YOOHUSERYA 8
Ntakhara Heeni Muluku Onneemererya Onanara ni Makacamiho?
1. Onanara waapacenrye hai?
Muluku aaweemererya achu olamulela elukuluku yincipale wi ooniherye wi awo hanawerya omaliha makacamiho a achu
Onanara waapacenrye vaava Satana aalonceiye yawootha yoopacerya. Wuupaceryani, Satana aari munkeelo oophaameya, nyenya owo “hémenle mu eparipari.” (Yohane 8:44) Owo aachuna olapeliwa, malapelo yaawo ari a Muluku pahiru. Satana aahinwoka muthiyana oopacerya, Haava, nave aamuceenyerya wi amwiiwelele yoowo omuhiya Muluku. Aatamu aamwiiwelela Haava mu ohimwiiwelela Muluku. Yoothanla ya Aatamu yaahihoolela makacamiho ni okhwa.—Mwaalakhanye Mapacereryo 3:1-6, 19.
Vaava Satana aamuleenleiye Haava wi ahimwiiwelele Muluku, owo aapaceryiha omwaryeya moovanyihana ni Olamulelo wa Muluku, nari nipuro nawe ntoko Awirimurimu. Achu ancipale aamuchara Satana omukhooca Muluku ntoko Mwene. Mwawihiihaa, Satana ti “mutokwene a elapo ya vathi.”—Mwaalakhanye Yohane 14:30; 1 Yohane 5:19.
2. Mano soopatuxiwa sa Muluku saari soohiphaameya?
Miteko soothene sa Muluku ti soophaameya. Achu ni ankeelo yaapatuxiwe ti Muluku yaanwerya omwiiwelela Muluku moophaameya. (Malamulo 32:4, 5) Muluku onipatunxe ni othanla woochuna weera yaphaama nari yoonanara. Othanla weiwo onnanivaha ekari ya wooniherya omusivela wahu Muluku.—Mwaalakhanye Yakobo 1:13-15; 1 Yohane 5:3.
3. Ntakhara heeni Muluku Onneemererya makacamiho ophiyerya olelo?
Voovira wa elukuluku, Yehova onneemererya omwaryeya moovanyihana ni olamulelo awe. Ntakhara heeni? Wi ooniherye wi achu hanaphura echu yaalamuleliwaka ni olamulelo ohinakhaviheryiwa ti Muluku. (Eklesiasti 7:29; 8:9) Ovira wa iyaakha 6,000 sa mwaha wa achu sinnooniherya phaama yeela. Olamulelo wa achu wooviliwa omaliha ekhoco, epahu, onanara, nari ireca.—Mwaalakhanye Yeremiya 10:23; aRoma 9:17.
Moohiyana ni olamulela wa achu, olamulela wa Muluku onnaakhaviherya yaawo aneemererya. (Yesaya 48:17, 18) Moohilekela, Yehova onahaala omaliha olamulelo woothene wa achu. Pahiru achu yaale anathanla olamuleliwa ti Muluku enarwa yaakhela elapo ya vathi.—Yesaya 11:9. Mwaalakhanye Daniyeli 2:44.
Moone exilema Ntakhara Heeni Muluku Onneemererya Makacamiho?
4. Ovilela wa Muluku onaneemererya weera eheeni?
Satana ooloca wi haavovo muchu aahaala omurumeela Yehova moorweela wa osivela. Mano nyuwo munnachuna ovaanya yawootha ela? Nyuwo munanwerya! Ovilela wa Muluku onneemererya wi oothene hiyo nooniherye wakhala wi nnachuna olamuleliwa ti Muluku nari olamuleliwa ti achu. Hiyaano ninnooniherya yoothanlaahu moorweela wa makhalelo a okumi ahu.—Mwaalakhanye Yobi 1:8-12; Masiposipo 27:11.
5. Nnii niwerye hai omuthanla Muluku ntoko Mulamuleli ahu?
Soothanla sahu sinnooniherya wakhala wi hiyaano ninnachuna wi Muluku akhale Mulamuleli ahu
Hiyaano nnanwerya omuthanla Muluku ntoko Mulamuleli ahu moorweela wa ohuserya ni weerano malapelo eeparipari anathipeliwa mu Masu a Muluku, Piipiliya. (Yohane 4:23) Hiyaano nnanwerya omukhooca Satana okhala mulamuleli ahu moorweela wa ohipaka makupa mu mukhalelo wa elapo ni ekhoco, hiihaa ntoko Yesu eenreiye.—Mwaalakhanye Yohane 17:14.
Satana onnapharihela muteko ikuru sawe wi eerihe wi ocapaheya ni saweera soonanara sikhale ntoko saphaama. Hiyaano naakhooca saweera seiya, asinthamwene ni amusi ahu poti onitheya nari onivaanya. (1 Petro 4:3, 4) Onaphwanela wi hiyaano nthanle. Hiyaano nnahaala waataana ni achu anamusivela Muluku? Mano nnahaala wiiwelela malamulo awe a miruku ni a osivela? Neerano hiihaa, ninnooniherya wi Satana aahootha vaava aalonceiye wi haavovo muchu aahaala omwiiwelela Muluku variyari va makacamiho.—Mwaalakhanye 1 aKorinto 6:9, 10; 15:33.
Muluku waasivela wawe achu onnaroromeliha wi onanara ni makacamiho enahaala omala. Yaale anooniherya wi annaroromela yeela anahaala opuha okumi woohimala veelaponi ya vathi.—Mwaalakhanye Yohane 3:16.
