Soovira miyeeri misese Mariya arupanle. Muupuwele wi omalinhe elukuluku yoopacerya ya orupala wawe amusekuryaka mmusi awe Isapeli yoowo onakhala o Yuteya, makupa a miyoko so ohico. Nyenya vano Mariya onahaawela okookela owaani o Nasareti. Weiwo, achu anahaala osuwela wi oorupala. Nkaanyiheryani wuukhuwa oreiyeno vooloca sa yeeyo!

Mariya aakameliwe ni karpintero a vanipuroni nsina nawe Yosefe. Nave Mariya osuwela wi mwawiiwanana ni Nlamulo na Muluku wa Aisarayeli, muthiyana yoowo aakameliwe, nyenya acapaheya ni mulopwana mukina onaphwanela ovonyiwa ni maluku wi akhwe. (Malamulo 22:23, 24) Naamwi Mariya ahicapahen’ye, owo akhweya onnuupuwela mukhalelo taani onahaaleiye omutharihela Yosefe vooloca sa orupala wawe ni yeeyo enahaala okhumelela.

Mariya aari ocai mu miyeeri miraru, mwawiihiiha ninnaroromela wi Yosefe ookhalano munkhela wi amoone. Vaavaa anakumanaaya, akhweya Mariya onnamuleela mukhalelo awe, iilipiheryaka wi amutharihele phaama wi orupala wawe weeren’ye moorweela wa munepa waweela wa Muluku. Chiryene, ntoko munaweryaanyu waanyiherya, ela echu yoovilaxa wa Yosefe wiiwexexa ni weemererya.

Yosefe oosuwela wi Mariya muthiyana oocicimiheya. Nave onnamusivela vancipale. Nlelo, moohipwacha yeeyo Mariya onaloceiye, Yosefe onoona wi owo orupanle moorweela wa mulopwana mukina. Yosefe hanachuna wi owo avonyiwe maluku ophiyerya okhwa naari wi uulihiwe muri vanlakani; mwawiihiiha, owo onnalakelela mmuupuweloni mwawe omuhiya weephiini. Mmahiku yaale, waakamela wooniwa ntoko  othela, nave ohiyana waaneemereryiwa wi omalihe waakamelana.

Ohoolo waya, vaavaa Yosefe nlelo onuupuweleiye miyaha seiya, owo onnakona. Munkeelo a Yehova onnamphiyerya moolohani nave aloca: “Ohòve omwakhela Maria okhala mwara-à: mwana orupaliwe ni ikuru sa Munepa Wawela. Onammuyara mwana onerawe omutxhuwe ni nsina na Yesu, ntakhara owo onanvulusa nloko nawe wa sotxheka.”—Mateu 1:20, 21.

Elukuluku Yosefe onavinyeiye, onnatepa ohakalala woona wi vano mwaha ori wookwakwaleya! Owo hanalekela opaka yeeyo munkeelo omulenleiye. Onnamukusa Mariya amukeriha owannyawe. Ela yaweereya ya vanlakani yaaphara muteko, ntoko yaweereya ya othela, evahaka onamoona wi Yosefe ni Mariya vano mutheli. Naamwi hiiha, Yosefe haakumanenle ni Mariya elukuluku yeeyo amurupanleiye Yesu.

Miyeeri ohoolo waya, Yosefe ni Mariya, nlelo amurupanle mwaana, annapaka mukwaha ovinyerya owannyaya o Nasareti. Ti woowi anayaayawo vaavaa Mariya ohanleiye vakhaani oyara?