NIKOHO 3
Kinii Kiwerye Hai Oloca ni Asitiithi Aka?
WAAHAALA WEERA EHEENI?
Waanyiherye yaweereya ela: Xorxe a iyaakha 17 sa oyariwa, onnamaliha ophara muteko yoowo ohinamuhakalaliha. Vano onniivaha elukuluku wi iichuuwe! Onnamuhula televisau nave onnakiraathi va ekatera awe yoomusivela.
Mweelukuluku yeeyo, atiithi awe annaphiya oonyeenyeya.
Awo annaloca: “Xorxe! Ntakhara heeni onaweiwaawe omoonaka televisau ohiya omukhaviherya munna aa? Weyaano honiiwelelaru!”
Xorxe onnatheya vakhaani nave onniilocela: “Aapacerya tho olelo.”
Atiithi awe annamwaacamela nave annamukoha: “Tiheeni oloncaawe?”
Xorxe onnaakhula vathivathi: “Heechu.”
Moonyeenyeya atiithi awe annasama: “Ohuuluule okilocela masu yaawo!”
Waakhanle wi weyaano wa Xorxe, tiheeni waaphwanelaawe weera?
WUUPUWELE ELA!
Oloca ni asitiithi aa onalikana ni weeciha ekaaro. Wakhala wi woophwanya echu enaciyelela mphiro, onaphwanela waavya mukhalelo mukina wa ovira.
YOOTAKIHERYA:
Namwali mmoha awiichaniwa Leiya oriye: “Onnakivila oloca ni apapa, vakina vaya kimanle weererya oloca ni yaawo elukuluku yincipale, wookuchulani annaakhula, ‘okikhurumuwele, waaloca ni mi?’”
LEIYA ONAPHWANELA OTHANLA YAWEERA.
-
Okhuwela wa atiithi awe.
Leiya onnakhuwela: “Nyuwaano hamunapwacha echu kinalocaaka?”
-
Omaala oloca ni atiithi awe.
Leiya onnahiya waaleela atiithi awe makacamiho awe.
-
Waavya elukuluku yoophwanelela wi aloce.
Leiya onnaavya elukuluku wi aloce ni atiithi awe sa makacamiho awe, naari onnarepela wi aperekhe wa atiithi awe.
Yaweera taani Leiya onaphwaneleiye ochariha?
OTHOKORORYE: Atiithi a Leiya ari ookacamiheya. Yakhala wi Leiya onnathanla Yaweera 1, atiithi awe anahaala wuupuwela wi onamoona osama nihirivo nthowa. Awo heni yiiwexexe ntakhara heeni oreiye oonyeenyeya. Osama howeeriha atiithi awe owiriyana yeeyo Leiya onachuneiye oloca. Mukhalelo yoola honooniherya ncicimiho. (Éfeso 6:2) Vano apwanne yaweera yoopacerya ti yoophwanela ochariha?
Moolikana ni weeciha ekaaro, onaphwanela waavya mikhalelo mikina sa wiiwanana ni asitiithi aa
Yaweera 2 akhweya ti yookhweya wi esepe makacamiho. Munoona wi chiryene ti yoophwanelela? Leiya onnachuna nikhaviheryo na atiithi awe. Wakhala wi oomala olocano, atiithi awe enii esuwele hai echu enamukacamiha? Okhala oomala homukhaviherya.
Hanka Yaweera 3? Wakhala wi Leiya ohaavya elukuluku yaphaama wi aloce ni atiithi awe, enahaala omukhaviherya ophwanya mukhalelo waphaama. Vano achuna orepela sa makacamiho awe, enamukhala echu yaphaama tho.
Orepela makacamiho awe, enammukhaviherya Leiya oloca phaama yeeyo onuupuweleiye. Yaalakhanya echu orempeiye, atiithi awe ananwerya osuwela yeeyo enamphacuwela. Apwanne nikupa naneeraru tahi noophwanelela wa Leiya ni atiithi awe? Yakhala wi munnaloca naari orepela sa makacamiho anyu munahaala weerano mwawiiwanana ni Aroma 14:19, yoowo onaloca wi “nasyeke seiyo inavaha muretxele.”
Echu taani ekina Leiya aaphwaneleiye weera?
Orepele vathi moonelo aa nave tiivi yaahaala okhumelela.
OTHANLE PHAAMA MASU
Wuupuwele wi, echu onalocaawe asitiithi aa ananwerya wiiwexexa mmukhalelo woohiyana.
NTOKO YOOTAKIHERYA:
Wuupuwele wi asitiithi aa ahoona wi yookhala enawuukhula, nave annookoha eriki: ‘Tiheeni enaweera?’ Weyaano waakhula oriki: “Heechu, nyuwaano hamunaphwanela osuwela.”
Eyo mmuupuwelo mwa asitiithi aa ori ntoko oloca wi: “Nkinoororomelaani wi kooleeleni makacamiho aka. Yaphaama ori waaleela asinthamwene aka.”
Vano waanyiherye wi asitiithi aa ahookoha waakhanle wi onnachuna nikhaviheryo nave owaakhula oriki: “Hooye koosuwela kinahaalaaka weera.”
-
Asitiithi aa eni yuupuwele hai?
-
Yawaakhula taani yaahaala waahakalaliha asitiithi aa?
