1, 2. Ntakhara heeni epuusula ekaruma yookhweleya, nave ti mwawiihai enanwerya olikanyihiwa ni yawuupuxerya-ya-murima?

MULIPA oomweeciha pophoro onnamweeciha pophoro awe ahoolelaka macumuca mancipale a eniya etokweene; mulipa aweeca onnapaka mukwaha mutokweene ni wookacamiha mutakhwani; mulipa aweeciha nceeke onneeciha nceeke nawe osulu wa mahuruku. Nyuwaano moosuwela yeeyo enaahoolela achu oothene yaala? Mmoha ti mmoha a yaala ahaala orimeela waakhanle wi haanono epuusula.

² Epuusula ekaruma yookhweya, ennakhalano yawooniherya ni sikano yoowo onathoonya omokoni. Wakhala wi ennalapa phaama, xaxaxa wakhala wi eyo ennaphariheliwa ni maapa awaakhwanela, enanwerya ovuluxa ikumi. Moophwanaphwana, enanwerya olikanyihiwa ni yamahala yasisapo yeeyo Yehova onivanheiye—yawuupuxerya-ya-murima. (Yakopo 1:17) Nahirino yawuupuxerya-ya-murima, naahaala orimeela moomalela. Yaaphariheliwa phaama, yawuupuxerya-ya-murima  enanwerya onikhaviherya ophwanya ephiro yaphaama ya okumi ni otitelela ochara yeeyo. Vano haya nthokororye, yawuupuxerya-ya-murima tiheeni nave enalapa hai. Voocharela nnahaala othokororya miyaha iha: (1) Yawuupuxerya-ya-murima enavyakihiwa hai, (2) ntakhara heeni ninnaphwanela othokororya yawuupuxerya-ya-murima ya akina, ni (3) yawuupuxerya-ya-murima yaphaama enaruuha hai mareeliho.

3. Yootaphulela taani yookwakwaleya ya nsu na Ekiriki “yawupusherya-ya-murima,” nave mukhalelo taani wa vameekhaaya eryaayano mwa achu?

³ Mpiipiliyani, nsu na Ekiriki “yawupusherya-ya-murima” nnataphulela “osuwela ori mpuwa mwanyu.” Moohiyana ni soopatuxiwa soothene sa veelaponi ya vathi, Muluku oonivaha owerya wa wiisuwela mukhatiihu. Nnanwerya weemela, ni wiisaalikhela mukhatiihu ni othokororya meecelo ahu. Elapaka ntoko namoona naari muthoriha mpuwa mwahu, yawuupuxerya-ya-murima ahu enanwerya waalikhela saweera sahu, moonelo ahu, ni soothanla sahu. Eyo enanwerya onihoolela opaka soothanla saphaama ni onilopola vooloca sa soothanla soonanara. Voocharela, yawuupuxerya-ya-murima enanwerya onihakararya napaka soothanla saphaama naari onithoriha napaka soonanara.

4, 5. (a) Nnasuwela hai wi Aatamu ni Haava oopiili yaakhalano yawuupuxerya-ya-murima, nave tiheeni yaakhumelenle nthowa na ohiiwelela nlamulo na Muluku? (b) Yootakiherya taani enooniherya wi alopwana oororomeleya akhalai yaawiriyana yawuupuxerya-ya-murima aya?

⁴ Mukhalelo ola aavahiwa mulopwana ni muthiyana vaavaa yaapatuxiwaaya. Aatamu ni Haava yaahooniherya wi yaakhalano yawuupuxerya-ya-murima. Ninnasuwela yeeyo, nthowa nawi emanle ocheka yaahuuliwa muru. (Mapacereryo 3:7, 8) Moothananiha, yawuupuxerya-ya-murima yoolimela hiyaahaala waakhaviherya mu elukuluku yeele. Mwaayiini awo yaathanla ohiiwelela nlamulo na Muluku. Moolakelela yaathanla omwiica ni ommwaryeela Yehova Muluku. Ntoko achu oophaameya,  yaanasuwela yeeyo yaapakaaya, nave hiwaari wooweryeya okookela muculi.

⁵ Moohiyana ni Aatamu ni Haava, achu ancipale oohiphaameya, annawiriyana yawuupuxerya-ya-murima aya. Ntoko yootakiherya, Yupu mulopwana a nroromelo aaphiyerya oloca: “Nkinahiyererya olotxa wi kiri òhitxeka, ntakhara murima aka hontonko okitxutxha.” * (Yobi 27:6, BNM) Yupu aanikasoopa wi awiriyane yawuupuxerya-ya-murima awe, eemereryaka wi ehoolele saweera ni soothanla sawe. Mwawiihiiha, owo anwerya oloca ni ohakalala weeparipari wi yawuupuxerya-ya-murima awe hiyaamuhooxa naari omuthoriha, moorweela wa wuuliwa muru ni nthowa. Moone ohiyana orivovo variyari va Yupu ni Tavite. Vaavaa Tavite aayeleenleiye ncicimiho wa Sawuli, Mwene aathanliwe ti Yehova, “murima wàtepa omwìna wa nthowa na okwasa niveru na yowara ya Sawuli.” (1 Samuwele 24:6, BNM) Moonelo yoowo wa okhalano nthowa waamukhaviherya Tavite, omuhusihaka wi ahikookele oyeleela ncicimiho omwaahiyu.

6. Tiheeni enooniherya wi yawuupuxerya-ya-murima yamahala evahiwe achu oothene?

⁶ Apwanne yamahala yeela ya yawuupuxerya-ya-murima avahiwe pahiru akapuro a Yehova? Muthokororye masu ooveereliwa a murummwa Paulo: “Ntoko amalapo yawo ehinakhalano nlamulo, ennera mwa mekhaya sa nlamulo, yawo nari ehikhanleno nlamulo, enníkhalela mekhaya ntoko nlamlo; vawi yawo ennoniha muteko wa nlamulo nlo worempwa m’murima mwaya, nave oléla-wa-murima waya onnerelatho namona vamoha ni yawo, nave sawupuwelela saya mukina ni mukhwawe ennahelelana nari ennarunelana.” (Aroma 2:14, 15) Naari yaale ahisuwenle malamulo a Yehova ilukuluku ikina annawerya  ohooleliwa ni yawuupuxerya-ya-murima eri mpuwa mwaya, weera mwawiiwanana ni malakiheryo a Yehova.

7. Ntakhara heeni ikwaha ikina yawuupuxerya-ya-murima ahu enanwerya oniwoka?

⁷ Ikwaha ikina, yawuupuxerya-ya-murima ahu enanwerya oniwoka. Ntakhara heeni? Phaameene, wakhala wi epuusula yoohaacamela muthipo, eyo enahaala ohiya othoonyaka omokoni. Naari wakhala wi epuusula enaphariheliwa ni maapa ahiri awaakhwanela, epuusula heni emukhaviherye mulipa aweeca. Moophwanaphwana, wakhala wi minkhela sa mwiili ni soochuna sa murima ahu soonivolowela, yawuupuxerya-ya-murima ahu enahaala onthoonyeryaka ephiro yoonanara. Nave wakhala wi enaphariheliwa ohirivo ohoolela weeparipari wa Masu a Muluku, akhweya hiniwerya osuwela ohiyana orivovo variyari va yaphaama ni yoonanara, vooloca sa miyaha soochuneya. Vanthowa na yeela, wi yawuupuxerya-ya-murima ahu elapeke phaama, ninnachuna ohooleliwa ni munepa waweela wa Yehova. Paulo aarepa: “Yawupusherya-aka-ya-murima ennerela namona vamoha ni miyo mwa munepa.” (Aroma 9:1) Mano, tiheeni nnaphwanelaahu weera wi yawuupuxerya-ya-murima ahu elapeke mwawiiwanana ni munepa waweela wa Yehova? Eyo enaphwanela ovyakihiwa.

8. (a) Murima onavolowela hai yawuupuxerya-ya-murima, nave tiheeni nnaphwanelaahu othokororya vancipale mu soothanla sahu? (b) Ntakhara heeni Mukiristu hanaphwanela wuupuwela wi okhalano yawuupuxerya-ya-murima yaphaama pahiru ennaakhwanela? (Moone masu a vathi.)

⁸ Munapaka hai yoothanla enathipeleya mu yawuupuxerya-ya-murima? Achu akina, pahiru anaweha mpuwa mwaya, yaalikhela moonelo ni muupuwelo aya, nave elakelela yeeyo anahaalaaya opaka. Voocharela akhweya annaloca, “Phaameene, ela henaakanyerya yawuupuxerya-ya-murima aka.” soochuna sa murima inanwerya okhala soolipa, ophiyerya ovolowela yawuupuxerya-ya-murima. Piipiliya onnaloca: “Murima onnatepa wòtotha ophwaha etxhu ekina: honalakeya. Tani onawerya osuwela onatxhunaya?” (Yeremiya 17:9) Yeeyo murima  ahu onachunaaya, hinnaphwanela othokororyaxa vancipale. Opwaha yeeyo, nnaphwanela othokororya woopaceryani yeeyo enahaala omuhakalaliha Yehova Muluku. *

9. Woova wa ncicimiho tiheeni, nave onavolowela hai yawuupuxerya-ya-murima ahu?

⁹ Wakhala wi soolakelela sahu inahooleliwa ni yawuupuxerya-ya-murima ahu yoovyakihiwa, eyo enahaala wooniherya wi ninnamoova Muluku, ohiya soochuna sahu. Muthokororye yootakiherya enooniherya phaama mwaha yoola. Nehemiya, mulamuleli a nroromelo, aakhalano owerya oliviha musokho wa achu Ooyeerusalemo. Nyenya owo heenreno. Ntakhara heeni? Ntakhara haachuna omuchekela Yehova moorweela wa ohooxa nloko na Muluku. Owo aaloca: “Nto miyaano nkeenre yeeyo wa nthowa na omoova Muluku.” (Nehemiya 5:15, BNM) Woova wa ncicimiho ti woochuneya, woova omuchekela Tiithi ahu a wirimu. Woova wa ncicimiho onnanikhaviherya waavya ohoolela wa Masu a Muluku vaavaa nnapaka ahu soothanla.

10, 11. Malakiheryo taani a Piipiliya anaphariheleya ni owurya soohapala, nave nnii niphwanye hai ohoolela wa Muluku wi nipharihele muteko?

¹⁰ Ntoko yootakiherya, muthokororye mwaha wa soowurya soohapala. Mmithukumano sa othata, ancipale a hiyo ninnaphwanela opaka yoothanla: Kinnaphwanela owurya, naari hooye? Woopaceryani, hiyaano nnaphwanela wiilaka mukhatiihu. Taavi ari malakiheryo a Muluku vooloca sa mwaha yoola? Chiryene, Piipiliya hanawatiiha owurya woophimelela. Owo onnamuloca viinyu ntoko yoovaha ya Yehova. (Salmo 104:14, 15) Mwawiihiiha, Piipiliya onnawatiiha olyoolya ni ohapaliwa. (Luka 21:34; Aroma 13:13) Opwaha yeeyo, Piipiliya onnaphitaanyerya ohapaliwa ni soocheka ikina itokotoko, ntoko ocapaheya ni oraruwa. *—1 Akorinto 6:9, 10.

 ¹¹ Yawuupuxerya-ya-murima ya mukiristu enavyakihiwa ni malakiheryo a Mpiipiliyani enniiwelela yaawo. Mwawiihiiha, vaavaa nnapakaahu yoothanla vooloca sa owurya va mithukumano sa othata, hiyaano nnaphwanela wiikoha mukhatiihu makoho ntoko ala: ‘Mukhalelo taani wa muthukumano onareheryiwa? Apwanne onahaala opwaha mphimo ophiyerya okhale olyoolya? Kinnathitimanela owurya vancipale? Murima aka onnakuukucha wi kiwurye? Okumi aka onahooleliwa pahiru ni yoowurya? Kinampharihela viinyu wi kihoolele meecelo aka? Kinnawerya wiihiiha wi kihivirelele mphimo?’ Vaavaa nnuupuwelelaahu malakiheryo a Piipiliya ni makoho anakhumelela, nnaphwanela waavya ohoolela wa Yehova orweela mmavekelo. (Mwaalakhanye Salmo 139:23, 24.) Weerano hiiha, nnahaala omvekaka Yehova wi anihoolele ni munepa awe waweela. Nnahaala tho ovyakihaka yawuupuxerya-ya-murima ahu wi elapeke mwawiiwanana ni malakiheryo oomuluku. Nyenya sookhalavo tho ichu ikina inaphwanela ohoolela soothanla sahu.

12, 13. Mathowa taani aneeriha wi moonelo wa Akiristu okhale woohiyana mmiyaha sa yawuupuxerya-ya-murima, nave nnii nivoothe hai?

¹² Ikwaha ikina munnawerya otikhiniheya mukhatiinyu nthowa na ohiyana wa moonelo wa Akiristu vooloca sa miyaha sa yawuupuxerya-ya-murima. Muchu mukina onanwerya woona okhala yooheemereryeya yaaweera ni yookhovelela, mukina onnasiveliwa ni yeeyo nave hanoona okhala yooheemereryeya. Ntoko yootakiherya, mmwaha wa owurya mmithukumano sa othata, muchu mukina akhweya onanwerya woona okhala yaphaama owurya ni asinthamwene awe vaavaa anachekulaaya omakuchuwelo wa nihiku; nave mukina hanoona okhala yaphaama. Ntakhara heeni oryaayavo ohiyana wuuwu, nave onii ovolowele hai soothanla sahu?

¹³ Achu annahiyana ni mathowa mancipale. Mikhalelo sa muchu ori oothene ti soohiyana mwawiiwanana nnipuro oyariweiyewo. Ntoko yootakiherya, akina annasuwela chiryene wi aakhalano  soocheeceya saya seiho yaawannaayano khalai—akhweya hiyaakhumelenle phaama. (1 Mamwene 8:38, 39) Wakhala wi mwaha wa soowurya soohapala, akhweya yawuupuxerya-ya-murima ya achu yaawo enahaala owuukhula vancipale. Wakhala wi muchu ori mmukhalelo yoowo, oorwa vaate vanyu nave nyuwaano mumvaha eviinyu, akhweya yawuupuxerya-ya-murima awe, ni mathowa oophwanelela hanii eemererye. Nyuwaano munahaala onanariwa? Munahaala omutiteleliha? Hooye. Musuwelaka naari hooye mathowa a muchu yoowo—akhweya olakelenle ohiloca—osivela weekiristu onahaala oweerihaani ocicimiha yoothanla awe.

14, 15. Ohiyana taani waarivovo mmwaha wa yawuupuxerya-ya-murima ya Akiristu a nsana noopacerya, nave ekano taani Paulo aavanheiye?

¹⁴ Murummwa Paulo aahoona wi yawuupuxerya-ya-murima ya Akiristu a nsana noopacerya yaanahiyana. Ntoko yootakiherya, mu elukuluku yeele Akiristu akina yaanakhala awuukhuwa ni soolya seiho saaveleeliwa wa amuluku oopachiwa. (1 Akorinto 10:25) Yawuupuxerya-ya-murima ya Paulo yaanamweemererya olya soolya seiho saatumihiwa omusikani. Wa yoowo, soopachiwa hisaari echu; vawi hiwaari wooweryeya wi yoolya ekhale ya soopachiwa ntakhara soolya sipatuxiwe ni Yehova nave soothene sinarweela wa yoowo. Naamwi hiiha, Paulo aasuwela wi tahi wi oothene yaarino moonelo mmohamoha. Akhweya akina, ehaakumve okhala Akiristu yaanalapela soophwaniherya. Wa yaawo, echu vyakala, naamwi ehivolowelaka soophwaniherya moomalela, yaakhala yoothanyeya. Paulo aahaala omaliha mwawiihai mwaha yoola?

¹⁵ Owo aaloca: “Nave hiyo yehu n’ri awúpa ninnaphwanela otesha sokhulumuwa saya sa alipa-ochétcheya, ni ohítheyiha mekhihu. Vawi Kristutho hítheyihale mekhiye.” (Aroma 15:1, 3) Paulo aahooniherya wi nnaphwanela okuha soochuna sa annihu ohoolo wa soochuna sahu, hiiha ntoko Yesu enreiye. Mu othokororya okina wa mwaha yoola, Paulo aaloca wi yaahaala okhala yaphaama ohikuura emece opwaha okwaculiha epucepuche yoochuneya yeeyo Kiristu aaveleelenleiye okumi awe.—Mwaalakhanye 1 Akorinto 8:13; 10:23, 24, 31-33.

16. Ntakhara heeni yaale arino yawuupuxerya-ya-murima yooceecheya, hanaphwanela waathoriha yaale arino yawuupuxerya-ya-murima yoohiyana?

 ¹⁶ Mmukhalelo mukina, yaale arino yawuupuxerya-ya-murima yooceecheya, hanaphwanela owaakaaha akina, echunaka wi oothene yooneke ichu mmukhalelo woolikana ni yaawo. (Mwaalakhanye Aroma 14:10.) Chiryene, ti yaphaama opharihela yawuupuxerya-ya-murima wi niithorihe mukhatiihu, ohiya waathoriha akina. Muupuwele masu a Yesu: “Muhithoriheke wi muhithorihiwe.” (Mateyu 7:1, BNM) Oothene mmulokoni anaphwanela osepa waakaaha miyaha inavolowela yawuupuxerya-ya-murima. Opwaha yeeyo, nnaphwanela waavya meerelo anaaceererya osivela ni wiiwanana, nlipihanaka mukina ni mukhwaawe, ohiya oceecheihana.—Aroma 14:19.

17. Tiheeni eneereya ni yawuupuxerya-ya-murima ya ancipale olelo?

¹⁷ Murummwa Petro aarepa: “Okhalano yawupusherya-yaphama-ya-murima.” (1 Petro 3:16) Okhalano yawuupuxerya-ya-murima yaphaama vamiithoni va Yehova Muluku mareeliho matokweene. Ancipale olelo, haanono yawuupuxerya-ya-murima yaphaama. Paulo aahaaloca yaawo wi ari “óhisiwa mu yawupusherya-ya-murima aya ntoko ni muthipo wa moro.” (1 Timoteo 4:2) Muthipo woohisano, onnahisa mwiili, ohiyaka maharipa ni oceecheya. Ancipale, arino yawuupuxerya-ya-murima yookhweene—Yoosareya maharipa ni yooceecheya ehinawerya olopola, ehinakhooca echu naari ehinathoriha, ehinuuliwa muru variyari va yoonanara. Ancipale olelo anoona yeela okhala yaphaama.

18, 19. (a) Moonelo wa okhalano nthowa ni wuuliwa muru onanikhaviherya hai? (b) Tiheeni nnaphwanelaahu weera wakhala wi yawuupuxerya-ya-murima ahu ennatitelela onihooxa ni soocheka ncharunwaahu?

 ¹⁸ Mweeparipari moonelo wa okhalano nthowa onamukhala mukhalelo yoowo yawuupuxerya-ya-murima enanleelaaya wi noopaka yoonanara. Vaavaa moonelo yoowo onamweerihaaya mulipa oocheka ocharuwa, naamwi eri yoocheka etokotoko enanwerya okhurumuweliwa. Ntoko yootakiherya, Mwene Tavite, aapaka yoocheka etokotoko, nyenya owo aakhurumuweliwa moomalela nthowa na ocharuwa wawe weeparipari. Wiica wawe yoonanara ni olakelela wiiwelela malamulo a Yehova waamweeriha woona wi Yehova ti “aphama, ni óleva.” (Salmo 51:1-19; 86:5) Vano, nnii nloce hai, wakhala wi moonelo wa okhalano nthowa ni wuuliwa muru wootitelela nimanle ocharuwa ni okhurumuweliwa?

¹⁹ Ikwaha ikina, yawuupuxerya-ya-murima enanwerya omuthoriha ni omuhooxa mulipa oocheka, ni moonelo wa okhalano nthowa mu elukuluku yincipale, omanle omukhaviherya. Mmikhalelo seiha, nnaphwanela okhapelela murima ahu onanithoriha, wi Yehova mutokweene opwaha moonelo wa achu. Nnaphwanela weemererya osivela wawe ni okhurumuwela wawe, hiiha ntoko nnaaceenyeryaahu akina weera. (Mwaalakhanye 1 Yohane 3:19, 20.) Mmukhalelo mukina, yawuupuxerya-ya-murima yaphaama ennaruuha murecele wa mpuwa, ohuukhuwa ni ohakalala otokweene yoowo ori woovila ophwanya mu elapo yeela. Ancipale yaawo yiivolihenrye mu soocheka itokotoko, ahoona otaphuwa wootikhiniha, nave hiihaano annamurumeela Yehova Muluku ni yawuupuxerya-ya-murima yaphaama.—1 Akorinto 6:11.

20, 21. (a) Tiivi eri yoolakelela ya liivuru ola? (b) Ntoko Akiristu, oneethi taani nryaahuno, nave nnii nipharihele hai?

²⁰ Liivuru ola opakiwe wi ookhaviheryeeni ophwanya ohakalala, moorweela wa okhalano yawuupuxerya-ya-murima yaphaama vaavaa nnakhalaahu mmahiku yaala ookuchula a mukhalelo yoola wa Satana. Mweeparipari, hori wooweryeya orepela malakiheryo ni malamulo oothene a Piipiliya yaawo munaphwanelaanyu opharihela nihiku nnihiku. Opwaha yeeyo, hiyaano hinnaweherya ikano sookhweya naari sooluluwanya vooloca sa miyaha inavolowela yawuupuxerya-ya-murima. Yoolakelela ya liivuru ola ori wookhaviheryaani  ovyakiha yawuupuxerya-ya-murima anyu moorweela wa ohuserya mukhalelo wa opharihela Masu a Muluku mu okumi wa nihiku nnihiku. Moohiyana ni Nlamulo na Moose “malamulo a Kristu” annaaceenyerya yaawo anachara ehooleliweke ni yawuupuxerya-ya-murima ni malakiheryo, ohiya ni malamulo oorempwa. (Akalatiya 6:2) Mwawiihiiha, Yehova onnaavaha Akiristu oneethi wawooneya. Nyenya masu awe annanuupuxerya wi nihipharihele oneethi naari otaphuwa “ntoko wokhuwano sonanara.” (1 Petro 2:16) Opwaha yeeyo, otaphuwa onnanivaha ekari yootikhiniha ya wooniherya osivela wahu wa Yehova.

²¹ Moorweela wa othokororya ni mavekelo mukhalelo wa opharihela phaama malakiheryo a Piipiliya mu okumi anyu, ni opaka soothanla, nyuwaano munahaala otitelela ochara mukhalelo woochuneya yoowo waapacenrye vaavaa mwaapacenryaanyu omusuwela Yehova. “Masuwelelo” anyu anahaala ovyakihiwa “vaweranosha.” (Ahebri 5:14) Yawuupuxerya-ya-murima anyu yoovyakihiwa ni Piipiliya enahaala okhala mareeliho wa nyuwaano mahiku oothene a okumi anyu. Ntoko epuusula enamuhoolela mulipa aweeca, yawuupuxerya-ya-murima anyu enahaala wookhaviheryaani opaka soothanla sinamuhakalaliha Tiithi anyu a wirimu. Ola mukhalelo waphaama wa wiikhapelela mu osivela wa Muluku.