Muupuwele vooloca sa wiiwanana wa waacameleyasa orivovo: wiiwanana wa maphapo oophwana. Anna ari maphapo aakhalano nimakelo navameekhaaya. Moone yeeyo Nancy Segal, yoowo ori mutokweene a nipuro nnahuserya mukhalelo wa maphapo, o Kaliforniya, navetho yoowo ori niphapo olonceiye sa yeeyo. Owo olonce wi wa akina, okhalano munnaa oyariwaaweno maphapo, ori ntoko okhalano muchu yoowo “onawiiwexexa mookwakwaleya ohichuneyakavo othariha.” Muthiyana mukina ooloca sa wiiwanana orivovo ni murokorawe yoowo oyariweiyeno maphapo mmukhalelo ola: “Hiyo ninnasuwela soothene sa mukina ni mukhwaawe.”

Ntakhara heeni anamwane amaphapo annasuwelana phaama? Mwawiiwanana ni otholathola okina, elapo anakhalaayawo ni mukhalelo anaphwiiwaaya sinnakhaviherya wiiwanana wavameekhaaya onakhalavo variyari va yaawo. Nyenya enakhala ntoko wi maphapo oophwana aakhalano wiiwanana wawaacameleya xaxaxa nthowa nawi aakhalano ixeene soolikana.

NKUUPUWELANI: Mpatuxa a ixeene chiryene oonisuwela phaama opwaha muchu mukina. Mulipa a masalumu Tavite oriye: “ti nyuwo mumpe mwili aka mmirimani mwa amani. Hiyipinthe wa nyuwano makhuva aka elukuluku kàpakiwaka wiphini, . . . Mitho anyu àkiweha kihakunve oyariwa, mahiku othene yanarepiwa mulivuruni mwanyu.” (Salumu 139:13, 15, 16) Pahiru Muluku tonasuwela ixeene sahu. Owo onnasuwela ichu nnahoolelaahu seiho inuupulula omuchu ahu. Eyo ennaneeriha ororomela wi onnaniiwexexa moomalela.

Tavite aahivekela: “Pwiya, munnatokosa ni mòsuwela murima aka. Mòkisuwela kàkirathiki ni kàvinyaka. Muri otxiwene, munnavolowa mmupuweloni mwaka. Nivano nsu nihiphiyale vanlumini vaka, nyuwo, Pwiya, mòsuwela phama.” (Salumu 139:1, 2, 4) Yehova onnasuwelatho miyoonelo sahu sawiiseela ophiyerya wi ‘onnatokosa murima ni annasuwela mupuwelo othene.’ (1 Matharihelo 28:9; 1 Samuwele 16:6, 7) Tiheeni iciciri iha inanihusihaaya vooloca sa Muluku?

Ikwaha ikina hiyaano hinnamuleela Muluku yeeyo nnuupuwelaahu naari mukhalelo nnoonaahu. Nyenya naamwi hiiha, mpatusa ahu onnasuwela yeeyo nipankaahu nave ntakhara heeni nipankaahu echu yammoori. Opwaha yeeyo, Muluku onnasuwela wi ilukuluku ikina ninnachuna opaka echu yaphaama, nave hannaakhwaniha wa nthowa na okotakota wahu. Ti Muluku yoowo onivanhe mukhalelo wa osivela. Wa nthowa na yeeyo, owo onachuna wi anoone nuupuwelaka mmukhalelo woosivela—mweeparipari onnachuna chiryene woona yeeyo mwa hiyo.—1 Yohani 4:7-10.

 Piipiliya onnanroromeliha

• “Maitho a Apwiya annawona alipa awokolola ni maru aya anniwa mavekelo aya”—1 PEDRO 3:12.

• Muluku onnaroromeliiha: “Kinamohusiha ni kinan’woniha ephiro yotxhara; kinnatxhuna wovaha miruku; mitho aka ari wa weyano.”—SALUMU 32:8.

Ntoko noonnaahu, Muluku onniiwexexa phaama mukhalelo ahu ni miyoonelo sahu. Apwanne osuwela wi Muluku onniiwexexa mukhalelo ahu ni miyoonelo sahu ennanikhaviherya ovilela ni makacamiho? Muthokororye echu yeeren’ye ni Ana o Nixeriya. Owo oothariha ariki: “Miyaano kaanahoolela mikhalelo soohiiweherereya. Nave kaaniikoha waakhanle wi kaanaphwanelela okhala. Kaari naamukhweli nave kaanamukhapelela mwanaka aarino ereca ya hidrocefalia (okhalano maahi awaacaxa moocopareni). Mweelukuluku yeeyo kaahisuwela wi kaahikhalano ereca ya kanser vanipeleni nave waanachuneya wi kooperaariwe. Miyaano ni mwanaka amwaamuthiyana naahikhala osipitaale mu elukuluku emohamoha. Yaari yoovila wa miyaano ovilela nikacamiho nenla!”

Tiheeni yaamukhavihenrye Ana ovilela ni makacamiho yaala? Owo onnathariha: “Miyo kaanuupuwela soorepa ntoko Filipi 4:6, 7 yoowo oni: ‘muretxele wa Muluku, onapwaha miruku sothene, onamukhapelela mirima sanyu ni mupuwelo anyu.’ Elukuluku eri yoothene vaavaa kuupuwelaaka yoorepa yeela, kaaniisoona okhala vakhiviru va Yehova, kisuwelaka wi owo onnakiiwexexa phaameene opwaha miyo mukhataaka. Navetho kaahaakhela nceenyeryo nawaaca orweela wa anna ni arokora oosiveliwa a muloko aka Weekristu.

“Naamwi nlelo kihoolelaka makacamiho a okumi aka, mukhalelo aka navetho wa mwanaka wootorokeya. Woona wi Yehova ori mmakupa ahu, hiyaano noohuserya ohithitimanela mmuupuwelo wooheseya elukuluku nnahoolelaahu makacamiho. Yoorepa ya Tiyako 5:11 ennanilipiha: ‘Hiyo nnawera òrèriwa [naari oohakalala] yawo yari anthìti. Nyuwo mòhiwa olotxiwaka ovilela wa Job, navetho mòsuwela makutxhuwelo Apwiya yavan’haya. Eparipari Apwiya t’a niphwanya ni a ikharari.’” Yehova aanasuwela phaama makacamiho yaawo Yupu aahooleleiye. Vaavaa nnahoolelaahu nikacamiho vyakala, hiyotho nnaphwanela ororomela wi Yehova onnaniiwexexa nave wi onnasuwela makacamiho nnahoolela ahu.