Evinre mahiku khumi Yesu akele wirimu, oohuserya awe yaahaakhela munepa waweela. Eyo yeeren’ye mu Pentekoste a 33 E.K., nave achu a ilapo sincipale yaaya o Yerusalemu wi emuchapele Pentekoste. Weiwo yaakhalawo oohuserya 120 a Yesu yaathukumanne mpa. Mootutuxa yaaheereya echu yootikhiniha. Echu ntoko nikalume naamorela vamuru wa oohuserya oothene, nave epacerya oloca ilocelo soohiyanahiyana. Onyakula waasareya mpa moothemwene.

Alipa ooxekurya yaakhumme makupa makina eyaaka o Yerusalemu, yaaniiwa onyakula nave echimakela mpa wi esuwele tiheeni yeereya. Awo yaatikhiniheya owiiwa oohuserya elocaka elocelo aya. Awo yaaloca: ‘Achu ala ta o Kalileya. Onaweryeya hai oloca elocelo ahu?’

Petro ni akina yaaheemela ohoolo wa nikhuuru. Petro aahaatharihela achu mukhalelo Yesu iiphiweiye ni Yehova omviiha  wawe mookhwani. Petro aaloca: ‘Hiihaano Yesu ori wirimu omoono woolopwana wa Muluku, nave oheelihiwa ni munepa waweela. Ntakhara nyuwo mohoona ni mohiiwa sootikhiniha.’

Achu yaatikhiniheya ni masu a Petro nave emukoha: ‘Vano nnaphwanela weera eheeni?’ Owo aawaakhula: ‘Murukunuxe murima nave muchu ti muchu aakhele opatiso mwa nsina na Yesu. Hiiha munanwerya waakhela mahala a munepa waweela.’ Nihiku nenle yaapatisiwa achu 3.000. Ovinyerya elukuluku yeele, oohuserya a Yesu yaapacerya waaceereryeya mwawaakuveya o Yerusalemu. Nnikhaviheryo na munepa waweela, arummwa yaapaka miloko, mummo yaanaahusiha oohuserya ichu soothene Yesu aaleenleiye.