1. Nchuno taani nooyariwano achu oothene nryaahuno?

MUNOONA hai wakhala wi muchu mmusuwenlaanyu nave munamucicimihaanyu oocuwala nsina nanyu, naari hanawuupuwelaani? Ela enamukhala yooceecheiha vancipale. Ntakhara heeni? Woona wi muchu ti muchu a hiyo ookhalano nchuno nooyariwano na wooneliwamo naari weemereryiwa ni akina. Nto ninnachuna wi akina epake sincipale opwaha onisuwela. Nnachuna wi esuwele mukhalelo wa omuchu ahu ni yeeyo niwenryaahu okhwaaniherya.—Namarepela 11:16; Yobi 31:6.

2, 3. Tiheeni eni yeereye vooloca sa nchuno nahu na wooneliwamo ni akina? (Moone eruku yoopacerya.)

² Nto wakhala wi hinaanono ephoole, nchuno nenla nooyariwano na ochuna wooneliwamo nnamukhala noonanara. Elapo ya Satana enamuneeriha ochuna okhala oovuwa ni ookhweleya. Vaavaa ela eneereyaaya, hinni niwerye omvaha Tiithi ahu a wirimu, Yehova Muluku ncicimiho ni malapelo yaawo onaphwaneleiye.—Wupulula 4:11.

³ Mmahiku a Yesu, ahooleli akina a malapelo yaahikhalano moonelo woonanara vooloca sa wooneliwamo. Yesu  aahaalopola amuhuserya awe: “Mwikosopeke ni alipa òrepa, onàsivela wetxa ewanre ikuwo sorakama, onàsiveIa omwenyeriwa mmapuwani, mapuro òpatxerya musinagoga ni mapuro òtxitximiheya onalyiwamo efesta. Yawo anàlyela anamukhweli, nave, wi yisonihe, analekeliha mavekelo. Yawo anamwakhela nthorihelo ni ekoi etokwene.” (Luka 20:46, 47) Moohiyana, Yesu aahimuthamalela naamukhwele oohaawa yoowo aavelenle ikhorowa piili, akhweya elukuluku yeeyo haavo aavanhe esisapo yeeyo aavelenleiye. (Luka 21:1-4) Mwawooneya, moonelo wa Yesu vooloca sa wooneliwamo waari woohiyana ni wa akina. Mwaha ola onahaala onikhaviherya okhapelela moonelo woophwanelela wa wooneliwamo, moonelo yoowo Yehova Muluku onachuneiye wi nikhaleno.

4. Tuuvi ori mukhalelo waphaama wa wooneliwamo, nave ntakhara heeni?

⁴ Tuuvi ori mukhalelo waphaama wa wooneliwamo? Tahi nchuno nenlo achu ancipale aneereryaaya moorweela wa ohuserya wavasulu, okhumelela phaama mu ompaka nakoso, naari ovuwa mu mathatelo a elapo. Paulo aahithariha eyo vaavaa aalonceiye: “Vano nyuwo mmusuwenle Muluku, nari mano Muluku osuwenleni, munawerya hai okhala wiliwili akapuro a itxhu ihe sohirèra ni ihirino muteko, wa seiyo munakhwelanyu okòkela okhala akapuro?” (Galasya 4:9) Ela ekari etokweene ‘Muluku onsuwela,’ Mulamuleli Mutokweene a sopatusiwa! Yehova oonisuwela phaama, onnanisivela, nave onachuna wi nikhale vakhiviru vawe. Yehova onipatunse wi nikhale asinthamwene awe.—Eklesiyaste 12:13, 14.

5. Tiheeni nnaphwanelaahu opaka wi nsuweliwe ti Muluku?

⁵ Noosuwela wi Mose aari nthamwene a Yehova. Vaavaa aamvenkeiye Yehova: “Mukisuwelihe itxhu munupuwelanyu” Yehova aahimwaakhula: “Kinamwèra yeyo olontxawe: weyano ori òroromeleya vamithoni vaka, ntakhara kotepa wòsuwela phàma!” (Mukwaha 33:12-17) Yehova onanweryatho omusuwela muchu ti muchu a hiyo. Nto tiheeni nnaphwanelaahu opaka wi nikhale asinthamwene a Yehova? Nnaphwanela omusivela ni oveleela okumi ahu wa yoowo.—Mwaalakhanye 1 Korinto 8:3.

6, 7. Tiheeni yaahaala oneeriha oyeleela onthamwene ahu ni Yehova?

⁶ Mwawiihiiha, nnaphwanela okhapelela onthamwene ahu wasisapo ni Tiithi ahu awirimu. Hiiha ntoko Akristu oopacerya o Kalasya, nnaphwanela ohiya “itxhu ihe sohirèra ni ihirino muteko” sa elapo yeela, ophitaanyerya okhumelela phaama ni ovuwa elapo enavahaaya. (Galasya 4:9) Akristu yaawo o Kalasya yaahimusuwela Muluku, nave Muluku aahaasuwela. Nto Paulo aalonce wi anna amohamoha yaawo ‘yahikhala wiliwili akapuro’ a ichu ihirino muteko. Mmasu makina, owo aahaakoha ariki: ‘Ntakhara heeni munakookelaanyu muculi nave munapacerya okhala akapuro ntakhara ichu imohamoha soohiphwanelela ni ihinaphara muteko?’

⁷ Apwanne echu emohamoha enamweereya ni hiyo? Chiryene. Ntoko Paulo, vaavaa nihusenryaahu eparipari, nooyeeha ovuwa ni okhumelela phaama mu elapo yeela ya Satana. (Mwaalakhanye Filipi 3:7, 8.) Akhweya noohiya ohuserya wa vasulu, muteko waphaama, naari ikari sa okhalano ikhorowa sincipale. Naari akhweya naatepa ovuwa naari okanyaari nthowa na okhalano mavyakelo  a wiipa macipo naari ovonya mapokha. Nto nookhooca ikari soothene seiya. (Ahebri 11:24-27) Enahaala okhala yoohiphwanelela okhalano ekeerelani vooloca sa yoolakelela yaphaama nipankaahu ni wuupuwela wi ikumi sahu saahaala okhala phaama waakhanle wi hinihin’ye ichu seiye! Moonelo yoowo waahaala oneeriha okookela ichu sa elapo, noonaahu okhala “sohirèra ni ihirino muteko.” *—Moone masu avathi.

8. Tiheeni eni elipihe nchuno nahu na okhalano weemereryiwa wa Yehova?

⁸ Nchuno nahu na okhalano weemereryiwa wa Yehova nni nunnuwe hai ophiyerya wi nihichune wooneliwamo wa elapo? Nnaphwanela othokororya ichu piili sookhweleya. Yoopacerya, Yehova wiiliwiili onaweemererya yaale anamurumeela yoowo moororomeleya. (Mwaalakhanye Ahebri 6:10; 11:6) Yehova onawoona akapuro awe oororomeleya ntoko tasisapo, mwawiihiiha owo onoona wi yaahaala okhala “yohikhala ekhaikhai” ohimpwacha mmoha a yaawo. Wiiliwiili Yehova ohaasuwela, ‘yale ari awawe.’ (2 Timóteo 2:19) Owo ‘onnalipelela ephiro ya awokololowa’ nave oosuwela mukhalelo wa owoopola.—Salumu 1:6; 2 Pedro 2:9.

9. Mvahe sootakiherya mukhalelo Yehova aaweemerenryeiye achu awe.

⁹ Ikwaha ikina, Yehova onnooniherya oweemererya wawe achu awe mmukhalelo wavameekhaaya. (2 Matharihelo 20:20, 29) Ntoko yootakiherya, muupuwele vooloca sa mukhalelo Yehova aavulunseiye achu mu Eniya Yoophilivila vaavaa akhoco oowerya a Farawo yaawiikaraaya. (Mukwaha 14:21-30; Salumu 106:9-11) Yaweereya ela yaari yootikhiniha ophiyerya wi achu a mukuma yoole wa elapo yaanaloca sa yeeyo ivinrevo iyaakha 40 ohoolo waya. (Yosuwa 2:9-11) Ti yoolipisa wa hiyo wuupuwelela mukhalelo Yehova aasivenleiye ni opharihela ikuru sawe wi aavuluse achu awe khalai, woona wi moohilekela Koki a Makoki onahaala onihiphela. (Ezekiyeli 38:8-12) Ophiyerya elukuluku yeeyo, nnahaala okhala oohakalala osuwela wi naamvye weemereryiwa wa Muluku ohiya wa elapo.

10. Eparipari taani ekina nnaphwanelaahu othokororya?

¹⁰ Eparipari yanawiili enaphwanela oneeriha waavya weemererya wawe ti yawi Yehova onamunivaha weemereryiwa mmikhalelo naahaanyiheryaahu. Wakhala wi achu annapaka ichu saphaama wi ethamaleliwe ni akina, Yehova harwa aavaha nchuwelo. Ntakhara heeni? Nthowa nawi, hiiha ntoko Yesu aalonceiye, vaavaa akina anathamaleliwaaya, nchuwelo naya ti nenlo. (Mwaalakhanye Mateu 6:1-5) Mmukhalelo mukina, Yehova ‘onnona sawitiha’ wa yaale ahinathamaleliwa wa ichu saphaama apankaaya wa akina. Owo onnoona yeeyo apankaaya, nave onnaavaha nchuwelo, naari waareeliha. Khalai Yehova aahaavaha nchuwelo akapuro  awe mmikhalelo soohaanyiheryeya. Hankooni nthokororye sootakiherya ikina.

11. Yehova aamweemerenrye hai Mariya?

¹¹ Yehova aahimuthanla mwali iichaniwa Mariya wi akhale mai a Mwanawe, Yesu. Mariya aakhala o epooma ekhaani yiichaniwa Nasareti, ocai wo Yerusalemu ni empa aya yooreera. (Mwaalakhanye Luka 1:26-33.) Ntakhara heeni Yehova aahimuthanla Mariya? Munkeelo Kapriyele aahimuleela wi owo aahiphwanya “mahala vamithoni va Muluku.” Ninnawerya osuwela wi aahikhalano onthamwene wawaacameleya ni Yehova orweela wa yeeyo ohoolo waya aamulenleiye mmusi awe Elisapeti. (Luka 1:46-55) Yehova aahimvarerya Mariya, nave aahimvaha mareeliho yaala ahaanyiheryeiye nthowa nawi aari oororomeleya wa yoowo.

12, 13. Yesu aacicimihiwe hai vaavaa aayariweiye ni elukuluku Mariya aamukerinheiye o empa ya Muluku evinre mahiku makhumi masese?

¹² Elukuluku Yesu aayariweiye, taani Yehova aamulenleiye vooloca sa oyariwa wawe? Hiyaari ahooleli ookhweleya naari alamuleli o Yerusalemu ni o Petelehemu. Opwaha yeeyo, owo aaruminhe ankeelo wa akukhuli awiiyeviha yaawo yaakhapelela ipucepuche mu ntakhwa no Petelehemu. (Luka 2:8-14) Voocharela akukhula yaawo yaahimusekurya mwaana yoowo aayariwe. (Luka 2:15-17) Mariya ni Yosefe yaatepa otikhiniheya woona mukhalelo Yesu aacicimihiweiye. Mukhalelo wa Yehova opaka ichu ti woohiyana ni mukhalelo wa Musaserya opaka wawe ichu. Elukuluku Satana aaruminheiye anamiruku wi yamusekurye Yesu ni asitiithi awe, achu oothene o Yerusalemu yaahisuwela vooloca sa oyariwa wa Yesu, nave eyo yaahikumiherya makacamiho mancipale. (Mateu 2:3) Ntoko yookhumelela, anamwane yahaarino nthowa yaahiiphiwa.—Mateu 2:16.

¹³ Mu Nlamulo Yehova aavanheiye Aisarayeli aahiloca wi mahiku makhumi masese amanle oyariwa mwaana, amamaawe yaaphwanela omvaha Yehova mukucho. Mwawiihiiha Mariya ni Yosefe vamoha ni Yesu yaahipaka mukwaha wa mastatiya mathanu nasese ovinya o Petelehemu oya o empa ya Muluku o Yerusalemu. (Luka 2:22-24) Epakaka mukwaha, akhweya Mariya aaniikoha  waakhanle wi alipa amukucho yaahaala opaka echu yavameekhaaya wi emucicimihe Yesu. Yesu aahicicimihiwa, nto mmukhalelo Mariya akhweya aahintonkweiye waanyiherya. Yehova aahimuthanla Simone, “mutxhu aphama ni òmutxitximiha Muluku” ni mulipa a miririmu amwaamuthiyana Ana, naamukhwele a iyaakha 84, wi alokohe wi Yesu aahaala okhala Mesiya naari Kristu yoowo aalaiheryiwe.—Luka 2:25-38.

14. Nchuwelo taani Yehova omvanheiye Mariya?

¹⁴ Apwanne Yehova aahititelela omvaha weemereryiwa Mariya nthowa na ororomeleya wawe omphuwa ni omukhapelela Yesu? Aai, chiryene. Muluku aaheeriha wi ichu ikina Mariya aalonceiye ni aapankeiye irempwe Mpiipiliyani. Enakhala wi Mariya haawenrye weeca ni Yesu variyari va iyaakha chaaru ni emeya elukuluku aalaleeryeiye. Akhweya nthowa na okhala naamukhwele, owo aakhala o Nasareti. Mwawiihiiha owo aahiyeleela ichu sincipale saphaama seiye akina yonnaaya. Nto owo aari vaava elukuluku Yesu aakhwileiye. (Yohani 19:26) Ohoolo waya, Mariya aari o Yerusalemu ni amuhuserya a Yesu ehaakumve waakhela munepa waweela mu Pentekoste. (Saweriwa T’arummwa 1:13, 14) Owo akhweya aahithanliwa ni munepa waweela vamoha ni amuhuserya akina. Yaakhanle hiiha, eyo enataphulela wi ohaakhela ekari ya okhala vamoha ni Yesu wirimu okhala wookhala. Mweeparipari nno nchuwelo naphaama ntakhara muteko awe woororomeleya!

15. Yehova aamweemerenrye hai Yesu vaavaa aareiye veelaponi yavathi?

¹⁵ Yesu haachuna ncicimiho noorweela wa ahooleli a malapelo naari ahooleli a miyaha sa elapo. Nyenya mu ikwaha chaaru, Yehova aahiloca orweela wirimu, eerihaka wi Mwanawe asuwele wi owo aanamusivela. Eyo yaahimulipiha vancipale Yesu! Yesu amanle opatisiwa mu Muhice Yortano, Yehova aahiloca: “Ola ti mwanaka òkhweleyasa, kinaphwanyakamo nihakalaliho naka.” (Mateu 3:17) Enakhala wi Yohani Mpatisi aari muchu mukina yoowo iiwale masu yaale. Voocharela, waacamela eyaakha emoha Yesu ahaakumve okhwa, arummwa araru yaahimwiiwa Yehova alocaka vooloca sa Yesu:  “Ola ti Mwanaka òkhweleyasa, kinaphwanyakamo ohakalala waka: mun’wiriyaneke.” (Mateu 17:5) Wookuchulani, mahiku vakhaani Yesu ahaakumve okhwa, Yehova aahiloca wiiliwiili ni Mwanawe orweela wirimu.—Yohani 12:28.

16, 17. Yehova aamuciciminhe hai Yesu mmukhalelo woohaanyiheryeya?

¹⁶ Yesu aahisuwela wi achu yaahaala omwiichana ntoko mulipa amunyemu nave wi aahaala okhwa mmukhalelo wa wuuliha muru. Naamwi hiiha, aahivekela wi, okhwela wa Muluku weereye opwaha okhwela wawe. (Mateu 26:39, 42) Owo “òhawa [vamwirini] ahipwatxhaka wulihiwa muru,” nthowa nawi aachuna wooneliwamo onarweela wa Tiithi awe, ohiya wa veelaponi. (Ahebri 12:2) Yehova amvanhe hai Yesu weemereryiwa?

¹⁷ Vaavaa Yesu aareiye veelaponi, owo aahivekela wi akhaleno ncicimiho aareiyeno khalai, vaavaa aareiye wirimu ni Tiithi awe. (Yohani 17:5) Piipiliya haanono nikupa nnooniherya wi Yesu aanaweherya waakhela sincipale opwaha yeela. Owo haaweherya nchuwelo navameekhaaya nthowa na weerano yookhwela ya Yehova veelaponi. Nyenya tiheeni Yehova aapankeiye? Aahimucicimiha Yesu mmukhalelo woohaanyiheryeya. Elukuluku Yehova aamviihaleiye mookhwani Yesu, aahimvaha “nipuro ntokweene” wirimu. Ahimvahatho mwiili woomunepani ohinakhwa, mwiili yoowo Yehova ahamvanheiye muchu vyakala ophiyerya elukuluku yeele! * (Moone masu avathi.) (Filipi 2:9 Tradução do Novo Mundo; 1 Timóteo 6:16) Echu yootikhiniha mukhalelo Yehova omvanheiye Yesu nchuwelo nthowa na muteko awe woororomeleya!

18. Tiheeni eni enikhaviherye waavya wooneliwamo onarweela wa Yehova nave ohiya wa elapo yeela?

¹⁸ Tiheeni eni enikhaviherye waavya wooneliwamo onarweela wa Yehova ohiya wa mweelaponi? Nnaphwanela ororomela wi elukuluku yoothene Yehova onnaweemererya akapuro awe oororomeleya nave wi wiiliwiili onnaavaha nchuwelo mmikhalelo soohaanyiheryeya. Nnaphwanela weererya waanyiherya mukhalelo Yehova oneereiye anreelihe omwaahiyu! Nyenya hiihaano, elukuluku yeela nnahoolelaahu makacamiho mu elapo yeela yoonanara, nnaphwanela wuupuwela wi elapo ela enamvira. Mwawiihiiha wooneliwamo vyakala wa elapo yeela onahaala ovira. (1 Yohani 2:17) Tiithi ahu oosivela, Yehova, mmukhalelo mukina, harwa acuwala muteko ni osivela noonihenryaahu nsina nawe, woona wi owo “hari óhikhalano ekhaikhai.” (Ahebri 6:10) Mweeparipari owo onahaala wooniherya wi onnaneemererya, akhweya mmikhalelo nihintonkwaahu waanyiherya!