Yesu onnamucicimiha vancipale Yohani Mpatisi, nyenya achu ancipale anamoona hai Yohani? Yesu oovaha yoolikanyiha yeeyo enanikhaviherya waakhula nikoho nla. Ari ntoko anamwane akiranthe vapuwani. Akina anawiichana asinthamwene aya, elocaka: ‘Hiyo nòwopa ananviro nave nyuwo himwinne! Nihinla ikutxho nave nyuwo hamunlale!’—Mateu 11:16, 17.

Tiheeni Yesu onachuneiye oloca? Owo onnathariha mwaheene: “Vawi Yohane árwa óhilya, óhiwurya, nave yawo eni, Ori ni munepa wonanara. Mwana a mutchu árwa ólya, ni ówurya, nave yawo eni, Onani mutchu ólyólya ni ówuryawurya vinyo, nthamwene a alipa-mushokho ni alipa-otcheka!” (Mateu 11:18, 19, Nlakano Nahihano) Mmukhalelo mukina, Yohani aarino okumi wookhweya ntoko Nasirewu, ophiyerya osepa eviinyu, naamwi hiiha nloko nla nnaloca wi owo ori ni munepa woonanara. (Namarepela 6:2, 3; Luka 1:15) Mmukhalelo mukina, Yesu onakhala ntoko alopwana akina. Owo onnalya nave onnawurya mwamphimo, nyenya onnathorihiwa wi oneerano moopwaha mphimo. Enakhala yoovila waahakalaliha achu.

Yesu onnalikanyiha nloko ni anamwane ari vapuwani yaawo anakhooca wiina vaavaa asinthamwene aya anawiipaaya anamviiro naari winla vaavaa akina aninlaaya. Owo onnaloca: “miruku eneriwa yekhaikhai ni miteko aya.” (Mateu 11:16, 19, NN) Chiryene, “miteko”—seiyo ipakiwe ni Yohani ni Yesu—sinnooniherya wi othoriha aneereliwaaya tahi weeparipari.

Yesu amanle othariha nloko ntoko noohiphwanelela, owo onnathoriha ipooma sa Korosaim, Petisaita, ni Kafarnau, weiwo opankeiyewo miteko sootikhiniha. Yesu onaloca wi waakhanle wi opanke miteko seiyo o Powenisiya ipooma sa Tiru ni Sitoniya, achu a weiwo yaahaala ocharuwa. Voocharela onnamuloca Kafarnau, nenlo nnakhala nipuro nawe mu elukuluku. Naamwi weiwo, ancipale hanaakhulela. Yesu onnaloca sa epooma yeeyo: “Nihiku nothoriha mulatxu, Sodóma onammoreliwa ikharari wohiyani nyuwo.”—Mateu 11:24.

Voocharela Yesu onnamvuwiha Tiithi awe, yoowo onavitha iparipari soomunepani sasisapo wa “atokwene ni alipa a miruku” nyenya ooneiha ichu seiya wa awiiyeviha, yaawo anakhala ntoko anamwane. (Mateu 11:25) Owo onnapaka nwopelo wa achu yaawo: “Rwani wa miyo othene nyuwo muri òvelavela ni ònyokoliwa, wona wi miyo kinan’witxhuwihani. Ireyani muritxi aka ni huseryani wa miyo kiri òrèra murima ni awiyeviha, nave munamphwanya witxhuwa wa minepa sanyu, wona wi muritxi aka honalimelasa ni ori woveya.”—Mateu 11:28-30.

Yesu onavaha wiichuuwa mmukhalelo taani? Ahooleli a malapelo annaahokoliha achu ni okapuro wa sookhovelela, ntoko omukhapelela Sapata. Nyenya Yesu onnawiichuuwiha awo moorweela wa waahusiha eparipari ya Muluku, owoopola mu sookhovelela seiyo. Owotho onnooniherya mphiro wa owiichuuwiha yaale anoona wi ari oovelavela ni ohuhula wa alamuleli ni wa yaale ahokoliwe ni yoocheka. Mweeparipari, Yesu onnawooniherya mukhalelo soocheka saya sineeraaya ileveleliwe ni okhaleno murecele ni Muluku.

Oothene yaale aneemererya mwaphaama murici wa Yesu anaphwanela wiiveleela wa Muluku ni omurumeela Tiithi ahu awirimu, ooreera murima ni aikharari. Weerano hiiha tahi murici mutokotoko, woona wi malamulo a Muluku hanalimela.—1 Yohani 5:3.