1, 2. Yehova onoona hai vaavaa nniilipixeryaahu wi nikhale oororomeleya?

MMIRAVO mmoha oorowaka oxikola, onnacoca murupa wa ikhorowa. Tiheeni onahaaleiye weera? Owo onanwerya ovitha. Nyenya ohiya weerano yeeyo, owo onnamukookiherya mwaneene. Vaavaa amannya anasuwelaaya yeeyo, awo annatepa ohakalala ni mwanaya.

² Asitiithi ancipale annatepa ohakalala wakhala wi anamwane aya toororomeleya. Tiithi ahu awirimu, Yehova, “Muluku awookololowa,” nave onnatepa ohakalala wakhala wi ninnakhala oororomeleya. (Salumu 31:5) Nnakhwela omuhakalaliha Yehova nave “nchunaka mu soothene meecelo aphaama.” (Ahebri 13:18) Hankooni noone makupa maxexe a ekumi ahu yaawo ari oovila okhala oororomeleya. Nave voocharela nnahaala woona ntakhara heeni oryaaya woochuneya okhala oororomeleya.

3-5. (1) Mmukhalelo taani akhweya nahaalaahu wiiwokaka mukhatiihu? (2) Tiheeni enahaala onikhaviherya okhala oororomeleya wa hiyaano mukhatiihu?

³ Wi nikhale oororomeleya ni akina, nnaphwanela woopaceryani okhala oororomeleya wa hiyaano mukhatiihu. Nyenya tahi wi ilukuluku soothene onakhala wookhweya. Khalai, Akristu oopacerya a muloko wa Lowatikeya, yaaniiwoka  mukhataaya. Awo yuupuwela wi yaanamuhakalaliha Muluku, nyenya mweeparipari hooye. (Wupulula 3:17) Hiyaano tho nnanwerya wiiwoka mukhatiihu vooloca sa meecelo ahu.

⁴ Yaakopo oorepa: “Muchu aaniiseera oomulapa Muluku, ahinahiiha nlumi nawe, onniiwoka mmurimani mwawe nave olapa wawe ti wasiiyo.” (Tiyako 1:26) Akina annuupuwela: ‘Hiyaavo yoonanara waakuvela onyeenyeya, naari oloca sawootha. Pahiru wakhala wi kinneera ichu saphaama, Muluku hani apwache ichu soonanara kinapakaaka.’ Wakhala wi ninnuupuwela mmukhalelo yoola, nniiwoka mukhatiihu. Tiheeni enahaala onikhaviherya osepa wiiwoka mukhatiihu?

⁵ Vaavaa nnawehaahu va eweheryo, ninnawerya woona omuchu ahu wa vaate. Nyenya vaavaa nnamwaalakhanyaahu Piipiliya, ninnawerya woona omuchu ahu wa mpuwa. Piipiliya onanwerya onikhaviherya osuwela makupa ahu aphaama ni sooceecheya sahu. Nave onnanleela matorokelo yaawo nnaphwanelaahu opaka mmukhalelo wa wuupuwela, oloca ni meerelo ahu. (Mwaalakhanye Tiyako 1:23-25.) Nyenya wakhala wi nniisoona wi hinaano sooceecheya, hinnahaala wiilipixerya wi nipake matorokelo ari oochuneya. Mwawiihiiha, nnaphwanela ompharihela Piipiliya wi nsuwele omuchu ahu wa mpuwa. (Wikhupanyerya 3:40; Ageu 1:5) Ovekela tho onanwerya onikhaviherya osuwela omuchu ahu chiryene. Nnanwerya omveka Yehova mu nivekelo wi anivareryele ni onikhaviherya woona sooceecheya sahu seiho nnaphwanelaahu orehererya. (Salumu 139:23, 24) Ti woochuneya wuupuwela wi Apwiya Yehova “annamuthanya mulavilavi, nto anniiwananano awookololowa.”—Masiposipo 3:32.

6. Ntakhara heeni achu athelanne anaphwanela okhala oororomeleya mukina ni mukhwaawe?

⁶ Ororomeleya ti woochuneyaxa va echoko. Wakhala wi  achu athelanne annaloca eparipari mukina ni mukhwaawe, awo anakhala oolipiheya nave onnakhalavo ororomelana. Ohiroromeleya variyari va othela onanwerya weereya mmikhalelo soohiyanahiyana. Ntoko yootakiherya, Muchu ootheliwa naari othenle onanwerya opacerya omooseelela muchu mukina, woona epwitikiri naari opaka ompwana moovitheya. Moone yeeyo namarepa a Salumu olonceiye: “Nkineeca ni yaawo aneera itheru sene nari waataana ni oowoka.” (Salumu 26:4) Wakhala wi hamunaroromeleya wa oothelana anyu naamwi ori pahiru mmuupuweloni, eyo enahaala onanariha othela wanyu.

7, 8. Asitiithi eni ewerye hai ompharihela Piipiliya wi yaahusihe anamwane aya ochuneya waya okhala oororomeleya?

⁷ Anamwane tho anaphwanela ohuserya wi ororomeleya echu yoochuneya. Asitiithi anaphwanela ompharihela  Piipiliya wi yaahusihe yeela anaaya. Mpiipiliyani, sinnaphwanyeyamo sootakiherya soonanara sa achu yaawo yaari oohiroromeleya ntoko: Akani, yoowo aari mpava; Kehasi, yoowo oonthe achunaka ovahiwa ikhorowa; ni Yutasi, yoowo iiya ikhorowa nave ohoolo waya amutumiha Yesu ni ikhorowa masana mararu sa eparata.—Yosuwa 6:17-19; 7:11-25; 2 Mamwene 5:14-16, 20-27; Mateu 26:14, 15; Yohani 12:6.

⁸ Nave tho Mpiipiliyani sookhalamo sootakiherya sincipale saphaama sa achu yaawo yaari oororomeleya ntoko: Yakopo, yoowo aarumme anamwane awe okookiha ikhorowa yaaphwannyaaya mmirupani; Yefite ni mwanawe amwaamuthiyana, yaawo yaakhwanihenrye nlakano naya wa Muluku; ni Yesu, yoowo aari oororomeleya naamwi aakumanne ni makacamiho mancipale. (Maphatxuwelo 43:12; Amuthoriha 11:30-40; Yohani 18:3-11) Sootakiherya seiha, inanwerya waakhaviherya anamwane wiiwexexa ochuneya waya okhala oororomeleya.

9. Wakhala wi asitiithi toororomeleya, eyo eni yaakhaviherye hai anamwane aya?

⁹ Asitiithi ananwerya ohuserya orweela wa nlakiheryo nla noochuneya: “Vano weyo onaahusiha achu akina, honiihusiha meekhaa? Yoowe onalaleerya ohiiya honiiya?” (Aroma 2:21) Anamwane annasuwela wakhala wi asitiithi aya annaloca echu, eniiha yeeraka echu ekina. Wakhala wi asitiithi annaaleela anamwane aya okhala oororomeleya nave awo ehikhalaka oororomeleya, anamwane aya anahaala ohaleela echu yaweera. Wakhala wi awo annoona wi asitiithi aya annootha, naamwi mu ichu ikhaani, awo tho anahaala weerano emohamoha. (Mwaalakhanye Luka 16:10.) Nyenya wakhala wi awo annoona wi asitiithi aya toororomeleya, omwaahiyu awo tho yakhalano anamwane aya anahaala okhala oororomeleya.—Masiposipo 22:6; Éfeso 6:4.

10. Nni nikhale hai oororomeleya vaavaa nnachekulaahu ni annihu mmulokoni?

¹⁰ Nnaphwanela tho okhala oororomeleya ni annihu mmulokoni. Ti wookhweya wi ochekula wahu wa nihiku nnihiku moohisuwela okhale waapa, ophiyeryatho wootha. Wakhala wi ninnaloca echu yeeyo nihisuwenlaahu phaama waakhanle wi eparipari, nnawerya omwaramwaxa yawootha. Mwawiihiiha, ti woochuneya ‘wiichaalela’ masu ahu. (Masiposipo 10:19) Nyenya okhala oororomeleya henataphulela wi nnaphwanela olocaka soothene nsuwenlaahu, nnuupuwelaahu naari niiwalaahu. Naamwi yeeyo munayaanyu oloca eri eparipari, ti yaphaama wiikoha: ‘Apwanne ti yaphaama? Ennakiphwanela oloca? Apwanne ti woochuneya chiryene oloca?’ (1 Tesalónika 4:11) Achu akina annaloca ichu soohiphwanelela, nave eniikuphelela eriki: “Kinaloca eparipari!” Nyenya hiyaano na akapuro a Yehova, wa nthowa na yeela, ti woochuneya wi masu ahu enakhala oosivela ni aphaama.—Mwaalakhanye Kolosi 4:6.

11, 12. (1) Muchu opanke yoocheka, onaaceererya hai mwaha wakhala wi hari oororomeleya? (2) Makoho taani nnaphwanelaahu wiipakela wakhala wi noosuwela wi nthamwene ahu oopaka yoocheka? (3) Mukhalelo taani mukina nneeraahu nooniherye wi nri oororomeleya ni marehereryo a Yehova?

¹¹ Yehova ohaavaha murici atokweene wi ekhaviheryeke muloko. Onahaala okhala wookhweya wa atokweene onikhaviherya wakhala wi ninnakhala oororomeleya wa yaawo. Ntakhara heeni? Wakhala wi munniiceliwa nave muya oxipitale wi mmuleele totore ereca anyu, apwanne mwaahaala omukhuwa yeeyo enawicelani? Wakhala wi moomukhuwa, owo aahaala wookhaviheryaani hai? Moolikana, wakhala wi noopaka yoocheka etokweene, hannaphwanela okhuwa. Ohiya yeeyo, hiyaano nnaphwanela owaasya atokweene ni okhala oororomeleya ni yaawo. (Salumu 12:2; Saweriwa T’arummwa  5:1-11) Nave hanka wakhala wi moosuwela wi nthamwene anyu oopaka yoocheka etokweene? (Onamukutxho 5:1) Apwanne munahaala wuupuwela muriki: “Wi kikhale nthamwene aphaama, kinaphwanela okhuwa yoocheka awe”? Naari munahaala wuupuwela wi atokweene ananwerya omukhaviherya nthamwene anyu okookela ni orehererya onthamwene awe ni Yehova?—Ahebri 13:17; Tiyako 5:14, 15.

¹² Nnaphwanela tho okhala ororomeleya ni marehereryo a Yehova vaavaa nnarepelaahu iwora nimalinhaahu mmuteko woolaleerya, naari nipakaka yoolokoha syakala. Ohiya yeeyoru tho, nooniherye okhala oororomeleya vaavaa nnaakhulaahu makoho anaphwanyeya va epetisau ya muteko wa opiyoneru naari epetisau ekina.—Mwaalakhanye Masiposipo 6:16-19.

13. Tiheeni nnaphwanelaahu weera wi nikhale oororomeleya vaavaa nnapakaahu maroca ni munna?

¹³ Ntoko Akristu hannaphwanela waakanyerya maroca ni omulapa wahu Yehova. Ntoko yootakiherya, hannaphwanela opaka maroca naari omweeca nakoso mu Empa ya Omwene naari mmuteko woolaleerya. Nave hinnapharihela moonanara onnaahu vooloca sa opaka maroca. Wakhala wi anamalapa ahu anna, nnaphwanela waalivaka ehivinre mahiku yaawo nlakannaahuno nave weerano soothene mwawiiwanana ni malamulo. Ela enavolowela waarepa ni waavaha mahiku awiichuwa. (1 Timóteo 5:18; Tiyako 5:1-4) Wakhala wi nnamulapa munna, nihuupuwele wi nnaphwanela okhalihiwa mmukhalelo wavameekhaaya woohiyana ni anamalapa akina. (Éfeso 6:5-8) Nnaphwanela ophiya mu elukuluku yoolakaniwa ni ophara muteko yoowo nivahiwaahu.—2 Tesalónika 3:10.

14. Tiheeni Akristu anaphwanelaaya weera ehaakumve opacerya omweeca nakoso ni munna?

 ¹⁴ Hanka wakhala wi nnachuna omweeca nakoso ni munna naari murokora? Eyo akhweya enavolowela opharihela ikhorowa naari opoleya. Mmikhalelo ntoko seiha, nookhalavo nlakiheryo na Mpiipiliyani nnahaala okhaviherya vancipale: Murepele soothene! Vaavaa mulipa a miririmu Yeremiya aathummeiye emaca, owo aarepa ipaaxo piili, aveka wi anamoona erepevo masina aya nave aakhapelela soopiili. (Yeremiya 32:9-12; moone tho Maphatxuwelo 23:16-20) Akina anuupuwela wi orepela soothene onahaala okhalaka ntoko wi hanamuroromela munna. Nyenya mweeparipari eyo enahaala onikhaviherya orapela sookacamiha ni moonelo wooheseya wa akina, ophiyeryatho waakhulana. Nnaphwanela wuupuwela wi okhala mmureceleni mmulokoni, echu yoochuneyaxa opwaha nlakano nri noothene na nakoso.—1 Korinto 6:1-8; moone Yooleeliherya 30.

15. Yehova onoona hai ohiroromeleya mmaroca?

¹⁵ Nnaphwanela okhala oororomeleya wa achu oothene, ophitaanyerya ni yaawo ahiri Anamoona a Yehova. Wa Yehova ti woochuneya wi nikhaleke oororomeleya. “Apwiya annathanya miphimo soowoka, nto annahakalalela miphimo sawaakhwana.” (Masiposipo 11:1; 20:10, 23) Mmahiku akhalai, miphimo saanaphariheliwa wiiliwiili ni alipa ootumiha. Nyenya alipa ootumiha akina, yaanaawoka anamathuma aya, moorweela wa owala mphimo yeerihaka wi alipa oothuma enakuxa echu yavakhaani ehiniiwanana ni ikhorowa alimvaaya naari moorweela wa waaliviha ikhorowa sincipale. Olelo, hiiha ntoko yeereyaaya mmahiku akhalai, ohiroromeleya ti wawunlaana mmaroca. Nave hiiha ntoko Yehova iiceiye khalai, owo tho onniica olelo.

16, 17. Ichu taani sinahaala weeha ororomeleya wahu?

 ¹⁶ Oothene hiyo ninnakumana ni mikhalelo sinakhala yaweeha ya ororomeleya wahu: Vaavaa nnalocaahu sa masyakelo ahu a muteko, orepela ipaaxo wa alamuleli naari vaavaa nnapakaahu eporova oxikola. Ancipale anuupuwela wi hiyaavo yoonanara wootha, waaceererya ichu naari ovaha naakhulo nnaweeriha akina wuupuwela echu yammoori eniiha mweeparipari eri echu ekina. Ela henaphwanela ontikhiniha. Piipiliya onnaloca wi mmahiku ookuchula achu yaahaala okhala “awiichuna mukhataaya, oochunasha ikhorowa, . . . amwiicani a saphaama.”—2 Timóteo 3:1-5.

¹⁷ Vakina vaya, enakhala ntoko wi achu oohiroromeleya annakhumelela phaama mmahiku ahu yaala. (Salumu 73:1-8) Nthowa na okhala oororomeleya, Mukristu onanwerya oyeleela muteko awe, ohaakhelihiwa ikhorowa sawe soothene, naari okhalihiwa moonanara omutekoni. Naamwi hiiha, okhala oororomeleya echu yasisapo etokweene. Ntakhara heeni?

18. Ntakhara heeni ti yaphaama osuweliwa ntoko muchu oororomeleya?

¹⁸ Osuweliwa ntoko muchu oororomeleya, echu yasisapo mmahiku ahu yaala. Hiyaano nnanwerya osuweliwa ntoko muchu oororomeleya. (Mikeya 7:2) Eparipari wi achu akina anahaala wootheyakaani elocaka wi mwa muchu oolosowa. Nyenya akina anahaala osiveliwa ni ororomeleya wanyu nave anahaala woororomelakaani. Mu elapo yoothene, Anamoona a Yehova aasuweliwa wi achu oororomeleya. Akina, annalakelela waavaha muteko anamalapa ari Anamoona a Yehova nthowa nawi aasuwela wi anahaala okhalaka oororomeleya. Nave vaavaa anamalapa akina aniikariwaaya omuteko, wiiliwiili anamalapa ari Anamoona annatitelela olapa.

19. Yehova onahaala onoonaka hai wakhala wi naachu oororomeleya?

 ¹⁹ Okhala oororomeleya mu ichu soothene onahaala oneeriha okhalano yawuupuxerya-ya-murima yaphaama. Nnahaala okhala ntoko Paulo, yoowo aarempe ariki: “Ninnaroromela wi eleela murima ahu ti yooreera.” (Ahebri 13:18) Echu yoochuneyaxa, Tiithi anyu oosivela Yehova, onnahakalala vaavaa onooneiye ororomeleya wanyu nave onahaala othamalela wiilipixerya wanyu wa okhala oororomeleya mu ichu soothene.—Mwaalakhanye Salumu 15:1, 2; Masiposipo 22:1.