASULU
Mukhalelo atokweene aneereryaaya waakhaviherya achu a mmulokoni yaawo epanke soocheka itokweene.
1. Tiheeni eni yeereye muchu amanle opaka yoocheka?
MMWAHA ovirale, nohoona mukhalelo murummwa Paulo aathokoronryeiye mwaha vooloca sa yoocheka etokweene o Korintu. Mulipa oocheka haacharunwe nave owo aaviihiwamo mmulokoni. Nyenya ntoko enooniheryaaya yoorepa eri mathipelo ya mwaha ahu yoola, Muluku onanwerya waakeriha woorukunuxani murima. (Aro. 2:4) Atokweene eni ewerye hai waakhaviherye yaawo ocharuwa?
2-3. Tiheeni nnaphwanelaahu weera wakhala wi noosuwela wi Mukristu mukhwiihu oopaka yoocheka etokweene, nave ntakhara heeni?
2 Atokweene ehaakumve okhaviherya, awo enaphwanela osuwela mwaha ene toko. Vano, tiheeni nnaphwanelaahu weera wakhala wi noosuwela wi Mukristu mukhwiihu oopaka yoocheka etokweene, echu yeeyo yaahaala omweeriha oviihiwamo mmulokoni? Nnaphwanela omuceenyerya mulipa oocheka owo wi aavye nikhaviheryo wa atokweene.—Yes. 1:18; Saw. 20:28; 1 Pet. 5:2.
3 Vano hanka wakhala wi mulipa oocheka ookhooca oloca ni atokweene? Voocharela nnahaala oloca ni atokweene wi nroromele wi muchu owo ohaakhela nikhaviheryo noophwanelela. Ola mukhalelo wa wooniherya osivela woona wi hinnachuna omuyeleela munna naari murokora ahu. Wakhala wi mulipa oocheka owo hanachuna ocharuwa, onahaala oyeleela onthamwene awe ni Yehova. Owo tho onanwerya onanariha meecelo aphaama a muloko. Mwawiihiiha, nnaphwanela weeravo echu moolipa murima nthowa na omusivela Yehova vamoha ni mulipa oocheka owo.—Sal. 27:14.
MUKHALELO ATOKWEENE ANAAKHAVIHERYAAYA YAALE APANKE SOOCHEKA ITOKWEENE
4. Tiivi eri yoolakelela ya atokweene vaavaa anathukumanaaya ni muchu yoowo opanke yoocheka etokweene?
4 Wakhala wi muchu a mmulokoni oopaka yoocheka etokweene, nikhuuru na atokweene ninnaathanla asitokweene araru oophwanelela yaawo anahaala opaka makupa a ekomisau. a Alopwana yaala anaphwanela okhala oophimelela ni awiiyeviha. Vaavaa aneereryaaya omukhaviherya namacheka wi acharuwe, awo annasuwela wi hanaphwanela omukhinyererya muchu wi acharuwe. (Malam. 30:19) Atokweene annasuwela wi tahi wi alipa oocheka oothene anahaala waakhulela phaama hiiha ntoko Mwene Tavite eenreiye. (2 Sam. 12:13) Alipa oocheka akina enanwerya othanla okhooca olopola wa Yehova. (Map. 4:6-8) Moohipwacha mukhalelo ene, yoolakelela ya atokweene ori omukeriha mulipa oocheka woocharuwani wakhala wooweryeya. Malakiheryo taani anahaala waakhaviherya vaavaa anathukumanaaya ni mulipa oocheka?
5. Ekano taani atokweene anaphwanelaaya okhapelela mmuupuweloni vaavaa anathukumanaaya ni mulipa oocheka? (2 Timotiyu 2:24-26) (Moone tho eruku.)
5 Atokweene anamoona mulipa oocheka ntoko epucepuche yookhweleya yeeyo erimeenle. (Luka 15:4, 6) Mwawiihiiha, vaavaa atokweene anathukumanaaya ni mulipa oocheka, awo henaloca ni masu oonyeenyeiha naari ohimukhaliha mooreera murima. Tahi wi atokweene pahiru anaphwanela ompakela makoho mulipa oocheka wi esuwele soothene inavolowela mwaha. Ohiya yeeyo, awo anahaala wooniherya makhalelo analociwa mu 2 Timotiyu 2:24-26. (Mwaalakhanye.) Atokweene annatitelela okhala awiiyeviha, oosivela ni ooreera murima vaavaa aneereryaaya omukhaviherya owo otoroka muupuwelo awe.
Hiiha ntoko akukhula akhalai, atokweene annapaka soothene anaweryaaya wi ephwanye epucepuche yoorimeela (Moone eparakrafo 5)
6. Atokweene anarehererya hai murima aya ehaakumve othukumana ni mulipa oocheka? (Aroma 2:4)
6 Atokweene annarehererya murima aya. Awo anneererya omutakiherya Yehova mu omukhaliha waya mulipa oocheka, yuupuwelaka masu a Paulo, yaawo ani: “Muluku, mu mahala awe onneererya wookeriha woorukunuxani murima.” (Mwaalakhanye Aroma 2:4.) Atokweene akukhula nave anaphwanela ochariha ohoolela wa Kristu ni omutakiherya yoowo mmukhalelo awo anakhapelelaaya muloko. (Yes. 11:3, 4; Mat. 18:18-20) Ehaakumve othukumana ni mulipa oocheka ekomisau enahaala ovekela ethokororyaka yoolakelela aya: Ya omukeriha mulipa oocheka woocharuwani. Awo anahaala opaka otholathola mu Soorempwa ni mu soolaleeryiwa sahu nave anahaala ovekela evekaka miruku. Echu anachunaaya osuwela ori vooloca sa yeeyo emweerinhe muchu owo wuupuwela ni weerano ichu mmukhalelo yoowo.—Mas. 20:5.
7-8. Atokweene eni etakiherye hai opixa murima wa Yehova vaavaa anathukumanaaya ni mulipa oocheka?
7 Atokweene annatakiherya opisa murima wa Yehova. Awo annuupuwela mukhalelo Yehova aakhalinheiye alipa oocheka khalai. Ntoko yootakiherya, Yehova aari oopisa murima ni Kayini, amulopolaka vooloca sa sookhumelela sa yoocheka, nave aamuroromeliha omureeliha waakhanle wi oomwiiwelela yoowo. (Map. 4:6, 7) Yehova aahimulopola Tavite moorweela wa mulipa a miririmu Natani, yoowo aapharihenle niphwanaphwaniho nenlo naatannyile murima wa mwene. (2 Sam. 12:1-7) Nave Yehova ‘aanaarumihela’ alipa a miririmu awe “mahiku oothene” wi elopole nloko noomwaryeya na Isarayeli. (Yer. 7:24, 25, PMM) Owo haaweherya wi achu awe echaruwe ahipacenrye waakhaviherya. Ohiya yeeyo, owo aapacerya waakhaviherya moorweela wa waalopola yaawo wi echaruwe.
8 Atokweene annachariha yootakiherya ya Yehova vaavaa aneereryaaya waakhaviherya yaale apanke soocheka itokweene. Atokweene anaakhaliha yaawo “ni opixa murima woothene” hiiha ntoko 2 Timotiyu 4:2 onaloceiye. Mwawiihiiha, ilukuluku soothene mutokweene onaphwanela okhala oomaaleleya ni oopixa murima wi amukhaviherye mulipa oocheka ochuna weerano yeeyo eri yaphaama. Wakhala wi mutokweene oonyeenyeya naari ori oohaleeliheya, mulipa oocheka hani awiriyane ekano naari owo onanwerya okhooca ocharuwa.
9-10. Atokweene eni emukhaviherye hai mulipa oocheka wuupuwelela sa meerelo awe?
9 Atokweene anneererya osuwela mathowa emweerinhe muchu opaka yoocheka. Ntoko yootakiherya, tiheeni eceecheihale onthamwene awe ni Yehova? Apwanne aarimuhiya ohuserya moohihiyererya naari oya mmuteko woolaleerya? Apwanne arimmaala ovekela wa Yehova? Apwanne aarimuhiya okhooca nchuno noonanara? Mano, aamaliha elukuluku awe naani? Mathatelo taani owo aathanleiye? Soothanla seiho sivolowenle hai muupuwelo awe ni nchuno nawe? Apwanne ohiiwexexa mukhalelo soolakelela seiho opankeiye simvolowenlaaya Tiithi awe, Yehova?
10 Atokweene ananwerya ompakela makoho wi emukhaviherye owo wuupuwela vooloca sa ichu seiho siceecheihale onthamwene awe ni Yehova nave simweerinhe owo opaka yoocheka. Awo anneerano yeela mooreera murima nave hanamukoha ichu sa muchu mukhateiye seiho asitokweene ehinaphwanelaaya osuwela. (Mas. 20:5) Mwawaaceererya awo ananwerya opharihela maphwanaphwaniho wi emukhaviherye wuupuwelela ni woona onanara wa saweera sawe hiiha ntoko Natani eenreiye ni Tavite. Akhweya mu ekwaha aya yoopacerya othukumanano, mulipa oocheka onanwerya opacerya wiithananela wanthowa na ichu seiho eenreiye. Owo onanwerya ocharuwa.
11. Yesu aakhalinhe hai alipa oocheka?
11 Atokweene anniilipixerya omutakiherya Yesu. Vaavaa aavaaneleiye ni Sawulu o Tarsi, Yesu yoowo aaviihiwe mookhwani, aahimpakela nikoho nla na miruku: “Sawulu, Sawulu, onakiikarelani?” Mmukhalelo yoola, Yesu aamukhaviherya Paulo wuupuwelela sa meerelo awe oonanara. (Saw. 9:3-6) Nave vooloca sa “muthiyana ole Yesapeli,” Yesu aaloca wi: “Koomvaha elukuluku wi acharuwe.”—Wup. 2:20, 21.
12-13. Mmukhalelo taani atokweene anaphwanelaaya omvaha elukuluku mulipa oocheka wi acharuwe? (Moone tho eruku.)
12 Emutakiheryaka Yesu, atokweene henaakuvela ophiyerya makuchuwelo wi mulipa oocheka hani acharuwe. Naamwi akina echaruwaka mu ekwaha aya yoopacerya anathukumanaaya ni anna a ekomisau, akina akhweya anamuchuna elukuluku yincipale. Mwawiihiiha, atokweene anaphwanela opaka marehereryo wi ethukumane ni namacheka opwaha ekwaha emoha. Akhweya emanle othukumanano mu ekwaha yoopacerya, Mukristu yoowo ochenke onampacerya wuupuwelela mwawiiseela vooloca sa yeeyo atokweene amuleenlaaya. Owo onanwerya wooniherya wiiyeviha ni omveka Yehova wi akhurumuwele yoocheka awe. (Sal. 32:5; 38:18) Mwawiihiiha, vaavaa anathukumanaaya wanaawiili, mulipa oocheka onanwerya otoroka muupuwelo yoowo oonihenryeiye mu ekwaha yoopacerya.
13 Wi emukhaviherye mulipa oocheka ocharuwa, atokweene annooniherya niphwanya ni oreera murima. Awo annaweherya nave tho annavekela wi Yehova areelihe wiilipixerya waya nave wi Mukristu yoowo opherunwe onanwerya wiisuupuwelela ni ocharuwa.—2 Tim. 2:25, 26.
Atokweene ananwerya othukumana ni mulipa oocheka opwaha ekwaha emoha ni yoolakelela ya omvaha elukuluku wi acharuwe. (Moone eparakrafo 12)
14. Taani onaphwanela ocicimihiwa vaavaa mulipa oocheka onacharuweiye, nave ntakhara heeni?
14 Wakhala wi mulipa oocheka oocharuwa, eyo ennaruuha ohakalala otokweene! (Luka 15:7, 10) Taani onaphwanela ocicimihiwa? Apwanne atokweene? Muupuwele yeeyo Paulo aarempeiye vooloca sa alipa oocheka ariki: “Akhweya Muluku onamwaavaha murima woocharuwa.” (2 Tim. 2:25) Mwawiihiiha, Yehova, nave ohiya muchu vyakala, ti yoowo onamukhaviherya Mukristu otoroka muupuwelo ni meecelo awe. Paulo oothariha ichu saphaama seiho sineereya muchu acharuwa. Muchu owo onanwerya okhalano masuwelelo awaakhwanela vooloca sa eparipari, onnakookela meecelo awe aphaama, nave onanwerya okophola wa miraakho sa Satana.
15. Ti mwawiihai atokweene anatitelelaaya omukhaviherya mulipa oocheka yoowo ocharunwe?
15 Vaavaa mulipa oocheka onacharuweiye, anna a ekomisau enahaala opaka marehereryo wi emuxekuryeke muchu owo atitelele waakhela nikhaviheryo noophwanelela wi awerye owaniha ni miraakho sa Satana ni wookolola iphiro sa inaani sawe. (Ahe. 12:12, 13) Mweeparipari, atokweene hanamuleela muchu vyakala ichu inavolowela mwaha wa mulipa oocheka. Nyenya tiheeni muloko onaphwanelaaya oleeliwa?
“WAASAMELE VAMIITHONI VA ACHU OOTHENE”
16. Mwawiiwanana ni 1 Timotiyu 5:20, Paulo aawaaha aani vaavaa aalonceiye sa “achu”?
16 Mwaalakhanye 1 Timotiyu 5:20. Paulo aamurepenle masu yaala mutokweene mukhweiye Timotiyu mwawiiwanana ni mukhalelo aaphwaneleiye waakhalihaka yaale “anapaka soocheka.” Apwanne Paulo aachuna oloca wi mulipa oocheka aaphwanela osameliwa vamiithoni va muloko woothene? Tahi yeeyo. Ohiya yeeyo, owo aawaaha achu avakhaani yaawo yaasuwenle soocheka iho. Yaanwerya okhala achu yaawo yeerenle onamoona, naari yaawo mulipa oocheka aawiitihenryeiye mwaha awe. Atokweene yanwerya waaleela moovitheya wi mwaha owo woothokororyiwa nave mulipa oocheka ohookololiwa.
17. Wakhala wi yoocheka etokweene yoosuweliwa mmulokoni naari akhweya enahaala osuweliwa muhoolo, yoolokoha taani enaphwanela opakiwa, nave ntakhara heeni?
17 Mmikhalelo mikina, muloko onanwerya osuwela wi Mukristu oopaka yoocheka naari akhweya muloko onahaala osuwela sa yeeyo muhoolo. Mmikhalelo ntoko seiha, masu awi “vamiithoni va achu oothene” onanwerya ophitaanyeryiwa muloko woothene. Mwawiihiiha, mutokweene mmoha onahaala olokoha wi munna naari murokora oosameliwa. Ntakhara heeni? Paulo onnaakhula: “Wi ekhale yoolopola wa akina” nave ehimorele mu yoocheka.
18. Atokweene eni ethokororye hai miyaha inaavolowela anamwene oopatisiwa? (Moone tho eruku.)
18 Hanka vooloca sa mwaana opatisiwe, ohaakhwaninhe iyaakha 18 yoowo opanke yoocheka etokweene? Nikhuuru na atokweene nnahaala opaka marehereryo wi atokweene eeli ethukumane ni mwaana owo vamoha ni asitiithi awe. b Atokweene anahaala waavya osuwela tiheeni asitiithi apankaaya wi emukhaviherye mwanaya ocharuwa. Wakhala wi mwaana ookhalano mukhalelo waphaama nave onnachariha ekano ya asitiithi awe naari yaale anamphuwa, atokweene eeli akhweya ananwerya olakelela wi tahi woochuneya wi mwaana vamoha ni asitiithi awe ethukumane ni ekomisau ya atokweene. Opwaha soothene, Muluku aavanhe asitiithi murici wa owookolola anaaya moosivela. (Malam. 6:6, 7; Mas. 6:20; 22:6; Aef. 6:2-4) Elukuluku ti elukuluku, atokweene anahaala olocaka ni asitiithi a mwaana wi yaavye osuwela waakhanle wi mwaana owo onnaakhela nikhaviheryo noomunepani nenlo onachuneiye. Vano, hanka wakhala wi mwaana yoowo opatisiwe hanacharuwa nave onnatitelela ni meerelo awe oonanara? Mmukhalelo yoola, ekomisau ya atokweene enahaala othukumana ni mwaana vamoha ni asitiithi awe.
Vaavaa mwaana onapakeiye yoocheka etokweene atokweene eeli anahaala othukumana ni yoowo vamoha ni asitiithi awe (Moone eparakrafo 18)
“YEHOVA OOKHALANO NIPHWANYA NTOKWEENE NAVE TAIKHARARI”
19. Mmukhalelo taani atokweene aniilipixeryaaya omutakiherya Yehova vaavaa anaakhalihaaya alipa oocheka?
19 Atokweene yaawo anapaka makupa a ekomisau aakhalano murici vamiithoni va Yehova wa weeliha muloko. (1 Kor. 5:7) Awo tho anachuna wi alipa oocheka eceenyeryiwe ocharuwa wakhala wooweryeya. Nave vaavaa awo anamukhaviheryaaya muchu, annawehererya wi muchu owo onamutoroka meecelo awe. Ntakhara heeni? Woona wi awo anachuna omutakiherya Yehova yoowo orino ‘niphwanya ntokweene nave aikharari.’ (Tiy. 5:11) Murummwa Yohani aanaakhaliha anna ni arokora awe moosivela. Owo aahirepa wi: “Anaaka oosiveliwa, kinnoorepelaani ichu seiha wi muhipake yoocheka. Nyenya wakhala wi muchu oopaka yoocheka, nookhalano mukhaviheryi ori vamoha ni Atiithi, Yesu Kristu, awookololowa murima.”—1 Yohani 2:1.
20. Tiheeni nnahaalaahu othokororya mu nikupa nookuchula na miyaha seiha?
20 Moothananiha, ikwaha ikina Mukristu onnakhooca ocharuwa. Wakhala wi ti hiiha, owo onaphwanela oviihiwamo mmulokoni. Atokweene anathokororya hai miyaha mitokweene ntoko seiho? Nnahaala othokororya yeeyo mu nikupa nookuchula na miyaha seiha.
NCIPO 103 Asitokweene a Muloko—Yoovaha ya Yehova
a Khalai, ikomisau seiha siichaniwa makhuuru a othoriha. Nyenya woona wi othoriha ori pahiru mukhalelo wa muteko aya, hinnahaala tho opharihelaka masu yaala. Ohiya yeeyo, nnahaala wiichanaka nikhuuru nenla pahiru ntoko ekomisau ya atokweene.
b Yeeyo enalociwa wa asitiithi ennaphariheleya tho wa achu aweemereryiwa naari wa amusi akina yaawo arino murici wa omukhapelela mwaana owo.
