Waanyiherye yaweereya ela: Ivinrevo miyeeri miili opacerya vaavaa Rita omusuwenleiye Mikeli, nyenya onakhala ntoko asuwelanne khalai. Annarepelana michaka moohihiyererya, annamaliha iwora sincipale echekulaka mu telefone. Nyenya echu Mikeli onachuneiye hori ochekula pahiru.

Variyari va miyeeri miili muculi, echu Mikeli ni Rita yeeraaya waari pahiru opharelana mata ni okhupaarelana. Rita hanachuna opwahiherya nave tho hanachuna omuyeleela Mikeli. Haavo muchu mikina onamuhakalalihaxa ompwaha yoowo. Rita onnuupuwela: ‘Miyaano ni Mikeli ninnasivelana chiryene.’

Wakhala wi weyaano wohuunnuwa nave okhala mmukhalelo wa Rita, tiheeni waahaalaawe weera?

Wakhala wi muchu hiiwelenle nlamulo na weeciha ekaaro, owo onahaala ohooxeya ni sookhumelela sene. Eyo tho enahaala weereya wakhala wi hiwiiwelenle nlamulo na meecelo ntoko nla: ‘Mukhaleke òtxiwene wa oraviwa [naari mararuwo].’—1 Tesalónika 4:3.

Tiivi iri sookhumelela sa ohiiwelela nlamulo nla? Piipiliya oni: “Mutxhu onera yonanara ni mwili, onnatxhekela mwili awe.” (1 Korinto 6:18) Apwanne ela eparipari?

 Sootholathola sinnooniherya wi amiravo yaawo yaapanke mararuwo ehaakumve othela yaahooxeya ni sookhumelela iha:

• EKEERELANI. Amiravo ancipale yaawo yaapanke mararuwo ehaakumve othela annaloca wi voocharela yaakhalano ekeerelani.

• MINIKWA. Emanle opaka mararuwo, achu oopiili annakhwa minikwa waakhanle wi haavo muchu mukina opankeiyeno mararuwo.

• WUUKHUWA. Asimwali ancipale anasiveliwa ni muchu yoowo onahaala owaakiha ohiya waapharihela wi yiiphwanyerye. Nave amiravo ancipale annayeleela nchuno naya ni mwali yoowo apankaayano mararuwo.

• Wuupuwelele: Wakhala wi woopaka mararuwo ohaakumve othela, onipahula mukhata ni oyeleela echu yoochuneyaxa. (Aroma 1:24) Mwiili aa ti woochuneyaxa woohiphwanela oyeleela!

Wooniherye wi wookhalano ikuru sa ‘okhalaka òtxiwene wa oraviwa [naari mararuwo].’ (1 Tesalónika 4:3) Nave wakhala wi woothela naari wootheliwa, munahaala okonihanaka ehirivo ekeerelani, minikwa ni wuukhuwa seiyo inaarweela achu yaale anapaka mararuwo ehaakumve othelana.—Masiposipo 7:22, 23; 1 Korinto 7:3.

• Apwanne muchu onoosivela mweeparipari aahaala ohela va yawoopiha okumi aa?

• Apwanne muchu onoosivela mweeparipari aahaala wookhinyererya opahula onthamwene aa ni Muluku?—Ahebri 13:4.