Ti wookhweya elukuluku yoothene owiiwelela asitiithi aa?— Ikwaha ikina ti woovila. We waasuwela wi Yesu aari awiiwelela wa Yehova ni asitiithi awe?— Yootakiherya awe poti wookhaviherya owiiwelela asitiithi aa naamwi ori woovila. Haya nihuserye sincipale vooloca sa yeela.

Ahaakumve orwa veelapo yavathi, Yesu aari ni atiithi awe, Yehova, wirimu. Nnya Yesu aakhalano tho asitiithi awe veelaponi yeela yavathi. Masina aya yaari Yoosefe ni Mariya. We woosuwela ti mwawiihai awo yaakhanlaaya asitiithi awe?—

Yehova aakuxa okumi wa Yesu wirimu nave aakuha mmirimani mwa Mariya nave Yesu aawerya oyariwa ni okhala veelapo yavathi. Ela yaari yootikiniha! Yesu aahinnuwa mmirimani mwa Mariya sintoko anamwane akina aninnuwaaya mmirimani mwa amamaaya. Ivinre miyeeri mithanu naxexe muhoolo, Yesu aayariwa. Ti hiihaa Mariya ni aiyawe Yoosefe yaakhanlaaya asitiithi a Yesu veelapo yeela yavathi.

Vaavaa Yesu aareiyeno iyaakha khumi napiili sa oyariwa, owo aaheera echu yoonihenrye wi aanaasivela vancipale Atiithi awe, Yehova. Ela yeeren’ye vaavaa Yesu ni emusi awe yeencaaya mukwaha woorekama eyaaka o Yerusalemu o Paskha. Ekookelaka owaani, Yoosefe ni Mariya hiyaawerya omphwanya Yesu voothevene. We onnasuwela ti woowi Yesu aareiyewo?—

Yoosefe ni Mariya yaakookela o Yerusalemu ni omwaavya Yesu mapuro oothene. Awo yaathanana ntakhara hiyawenrye omphwanya. Nnya emanle mahiku mararu, yaamphwanya yoowo mu empa ya Muluku! We onnasuwela ntakhara heeni Yesu aahanleiye mu empa ya Muluku?— Ntakhara mummo owo anwerya ohuserya vooloca sa Atiithi awe, Yehova. Yesu aanamusivela Yehova nave aachuna ohuserya mukhalelo aahaaleiye omuhakalaliha. Naamwi aakhanle mutokweene, ilukuluku soothene Yesu anamwiiwelela Yehova. Yesu aaniiwelela naamwi waari woovila wa yoowo naamwi eyo yaataphulela woona ekoi. Apwanne Yesu anamwiiwelela tho Yoosefe ni Mariya?— Aayi, Piipiliya onnaloca wi owo aaneerano.

Tiheeni onaweryaawe ohuserya orweela wa yootakiherya ya Yesu?— Ti yoochuneya wi we onawiiwelela asitiithi aa naamwi ori woovila. We onahaala weerano yeela?—