Amanle ompenusa mulopwana aahooseya ni mareca, Yesu nlelo ori vaate va Mfarisi. Yesu onnawoona alipa oowompwa akina ethanlaka mapuro aphaama va yoolya, nave owo onnapharihela ekari ela wi ahusihe nihusiheryo na wiiyeviha.

Yesu onnaloca: “Arwà mutxhu awitxhanela efesta ya othela, ohikhale vanipuro nopatxerya, ehereye wi onamurwa awompwe mutxhu òtxitximiheya wopwaha weyo, ni yole òwompe ahiwerele wi: ‘Omuhiyerye nipuro ola’. Wavinyaka vavale oyaka mpuro wotxuli, muru onan’wula.”—Luka 14:8, 9.

Voocharela Yesu onnaloca: “Vano warwà witxhaneliwa okhale nipuro nomaliherya, ni yole owitxhanne onan’werela: ‘Mukhwaka, suserá nno kiryakawo’. Vava wereliwa hiha oni okhale òtxitximiheya vamithoni va alipa òwompwa.” Ela ennapwaha ohiya pahiru wooniherya makhalelo aphaama. Yesu onnathariha: “Wona wi yole onisinnuwiha, onamuyevihiwa; ni yole oniyeviha, onamunnuwihiwa.” (Luka 14:10, 11) Aai, owo onnaaceenyerya alipa oowiriyana awe wi yunnuwihe wiiyeviha.

Yesu aahiloca nihusiheryo nikina nenlo Mfarisi yoowo aanwompe aahaaleiye ohuseryavo echu. Yesu aahimutharihela muchu taani Mfarisi owo aaphwaneleiye onwopa va yoolya wi amuhakalalihe Muluku. “Wavahaka yolya, ohiwitxhaneke akhwa-à, asinna-à, ahima-à nari alipa òrèla watxamannaweno, wi ehowopeletho efesta aya, ni yokòkiherye ni yeyo. Nto wakhwelaka ovaha yolya, owitxhaneke alipa òhawa, òtuthunya, òrakala ni alipa èvasi. Ni onamuhakalala ntakhara hanono yawokòkiherya, nto onamutxhuweliwa nihiku novinya mokhwani wa atxhu awokolola.”—Luka 14:12-14.

Ti yoophwanelela waawopa asinthamwene, amusi, ni amwaacamani ntakhara yoolya, nave Yesu hanaloca wi ela ti yooheseya. Nyenya, owo onaceenyerya wi waavaha yoolya alipa oothoiwa, oohaawa, ootuthunya, oorakala ni eevaasi, onnaruuha mareeliho mancipale. Yesu onnaloca wa ole anwope ariki: “Onamutxhuweliwa nihiku novinya mokhwani wa atxhu awokolola.” Muleco mmoha onnaloca: “Òrèriwa tule oni alye mwa omwene wa Muluku!” (Luka 14:15) Owo onnoona wi enahaala okhala ekari. Nyenya, tahi achu oothene anathamalela, vaavaa Yesu onatiteleleiye oloca niphwanaphwaniho nla:

“Mulopwana mmoha apaka efesta etokwene ni àwopela atxhu antxipale . . . àmuruma mulapeli awe wi àlèle alipa owompwa, ariki: ‘Murwe, solya somalela.’ Nto othene yàpatxerya wasya nthowa nohiyawo. Opatxerya àri: ‘Kòkula ematxa, nave kinnakhwela kone. Kinnoveka wi okilevelele.’ Mukina àhi wa yowo: ‘Kòkula imope khumi, nave kinnaya wererya; kinnoveka wi okilevelele.’ Nave mukinatho àhi wa yowo: ‘Kòthela, nave wa nthowa na yela nkinawerya oyawo.’”—Luka 14:16-20.

Awo tahi mathowa oophwanelela! Wiiliwiili muchu onapacerya woona emaca ahaakumve okula, mwawiihiiha ela tahi yawaakuveyaxa. Mulopwana aneeraru tahi wi iirehererya wi athele. Owo oomala othela, mwawiihiiha othela hiwaaphwanela omweeriha oheemererya nwopelo woochuneya. Vaava pwiya oniiweiye mathowa yaala, onnamuleela mulapeli awe mooximwa ariki:

“Wakuve, oye mmapuwani ni iphiro sopoma, ni wavolihe mumu alipa òhawa, òrakala, èvasi ni òtuthunya.” Mulapeli amanle weerano yeela, nlelo mpa mpuro waahalamo. Voocharela pwiya onnamuleela mulapeli awe: “Oye oramphani  ni miphiro sothene, ni warume atxhu ovolowa wi empaka esareye. Vano miyo kinnolèlani wi havo wa yale yawompwe oni alawihe yolya aka.”—Luka 14:21-24.

Yeeyo Yesu aamanleiye oloca yaahooniherya phaama mukhalelo Yehova Muluku aamurummeiye Yesu Kristu wi alokohe sa nwopelo wa muchu ti muchu wi akhale mmarehereryo a Omwene wa wirimu. Ayuta, xaxaxa ahooleli a malapelo, ti yaapacenrye owompwa. Mweeparipari, ancipale a yaawo yaahikhooca nwopelo orweela mu orummwa wa Yesu. Nyenya akina yaahaala owompwa. Mwawooneya Yesu onnooniherya wi omwaahiyu nwopelo wanaawiili waahala otheteiwa wa Ayuta ni yaawo yaachara yooniwa ohikhala echweenevo ni ahooleli a malapelo. Ohoolo waya, waahaala okhalavo nwopelo waneeraru ni wookuchula wa achu yaawo Ayuta yaawoonaaya ntoko oohikhweleya vamiithoni va Muluku.—Saweriwa T’arummwa 10:28-48.

Aai, yeeyo Yesu onaloceiye mweeparipari enniiwanana ni masu a mmoha a aleco, yoowo aalonce wi: “Òrèriwa tule oni alye mwa omwene wa Muluku.”