Mu ikerexa soothene aakhalamo achu ooreera murima. Michaka yaphaama ti wi Muluku onnawoona nave onnaakhapelela achu yaawo. Nyenya moothananiha, ichu soonanara ineeriwa ni achu anaya okerexa. (2 aKorinto 4:3, 4; 11:13-15) Moovarihana ni miyaha, ikerexa sikina sinnavolowela onamaahita, otoloxa, ekhoco, ni waakoniha anamwane. Ela ennaathananiha vancipale achu ooreera murima a ikerexa seiya!​—Mwaalakhanye Mateyu 24:3-5, 11, 12.

Malapelo eeparipari annamucicimiha Muluku, malapelo oowoka annamunyemula yoowo. Malapelo oowoka anahusiha ichu sihiri mPiipiliyani, ophitaanyerya mahusiheryo vooloca sa Muluku ni alipa ookhwa. Nyenya Yehova onachuna wi achu esuwele eparipari vooloca sa yoowo.​—Mwaalakhanye Ezekiyeli 18:4; 1 Timoteo 2:3-5.

Moohakalaliha, Muluku hanawokiwa ni ikerexa sinaloca wi sinnamusivela yoowo nyenya mwevelevelo inasivela elapo ya Satana. (Yakobo 4:4) Masu a Muluku analoca wi ikerexa soothene soowoka ti “Babulo Mtokotoko.” Paapulu aari muceche wa khalai weiwo waapacenryewo malapelo oowoka vaculi va Maahi mancipale a mahiku a Noowa. Moohilekela, Muluku onahaala omaliha mootutuxa ikerexa seiyo sinaawoka ni waahooxa achu.​—Mwaalakhanye Yawupulula 17:1, 2, 5, 16, 17; 18:8.

Nlelo yookhalavo michaka yaphaama. Yehova haacuwanle achu ooreera murima yaawo ari mu ikerexa soowoka veelaponi yoothene. Owo onnaathukumanya achu yaawo moorweela wa waahusiha eparipari.​—Mwaalakhanye Mikeya 4:2, 5.

Yehova onnaathokororya achu yaawo anasivela yeeyo eri yeeparipari ni yaphaama. Owo onnaaveka wi ekhumemo mu ekerexa yoowoka. Achu anamusivela Muluku aneemererya orukunuwa wi emuhakalalihe Muluku.​—Mwaalakhanye Yawupulula 18:4.

Mu nsana noopacerya, vaava achu ooreera murima yiiwalaaya michaka yaphaama moorweela wa arummwa, awo yaahaakhulela moohakalala. Awo yaahihuserya ephiro evyaani ya okumi yoorweela wa Yehova, ephiro ya okumi woohakalaliha, erino yookhwela ni ewehereryo. Awo ti yootakiherya yaphaama wa hiyo olelo ntakhara yaahaakhulela michaka yaphaama moorweela wa omuhela Yehova va nipuro noopacerya muukumini mwaya.​—Mwaalakhanye 1 aTesalonika 1:8, 9; 2:13.

Yehova onnawaakhela achu anakhuma mu ikerexa soowoka wi ekhale mu emusi ya alipa oothamala awe. Nyuwano mwaakhela ewopelo ya Yehova, munahaala okhala nthamwene awe, munahaala waakhela emusi evyaani yoosivela ya alipa oothamala a Yehova, ni okumi woohimala.​—Mwaalakhanye Marko 10:29, 30; 2 aKorinto 6:17, 18.

Olakiwa onoorwa wa ikerexa soowoka ti michaka yaphaama. Ela enahaala oruuha oneethi veelaponi yoothene vooloca sa ohooxa. Ikerexa soowoka hisirwa saahuweliha ni waamwalanya achu. Achu oothene anahaala okhala awaataana mmalapelo a Muluku mmoharu eeparipari.​—Mwaalakhanye Yawupulula 18:20, 21; 21:3, 4.