Mulopwana yoowo aari oorakala, aanakiraathi mahiku oothene vamulako wa empa ya Muluku. Nihiku nikina, aamoona Petro ni Yohani evolowaka mu empa ya Muluku. Owo aaloca wa yaawo: ‘Mukivahe ikhorowa.’ Petro aamwaakhula: ‘Kinnoovaha yeeyo kiryaakano ohiya ikhorowa. Mwa nsina na Yesu weeceke!’ Petro aamweemexa mulopwana nave apacerya weeca! Muloko wa achu woonnaaya yootikhiniha yeele, achu ancipale yaapacerya ororomela.

Nyenya alipa eephepa ni Asatuki yaananariwa. Yaahaakuxa arummwa yaakeriha wa alamuleli, nave enaathoriha eriki: ‘Taani oovanheni ikuru sa ompenuxano mulopwana ola?’ Petro aawaakhula: ‘Naakhenle ikuru sa Yesu Kristu, yoowo mmwiphalaanyu.’ Ahooleli a ikerexa yaakhuwela: ‘Muhiloce tho sa Yesu!’ Nyenya arummwa yaahaakhula: ‘Hiyo hinnawerya omaala oloca ichu noonnaahu ni niiwalaahu.’

Vaavaa Petro ni Yohani yaataphuliwaaya, awo yaaya wa oohuserya akina nave yaaleela echu yeeren’ye. Awo yaavekela vamoha emvekaka Yehova: ‘Khwoo munikhaviherye wi ntitelele ophara muteko anyu.’ Yehova aahaavaha munepa waweela, nave yaatitelela olaleerya ni openuxa. Achu yaapacerya ororomela. Asatuki yaakhalano nrima epacerya waahooxa arummwa ni yaawalela mukalaposo. Ohiyu, Yehova aamuruma munkeelo, owo aahula mukhora nave aloca wa arummwa: ‘Haweni o Yerusalemu wi mwahusihe.’

Wooxixelo ene, o Sineetriyu, mutokweene a ahooleli a ikerexa aaloca: ‘Alopwana mwawalenlaanyu mukalaposo ari mpa mwa Muluku ehusihaka nloko na achu.’ Voocharela arummwa yaahooxiwa ekerihiwa o Sineetriyu.  Mutokweene aalipa eephepa aahaaleela: ‘Moohiiheriwa ohusiha nsina nenlo.’ Nyenya Petro aahaakhula: ‘Ennakhweleya omwiiwelela Muluku waapwaha achu.’

Ahooleli a ikerexa yaatepa onanariwa enachuna owiipha arummwa. Nyenya Nfarisi mmoha awiichaniwa Kamaliyeli aavinya apacerya oloca: ‘Eparipari wi Muluku taarumme achu ala. Nyuwaano munachuna owana ni Muluku?’ Awo yaamwiiwelela. Emanle waamana arummwa, yaahaalamulela wi ehiye olaleerya. Nyenya awo hiyaahin’ye, yaatitelela olaleerya michaka yaphaama, mu empa ya Muluku ni echoko ni echoko.