Nsina na Muluku ti Yehova nave nnataphulela wi ‘Miyo kinahaala okhala soothene kinachunaaka.’ Yehova Muluku a ikuru soothene, nave ti yoowo opatunxe ichu soothene. Owo ookhalano ikuru sa weera soothene onachuneiye.

Mu Eheepri, nsina na Muluku nnarempwa ni ileetera xexe. Mu Enklesi, sinooniheryiwa ni ileetera iha YHWH naari JHVH. Nsina na Muluku ninnaphwanyeya mu soorepa soopacerya sa Eheepri opwaha ikwaha 7.000. Achu orukurerya elapo anaromola mmukhalelo woohiyana mwawiiwanana ni elocelo aya.

▸ Mwaha 1, epar. 15

Mwaneene a Piipiliya ti Muluku, ohiya achu aapharihenleiye wi emurepe. Ela enalikana ni mutokweene a muteko onamuruma namalapa awe wi arepe echu onachuneiye. Muluku aapharihela munepa awe waweela wi aahoolele anamarepa a Piipiliya orepa muupuwelo wa Muluku. Munepa wa Muluku waahaahoolela mmikhalelo soohiyanahiyana, ilukuluku ikina moorweela wa yawoona naari oloha nave voocharela yaanarepa.

▸ Mwaha 2, epar. 5

Mahusiheryo a Mpiipiliyani yaawo anathariha iparipari soochuneya. Ntoko yootakiherya, nlakiheryo nawi “wetxa n’atxhu ònanara murima onnipha mukhalelo waphama” nnanihusiha wi ninnavoloweliwa mwaphaama naari moonanara ni achu yaawo nnakhalaahuno vamoha. (1 Korinto 15:33) Nave nlakiheryo nawi “mutxhu ti mutxhu anaya ohepha yele anleiye” nnanihusiha wi hannawerya orapela sookhumelela sa saweera sahu.—Galasya 6:7.

▸ Mwaha 2, epar. 12

Iha michaka soorweela wa Muluku. Inanwerya okhala yooleeliherya ya yoochuna ya Muluku, mahusiheryo a meecelo, malamulo, naari othoriha. Enanwerya tho okhala michaka inaloca yeeyo enahaala weereya omwaahiyu. Mpiipiliyani sookhalavo sooloherya sincipale seiho saakhwanenle.

▸ Mwaha 2, epar. 13

Ti Yesu pahiru aakhwanihenrye Sooloherya soothene siri Mpiipiliyani vooloca sa Mesiya. Moone ekaaxa “ Sooloherya Vooloca sa Mesiya.”

▸ Mwaha 2, epar. 17, masu a vathi.

Yehova opatunxe elapo yavathi wi nikhale nipuro nooreera wa achu yaawo anamusivela. Yookhwela awe hetoroken’ye. Moohilekela, Muluku onahaala oviihavo onanara woothene ni waavaha achu awe ekumi yoohimala.

▸ Mwaha 3, epar. 1

Satana munkeelo yoowo aapacenrye ommwareela Muluku. Nsina nawi Satana, nnataphulela “Mwiicani” woona wi owo onawana ni Yehova. Owo onniichaniwa tho Musaserya, enataphulela “Nawoothe.” Oovahiwa nsina nenla nthowa na oloca sawootha ntakhara Muluku ni waawoka achu.

▸ Mwaha 3, epar. 4

Yehova aapatunxe ankeelo ahaakumve opatuxa elapo yavathi. Awo yaapatuxiwe wi ekhaleke wirimu. Akhalawo ankeelo oohaalakhanyeya. (Daniyeli 7:10) Awo aakhalano masina ni makhalelo oohiyanahiyana, ankeelo oororomeleya mwawiiyeviha annakhooca ocicimihiwa ni achu. Awo aakhalano miteko soohiyanahiyana. Miteko seiho sinaphitaanyerya orumeela va munyukhu wa Yehova, oveleela michaka sa Yehova, waakhaviherya ni waahoolela akapuro veelaponi yavathi, weerano othoriha wawe, ni okhaviherya muteko wa olaleerya. (Salumu 34:7, 8; Wupulula 14:6; 22:8, 9) Omwaahiyu, awo anahaala omukhaviherya Yesu mu ekhoco ya Armaketo.—Wupulula 16:14, 16; 19:14, 15.

▸ Mwaha 3, epar. 5; Mwaha 10, epar. 1

Echu eri yoothene nnuupuwelaahu, naari weera ehiniiwanana ni yoochuna ya Yehova ti yoocheka. Woona wi yoocheka ennananariha onthamwene ahu ni Muluku, owo oonivaha malamulo ni malakiheryo ananikhaviherya osepa opaka yoocheka moohisuwela. Woopaceryani, Yehova aapatunxe achu oophaameya, nyenya vaavaa Aatamu ni Haava yaathanlilaaya ohimwiiwelela Yehova, awo yaacheka nave hiyaatitelenle okhala oophaameya. Awo yaahuuluvala ni okhwa, nyenya woona wi nrwenle wa Aatamu, hiyaano tho ninnuuluvala ni okhwa.

▸ Mwaha 3, epar. 7; Mwaha 5, epar. 3

Ela ekhoco ya Muluku enahaala otoloxa elapo ya Satana ni achu oothene oonanara.

▸ Mwaha 3, epar. 13; Mwaha 8, epar. 18

Omwene wa Muluku olamulelo yoowo Yehova otikithenryeiye wirimu. Yesu Kiristu tori Mwene. Omwaahiyu, Yehova onampharihela Omwene owo wi amalihe onanara woothene. Voocharela, Omwene wa Muluku onahaala olamulelaka elapo yoothene.

▸ Mwaha 3, epar. 14

Muluku aampatunxe Yesu ahaakumve opatuxa echu ekina. Yehova aamuruma Yesu veelaponi yavathi wi akhwe ntakhara achu oothene. Yesu amanle wiiphiwa, Yehova aamviiha. Yesu onanlamulela hiihaano wirimu ntoko Mwene a Omwene wa Muluku.

▸ Mwaha 4, epar. 2

Piipiliya aaloherya, naari olaiherya, eyaakha Mesiya aahaaleiye wooneya. Eyo yaahaala okhala wookuchulani wa elukuluku ya isumana 69, yeeyo yaapacenrye mu eyaakha ya 455 E.E.K. nave yaakotenle eyaakha 29 E.K.

Nnnasuwela hai wi eyo yaakhwanenle mu eyaakha ya 29 E.K. Isumana 69 ipacenrye mu eyaakha 455 E.E.K. vaavaa Nehemiya aaphinyeiye Oyerusalemu nave apacerya oteka wanaawiili epooma. (Daniyeli 9:25; Nehemiya 2:1, 5-8) Hiiha ntoko masu awi “nikhumi” ananeerihaaya wuupuwela numero na 10, moolikana masu awi “esumana” annanuupuxerya mahiku 7. Isumana mu yooloherya ela tahi isumana sa mahiku thanu napiili, nyenya isumana sa iyaakha thanu napiili, mwawiiwanana ni meerelo a waalakhanyerya wa ‘nihiku nimoha olikana ni muyakha mmoha.’ (Namarepela 14:34; Ezekiyeli 4:6) Ela enataphulela wi esumana emoha enalikana ni iyaakha thanu napiili, nave waalakhanyerya isumana 69 sinnaakhwana iyaakha 483 (69 x 7). Wakhala wi nooheerenka iyaakha 483 opacerya eyaakha ya 455 E.E.K., sinakotela  eyaakha ya 29 E.K. Ela chiryene eyaakha yeeyo Yesu aapatisiweiye akhala Mesiya!—Luka 3:1, 2, 21, 22.

Yooloherya emohamoha yaaloca esumana ekina, seiho iri iyaakha thanu napiili sa vanlakani. Variyari va elukuluku yeeyo, mu eyaakha ya 33 E.K., Mesiya ahaala wiiphiwa, nave ovinyerya eyaakha ya 36 E.K., michaka ya Omwene wa Muluku saahaala olaleeryiwa wa maloko oothene ohiya pahiru wa Ayuuta.—Daniyeli 9:24-27.

▸ Mwaha 4, epar. 7

Piipiliya onahusiha wi Yehova Muluku Mpatuxa, nave wi aampatunxe Yesu ahaakumve opatuxa echu eri yoothene. (Kolosi 1:15, 16) Yesu tahi Muluku a Ikuru Soothene. Yesu hantonko oloca wi aanalikana ni Muluku. Moohiyana, owo aariye: “Atithi t’atokwene okipwaha miyo.” (Yohani 14:28; 1 Akorinto 15:28) Nyenya ikerexa ikina inahusiha wi Muluku ori mmakhalelo mararu: Atiithi, Mwaana, ni munepa waweela ooraaru ala ari Muluku mmoharu. Mahusiheryo ala hanaphwanyeya Mpiipiliyani. Ala mahusiheryo atheru.

Munepa waweela ikuru sa Muluku, ikuru sawe soohooneya seiho owo onaphariheleiye wi eereno yoochuna awe. Tahi muchu. Ntoko yootakiherya, Akiristu a nsana noopacerya “yàsareya munepa wawela,” nave Yehova aaloca: “Kinamuyeherya munepa aka mwa atxhu othene.”—Saweriwa T’arummwa 2:1-4, 17.

▸ Mwaha 4, epar. 12; Mwaha 15, epar. 17

Akiristu eeparipari hanapharihela mwikimanyo mmalapelo aya. Ntakhara heeni?

1.  Mwikimanyo onnaphariheliwa mmalapelo atheru ovinyerya khalai. Mmahiku akhalai mwikimanyo waaphariheliwa mu mihapo sa okonihana woohiphwanelela wa amalapo. Variyari va iyaakha 300 Yesu amanle okhwa, Akiristu hiyaapharihela mwikimanyo mmalapelo. Evinrevo elukuluku yincipale, Mutokweene a o Roma Konstantino aapaka mwikimanyo okhala eneneeryo ya Ekiristu. Eneneeryo eyo yaaphariheliwe wi evuwihiwe Ekiristu. Nyenya mwikimanyo honakhumelela wa Yesu Kiristu. Liivuru New Catholic Encyclopedia onnathariha: “Mwikimanyo onnaphwanyeya mmihapo sa Akiristu ni sa amalapo.”

2.  Yesu haakhwile va mwikimanyo. Masu a Ekiriki ataphuleliwe “mwikimanyo” anataphulela “mwiri waweemela,”  “poco” naari “mwiri wookwatiwa.” Liivuru The Companion Bible onnathariha: “Mu soorepa sa Ekiriki sa [Nlakano na Hiihaano] hiyaamo masu anooniherya miri miili sawiikimanyiwa.” Yesu aakhwile va mwiri pahiru.

3.  Yehova hanachuna wi niphariheleke soophwaniherya ntoko eneneeryo ya malapelo ahu.—Mukwaha 20:4, 5; 1 Korinto 10:14.

▸ Mwaha 5, epar. 12

Yesu aahaalamulela oomuchara awe wuupuxerya nihiku na okhwa wawe. Awo anneerano yeeyo eyaakha yoothene mu 14 a Nisani, nihiku nimohamoha Aisarayeli yaakhalaayano Paskha. Ephaawu ni eviinyu, seiho ineemelela mwiili ni nikhami na Yesu, sinnavirihiwa wa oothene anaphwanyeya va mukonelo. Yaale anaya olamulela ni Yesu wirimu annalya ephaawu ni owurya eviinyu. Yaale arino ewehereryo ya okhala veelaponi yavathi okhala wookhala hanalya ephaawu naari owurya eviinyu, nyenya anooniherya ncicimiho naya.

▸ Mwaha 5, epar. 21

Mu Tradução do Novo Mundo, nsu “okumi” nnaphariheliwa wi alociwe (1) muchu, (2) mwaaxinama, naari (3) ekumi ya muchu naari ya mwaaxinama. Moone sawooniherya inacharela:

• Muchu. Mmahiku a Noowa “atxhu vakhani, ti wi athanu nararu pahi, yàvulusiwa mmahini.” (1 Pedro 3:20) Va eciciri ela etaphuleliwe “okumi” ntoko achu—Noowa ni amwaariye, anamwane aya araru, ni asaaraya.

• Mwaaxinama. “Muluku àhi: Mmahini opakeyemo asinama awipurula [“okumi”] nave osulu ovavekewo ipalame [“okumi”]. Muluku àhi: Mw’elapo ya vathi opakeyekemo inama sa miloko miloko [“okumi”] sa vate, sa mutakhwani ni sawipurula  vatxhayani. Nave hiha yahereya.”—Maphatxuwelo 1:20, 24.

• Ekumi ya muchu naari ya Mwaaxinama. Yehova aamuleela Moose: “Yale yàsya owìpha [yaasya okumi a], àkhwa.” (Mukwaha 4:19) Yesu ari veelaponi yavathi, owo aaloca: “Miyo ka mukukhuli aphama. Mukukhuli aphama onnavaha ekumi awe iputxeputxhe sawe.”—Yohani 10:11.

  Mwawaaceererya, vaavaa muchu oneereiye echu ni ‘okumi awe wothene’ eyo enooniherya wi oneera mwawiiveleela apharihelaka phaama ikuru sawe. (Mateu 22:37; Malamulo 6:5) Nsu nawi “Okumi” nnanwerya tho ophariheliwa wi nthoonyerye nchuno naari nchanana na yoopatuxiwa erino ekumi. Muchu ookhwa naari mwiili wookhwa onanwerya tho wiichaniwa ntoko okumi wookhwa.—Namarepela 6:6; Masiposipo 23:2; Isaiya 56:11; Ageu 2:13.

▸ Mwaha 6, epar.5; Mwaha 15, epar. 17

Masu a Eheepri ataphuleliwe “munepa” mu Tradução do Novo Mundo aakhalano yootaphulela yoohiyanahiyana. Ikwaha sincipale enaahiwa echu ehinooniwa ni achu, ntoko nwiya wa achu naari axinama anamumulaayano. Masu yaala tho annathoonya munepa waweela, yoowo ori ikuru sa Muluku. Piipiliya hanahusiha wi aakhala makupa anakhalano ekumi wa vameekhaaya muchu amanle okhwa.—Mukwaha 35:21; Salumu 104:29; Mateu 12:43; Luka 11:13.

▸ Mwaha 6, epar. 5; Mwaha 15, epar. 17

Gehena nsina na nipuro waacamela o Yerusalemu wiiwo seeyeliwaayawo ikokhola. Hiyaavo yoothoonyerya yawi mmahiku a Yesu, axinama naari achu yaanavonyeryiwa o nipuro nenle na mooro eniiha erino okumi. Mwawiihiiha, Gehena tahi eneneeryo ya nipuro weiwo achu ookhwa anahooxiwaayawo naari weeyeliwa mahiku oothene. Vaavaa  Yesu aaloceiye sa yaale ariheliwe o Gehena, owo aloca sa otoloxiwa woohimala ohirivo ewehereryo.—Mateu 5:22; 10:28.

▸ Mwaha 7, epar. 20

Nla nivekelo Yesu aapankeiye wi aahusihe oomuchara awe mukhalelo wa ovekela. Nlo tho ninniichaniwa Atiithihu muri wirimu naari nivekelo na ntakiheryo. Ntoko yootakiherya Yesu oonihusiha ovekela mmukhalelo ola:

• “Nsina nanyu nèlihiwe”

  Ninnavekela wi Yehova eelihe nsina nawe, naari waakiha wa sawootha soothene. Ti yoochuneya wi oothene wirimu ni veelaponi yavathi yeeliheke ni ocicimiha nsina na Muluku.

• “Omwene anyu orwe”

  Ninnavekela wi olamulelo wa Muluku otoloxe elapo yoonanara ya Satana, nave tho wi olamuleleke elapo yoothene, ni otatuxa elapo okhala parataiso.

• “Okhwela wanyu wereye . . . vathiva”

  Ninnavekela wi yookhwela ya Muluku ekhwaanele, nave wi achu awiiwelela ekhaleno okumi woophaameya ni woohimala mu Parataiso, hiiha ntoko Yehova aachuneiye aapatuxaka achu.

▸ Mwaha 8, epar. 2

Yehova oovaha woopola wi aavuluxe achu mu yoocheka ni okhwa. Woopola esisapo yawaakhwanela wi eliveliwe ekumi yoophaameya yeeyo mulopwana oopacerya Aatamu, aayeleenleiye ni onikhaviherya orehererya onthamwene ahu ni Yehova. Muluku aamurumiha Yesu veelaponi yavathi wi akhwe ntakhara achu oothene. Nthowa na okhwa wa Yesu oothene nookhalano ekari ya okhalano okumi woophaameya okhala wookhala.

▸ Mwaha 8, epar. 21; Mwaha 9, epar. 13

Yooloherya mu Daniyeli ecima 4 ennanihusiha wi Muluku ootikitherya Omwene awe mu 1914.

Yooloherya: Yehova aamvaha yooloha Mwene Napukotonosor vooloca sa mwiri mutokweene yoowo wuuhiwe. Mu yooloha, nikoco na mwiri naamakiwa ni muthipo ni kopre wi ohinnuweke ophiyerya ivinrevo “ilukuluku thanu napiili.” Nave voocharela, mwiri owo waahaala ophuwela wanaawiili.—Daniyeli 4:1, 10-16.

Yooloherya ela enataphulela eheeni wa hiyaano: Mwiri oneemelela olamulelo wa Muluku. Mu iyaakha sincipale, Yehova anaapharihela mamwene a o Yerusalemu wi elamulele nloko na Isarayeli. (1 Matharihelo 29:23) Nyenya mamwene awo yaakhala oohiroromeleya, nave olamulelo aya waanamala. Yerusalemu aatoloxiwa mu eyaakha ya 607 E.E.K. Ala yaari mapacereryo a “ilukuluku thanu napiili.” (2 Mamwene 25:1, 8-10; Ezekiyeli 21:25-27) Vaavaa Yesu aalonceiye aareiye, “Yerusalemu onamunyikaliwa t’amalapo ophiyerya wi mahiku aya ekhwanele,” owo achuna oloca sa “ilukuluku thanu napiili.” (Luka 21:24) Mwawiihiiha, “ilukuluku thanu napiili” hisaamanle vaavaa Yesu aareiye veelaponi yavathi. Yehova aaloherya omuthanla Mwene omakuchuwelo wa “ilukuluku thanu napiili.” Olamulelo ola wa Mwene musyaani, Yesu, ahaala oruuha mareeliho oohimala wa achu a Muluku mu elapo yoothene.—Luka 1:30-33.

Olekela wa “ilukuluku thanu napiili”: “Ilukuluku thanu napiili” sinalikana ni iyaakha 2.520. Wakhala noheerenka iyaakha 2.520 opacerya eyaakha ya 607 E.E.K., sinakotela mu eyaakha ya 1914. Ela yaari eyaakha yeeyo Yehova aamuthanlileiye Yesu, Mesiya, okhala Mwene a Omwene wa Muluku wirimu.

 Tiheeni nenraahu wi niphwanye numero 2.520? Piipiliya onnaloca wi ilukuluku raru ni emeya irino mahiku 1.260. (Wupulula 12:6, 14) Mwawiihiiha “ilukuluku thanu napiili” ori wuuluulela itila piili numero nenla enaakhwanela mahiku 2.520. Mahiku 2.520 analikanela ni iyaakha 2.520 mwawiiwanana ni waalakhanyerya wa ‘nihiku nimoha olikana ni muyakha mmoha.’—Namarepela 14:34; Ezekiyeli 4:6.

▸ Mwaha 8, epar. 23

Masu awi “munkelo mutokotoko” anataphulela “muhooleli a ankeelo.” Piipiliya onamuloca pahiru munkeelo mutokotoko, wi nsina nawe ti Mikayeli.—Daniyeli 12:1; Yuda 9.

Mikayeli Muhooleli a anakhoco a Muluku ankeelo oororomeleya. Liivuru a Wupulula 12:7 onnaloca: “Miguel [naari Mikayeli] ni ankelo awe yàwana ekhotxo ni enama yawopiha . . . ni ankelo aya yàwanano.” Liivuru a Wuupulula onnaloca wi Muhooleli a anakhoco a Muluku ti Yesu, mwawiihiiha Mikayeli nsina nikina na Yesu.—Wupulula 19:14-16.

▸ Mwaha 9, epar. 4

Masu ala anathoonyerya elukuluku yeeyo ichu sincipale sinahaalaaya weereya veelaponi yavathi Omwene wa Muluku ohaakumve otoloxa elapo ya Satana. Masu ntoko, “omaliha elapo” naari “orwa wa Mwana a mutxhu,” annaphariheliwa Mpiipiliyani wi yooniherye elukuluku yeeyo. (Mateu 24:3, 27, 37) “Mahiku òmaliherya” apacenrye vaavaa Omwene wa Muluku waapacenryaaya olamulela wirimu mu eyaakha ya 1914, nave enahaala okotela vaavaa Elapo ya Satana enahaalaaya otoloxiwa mu Armaketo.—2 Timóteo 3:1; 2 Pedro 3:3.

▸ Mwaha 9, epar. 5

Wakhala wi muchu aakhwile okookiheryiwa okumi ti Muluku, yaweereya eyo eniichaniwa ovinya mookhwani. Piipiliya onnaaloca achu thanu naxexe yaaviihiwe. Eliya, Eliseu, Yesu, Pedro, ni Paulo yaahaaviiha achu mookhwani. Sootikhiniha iho saaheereya nthowa na ikuru sa Muluku. Yehova oororomeliha waaviiha “ékhaikhai ni óhikhala ékhaikhai” veelaponi yavathi. (Saweriwa T’arummwa 24:15) Piipiliya tho onnaloca sa oviihiwa oya wirimu. Ela eneereya ni yaale ari awoocihiwa, naari oothanliwa ni Muluku, wi yakhale ni Yesu wirimu.—Yohani 5:28, 29; 11:25; Filipi 3:11; Wupulula 20:5, 6.

▸ Mwaha 9, epar. 13

Ehako naari onamulosiwe meerelo a ochuna oloca ni minepa, mukhatiinyu naari moorweela wa muchu mukina, ntoko okhwiri naari masica. Achu annaavya ihako nthowa nawi anneemererya mahusiheryo atheru awi munepa wa muchu honakhwa vaavaa muchu onakhweiye nave wi onathatuwa okhala naamunepa. Masololo tho anneererya waahuweliha achu wi emuchekele Muluku. Waavya yootaphulela mu ichu sa wirimu, ehako, masica, okhwiri, masenka, wiisaciherya annapaka makupa a olapela masololo. Aliivuru ancipale, irevista, ixilema, iruku, ophiyerya tho macipo, nave yaale aneerano ichu seiha anuupuwela wi tahi ichu soonanara. Mihapo mincipale sa ovitha muruchu, ntoko makeya, isatakha sa makhwelo, wuupuxerya nihiku na okhwa, mihapo sineeriwa wa anaamukhwele, ni meerelo makina, annavolowela tho oloca ni masololo. Wiiliwiili achu annawara ikhulula wi ekhaleno ikuru sa masololo.—Galasya 5:20; Wupulula 21:8.

▸ Mwaha 10, epar. 10; Mwaha 16, epar. 4

Yehova Muluku a Ikuru Soothene, nave ti yoowo opatunxe elapo yoothene. (Wupulula 15:3) Ti nthowa nene owo oreiye Mwaneene a ichu soothene nave owo ookhalano owerya wa olamulela soopatuxa sawe soothene. (Salumu 24:1; Isaiya 40:21-23; Wupulula 4:11) Owo ootikitherya malamulo wa echu yoothene opatunxeiye. Yehova tho ookhalano owerya wa waathanla akina wi ekhale alamuleli. Hiyaano ninnakhaviherya otokweene ni olamulelo wa Muluku vaavaa nnamusivelaahu ni omwiiwelela.—1 Matharihelo 29:11.

▸ Mwaha 11, epar. 10

Oyeeha erukulu echu eneeriwano mwaayiini wi muchu amwiiphe mwaana ohaakumve oyariwa. Ohiya onatannyiwa nthowa na asitenti naari echu ekina. Ovinyerya vaavaa mwaana onarupaliweiye, mwaana onakhalano ekumi yoovalaanyeya ni amannya.

▸ Mwaha 13, epar. 5

Ola mukhalelo wa oloola onavolowela opharihela nikhami noothene naari makupa aya maxexe oochuneya wi niheliwe mmwiilini mwa muchu nikumihiwaka mmwiili mwa muchu mukina naari ninlaathiwe. Makupa maxexe oochuneya a nikhami aniichaniwa Epalasma, Ikolopulo soophilivila, Ikolopulo saweela, ni Ipalaketa.

▸ Mwaha 13, epar. 13

Mpiipiliyani, masu awi “ikano” hanataphulela olaka naari ohooxa. Vaavaa nnavahiwaahu ekano, nnanvyakihiwa, ohusihiwa, ni wookololiwa. Yehova hantonko waavaha ekano moonanara yaale onaahusiheiye. (Masiposipo 4:1, 2) Yehova oovaha yootakiherya yaphaama wa asitiithi. Ikano owo onavaheiye ti soophwanelela ophiyerya wi muchu anasiveliwa ovahiwa ekano. (Masiposipo 12:1) Yehova onnaasivela achu awe, nave onnaavyakiha. Owo onnavaha mahusiheryo yaawo anookolola moonelo woonanara nave annaakhaviherya wuupuwela ni weera ichu inamuhakalaliha. Wa asitiithi, waavaha ekano anamwane aya, onavolowela waaleela mathoweene awo anaphwanelaaya okhala awiiwelela. Eyo tho enavolowela waahusiha awo omusivela Yehova, osivela masu awe Piipiliya, ni wiiwexexa malakiheryo awe.

▸ Mwaha 14, epar. 13

Iho soopatuxiwa soomunepani soohooneya, seiho iri soonanara nave ti sakuru waapwaha achu. Masololo ankeelo oonanara. Yaathatuwa okhala oonanara vaavaa yiipankaaya mukhataaya okhala amwiicani a Muluku moorweela wa ohimwiiwelela. (Maphatxuwelo 6:2; Yuda 6) Awo yaakhala vamoha ni Satana mu ommwareela Yehova.—Malamulo 32:17; Luka 8:30; Saweriwa T’arummwa 16:16; Tiyako 2:19.

▸ Mwaha 16, epar. 4