Farawo amanle oweemererya Aisarayeli okhuma Oyikuputu, owo aatoroka muupuwelo awe wi aakookihe. Aahaalamulela akhoco awe ariki: ‘Nirehererye ikaaro sa ekhoco wi naachimakele! Hinikhalano anamuteko awo yapwaha.’ Owo ni achu awe yaapacerya waachimakela.

Yehova aanaahoolela achu awe, aanapharihela neeku othana nave ohiyu aanapharihela mooro. Aahaahoolela ophiyerya Ephareya Yooxeerya nave aaleela wi ehaye vaavaa.

Aisarayeli yaamoona Farawo ni akhoco awe yaachimakelaka. Awo yaari variyari ohoolo ephareya nave oculi akhoco a Farawo. Awo yaakhuwela wa Mose eriki: ‘Vano nnahaala wiiphiwa! Onikuxeryewo eheeni Oyikuputu?’ Mose aahaakhula: ‘Muhoove! Mulipihe murima, munamoona olelo echu Apwiya anayaaya weera wi yoovuluxeeni.’ Mose aanamuroromela Yehova, tahi yeeyo?

Yehova aahaaleela Aisarayeli wi ecimule. Ohiyu yoole, Yehova aahela neeku variyari va Ayikuputu ni Aisarayeli. Wa Ayikuputu yaayaayawo yaariwo epiiphi. Nyenya Aisarayeli yaayaayawo yaariwo ekamaama.

Yehova aaloca ni Mose wi ookolele ntata nawe va ephareya. Yehova aaheeriha wi enavira echeku etokweene ohiyu woothene.  Ephareya yaakawanyeya nave saapakeya ixiri piili nave variyari va ixiri piili yaapakeyavo ephiro. Aisarayeli yaavira va echaya yawuuma elapuwela okhopela.

Akhoco a Farawo yaahaachara Aisarayeli vaavaa yaavinraaya. Yehova aaheeriha wi akhoco ekhale oohaleeliheya. Maseko a ikaaro yaapacerya okhuleya. Akhoco yaakhuwela eriki: ‘Nichawemo muumu! Apwiya ari ni yaawo ewanaka ni hiyaano.’

Yehova aamuleela Mose ariki: ‘Wuuluule wookolela moono ephareya.’ Elukuluku emoharu maahi yaakumana yaamirya anakhoco a Farawo. Farawo ni achu awe oothene yaakhwa. Haavo mmoharu mano aakophonle.

Eri makupa makina a ephareya, Aisarayeli yaapacerya omuthamala Muluku ni macipo eriki: ‘Niwiipele Apwiya ncipo awo aavootha ni ovuwa otokotoko. Aarihela mphareya ikavalo ni alipa oowela seiho.’ Achu akina yiipaka, athiyana yaaniina ni wiipa ikoma. Yaatepa ohakalala nthowa na woopoliwa waya.