Yesu Muru wa muloko. (Éfeso 5:23) Olelo, owo ori wirimu nave ovinyerya weiwo onnavahererya ohoolela wa omuchara awe veelaponi ya vathi orweela wa “namuteko oororomeleya ni a miruku.” (Mwaalakhanye Mateu 24:45.) Yesu oomuthanla “namuteko” yoola nave oomvaha owerya wa opaka soolakelela sikina. Naamwi arino owerya yoola, namuteko onnamurumeela Kristu ni asinnawe. Namuteko oororomeleya ni a miruku taani? Owo onanikhapelela hayi?

1. “Namuteko oororomeleya ni a miruku” taani?

Ovinyerya khalai Yehova onnampharihela mulopwana naari nikhuuru nikhaani na alopwana wi avahererye ohoolela wa muloko awe. (Malakiya 2:7; Ahebri 1:1) Yesu amanle okhwa, arummwa ni asitokweene o Yerusalemu tiyaahoolela. (Saweriwa T’arummwa 15:2) Emohamoha enneereya tho olelo. Yehova onnapharihela nikhuuru nikhaani na asitokweene wi evahererye yoolya yoomunepani ni ohoolela muteko woolaleerya. Nikhuuru nenla, ti Nikhuuru Noolamulela na Anamoona a Yehova. Awo tari ‘namuteko oororomeleya ni a miruku yoowo pwiyawe [Yesu] omuthanlileiye’ wi aphare muteko yoola. (Mateu 24:45a) Anna oothene a Nikhuuru Noolamulela, Akristu oothanliwa ni munepa waweela. Okumi aya omanle okuchuwa veelaponi, awo anaya olamulela ni Yesu wirimu.

2. Ti mwawiihai namuteko oororomeleya onavahereryeiye yoolya yoomunepani wa nloko na Yehova?

Yesu aaloca wi namuteko oororomeleya ‘aahaala waavahereryaka yoolya [oomuchara a Kristu] mu elukuluku yoophwanelela.’ (Mateu 24:45b) Hiihaa ntoko yoolya enanikhaviheryaaya okhalano ikuru ni okumi waphaama, yoolya yoomunepani (mahusiheryo a Masu a Muluku) ennanivaha ikuru nnachunaahu wi ntitelele okhala oororomeleya wa Yehova ni ophara muteko yoowo Yesu onivanheiye. (1 Timóteo 4:6) Ninnaakhela yoolya yeela yoomunepani orweela mmithukumano sa muloko, sa ekulucu, sa muceche, nave tho moorweela wa soolaleeryiwa ni ixilema inathipeleya Mpiipiliyani. Yoolya yoothene yeela ennanikhaviherya wiiwexexa yookhwela ya Muluku ni olipiha onthamwene ahu ni yoowo.

 OHUSERYA MWAWIISEELA

3. Achu a Yehova anaphwanela okhala oorehereya

Ncharihaka ohoolela wa Yesu, Nikhuuru Noolamulela ninnarehererya muteko wa Anamoona a Yehova. Echu emohamoha yaaneereya ni Akristu a mu nsana noopacerya. Moone EXILEMA.

Mwaalakhanye 1 Korinto 14:33, 40, nave voocharela muthokororye nikoho nla:

• Ti mwawiihai yoorepa yeela enooniheryaaya wi Yehova onnachuna wi Anamoona awe epakeke makupa a marehereryo?

4. Namuteko oororomeleya onnarehererya muteko ahu woolaleerya

Olaleerya waari muteko woochuneyaxa yoowo Akristu a mu nsana noopacerya yaapakaaya. Mwaalakhanye Saweriwa T’arummwa 8:14, 25, nave voocharela muthokororye makoho ala:

• Taani aahoolela muteko woolaleerya yoowo waapakiwa ni Akristu a mu nsana noopacerya?

• Apwanne Pedro ni Yohani yaaheemererya ohoolela waavahereriwe ni arummwa akina?

Muteko woochuneyaxa wa Nikhuuru Noolamulela ori ohoolela muteko woolaleerya. Moone EXILEMA.

 Yesu ooceenyerya wi ti woochuneyaxa olaleerya. Mwaalakhanye Marko 13:10, nave voocharela muthokororye makoho ala:

• Ntakhara heeni muteko woolaleerya ti woochuneyaxa wa Nikhuuru Noolamulela?

• Ntakhara heeni ninnachuna wi “namuteko ooromeleya ni a miruku” arehererye muteko yoola wa elapo yoothene?

5. Namuteko oororomeleya onnanivaha ohoolela

Nikhuuru Noolamulela ninnavahererya ohoolela wa Akristu orukurerya elapo. Awo analakelela hayi ohoolela yoowo onachuneya ovahiwa? Moone mukhalelo nikhuuru noolamulela na mu nsana noopacerya neeraayano. Mwaalakhanye Saweriwa T’arummwa 15:1, 2, voocharela muthokororye makoho ala:

• Tiheeni yaakumiherya makacamiho variyari va Akristu a mu nsana nopacerya?

• Taani Paulo, Parnape ni akina yaawaamvyaaya wi erehererye mwaha yoowo?

Mwaalakhanye Saweriwa T’arummwa 15:12-18, 23-29, nave voocharela muthokororye nikoho nla:

• Ehaakumve opaka yoolakelela, nikhuuru noolamulela mu elukuluku ya arummwa naanaavya ohoolela wa Muluku vooloca sa mwaha. Awo yeerano mwawiihai?—Moone iversikulu 12, 15, ni 28.

Mwaalakhanye Saweriwa T’arummwa 15:30, 31 ni 16:4, 5, nave voocharela muthokororye makoho ala:

• Apwanne Akristu a mu nsana noopacerya yaaheemererya ohoolela waavahereryiwe nnikhuuru noolamulela na elukuluku yeele?

• Yehova aareelinhe hai wiiwelela waya?

Mwaalakhanye 2 Timóteo 3:16 ni Tiyako 1:5, nave voocharela muthokororye nikoho nla:

• Nikhuuru Noolamulela na mmahiku ahu nnapaka hai soolakelela?

 MUKWASU

Nikhuuru Noolamulela ti “namuteko oororomeleya ni a miruku” othanliwe ni Yesu kristu. Anna yaawo annavahererya ohoolela wa Akristu orukurerya elapo yoothene.

Makoho awuuluulela

• Taani omuthanlile “namuteko oororomeleya ni a miruku”?

• Ti mwawiihai Nikhuuru Noolamulela nnanikhapelelaaya olelo?

• Apwanne munneemererya wi Nikhuuru Noolamulela ti “namuteko oororomeleya ni a miruku”?