ELA YOOWEHERERYA YOOTIKHINIHA! Mpatuxa ahu oororomeliha onivaha ekumi yoohimala, veelaponi vaava. Achu ancipale hanaroromela. Awo analoca wi: ‘Muchu ti muchu onahaala okhwa.’ ‘Owo mukhalelo ahu wi nikhalekeno okumi ni okhwa.’ Akina anuupuwela wi okhalano ekumi yoohimala ti wooweryeya, nyenya ohiya veelaponi yeela yavathi. Awo analoca wi muchu onaphwanya ekumi yoohimala pahiru amanle okhwa ni oya wirimu. Nyuwaano munoona hai?

Muhaakumve waakhula nikoho nenla, muthokororye maakhulo a Piipiliya a makoho ala mararu: Mukhalelo muchu opakiweiye enooniherya wi owo aaphwanela okhala ilukuluku hai? Tiivi yaari yookhwela yoopacerya ya Muluku ntakhara elapo ni achu? Okhwa waaphiyenrye hai achu?

Ichu soothene irino ekumi Muluku aapatunxeiye veelaponi, achu tari avameekhaaya. Mwawihai? Piipiliya onnaloca wi pahiru achu yaapakiwe “òphwana” ni ‘òlikana’ ni Muluku. (Maphatxuwelo 1:26, 27) Eyo enataphulela eheeni? Eyo enataphulela wi achu yaavahiwe mikhalelo seiho Muluku oreiyeno, ntoko osivela ni ekhaikhai.

Opwaha yeeyo, achu apakiwe ni muupuwelo wa waalikhela, ni mavyakelo a osuwela yaphaama ni yoonanara ni ochuna okhalano onthamwene ni Muluku. Ti nthowa nene nnaphwanelaahu osiveliwakano wunnuwa wa elapo ni soopatuxiwa sootikhiniha, ntoko opaka ichu, macipo, ni ochekula. Opwaha soothene, achu pahiru tanawerya opaka onthamwene ni Muluku. Mikhalelo soothene iha sinnawerya ohiyaniha variyari va achu ni soopatuxiwa soothene sa veelaponi yavathi.

Vano muthokororye ela: Apwanne Muluku aahaala waavaha achu mikhalelo sootikhiniha ntoko seiya, owerya wa opaka ichu, wunnuwiha mavyakelo ni okhovelela, waakhanle wi owo aachuna wi hiyo nikhaleke mu iyaakha sa vakhaani? Eparipari ti yawi Muluku ohaavaha achu mikhalelo savameekhaaya ni mavyakelo wi niwerye opuha okumi veelaponi yeela okhala wookhala.

Akina analoca wi Muluku haachunne wi achu ekhaleke veelaponi yavathi okhala wookhala. Awo annaloca wi elapo epakiwe wi nikhale nipuro na ohaya, mpuro wa owoona achu taani anaphwanela oya wirimu wi yakhaleke ni Muluku. Nto yaakhanle  eparipari, apwanne hiyaahaala weeriha wi Muluku akhale mwaneene a makacamiho ni onanara osaren’ye veelaponi? Eyo yaahaala ovuhana ni omuchu wa Muluku. Vooloca sa yoowo, Piipiliya oni: “Miteko saya ti sawokololowa. Ti Muluku òroromeleya ni ohiwoka, elukuluku yothene awokololowa ni èparipar.”—Malamulo 32:4.

Mweeparipari, Piipiliya onnaloca yookhwela ya Muluku ntakhara elapo yavathi mmasu ala: “Erimu ti y’Apwiya, nto elapo yavathi, ahàvaha ana a atxhu.” (Salumu 115:16) Chiryene, Muluku aapanke elapo yavathi wi ekhale yooreera, nipuro na achu nawiikhalelaru, nave asareiha ni ichu soothene nnachunaahu wi nihakalalekeno, okumi ohinakota.—Maphatxuwelo 2:8, 9.

“Erimu ti y’Apwiya, nto elapo yavathi, ahàvaha ana a atxhu.”—Salumu 115:16

Piipiliya tho onnuupulula yookhwela ya Muluku ntakhara achu. Owo aahimulamulela mutheli opacerya ‘osareiha elapo ya vathi. Elamuleke elapo eyo, nave ekhale asinène . . . a sothene inetxa v’elaponi ya vathi.’ (Maphatxuwelo 1:28) Chiryene yaari ekari etokweene wa yaawo okhapelela ni waacererya elapo aya okhala Parataiso! Mweeparipari, yoowehererya aareiyeno Atamu ni Eva waari okhalano ekumi yoohimala veelaponi yeela yavathi ohiya wirimu.

Vano ntakhara heeni ninnakhwa? Piipiliya onnooniherya wi emoha ya soopatuxiwa soomunepani, ohoolo waya yaasuweliwe ntoko Satana Musaserya, yaaheererya waakanyerya marehereryo a Muluku mu Eteni. Mwawiihai?

Satana aahaawoka makholo ahu oopacerya, Atamu ni Eva, wi ekhale vamoha mu ommwareela Muluku. Vaavaa Satana aalonceiye wi Muluku aakhwatiiherya echu yaphaama—ophwanelela wa othanla mukhataaya yaphaama ni yoonanara—awo yaahithanla okhala makupa a Satana ni ommwareela Muluku. Tiivi yaari yookhumelela? Mweelukuluku aya, awo yaakhwa, hiiha ntoko Muluku aaloponleiye. Awo aayeleela ewehereryo ya okhala wookhala mu Parataiso veelaponi ya vathi.—Maphatxuwelo 2:17; 3:1-6; 5:5.

Omwareya wa Atamu ni Eva wohaavolowela achu oothene ophiyerya mmahiku yaala. Masu a Muluku ani: “Wa nthowa na mutxhu mmoha pahi [Atamu] yòvolowa mwelaponi yotxheka, navetho ni yotxheka wòvolowa mwelaponi okhwa, hihatho okhwa wòhaphwanya atxhu othene.” (Aroma 5:12) Ninnakhwa nthowa nawi noorava yoocheka ni okhwa woorweela wa makholo ahu oopacerya, ohiya nthowa na mikhalelo mikina sa othuperyiwa.

Omwareya weeren’ye mu Eteni hiwaakanyenrye yookhwela ya Muluku ntakhara achu ni elapo. Osivela woophaameya wa Muluku ni ekhaikhai yoomweeriha waavya mukhalelo wa onoopola mookapuroni wa yoocheka ni okhwa nramvaahu. Murummwa Paulo oothariha: “Nlivelo na yotxheka ti okhwa, nto mahala Muluku onanivaheiye, ti ekumi yohimala mwa Yesu Kristu Pwiya ahu.” (Aroma 6:23) Moosivela, Muluku “onvaha Mwana awe mmoharu [Yesu Kristu], wi mutxhu onamwemererya yowo, ahirimele, nto akhaleno ekumi yohimala.” (Yohani 3:16) Moorweela wa wiiveleela ntoko mukucho wa ephepa, Yesu ohoopola ichu soothene saayeleeliwe ni Atamu. *

Moohilekela, yoororomeliha ya Muluku ya parataiso veelaponi yavathi enahaala waakhwanela. Omwaahiyu yoola wootikhiniha oni okhale wawinyu wakhala wi moochariha ekano ya Yesu: “Nvoloweke mulako mukhani, wona wi mulako ni mphiro sawunnuwa sinnamukeriha mutxhu worimelani. Nave awatxa yale anakusa etila yeyo. Nto mulako ni mphiro inamukeriha mutxhu w’ekumi, oyeva. Nave ari vakhani yale anakusa mphiro yowo.” (Mateu 7:13, 14) Chiryene, omwaahiyu anyu ori mmatani mwanyu. Tiheeni munahaalaanyu opaka?