1-2. (a) Nda mɛ ta azi gba ndo ye kpãngɔ bɛ la na ndo agbia ndɛ ma nɛ? (b) Aye mɛ ndɛ e na mandangɔ so ya tɛnɛ mɛ nɛ?

NDƐ lo mɛ ko, ta azi gba ndo ye kpãngɔ bɛ la ka tɛ azi mɛ na lo-lengɔ gbia ma. Ala ndo hũ ya, leta ná azi ti politikɛ ndo li kpale na ndombali nzɔ̃ lo tɛ awa ye ná azi mɛ na lo-lengɔ gbia, kanda ta ala ndo fa nga ngbanga tɛ awa yɛlɛ na mbilimbili ma. Ngbangɔ tɛnɛ ya: “Zo ndo le gbia na ndo fɔ̃ lo zo, ti hɛ̃ngɔ lo pɛnɔ.” (Mos. 8:9) Hãngɔ ni zingɔ, seliye tɛ ambanga agbia ti sambela ndo du siɔni nvɛ̃ni. Na lo ni la, ta azi mɛndɛ̃ dɛ kpã bɛ la ka tɛ Nzapa ma. Ni la, na ngoi mɛ e ndo manda na zo kɔi Ngbangɔ ko, ando du pɛnɔ ti nɛngɔ ya, e za lo, lo manda kpãngɔ bɛ lo na ndo Yehova, nga na azi mɛ lo pɔna la ge lɛ sese ya, ala tambwisa linɔ tɛ lo.

² Adu biani ya, ta bo azi mɛ ndo manda Ngbangɔ la, ayɔ ya, ala manda kpãngɔ bɛ la na ndo Yehova nga na linɔ tɛ lo ma. Abɛse du ya, e li kwa na mbilimbili zu hɛ̃ Yehova na ya abulu gba ko, ale ta e zia yengɔ ya, se tɛ lo ti lingɔ na kpale ndo du lá kwɛ mbilimbili ma. Ngoi mɛndɛ̃, kpale kɔi lengbi ti lingɔ tɛrɛ lo, wa ni kpã loyengɔ tɛ e ka tɛ Yehova na ya tara. Na ya tɛnɛ mɛ, e na tɛnɛngɔ tɛnɛ na ndo akpale taa mɛ alengbi ti lingɔ ya, loyengɔ tɛ e ati na ya tara: ti (1) na ngoi mɛ e ndo di ambanga apandɛ ti dungɔ lɛ ngɛ̃́ tɛ azi mɛ Ngbangɔ tɛnɛ tɛnɛ tɛ ala, ti (2) na ngoi mɛ e ndo lua ndia kɔi mɛ alo ka tɛ linɔ tɛ Yehova, wa ti (3) na ngoi mɛ gbanda e na tengbingɔ na kpengba kpale na bi mɛ na gangɔ.

3. Ngasia la, ambanga pandɛ ti dungɔ lɛ ngɛ̃́ tɛ azi mɛ Ngbangɔ tɛnɛ tɛnɛ tɛ ala, alengbi ti kpãngɔ loyengɔ tɛ e na mbage tɛ Yehova na ya tara nɛ?

 ³ Ngoi mɛ e ndo di tɛnɛ tɛ Nzapa ko, elengbi ti hũndangɔ tɛrɛ ngoi mɛndɛ̃ na ndo, na lo ti se mɛndó lo li na kpale tɛrɛ azi mɛndɛ̃, nga na ekateli mɛndɛ̃ mɛndó lo mu. Na ndakisa, kaya mbeti ti Mitángo ko, e ndo di ya, Yehova hɛ̃ndó tumbu ti kwá hɛ̃ zo kɔi ti Izraɛlɛ na lo mɛ ya, lo gwendó lo lɔ wá na bi ti Sabata. Kanda, mbeti ti sɛ ti Samwele tɛnɛ ya, asiɛklɛ gba na gesi, Yehova kandó lɛ lo na ndo siɔ kpale mɛndó gbia Davidi li ti tingɔ kɔmbɛ ná hongɔ zo. (Mit. 15:32, 35; 2 Sam. 12:9, 13) Elengbi ti hũndangɔ tɛrɛ e na ndo mɛ, ‘Nda mɛndó Yehova ka lɛ lo na ndo siɔ kpale ti kɔmbɛ ná hongɔ zo mɛndó Davidi li, wa lo hɛ̃ndó tumbu ti kwá hɛ̃ kɔli mɛndó ali siɔ kpale mɛ mabere ta ni kotani nvɛ̃ni ma nɛ?’ Ti nɛngɔ ya, e hɛ̃ gbinya ti hũnda niko ko, zia e ba akpale taa mɛ ta bɛ e lengbi ti lingɔ na ni ma na ngoi mɛ e ndo di Ngbangɔ.

4. Ngasia la, Ebandeli 18:20, 21 ná Kolimbola Mibeko 10:17 ndo za e ya, e kpã bɛ e zu na ndo fangɔ ngbanga tɛ Yehova nɛ?

⁴Ta Ngbangɔ ndo kambisa ngoi zu, akpale zu na ndo lo kɔi ngaso ma. Na ndakisa, e hĩnga ya, Davidi gbinyandó bɛ lo nvɛ̃ni na lo ti siɔ kpale tɛ lo. (Nz. 51:2-4) Kanda nyi kɔli mɛndó wa kongɔ nyɔ ndia ti Sabata, lo dundó zo ti ngasia? Lo mandó vundu ti aye mɛndó lo li? Lo kɛ̃ndó tɔndɔngɔ ndia tɛ Yehova uzu? Bɛ lo lindó na wangɔ mɛ ahɛ̃ lo bere lo kɛ̃ndó tɔndɔngɔ ni na sãna? Ta Ngbangɔ tɛnɛ tɛnɛ ni ma, ta ayɔ ya, e fa bo ngbanga na ndo kpale mɛ e ma, ma. Kanda elengbi ti yengɔ tɛnɛ mɛ, Ta Yehova “ndo li ye mɛ azanga mbilimbili ma.” (Mib. 32:4) Lo ndo mu ekateli tɛ lo na bangɔ na seni aye zu mɛ ali tɛrɛ lo, ta lo ndo kpã bo lɛ lo na ndo akpale mɛ lo ma, pɔnangɔ pɔrɔ tɛrɛ, bere ambɛge ye mɛndɛ̃ mɛ ndo li ya, agbia ndo fa ngbanga tɛ azi na ndenge ti siɔni ngoi gba ma. (Di Ebandeli 18:20, 21; Kolimbola Mibeko 10:17.) Se e manda aye gba na ndo Yehova nga na andia tɛ lo ko, e nga na kpãngɔ bɛ e fãni mɛndɛ̃ gba na ndo fangɔ ngbanga tɛ lo. Abɛse du ya, pandɛ ti dungɔ lɛ ngɛ̃́ tɛ zo kɔi mɛ Ngbangɔ tɛnɛ tɛnɛ ni asi na ahũnda mɛ ta elengbi ti luangɔ agbinya ni ndɛ ma ko, e hĩnga akpale gba na ndo Nzapa tɛ e, ni lengbi ti tongɔ e, e ye ya, “lo du mbilimbili na ya alége tɛ lo zu.”​—Nz. 145:17.

5. Ngasia la, zangangɔ lengbingɔ ndo gbɛ̃ se tɛ ti fangɔ ngbanga nɛ? (Ba nga Ãkadre “ Zangangɔ lengbingɔ ndo li ya, ta e fa ngbanga na ndenge ti nzɔ̃ni ma.”)

 ⁵Zangangɔ lengbingɔ ndo li ya, ta e fa ngbanga na ndenge ti nzɔ̃ni ma. Nzapa lindó e na yika yika tɛ lo, na lo ni la, e ndo ma pɛnɔ na ngoi mɛ ando li ye tɛrɛ azi mɛndɛ̃ na zangangɔ mbilimbili. (Eb. 1:26) Abɛse nga so ko, na lo mɛ ya, e du azi ti zangangɔ lengbingɔ ko, elengbi ti fangɔ ngbanga siɔni, abɛse e hĩnga akpale zu na seni. Da bɛ mɔ na ndakisa tɛ Yona mɛndó lo ma ngɔnzɔ na ngoi mɛndó Yehova fa bɛ ti vundu na azi ti Ninive. (Yon. 3:10–4:1) Wa binga li mɔ na ndo kpale mɛndó ali tɛrɛ na lo mɛ ya, Yehova fandó bɛ ti vundu na ala. Ni lindó ya, azi ti Ninive ɔngɔ 120 000 mɛndó agbinya bɛ la, alua songɔ kwá! Na ndani, adundó Yona la afa ngbanga tɛ azi na ndenge ti siɔni, ta Yehova ma.

6. Ayɔ bo ya, Yehova ndo kambisa hɛ̃ e nda mɛ lo mu na ekateli kɔi ngaso?

⁶Ta ayɔ bo ya, Yehova ndo kambisa hɛ̃ azi nda mɛ lo mu na ekateli kɔi ngaso ma. Ti biani, Yehova zindó lége hɛ̃ awa kwa tɛ lo ti ngoi ti gã ya, ala kambisa se mɛ ala ma na tɛrɛ la na ndo ekateli mɛndó lo mu nga na ekateli mɛndó lo ye mungɔ. (Eb. 18:25; Yon. 4:2, 3) Ngoi mɛndɛ̃, lo ndo kambisandó nda ekateli mɛ lo mu hɛ̃ ala. (Yon. 4:10, 11) Abɛse ngaso ko, ta ayɔ bo ya, Yehova ndo kambisa hɛ̃ e nda mɛ lo mu na ekateli kɔi ngaso ma. Na lo mɛ ya, lo du Wa lingɔ e ko, ta lo na gwɛ̃ ti hũndangɔ dangɔ bɛ tɛ e uzu bere na pɛ lingɔ ye kɔi ngaso ma.​—Yis. 40:13, 14; 55:9.

7. Ye mɛ lengbi ti dungɔ pɛnɔ na lo tɛ e nɛ, wa na lo nɛ?

⁷ Ta kitɛ da ma, e ye nvɛ̃ni ya, Yehova ndo li aye tɛ lo ngoi zu na mbilimbili. Kanda alengbi ti dungɔ pɛnɔ ya, e kpã bɛ e na ndo azi mɛ lo pɔna ala ya, ala tambwisa linɔ tɛ lo ge lɛ sese. Elengbi ti hũndangɔ tɛrɛ e na ndo bere azi mɛ na kumba ge ya linɔ tɛ Yehova ndo li akpale na landangɔ andia tɛ lo, bere ala ndo li ni na landangɔ se bɛ la nvɛ̃ni. Alengbi nga ti dungɔ dangɔ bɛ mɛ azi mɛndɛ̃ mɛndó na dungɔ lɛ ngɛ̃́ na ngoi ti gã mɛ Ngbangɔ tɛnɛ tɛnɛ na ni. E da bɛ e na se lɛlo mɛ fale e tɛnɛ tɛnɛ ni kaya  paragrafɛ ti 3. Zo ti ndasewa tɛ kɔli mɛndó wa kongɔ nyɔ ndia ti Sabata, alengbindó ti hũndangɔ tɛrɛ lo na ndo ya, adu biani ya, Moise hũndandó Yehova uzu ti nɛngɔ ya, ahɛ̃ lo tumbu ti kwá? Wa Uria mɛ zo ti Hitɛ mɛndó Davidi ti kɔmbɛ ná ya lo ko, kwa Uria kɔi lengbindó ti tɛnɛngɔ ya, Davidi salelandó lo-gbia tɛ lo ti nɛngɔ ya, ta lo lua tumbu mɛndó alengbi na lo ma. Se ta e ndo kpã bɛ e na ndo azi mɛ Yehova pɔna ala ge lɛ sese, wa lo ndo kpã bɛ lo ndo ala ya, ala ndo tambwisa linɔ tɛ lo ma ko, ta elengbi nga ti tɛnɛngɔ ya, e ndo kpã bɛ e ka tɛ Yehova ma.

8. Mangbi mɛ ka popo ti tɛnɛ mɛ kaya, Awa Pangɔ Kwa 16:4, 5, ná se mɛ ndɛ ando tambwisa na bombi tɛ awakristo nɛ?

⁸ Ndɛ lo mɛ ko, Yehova ndo tambwisa linɔ tɛ lo mɛ ge lɛ sese na lége tɛ “mbɛ ti mbilimbili ná ti kɔdɛ”, NWT. (Mat. 24:45) Nga mabere se tɛ bombi tɛ adonzi ti siɛklɛ ti uzu ko, mbɛ ti mbilimbili ndo tambwisa azi tɛ Nzapa na ndo lɛ gigi zu, wa lo ndo hɛ̃ andia hɛ̃ abiazi ti ya bombi. (Di Awa Pangɔ Kwa 16:4, 5.) Wa na mbage tɛ abiazi, ala ndo za azi ti ya bombi ya, ala ndo tɔndɔ andia ni. E ndo fa ya, e ndo kpã bɛ e ya, se tɛ Yehova ti lingɔ na kpale ndo du lá kwɛ mbilimbili na tɔndɔngɔ andia mɛ ndo lo ka tɛ linɔ tɛ lo, nga ka tɛ abiazi ti ya bombi.

9. Na ngoi mɛ wa la alengbi ti dungɔ pɛnɔ ya, e tɔndɔngɔ ekateli mɛ abiazi amu wa, wa na lo nɛ?

⁹ Ngoi mɛndɛ̃ alengbi ti dungɔ pɛnɔ ya, e tɔndɔ ekateli mɛ abiazi amu. Na ndakisa, na ya abulu mɛ biri aɔ ko, akpale gba ti abombi nga na ti akɛlɛ kɛlɛ agbinyangbindó. Ti nɛngɔ ya, e salela ada tɛ e ti Lo-lengɔ gbia na ndenge ti nzɔ̃ni ko, ngoi mɛndɛ̃ abiazi ndo hũnda ka tɛ awa fangɔ tɛnɛ ya, ala gwe hɛ̃ ti la kaya abombi mɛndɛ̃. Se du ya, a pa hɛ̃ mɔ ya, mɔ diri kaya  bombi mɛndɛ̃ ti fãnani ko, ngoi mɛndɛ̃ alengbi ti dungɔ pɛnɔ ziangɔ azi ti ndasewa tɛ mɔ nga na akwa mɔ. Yehova ndo tɛnɛ hɛ̃ abiazi, bombi mɛ ala lengbi ti tongɔ na wa fangɔ tɛnɛ kɔi na kɔi ka da? Ipɔ. Na lo ni la, alengbi ti dungɔ pɛnɔ ya, e ye tɔndɔngɔ andia mɛ e ndo lua. Kanda, Yehova ndo kpã bɛ lo na ndo ekateli mɛ abiazi ndo mu, wa ayɔ nga ya, e kpã bɛ e ndo ala. *

10. Na bangɔ Aebreo 13:17, nda mɛ ayɔ ya, e ye ekateli mɛ abiazi ndo mu nɛ?

¹⁰ Nda mɛ ayɔ ya, e ye, wa e hɛ̃ nga ti e na ndo ekateli mɛ abiazi ndo mu, abɛse na ngoi mɛ ta ekateli ni adɛ̃ na bɛ e ma nɛ? Na ngoi mɛ e ndo li ngaso ko, e ndo za azi tɛ Nzapa ya, ala du na siriri ka popo tɛrɛ la. (Ef. 4:2, 3) Bombi ndo mai nzɔ̃ni na ngoi mɛ azi zu ndo tɔndɔ na zungɔ na tɛrɛ zu ekateli mɛ abiazi ndo mu. (Di Aebreo 13:17.) Omɛ di du ngbondoni gba, na ngoi mɛ e ndo tɔndɔ ekateli tɛ azi mɛ Yehova ndo kpã bɛ lo na ndo ala ya, ala bata e ko, e ndo fa na lo ya, e ndo kpã bɛ e ka tɛ lo.​—Aw. 20:28.

11. Ye mɛ lengbi ti zangɔ e ya, e kpã bɛ e zu na ndo andia mɛ abiazi ndo hɛ̃ e nɛ?

¹¹ Se e hĩnga ya, abiazi ndo yɔ lisalisi ti Nyingɔ vurú tɛ Yehova uzu ti la bangɔ akpale ti ya bombi ko, ni na zangɔ e ya, e kpã bɛ e zu na ndo andia mɛ abiazi ndo hɛ̃ e. Ala ndo ba nga na seni andia ti ya Ngbangɔ, nga na andia mɛ alo ka tɛ linɔ tɛ Yehova. Ala ndo du na gwɛ̃ kpengbani ti hɛ̃ngɔ Yehova dengɔ bɛ, nga na batangɔ azi tɛ lo. Akɔli niko ti mbilimbili ndo hĩnga ya, ala na diringɔ na nyɔ ala hɛ̃ Nzapa na bangɔ se mɛ ala ndo li na kumba mɛ lo hɛ̃ ala. (1 Pet. 5:2, 3) Binga li mɔ na ndo kpale mɛ: Na ya gigi olo, mɛ kpale ti pɔnangɔ pɔrɔ tɛrɛ, kpale ti asambela, nga na kpale ti politikɛ ndo kpã kangbi na popo tɛ azi ko, azi tɛ Yehova ndo vɔrɔ Nzapa ti mbilimbili ndoni kɔi na ya siriri nga na mangbi. Ni ndo li tɛrɛ lo na lo mɛ ya, bo Yehova nvɛ̃ni la ndo za linɔ tɛ lo!

12. Aye mɛ alengbi ti zangɔ abiazi ya, ala hĩnga bere zo mɛ wa lingɔ siɔ kpale agbinya bɛ lo biani nɛ?

¹² Yehova hɛ̃ abiazi kota kumba ti lingɔ ya, bombi tɛ lo angbã lá kwɛ vuruni. Se wakristo kɔi ali siɔ kpale mɛ kotani ko, Yehova yɔ ka ti abiazi ya, ala ba se du ya, lo lengbi ti ngbãngɔ kaya bombi bere ta lo lengbi ti ngbãngɔ ma. Ando yɔ ya, ala gi hĩngangɔ bere zo mɛ wa lingɔ siɔ kpale agbinya bɛ lo. Ngoi mɛndɛ̃ lo lengbi ti lingɔ mabere lo gbinya bɛ lo, kanda lo kɛ̃ nvɛ̃ni ye mɛ lo li? Lo mu ekateli ya, ta lo na lingɔ siɔ kpale niko fãni mɛndɛ̃ ma? Se du ya, dungɔ na akwa ti siɔni la ato lo ya, lo li siɔ kpale niko, lo ye fangɔ mangbi tɛ lo na akwa lo niko ti siɔni? Abiazi ndo li sambela hɛ̃ Yehova, ala ndo ba akpale na seni na landangɔ andia ti ya Ngbangɔ, wa ala ndo ba nga se mɛ zo mɛ wa lingɔ siɔ kpale ndo ma na tɛrɛ lo na lo ti siɔ kpale mɛ lo li. Ala ndo mu nga ekateli bere wa lingɔ siɔ kpale niko alengbi ti ngbãngɔ kaya bombi bere ta lo lengbi ti ngbãngɔ ma. Ngoi mɛndɛ̃, alengbi bingɔ zo mɛ wa lingɔ siɔ kpale gigi.​—1 Kɔr. 5:11-13.

13. Se du ya, abi zo ti ndasewa tɛ e bere kwa e kɔi gigi, dangɔ bɛ mɛ elengbi ti dungɔ na ni nɛ?

¹³ Ngasia la, se mɛ e ndo kpã bɛ e na ndo abiazi ti ya bombi alengbi ti tingɔ na ya tara nɛ? Se du ya, ta zo mɛ abi lo gigi adu kwa e bere zo ti ndasewa tɛ e ma ko, alengbi ti dungɔ woni ya, e ye ekateli mɛ abiazi amu ti bingɔ lo gigi. Wa se du ya, lo du zo ti ndasewa tɛ e bere kwa e ko, elengbi ti hũngɔ ya, ta abiazi aba akpale zu na seni ma, bere elengbi ti hũndangɔ tɛrɛ e na ndo ya, ala fa ngbanga ni nga ma se mɛ Yehova lengbi ti fangɔ na ni? Aye mɛ alengbi ti zangɔ e ya, e bata dangɔ bɛ tɛ e nzɔ̃ni na ndo ekateli ni nɛ?

14. Ye mɛ alengbi ti zangɔ e ya, e du na dangɔ bɛ ti nzɔ̃ni, se du ya, abiazi amu ekateli ti bingɔ kwa e bere zo kɔi ti ndasewa tɛ e gigi nɛ?

¹⁴ Ale ta bɛ e li na ni ma ya, bingɔ zo gigi adu  ebongiseli mɛ alo ka tɛ Yehova, ni na lo ti nzɔ̃ kpale ti bombi, ni lengbi nga ti hɛ̃ngɔ nzɔ̃ kpale hɛ̃ zo mɛ wa lingɔ siɔ kpale. Se azi lége hɛ̃ zo mɛ wa lingɔ siɔ kpale mɛ ta lo gbinyangbi bɛ lo ma ya, lo ngbã so ya bombi ko, lo lengbi ti tongɔ azi mɛndɛ̃ ya, ala li nga siɔ kpale. (Gal. 5:9) Hãngɔ ni zingɔ, ngoi mɛndɛ̃, ta lo na hĩngangɔ ya, ni li siɔ kpale mɛ kotani ma, wa ta lo nga na lingɔ kpengbani ya, lo gbinyangbi seliye ná dɔngɔ nɔ tɛ lo ti nɛngɔ ya, Yehova diri ye lo fãni mɛndɛ̃ ma. (Mos. 8:11) Elengbi ti yengɔ ya, ngoi mɛ ala ndo mu ekateli ti bingɔ zo gigi ko, ta abiazi ndo mu kumba tɛ la na wele ma. Ala ndo hĩnga ya, mabere se tɛ awa fangɔ ngbanga ti Izraɛlɛ ti gã ko, ta la ndo “fa ngbanga na lo tɛ zo ma, kanda na lo tɛ Yehova.”​—2 Nt. 19:6, 7.

15. Nda mɛ ayɔ ya, e kpã bɛ e na ndo litambwisi tɛ Yehova ndɛ, na ndenge mɛ ta e dɛndó e li ni uzu ma nɛ?

¹⁵ Na lo mɛ ya, angbã dã nda akpale ti gigi olo akɔ ko, ayɔ ya, e kpã bɛ e na ndo se mɛ Yehova ndo li na akpale na ndenge mɛ ta e dɛndó e li ni uzu ma. Na lo nɛ? Na lo mɛ ya, na ngoi ti kota pɛnɔ ko, ngoi mɛndɛ̃ e na luangɔ andia mɛ e na hũngɔ ya, adu kpengbani ti nɛngɔ ya, e gbɔ̃ ndani bere e tɔndɔ ni. Biani, ta Yehova na pangɔ hɛ̃ zo kɔi kɔi so popo tɛ e andia ni mbala kɔi ma. Lo na hɛ̃ngɔ andia ni na lége tɛ azi mɛ ndo tambwisa linɔ tɛ lo mɛ ge lɛ sese. Ta na dungɔ ngoi ti nɛngɔ ya, e dɛ tembe na andia ni bere e kɛ̃ ni na tɛnɛngɔ ya, ‘Andia ni alo ka tɛ Yehova biani bere adu bo ekateli mɛ ayata mɛ ndo tambwisa linɔ tɛ e, amu na landangɔ dangɔ bɛ tɛ la nvɛ̃ni?’ Mɔ na kpãngɔ bɛ mɔ na ndo Yehova ná linɔ tɛ lo na ngoi niko ti kpengbani? Se mɛ mɔ ndo ba na andia mɛ e ndo lua ndɛ, mɛ ando lo ka tɛ azi mɛ ndo tambwisa linɔ tɛ Nzapa na olo, na zangɔ mɔ ya, mɔ lua gbinya ti hũnda niko. Se du ya, mɔ ndo kpã bɛ mɔ na ndo andia mɛ e ndo lua ndɛ, wa mɔ ndo tɔndɔ ni na bɛ mɔ kɔi ko, ngoi mɛndɛ̃, mɔ na lingɔ nga ngaso na ngoi ti kota pɛnɔ.​—Lk. 16:10.

16. Ngasia la se mɛ e ndo kpã bɛ e na ndo fangɔ ngbanga tɛ Yehova na tengbingɔ na tara na bi mɛ gangɔ nɛ?

¹⁶ Ayɔ nga ya, e gbɔ̃ li e nzɔ̃ni na ndo aye mɛ e na lingɔ na ngoi mɛ gbanda Yehova na fangɔ ngbanga tɛ azi na ngoi mɛ nda gigi olo ti siɔni na kɔngɔ. Na olo mɛ ko, e ndo du na nzɔ̃ dangɔ bɛ ya, azi gba mɛ ta ala ndo vɔrɔ Yehova ma, nga na azi ti ndasewa tɛ e mɛ ta ala du Atɛmwɛ tɛ Yehova ma ko, ala na mungɔ ekateli ti vɔrɔngɔ lo uzu ti nɛngɔ ya, ndangba bi aga. Kanda na ngoi ti Armagedona, Yehova na mungɔ ekateli ti ndani na omɛ aba dungɔ lɛ ngɛ̃́ tɛ azi niko na bi mɛ na gangɔ na lége tɛ Yezo. (Mat. 25:31-33; 2 Tɛs. 1:7-9) Ta e la na pangɔ hɛ̃ Yehova azi mɛ lo na mangɔ vundu tɛ la, bere azi mɛ ta lo na mangɔ vundu tɛ la ma. (Mat. 25:34, 41, 46)  E na yengɔ fangɔ ngbanga tɛ Yehova bere e na ziangɔ vɔrɔngɔ lo na lo mɛ ya, ta e ye ekateli tɛ lo ma? Biani, ayɔ ya, e kpã bɛ e zu na ndo Yehova bandangɔ ndɛ, ni nga na lingɔ ya, e kpã bɛ e zu na ndo lo na bi mɛ na gangɔ.

17. Anzɔ̃ kpale mɛ gbanda e na luangɔ na ngoi mɛ Yehova na fangɔ ngbanga ti kɔngɔ na nda gigi olo nɛ?

¹⁷ Binga li mɔ na ndenge mɛ gbanda e na mangɔ tɛrɛ ka gigi ti fãnani na ngoi mɛ e na hũngɔ anzɔ̃ kpale ti fangɔ ngbanga tɛ Yehova. Ta asambela ti nvɛ̃nɛ na diringɔ dungɔ da fãni mɛndɛ̃ ma, ta linɔ tɛ awa dɛngɔ buze ti lɛ gigi olo mɛ na zugbu nga na guvɛrnɛma ti gigi olo mɛ ndo hɛ̃ azi pɛnɔ na diringɔ dungɔ da ma. Ta tɛrɛ e na diringɔ sɔngɔ ma, ta e na tingɔ abange ma, wa ta azi tɛ e na kpilingɔ fãni mɛndɛ̃ ma. Na kangangɔ Satana ná ademo tɛ lo kaya du ti nɛngɔ ya, ala li bulu koto kɔi. Asiɔ kpale zu mɛndó tɔmbɔkɔngɔ tɛ ala asi na ko, ta ni na dungɔ da fãni mɛndɛ̃ ma. (Sum. 20:2, 3) E na dungɔ na dengɔ bɛ nvɛ̃ni na lo mɛ ya, e kpãndó bɛ ya, se tɛ Yehova ti lingɔ na kpale ndo du lá kwɛ mbilimbili!

18. Na bangɔ Mitángo 11:4-6 nga na 21:5, wangɔ mɛ elengbi ti luangɔ na ndo se lɛlo tɛ aya Izraɛlɛ nɛ?

¹⁸ Dungɔ lɛ ngɛ̃́ kaya gigi ti fãnani na dungɔ nga na akpengba kpale mɛ alengbi ti kpãngɔ se mɛ e ndo kpã bɛ e na ndo se tɛ Yehova ti lingɔ na kpale na ya tara? E ba aye mɛndó ali tɛrɛ lo nyi ngoi yakere na pɛ singɔ tɛ aya Izraɛlɛ ka gbɛ mbɛ ti Ezipito. Ambɛge ni abandandó dangɔ bɛ la na atɛ ti nzɔ̃ni mɛndó ala ndo tɛ ka Ezipito, wa ala bandandó tɛnɛngɔ siɔni na lo ti mana mɛndó Yehova ndo hɛ̃ ala ya, ala tɛ. (Di Mitángo 11:4-6; 21:5.) E nga na lingɔ aye ti ngaso na ngoi mɛ gbanda kota pɛnɔ na wɛngɔ? Ta e hĩnga na seni nvɛ̃ni kwa ti kpengbani mɛ e na lingɔ ti nɛngɔ ya, e lɛkɛ lɛ sese ati vuruni, wa yɛkɛ yɛkɛ ati nga paradizo ma. Ngoi mɛndɛ̃ e na dungɔ na akwa gba ti lingɔ, wa na ebandeli ta dungɔ lɛ ngɛ̃́ tɛ e na dungɔ woni ma. E na bandangɔ demangɔ tɛrɛ e na lo ti aye zu mɛ Yehova na hɛ̃ngɔ e na ngoi niko? Ti bɛta kpale ko: Se e ndo ye, wa e ndo sepala nga na aye mɛ Yehova ndo hɛ̃ e ndɛ ko, e nga na lingɔ ngaso na lo ti aye mɛ lo na hɛ̃ngɔ e na ngoi niko.

19. Ngasia la mɔ lengbi ti kambisangɔ na ndunu ni atɛnɛ ti ngbondoni mɛ e lo ti mandangɔ na ya tɛnɛ mɛ nɛ?

¹⁹ Se tɛ Yehova ti lingɔ na aye ndo du bo ngoi zu mbilimbili. Ayɔ ya, e ye lo ni na bɛ e kɔi. Ayɔ nga ya, e kpã bɛ e na ndo azi mɛ Yehova ndo kpã bɛ lo na ndo ala ti nɛngɔ ya, ala ndo za azi ya, ala kpã andia tɛ lo na kwa. Ta bɛ mɔ li na tɛnɛ mɛndó Yehova tɛnɛ na lége tɛ prɔfeta Yisaya ma, lo pandó ya: “Ĩ na dungɔ na ngunu se du ya, ĩ du so kpɔ, wa ĩ kpã bɛ ĩ ka tɛ mbi.”​—Yis. 30:15.