Wanaawiili, Aisarayeli yaamuhiya Yehova enaalapa amuluku akina. Mu iyaakha sincipale Amitiya yaawiiyerya axinama aya ni onanariha soolya saya. Wi yaachawe Amitiya, Aisarayeli yaaniipitha mmakhuku a miyaako. Yaamveka Yehova wi aavuluxe. Yehova aamuruma munkeelo wa mmiravo Kiteyoni. Munkeelo aaloca: ‘Apwiya ahoothanla wi okhale nakhoco oolipa murima ni awuupa.’ Kiteyoni aamukoha: ‘Kini kiwoopole ni eheeni Aisarayeli? Miyo tahi keechweenevo.’

Kiteyoni aahaala osuwela hai wi Yehova taamuthanlile? Owo aakuha esapala vachayani nave aloca wa Yehova: ‘Nikami namorela vasapalani pahiru echaya yoothene eri yawuuma kinamusuwela wi kinamvuluxa nloko na Isarayeli ntoko muloncaanyu.’ Mmeeloni mwaya esapala eyo yaasareya nikami nto echaya yaari yawuuma! Nyenya Kiteyoni aaveka wi oxaakavo, esapalaru eyo ekhale yawuuma nave echaya enaane. Vaavaa yeeren’yaaya, Kiteyoni aaroromela wi Yehova aamuthanla. Owo aahaathukumanya anakhoco awe wi awane ni Amitiya.

 Yehova aahi wa Kiteyoni: ‘Kinamoovaha ovootha. Achu oryaaweno aatepa waaca. Mwavootha munamuloca wi munnatepa wuupa. Vano waaleele achu oothene wi yoole ori awoova ni oothukumela akooke.’ Mwawiihiiha anakhoco 22.000 yaakookela owaani ehala achu 10.000. Voocharela Yehova aaloca: ‘Nivano aatepa waaca, waakerihe oluusi nave waphiya weiwo, kinamwaathanla. Waathanle yaale eni ewuryeke maahi ni matata aya yiireheryaka wa amwiicani, ohaakuxe yaale anawurya ekokhonre.’ Pahiru alopwana 300 ti yaari awiilipelela. Yehova aaroromeliha wi achu yaala vakhaani yaahaala waavootha anakhoco 135.000 a Mitiya.

Ohiyu yoole, Yehova aaloca ni Kiteyoni: ‘Vinya, ocuphele misakala ntakhara kooveleela mmatani mwaa!’ Kiteyoni aahaavaha achu awe mapeka ni ipiya itokweene erimo epanthi. Owo aaloca: ‘Mutakiheryeke yeeyo kinayaaka weerano.’ Kiteyoni aarumiha nipeka, aapwesa epiya awe, aacukhulela osulu epanthi awe nave aakhuwela: ‘Ikuru sa Apwiya ni sa Kiteyoni!’ Alopwana oothene 300 yaamutakiherya. Amitiya yaahaleela yaweera nave yaapacerya ochawa ehisuwelaka anayaayawo. Yaapacerya wiiphana. Mwawiihiiha Yehova aahaakhaviherya Aisarayeli waavootha amwiicani aya.