1-2. Mwawiiwanana ni Saweriwa T’arummwa 8:27-31, 35-38, tiheeni yaamuceenyenrye Mutiyope opatisiwa?

APWANNE munnachuna opatisiwa ntoko oohuserya a Kristu? Osivela ni othamalela wohaaceenyerya ancipale opaka yoothanla yeela. Muthokororye yootakiherya emoha ya muhooleli yoowo aamurumeela mwene amwaamuthiyana o Etiyopiya.

² Amanle ohuserya ichu Soorempwa salocaaya, Mutiyope aaheeravo echu mwawaakuveya. (Mwaalakhanye Saweriwa T’arummwa 8:27-31, 35-38.) Tiheeni yaamuceenyenrye wi apatisiwe? Moohikhwa minikwa, owo aanavaha esisapo Masu a Muluku; owo aalakhanya nikupa na liivuru a Isaiya apakaka mukwaha ni ekaaro. Nave vaavaa Filipi aalonceiye ni yoowo, Mutiyope aahithamalela vancipale yeeyo Yesu aapankeiye wa yene. Vano ntakhara heeni Mutiyope aakeleiye o Yerusalemu? Nthowa nawi aahunnuwiha osivela ntakhara Yehova. Nnasuwela hai yeela? Owo aakele o Yerusalemu wi amulapele Yehova. Akhweya mulopwana ola aahihiya malapelo awe nave apaka makupa ni nloko nenno niiveleenle wa Muluku eeparipari. Waari omusivela Yehova yoowo waamuceenyenrye opaka yoolakelela ekina yookhweleya, ya opatisiwa ni okhala oohuserya a Kristu.—Mat. 28:19.

3. Tiheeni enahaala omuhiiha muchu opatisiwa? (Moone ekaaxa “ Mwa muchu a mukhalelo taani mmurimani mwanyu?”)

³ Omusivela wanyu Yehova onamooceenyeryaani opatisiwa. Nyenya osivela tho onamoohiihaani weerano yeeyo. Mwawiihai? Muupuwele sootakiherya ikina. Akhweya nyuwaano munnaasivela mwawiiseela ahima ni asinthamwene anyu yaawo ahiri anamoona a Yehova, nave munnoova wi wakhala wi moopatisiwa anahaala owiicaani. (Mat. 10:37) Naari munnasiveliwa ni sookhovelela seiyo musuwenlaanyu wi Muluku hanasiveliwano, nave onamukhala woovila ohiya. (Sal. 97:10) Naari munnunwe muupuwelelaka sookhovelela seiyo siniiwanana ni malapelo  atheru. Munnasiveliwa ni saweera siniiwanana ni meerelo yaawo. Ntoko yookhumelela onamukhala woovila omaala wuupuwelela sookhovelela seiyo sihinamucicimiha Yehova. (1 Kor. 10:20, 21) Nikoho munaphwanelaanyu wiipakela ti nna: ‘Tiheeni naari taani kinatepaaka oomusivela vancipale?’

4. Tiheeni chiryene enahaala wooceenyeryaani opatisiwa?

⁴ Mookhalano ichu sincipale sookhweleya wi musivele ni othamalela. Ntoko yootakiherya, Piipiliya. Naamwi muhaakumve omuhuserya Piipiliya ni Anamoona a Yehova, akhweya nyuwaano mwaanatepa omucicimiha. Opwaha yeeyo, nyuwaano mwaahihuserya oomusivela Yesu. Vano mwaasuwenlaanyu anamoona a Yehova, ti yawooneya wi munnasiveliwa okhala ni yaawo. Osivela ichu seiha ti waphaama, nyenya tahi wi inamooceenyeryaani wiiveleela wa Yehova ni opatisiwa. Echu enahaala wooceenyeryaani opatisiwa ori osivela muryaanyuno ntakhara Yehova Muluku. Wakhala wi munnamusivela Yehova opwaha echu ekina, hiyaavo enahaala woohiihaani oveleela okumi anyu wa yoowo. Nave naamwi mmanle opatisiwa, omusivela Yehova onahaala okhala ikuru seiho sinahaala woolipihaani weecaka mu ephiro ya eparipari.

5. Tiheeni nnahaalaahu othokororya?

⁵ Yesu olonce wi nnaphwanela omusivela Yehova ni murima ahu woothene, okumi ahu woothene, muupuwelo ni ikuru sahu soothene. (Mar. 12:30) Tiheeni munaphwanelaanyu weera wi mukhaleno osivela ni ncicimiho noolipa ntakhara Yehova? Muupuwelele mukhalelo Yehova onooniheryeiye osivela ntakhara nyuwaano. Eyo enamooceenyeryaani ochuna wooniherya tho osivela wa yene. (1 Yoh. 4:19) Vaavaa munannuwihanyu osivela ntakhara Yehova, miyoonelo ni saweera ikina sinarwa mukhataaya. Tisivi? Nnahaala othokororya moohilekela. *

6. Mwawiiwanana ni Aroma 1:20, tuuvi ori mukhalelo wi muhuserye vooloca sa Yehova?

⁶ Muhuserye vooloca sa Yehova orweela wa soopatuxiwa sawe. (Mwaalakhanye Aroma 1:20; Wup. 4:11) Muupuwele vooloca sa miruku mitokweene Yehova oonihenryeiye apatusaka miri ni asinama. Muhuserye vakhaani mukhalelo wootikiniha mwiili ahu onalapaaya. (Sal. 139:14) Muupuwele ikuru soothene Yehova ohenleiye mpuwa wa Nsuwa, nenno nri emoha ya apilyawu a itheneeri. * (Isa. 40:26) Mukhalelo yoola wa wuupuwelela, onanweerihaani wunnuwiha omucicimiha wanyu Yehova. Nyenya honaakhwana osuwela pahiru wi Yehova tooweryasa ni amiruku. Pahiru awo mathipelo a onthamwene anyu ni yoowo. Wakhala wi munnachuna wunnuwiha onthamwene anyu ni Yehova, munaphwanela ohuserya vancipale vooloca sa yene.

7. Wi mukhaleno osivela wawiiseela ntakhara Yehova, tiheeni munaphwanelaanyu ororomela?

⁷ Munaphwanela ororomela wi Yehova onnampwacha muchu ti muchu, ophitaanyerya tho nyuwaano. Apwanne munnoona okhala woovila weemererya wi Mpatusa a erimu ni elapo ya vathi osuwela wi nyuwaano mookhala nave wi onnoopwachaani? Waakhanle wi munoona hiiha, muupuwele wi Yehova ‘hari ociiwene wa mmoha ni mmoha a hiyo.’ (Saw. 17:26-28) Owo ‘onnavarerya mpuwa wa murima,’ nave oolaiherya wa nyuwaano wi, ‘mwamwaavya, ni omwaapareya, munahaala omphwanya.’ (1 Math. 28:9) Mweeparipari,  omuhuserya wanyu Piipiliya enooniherya wi Yehova ohoothanlaani wi mukhale mmakupa awe. (Yer. 31:3) Wakhala wi mohiiwexexa soothene Yehova onapakeiye wa nyuwaano, osivela wanyu ntakhara yene onamunnuwa.

8. Muni mooniherye hai othamalela wanyu osivela wa Yehova?

⁸ Mukhalelo mmoha wa wooniherya othamalela osivela wa Yehova ori oloca ni yene. Mmavekelo anyu, mmuleele Muluku sawuukhula sanyu nave mmuthamalele ntakhara ichu saphaama opankeiye wa nyuwaano. Nave mvareryeke mukhalelo onaakhuleiye mavekelo anyu. (Sal. 116:1) Eyo enamunnuwiha osivela wanyu ntakhara Muluku ni olipiha onthamwene anyu. Munahaala ororomela wi chiryene onnawiiwexexaani. Nyenya wi mmwaacamele Muluku moopwaha, munaphwanela wiiwexexa mukhalelo onuupuweleiye ni yeeyo onaweheryeiye wa nyuwo. Nto orivo mukhalelo mmoha wa okhalano nsuweliho nenlo: ohuserya Masu awe, Piipiliya.

9. Muni mooniherye hai wi munnamvaha esisapo Piipiliya?

⁹ Muhuserye ovaha esisapo Masu a Muluku, Piipiliya. Pahiru Piipiliya tonaloca eparipari vooloca sa Yehova ni yeeyo onakhweleiye opaka wa nyuwaano. Mwa yeeyo, mmwaalakhanyeke Piipiliya mahiku oothene. Mwiirehereryeke phaama woosiilo ntakhara yoohuseraanyu ni muhusiha. Mphariheleke yeeyo munahuseryaanyu. Mmukhalelo yoowo, munamooniherya wi munnamvaha esisapo Piipiliya. (Sal. 119:97, 99; Yoh. 17:17) Apwanne moopaka marehereryo a omwaalakhanya Piipiliya? Apwanne munnawerya ochariha marehereryo yaawo nihiku ti nihiku?

10. Echu taani enaphwanyeya pahiru Mpiipiliya?

¹⁰ Echu emoha enaphwanyeya pahiru Mpiipiliya, iri miyaha sa achu yaawo amonne Yesu. Yaweereya yavameekhaaya yeeparipari erempwe yeeyo enathariha echu Yesu opankeiye ntakhara nyuwaano. Ohuserya yeeyo Yesu olonceiye ni opankeiye enahaala wooceenyeryaani omusivela.

11. Tiheeni eni yookhaviheryeeni waaceererya osivela wanyu ntakhara Yehova?

¹¹ Muhuserye omusivela Yesu, nave osivela wanyu ntakhara Yehova onahaala wunnuwa. Ntakhara heeni? Nthowa nawi Yesu  onnatakiherya moophaameya makhalelo a Tiithi awe. (Yoh. 14:9) Nthowa na yeeyo, vaavaa munahuseryaanyu vancipale vooloca sa Yesu, munahaala omusuwela phaama Yehova nave munahaala omvahaka esisapo yawaaca. Muupuwele mukhalelo Yesu aapwacheiye achu yaale yaathanyiwa ni akina— ntoko achu oohaawa, awiiceliwa ni yaawo yahaawerya wiisaakiha. Muupuwelele tho miruku soophara muteko Yesu onavaheiye ni mukhalelo ekumi anyu enakhalaaya yoohakalaliha vaavaa munacharihaanyu yeeyo onaloceiye. Mat. 5:1-11; 7:24-27.

12. Mmanle ohuserya sincipale vooloca sa Yesu, muni muceenyeryeye opaka eheeni?

¹² Opwaha yeeyo, muupuwelele mukucho Yesu ovanheiye, owo ookhwa ntakhara hiyo, wi soocheka sahu ileveleliwe. (Mat. 20:28) Moohikhwa minikwa, wuupuwela yeela osivela wanyu ntakhara Yesu onamunnuwa. Ohiya yeeyoru, munahaala oceenyeryeya ocharuwa soocheka sanyu ni oveka nikhurumuwelo wa Yehova. (Saw. 3:19, 20; 1 Yoh. 1:9) Vaava munamusivelaanyu Yesu ni Yehova moopwaha, munahaala ochuna okhala vamoha ni yaale arino osivela omohamoha.

13. Tiheeni Yehova onoovaheiyeeni?

¹³ Muhuserye osivela emusi ya Yehova. Akhweya amusi anyu oohiroromela ni asinthamwene mwaaraanyuno heni yiiwexexe ntakhara heeni munachunaanyu wiiveleela wa Yehova. Akhweya awo anamphiyerya owiicani. Nyenya Yehova harwa oohiyaani meekhinyu, owo onamoovahaani emusi yoomunepani. Wakhala wi munnakhala moohihiyererya ni anna ni arokora anyu a mmulokoni, munahaala ophwanya osivela nnikhaviheryo munachunaanyu. (Mar. 10:29, 30; Ahe. 10:24, 25) Moovira wa elukuluku, akhweya amusi anyu anamulakelela okhala ni nyuwaano mu omulapela Yehova ni okhalaka mwawiiwanana ni Piipiliya.—1 Ped. 2:12.

14. Hiiha ntoko 1 Yohani 5:3 onaloceiye, tiheeni monnaanyu vooloca sa malakiheryo a Yehova?

¹⁴ Muhuserye ocicimiha ni ochariha malamulo a Yehova. Muhaakumve omusuwela Yehova, akhweya mwaahikhalano moonelo anyu vooloca sa yeeyo eri yaphaama ni yoonanara. Nyenya vano hamunakhwa minikwa wi malakiheryo a Yehova toophwanelela. (Sal. 1:1-3; mwaalakhanye 1 Yohani 5:3.) Muupuwele ikano seiho Piipiliya onaavaheiye alopwana athenle, athiyana atheliwe, asitiithi ni anamwane. (Éfe. 5:22–6:4) Munoona wi ikano seiha sinnakhaviherya echoko anyu okhala yoohakalala? Muupuwele tho mahusiheryo yaawo Yehova onavaheiye vooloca sa waathanla asinthamwene. Apwanne munoona wi wiiwelela mahusiheryo yaala annaweerihaani okhalano sookhovelela saphaama? Munoona wi mwa muchu oohakalalasa? (Masi. 13:20; 1 Kor. 15:33) Ti yawooneya wi mohaakhula wi “aai” wa makoho oothene yaala.

15. Tiheeni enahaala wookhaviheryaani osuwela mukhalelo wa ochariha malakiheryo a Piipiliya?

¹⁵ Onanweryeya wi ilukuluku ikina, hamunasuwela phaameene mukhalelo wa ochariha malakiheryo a Piipiliya munahuseryaanyu. Tinthowa nene Yehova onaphariheleiye marehereryo awe. Awo annavahererya ikaruma inathipeleya Mpiipiliyani seiho sinookhaviheryaani osuwela echu yaphaama ni yoonanara. (Ahe. 5:13, 14) Mwaalakhanye nave muhuserye ikaruma seiyo. Nyuwaano munahaala woona mukhalelo iryaaya soophara muteko ni sooluluwanya. Opwaha yeeyo, iho inamookhaviheryaani ochuna opaka makupa a marehereryo a Yehova.

16. Yehova onaarehererya hai achu awe?

¹⁶ Muhuserye osivela ni okhaviherya marehereryo a Yehova. Yehova onnaarehererya akapuro awe mmilokoni. Owo oomuthanla mwanawe, Yesu, wi akhale muru wa miloko soothene.  (Éfe. 1:22; 5:23) Olelo, wookhalavo muteko onapakiwa ni miloko seiyo. Wi ahoolele muteko yoola, Yesu oothanla nikhuuru nikhaani nenlo oniichaneiye “mulapeli òroromeleya ni awisuwela.” Alopwana oothanliwa ni munepa waweela yaawo anapaka makupa mu nikhuuru nenla anniilipiserya okhwaaniherye murici aya wi yoovahaani yoolya ni okhapeleleya woomunepani. (Mat. 24:45-47, BNM) Mukhalelo mmoha mulapeli oororomeleya onookhapeleleiyeeni, ori weeriha wi mmulokoni mwanyu okhalemo atokweene oophwanelela wi yoohooleleeni ni wookhapelelaani. (Isa. 32:1, 2; Ahe. 13:17; 1 Ped. 5:2, 3) Atokweene ari ooreheryeya opaka owetha waya ntakhara nyuwo; awo ari ooreheryeya woohakararyaani ni wookhaviheryaani okhalano onthamwene woolipa ni Yehova. Nave nikhaviheryo nookhweleyaxa atokweene eneeraaya yoovaheeni ori woovyakihaani waahusiha akina vooloca sa Yehova.— Éfe. 4:11-13.

17. Mwawiiwanana ni Aroma 10:10, 13, 14, ntakhara heeni ninnaloca ni akina sa Yehova?

¹⁷ Mwaakhaviherye akina ohuserya omusivela Yehova. Yesu ohaalamulela ohuserya awe wi yaahusiheke akina vooloca sa Yehova. (Mat. 28:19, 20) Eparipari wi naahaala wiiwelela nlamulo nenla woona wi ti yeeyo nlamuleliwaahu opaka. Nyenya elukuluku osivela wanyu ntakhara Yehova onaaceereryeyaaya, nyuwo munanwerya wiisoona ntoko murummwa Petro ni Yohani. Awo yaahiloca: “Hannawerya ohiya oloca yeeyo niiwalaahu ni noonnaahu.” (Saw. 4:20) Ichu savakhaani sinnaruuha ohakalala wawaaca hiiha ntoko omukhaviherya muchu omusivela Yehova. Mwaanyiherye mukhalelo murummwa Filipi aahakalanleiye vaavaa aamukhavihenryeiye Mutiyope osuwela iparipari sa mu Soorempwa ni opatisiwa. Vaavaa munacharihaanyu yootakiherya ya Filipi ni wiiwelela nlamulo na olaleerya, munnooniherya wi munachuna okhala Namoona a Yehova. (Mwaalakhanye Aroma 10:10, 13, 14.) Elukuluku munaphiyeryaanyu mweeryo yoola, moohikhwa minikwa munniipakela nikoho nimohamoha nenlo Mutiyope aapakeiye: “Tisheeni enahiiha wi miyo kipatisiwe?”— Saw. 8:36.

18. Tiheeni nnahaalaahu othokororya mmwaha onacharela?

¹⁸ Yoolakelela yookhweleyaxa ya mookumini mwanyu ori opatisiwa. Woona wi yoolakelela yeela echu yookhweleyaxa, munaphwanela wuupuwelela ichu soothene inavolowelavo. Tiheeni munaphwanelaanyu osuwela vooloca sa opatiso? Tiheeni munaphwanelaanyu opaka muhaakumve ni mmanle opatisiwa? Mwaha onacharela onahaala waakhula makoho yaala.