TƐNƐ TI MANDANGƆ 4
Yehova ndo sulu ge ge ge mɛ e ndo li ti nɛngɔ ya, e da bɛ e na bi ti kwá tɛ Yezo
“Ale ĩ li so, so dangɔ bɛ ĩ na mbi.”—LUKA 22:19.
BIA 19 Bilei ya mpokwa ya Nkolo
NA DUNU NI a
1-2. Nda mɛ e ndo gwe bombi ti dangɔ bɛ na bi ti kwá tɛ Yezo bulu zu nɛ?
YEZO kpindó na lo tɛ e ali ndɛ bulu bere 2 000 ti nɛngɔ ya, a hɛ̃ e lége ti luangɔ dungɔ lɛ ngɛ̃́ ti kaka. Na bi ti ndani uzu ti lo kpingɔ ko, Yezo pandó hɛ̃ ava lo ya, ala ndo da bɛ ala na bi ti kwá tɛ ni, na lége ti lingɔ bombi mɛ azanga mindɔndɔ na salelangɔ mapa ná vinyɔ.—1 Kɔr. 11:23-26.
2 E ndo tɔndɔ ndia tɛ Yezo na lo mɛ ya, e ndo ye lo mawoma. (Yn. 14:15) Bulu zu na ngoi ti dangɔ bɛ na bi ti kwá tɛ Yezo ko, e ndo hɛ̃ lo sia kɔli na lo ti aye mɛndó lo li na lo tɛ e na ngoi mɛ e ndo li sambela, e ndo gbɔ̃ nga li e na ndo ye mɛ kwá tɛ lo alengbi ti hɛ̃ngɔ e. Hãngɔ ni zingɔ, e ndo du na dengɔ bɛ ti pangɔ nzɔ̃ pa gba so ilingɔ nga azi gba ya, ala ga e na ala e li bombi niko ti ngbondoni. Ti biani e ndo du na ekateli ti kɛ̃ngɔ aye zu mɛ alengbi ti gbanzingɔ e ya, ta e gwe bombi niko ma.
3. Ye mɛ ndɛ e na mandangɔ so ya tɛnɛ mɛ nɛ?
3 Na ya tɛnɛ mɛ, e na tɛnɛngɔ tɛnɛ na do aye taa mɛ Atɛmwɛ tɛ Yehova ndo li zu mɛ ala lengbi ti lingɔ ti nɛngɔ ya, ala da bɛ la na bi ti kwá tɛ Yezo: Ti (1) na ndenge mɛ ala ndo da bɛ la na bi ti kwá tɛ Yezo nga ma se mɛndó Yezo li na ni, ti (2) na ndenge mɛ ala ndo ili azi mɛndɛ̃ ti nɛngɔ ya ala ga bombi ti dangɔ bɛ na kwá tɛ Yezo wa ti (3) na ndenge mɛ ala ndo da bɛ la na kwá tɛ Yezo abɛse ala ndo tengbi na kpengba kpale.
ALA NDO DA BƐ LA NA BI TI KWÁ TƐ YEZO NGA MA SE MƐNDÓ LO LI NA NI
4. (a) Hangɔ lo ti mbilimbili mɛ ando kambisa ni bulu zu na ya diskur ti dangɔ bɛ na bi ti kwá tɛ Yezo nɛ? (b) Wa na bangɔ Luka 22:19, 20 nda mɛ ayɔ ya, e hũ ni ngbondoni ka lɛ e nɛ?
4 Bulu zu, na ngoi ti dangɔ bɛ na bi ti kwá tɛ Yezo ko, e ndo landa diskur kɔi mɛ alo kaya Ngbangɔ mɛ ndo hɛ̃ gbinya na ndo ahũnda gba. Diskur niko ndo kambisa nda mɛ azi na gwɛ̃ ti tɔ̃ngɔ nga na se mɛ kwá tɛ zo kɔi alengbi ti hãngɔ siɔ kpale tɛ azi gba. Ando kambisa hɛ̃ e bere mapa ná vinyɔ alengbi na nɛ, nga na azi mɛ alengbi ti tɛngɔ nga na nyɔngɔ ni. (Di Luka 22:19, 20.) Wa e ndo lua nga lége ti gbɔ̃ngɔ li e na ndo nzɔ̃ kpale mɛ azi mɛ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese na luangɔ na bi mɛ na gangɔ. (Yis. 35:5, 6; 65:17, 21-23) Ale e ndo mu hangɔ lo niko ya, adu ngbondoni ka lɛ e. Ta amiliɔ̃ tɛ azi ndo hĩnga mateya niko ma, wa ta ala ndo hĩnga nga valɛrɛ ti kwá tɛ Yezo ma. Hãngɔ ni zingɔ, ta ala ndo da bɛ la na bi ti kwá tɛ Yezo nga ma se mɛndó Yezo nvɛ̃ni li na ni ma. Na lo nɛ?
5. Na pɛ kwá tɛ ava Yezo, ngasia la, azi bandandó lingɔ bombi ti dangɔ bɛ na bi ti kwá tɛ Yezo na se mɛ aɔngbi na omɛndó lo li na ni nɛ?
5 Nyi ngoi yakere na pɛ kwá tɛ ava Yezo ko, awakristo ti nvɛ̃nɛ alindó kaya bombi. (Mat. 13:24-27, 37-39) Ala bandandó ‘hangɔ na azi atɛnɛ ti kiri kiri ti nɛngɔ ya, azi gba ati pɛko ala.’ (Aw. 20:29, 30, NWT) Kɔi ti ‘atɛnɛ ti kiri kiri’ mɛ awakristo niko ti nvɛ̃nɛ ndo handó adu ya, ta Yezo kpindó “fãni kɔi so hãngɔ siɔ ye tɛ azi gba zingɔ” nga ma se mɛ Ngbangɔ tɛnɛ na ni ma, kanda ale Yezo kpi fãni gba so tɔ̃ngɔ azi. (Aeb. 9:27, 28) Ndɛ lo mɛ ko, azi gba ndo ye hangɔ lo niko ti nvɛ̃nɛ. Ala ndo gwe ka da Nzapa pɔsɔ zu ngoi mɛndɛ̃ nga bi zu so lingɔ yenga ti kwá tɛ Yezo mɛ azi ti Katolikɛ ndo ili ni ya “misa ti Ukarisia.” b Kaya asambela mɛndɛ̃ ko, ta azi mɛndɛ̃ ndo li bombi ti dangɔ bɛ na bi ti kwá tɛ Yezo fãni gba ma, wa ta azi gba kaya asambela ni ndo hĩnga bere kwá tɛ Yezo alengbi na nɛ ma. Azi mɛndɛ̃ ndo hũnda tɛrɛ la na ndo ya, ‘Kwá tɛ Yezo alengbi nvɛ̃ni ti lingɔ ya, Nzapa ka lɛlo na ndo siɔ kpale tɛ mbi?’ Nda mɛ ala ndo hũnda tɛrɛ la na ando ti ngaso nɛ? Ngoi mɛndɛ̃, ala ndo landa bingangɔ li tɛ azi mɛ ndo tɛnɛ ya, ta kwá tɛ Yezo alengbi ti lingɔ ya, aka lɛ na ndo siɔ kpale ma. Ngasia la ava Yezo ahĩngandó mbilimbili na lo ti kwá tɛ lo nɛ, wa ngasia la ala zandó azi mɛndɛ̃ ya, ala hĩnga mbilimbili niko nɛ?
6. Na 1872 mbilimbili ti ya Ngbangɔ mɛndó grupɛ kɔi tɛ awa mandangɔ Ngbangɔ agbɔ̃ ndani nɛ?
6 Dã na nda siɛklɛ ti 19, grupɛ tɛ awa mandangɔ Ngbangɔ mɛ Charles Taze Russell ndo tambwisa ko, ala bandandó mandangɔ Ngbangɔ na seni nvɛ̃ni. Ala yendó hĩngangɔ mbilimbili na lo ti kwá tɛ Yezo, nga na se mɛ alengbi ti dangɔ bɛ na bi ti kwá tɛ lo. Na 1872, na lége ti Ngbangɔ, ala gbɔ̃ndó ndani ya, Yezo kpindó so tɔ̃ngɔ azi zu. Ta ala hɔndɛndó mbilimbili niko ti ya Ngbangɔ na lo tɛ la nvɛ̃ni ma. Kutu, ala bandandó pangɔ ni hɛ̃ azi mɛndɛ̃ na lége ti abuku, ambeti nga na yakere buku. Wa mbala kɔi, ala bandandó lingɔ bombi ti dangɔ bɛ na bi ti kwá tɛ Yezo fãni kɔi na ya bulu nga ma se mɛndó awakristo ti siɛklɛ ti uzu ndo li na ni.
7. Ngasia la, e ndo lua nzɔ̃ kpale na ndo bolukiluki mɛndó Charles Russell ná awa mandangɔ Ngbangɔ mɛndɛ̃ ali na ngoi ti uzu nɛ?
7 Ndɛ lo mɛ ko, e ndo lua anzɔ̃ kpale gba na ndo bolukiluki mɛndó awakristo niko ti mbilimbili ali aɔ ndɛ abulu gba. Ngasia? Na lége tɛ la, Yehova za e ya, e hĩnga bere kwá tɛ Yezo alengbi na nɛ, nga na ye mɛ ni na lingɔ na lo tɛ e nga na lo tɛ azi zu na bi mɛ na gangɔ. (1 Yn. 2:1, 2) E gbɔ̃ nga ndani ya, Ngbangɔ hɛ̃ nzɔ̃ dangɔ bɛ sɛ mɛ akɛsɛnɛ na lo tɛ azi mɛ ndo hɛ̃ Nzapa dengɔ bɛ—azi mɛndɛ̃ na luangɔ dungɔ lɛ ngɛ̃́ mɛ azanga kwá ka ndozu, wa amiliɔ̃ tɛ azi mɛndɛ̃ na luangɔ dungɔ lɛ ngɛ̃́ ti kaka ge lɛ sese. Hĩngangɔ mbilimbili na lo ti songo mɛ Yehova ndo ye na e, nga na anzɔ̃ kpale zu mɛ e ndo lua na lo ti kwá tɛ Yezo ko, ando li ya e dɔ dã na Yehova. (1 Pet. 3:18; 1 Yn. 4:9) Ni la, nga ma se mɛndó ayata e na ngoi ti uzu ndo li na ni ko, e ndo ili azi mɛndɛ̃ ya, ala ga e na ala e li bombi ti dangɔ bɛ na bi ti kwá tɛ Yezo nga ma se mɛndó Yezo li na ni.
E NDO ILI AZI MƐNDƐ̃ YA, ALA GA E DA BƐ E NA BI TI KWÁ TƐ YEZO
Ye mɛ mɔ lengbi ti lingɔ ti nɛngɔ ya, mɔ hɛ̃ ti mɔ na kapanyɛ ti ilingɔ azi na lo ti dangɔ bɛ na bi ti kwá tɛ Yezo nɛ? (Ba paragrafɛ ti 8-10) e
8. Ye mɛ atɛmwɛ̃ tɛ Yehova ndo li ti nɛngɔ ya, ala ili azi mɛndɛ̃ na lo ti dangɔ bɛ na bi ti kwá tɛ Yezo nɛ? (Ba limɔ.)
8 Bandandó gã Atɛmwɛ tɛ Yehova ndo ili afɔ̃ la ya, ala ga bombi ti dangɔ bɛ na bi ti kwá tɛ Yezo. Na bulu ti 1881 ailindó ayata kɔli ná ayata wali ti États-Unis ya, ala ga bombi ti dangɔ bɛ na bi ti kwá tɛ Yezo kaya da tɛ nyita kɔli kɔi mɛ ka Allegheny mɛ kaya kɔdɔrɔ ti Pennsylvanie. Na gesi, abandó dangɔ na bi ti kwá tɛ Yezo kaya da ti bombi kɔi kɔi. Na nzɛ ti 03/1940, atɛnɛndó hɛ̃ awa fangɔ tɛnɛ zu ya, ala lengbi ti ilingɔ azi zu mɛ kaya teritware mɛ asepala na mbilimbili ya, ala ga bombi ni. Na bulu ti 1960, ti fãni ti uzu bethel tondó hɛ̃ ayata ti ya bombi papier ti invitasiɔ̃. Bandangɔ so ndoko ko, ando kangbi amiliare ti apapier ti invitasiɔ̃ hɛ̃ azi. Nda mɛ e ndo lekisa ngoi gba, e ndo li nga ge ge ge ti ilingɔ azi mɛndɛ̃ ka bombi ti dangɔ bɛ na bi ti kwá tɛ Yezo nɛ?
9-10. Azi mɛ e ndo ili la ya, ala ga bombi ti dangɔ na bi ti kwá tɛ Yezo na? Wa nzɔ̃ kpale mɛ ala ndo lua nɛ? (Yn. 3:16)
9 E ndo ili azi ya, ala ga bombi ti dangɔ bɛ na bi ti kwá tɛ Yezo na lo mɛ ya, e ye ya, azi mɛ aga fãnani amanda ye mɛ Yehova ná Yezo ali na lo tɛ e zu. (Di Yoanɛ 3:16.) E ndo du na dangɔ bɛ ya, akpale mɛ ala na hũngɔ nga na mangɔ na bi niko na tongɔ ala ya, ala di manda aye gba mɛ aba Yehova wa ala ti nga awa kwa tɛ lo. Kanda azi mɛndɛ̃ ndo lua nga nzɔ̃ kpale ni.
10 E ndo ili nga azi mɛ azia vɔrɔngɔ Yehova. E ndo li ngaso so zangɔ ala ya, ala hĩnga ya, Nzapa ndo ye bo ala. Azi gba ka popo tɛ la ndo ye invitasiɔ̃ tɛ e, wa e ndo sepala nga gba na ngoi mɛ ala ndo ga bombi ti dangɔ bɛ na bi ti kwá tɛ Yezo. Gwengɔ bombi niko ndo li ya, ala da bɛ la na dengɔ bɛ mɛndó ala na ni uzu na ngoi mɛndó ala ndo vɔrɔ Yehova. E mu se lɛ lo tɛ nyita wali Monica. c Na ngoi ti siɔ ngã ti COVID-19 ko, lo dirindó lo banda fangɔ tɛnɛ fãni mɛndɛ̃. Na pɛ gwengɔ bombi ti dangɔ bɛ na bi ti kwá tɛ Yezo ti bulu ti 2021 ko, lo tɛnɛ ya: “Ta bɛ mbi na lingɔ gbanda na bombi ti bulu niko ma. Ali abulu 20 mɛ ta mbi dɛndó mbi fa tɛnɛ ma. Kanda mbi diri fãni mɛndɛ̃ mbi pa loyengɔ tɛ mbi hɛ̃ azi mɛndɛ̃, wa mbi ili nga ala ya, ala ga bombi ti dangɔ bɛ na bi ti kwá tɛ Yezo. Mbi lindó zu mɛ mbi lengbi ti lingɔ na bɛ mbi kɔi, so hɛ̃ngɔ Yehova ná Yezo sia kɔli na lo ti aye zu mɛndó ala li na lo tɛ mbi.” (Nz. 103:1-4) Abɛse azi kɛ̃ bere ala ye invitasiɔ̃ tɛ e ko, e ndo li kpengbani ti nɛngɔ ya, e ili azi mɛndɛ̃ ya, ala ga bombi ti dangɔ bɛ na bi ti kwá tɛ Yezo, na lo mɛ ya, e hĩnga ya, ge ge ge tɛ e ndo hɛ̃ Yehova dengɔ bɛ.
11. Na bangɔ Hagai 2:7 ngasia Yehova ndo sulu ge ge ge mɛ e ndo li ti nɛngɔ ya, e ili azi ka bombi ti dangɔ bɛ na bi ti kwá tɛ Yezo nɛ?
11 Yehova ndo sulu ge ge ge mɛ e ndo li ti ilingɔ azi ya, ala ga bombi ti dangɔ bɛ na bi ti kwá tɛ Yezo. Na 2021, abɛse na ya siɔ ngã ti COVID-19 mɛ mbalasi ta kɔdɛ ti gwengɔ ka tɛ azi so ilingɔ ala da ma ko, azi bere 21 367 603 ali mbalasi bombi ti dangɔ bɛ na bi ti kwá tɛ Yezo. Nɔmbrɛ niko aɔ fãni sɛ na ndambu nɔmbrɛ tɛ Atɛmwɛ tɛ Yehova ti lɛ gigi zu! Ti biani ko, ta Yehova ndo kpã bo lɛ lo na ndo wungɔ tɛ azi mɛ ali bombi ti dangɔ bɛ na bi ti kwá tɛ Yezo ma. Lo ndo kpã lɛ lo na ndo zo kɔi na kɔi. (Luka 15:7; 1 Tim. 2:3, 4) E ndo ye na bɛ e kɔi ya, lo ndo salela lége niko ti nɛngɔ ya, e tengbi na azi mɛ bɛ la nzɔ̃ni.—Di Hagai 2:7.
E NDO LI BOMBI TI DANGƆ BƐ NA BI TI KWÁ TƐ YEZO ABƐSE NA YA NGOI TI PƐNƆ
Yehova ndo sulu ge ge ge tɛ e mɛ e ndo li ti nɛngɔ ya, e da bɛ e na bi ti kwá tɛ Yezo (Ba paragrafɛ ti 12) f
12. Ye mɛ alengbi ti lingɔ ya, ati pɛnɔ ti nɛngɔ ya, e da bɛ e na bi ti kwá tɛ Yezo nɛ? (Ba limɔ.)
12 Yezo piandó tɛnɛ ya, na ngoi ti ndani ko, e na tengbingɔ na kpengba kpale gba, mabere botemeli tɛ azi ti ndasewa, pɛnɔ, to, angã ná akpale mɛndɛ̃. (Mat. 10:36; Mar. 13:9; Luka 21:10, 11) Na ya ngoi mɛndɛ̃ ando ti pɛnɔ ti nɛngɔ ya, e da bɛ e na bi ti kwá tɛ Yezo. Ayata kɔli ná ayata wali ndo li nɛ na ngoi mɛ ando ti pɛnɔ ti nɛngɔ ya, ala da bɛ la na bi ti kwá tɛ Yezo nɛ?
13. Ngasia la, Yehova sulundó ge ge ge tɛ nyita Artem nga na ekateli tɛ lo ti dangɔ bɛ lo na bi ti kwá tɛ Yezo abɛse lo ndó ka bɔlɔkɔ nɛ?
13 Bɔlɔkɔ. Ayata e mɛ ka bɔlɔkɔ na lo ti loyengɔ tɛ la ko, ala ndo li zu mɛ ala lengbi ti lingɔ ti nɛngɔ ya, ala da bɛ la na bi ti kwá tɛ Yezo. E ba se lɛlo tɛ nyita Artem. Na ngoi ti dangɔ bɛ na bi kwá tɛ Yezo ti bulu ti 2020 ko, abindó lo kaya da boloko ti yakere mɛ na kɔnɔngɔ ti 17 mɛtrɛ kare, wa lo ndó ka bɔlɔkɔ niko na awa bɔlɔkɔ mɛndɛ̃ 5. Abɛse lo ndó ka bɔlɔkɔ ko, lo lindó kpengbani ti luangɔ aye mɛ lo na salelangɔ ni mabere mapa ná vinyɔ ti nɛngɔ ya, lo da bɛ lo na bi ti kwá tɛ Yezo, wa lo nvɛ̃ni lo li ngandó diskur na bɛ lo. Kanda afɔ̃ lo ti bɔlɔkɔ ndo nyɔndó manga, ala ndo tɛnɛ ngandó asiɔ tɛnɛ gba. Ye mɛndó lo li nɛ? Lo yɔndó ka ti la ya, se ala ye ko, ala zia nyɔngɔ manga na tɛnɛngɔ siɔ tɛnɛ na pɛ ngoi kɔi gɛgɛrɛ. Nyita Artem kamwãndó na ngoi mɛndó lo hũ ya, afɔ̃ lo niko aye ya, ta ni na nyɔngɔ manga bere tɛnɛngɔ siɔ tɛnɛ na ngoi ti dangɔ bɛ na bi ti kwá tɛ Yezo ma. Artem tɛnɛ ya, “Mbi pandó hɛ̃ la ya, mbi kambisa hɛ̃ la kpale mɛ aba dangɔ bɛ na bi ti kwá tɛ Yezo” Kanda ala kɛ̃ndó, abɛse ala tɛnɛndó ya, ta ala na gwɛ̃ ti mangɔ tɛnɛ niko ma ko, na pɛ hũngɔ nga na mangɔ nyita Artem na ngoi mɛ lo ndo da bɛ lo na bi ti kwá tɛ Yezo ko, ala hũndandó lo na ando gba mɛ aba kwá tɛ Yezo.
14. Ge ge ge mɛndó linɔ tɛ Yehova li ti nɛngɔ ya, ayata da bɛ la na bi ti kwá tɛ Yezo abɛse na ya ngoi ti siɔ ngã ti COVID-19 nɛ?
14 Siɔ ngã ti COVID-19. Ngoi mɛndó siɔ ngã ti COVID-19 abanda ko, ta Atɛmwɛ̃ tɛ Yehova lengbindó ti lingɔ bombi ti dangɔ bɛ na bi ti kwá tɛ Yezo kaya da ti Lo-lengɔ Gbia ma. Kanda ta ni gbanzindó ala na dangɔ bɛ ala na bi ti kwá tɛ Yezo ma. d Abombi mɛndó na likoki ti lingɔ ni na lége ti internet ko, ala lindó ni na lége ti video. Wa abombi mɛ mbalasi ta ala na makoki ti lingɔ ni na lége ti internet ma mɛ? Na ya akɔdɔrɔ mɛndɛ̃ ko, amundó ebongiseli ti nɛngɔ ya, ayata landa prɔgramɛ niko na lége ti televisiɔ̃ bere radio. Hãngɔ ni zingɔ, biro ti filia alindó ya, ayata li adiskur ti dangɔ bɛ na bi ti kwá tɛ Yezo na lége ti vídeo na ayanga ɔngɔ 500 ti nɛngɔ ya, azi mɛ kaya kɔdɔrɔ mɛ yɔngɔrɔ ni nvɛ̃ni ala mu avideo ni, wa ala da bɛ la na bi ti kwá tɛ Yezo. Ayata ndo gwendó zia avideo hɛ̃ ayata mɛndɛ̃ mɛndó ala na gwɛ̃ ni.
15. Wangɔ mɛ mɔ lengbi ti luangɔ na ndo se lɛlo tɛ wa mandangɔ Ngbangɔ kɔi mɛ ili lo la Sue nɛ?
15 Botemeli tɛ azi ti ndasewa. Tɛ ayata mɛndɛ̃, kpengba kpale mɛ ala ndo tengbi na ni ti gangɔ bombi ti dangɔ bɛ na bi ti kwá tɛ Yezo adu botemeli tɛ azi ti ndasewa la. E ba se lɛlo tɛ wa mandangɔ Ngbangɔ kɔi mɛ ili lo la Sue. Na 2021, uzu ti lá ti dangɔ bɛ na bi ti kwá tɛ Yezo ko, Sue tɛnɛndó hɛ̃ wa mandangɔ na lo Ngbangɔ ya, na lo mɛ ya, azi ti ndasewa tɛ lo ndo temela lo ko, ta lo na dungɔ na likoki ti gwengɔ bombi ti dangɔ bɛ na bi ti kwá tɛ Yezo ma. Wa mandangɔ na lo Ngbangɔ adindó hɛ̃ lo Luka 22:44. Na gesi, lo kambisandó hɛ̃ lo ya, ngoi mɛ e tengbi na kpengba kpale ko, elengbi ti landangɔ se lɛlo tɛ Yezo na ngoi mɛ e ndo li sambela hɛ̃ Yehova, wa e kpã nga bɛ e zu na ndo lo. Bi mɛndɛ̃ so pɛko ni, Sue lɛkɛndó mapa ná vinyɔ, wa lo landa ngandó prɔgramɛ ti texte du jour ti dangɔ bɛ na bi ti kwá tɛ Yezo mɛ akpã kaya jw.org. Na lá ti dangɔ bɛ na bi ti kwá tɛ Yezo ko, lo landandó diskur na lége telefɔnɛ kaya shambrɛ tɛ lo zangangɔ ya, agia lo. Na gesi, Sue sundó mɛsagɛ hɛ̃ wa mandangɔ na lo Ngbangɔ ya: “Mɔ sa biri ngunu bɛ mbi gba nvɛ̃ni. Mbi li zu mɛ mbi lengbi ti lingɔ ti nɛngɔ ya, mbi li bombi ti dangɔ bɛ na bi ti kwá tɛ Yezo, wa Yehova za mbi. Ta mɔ lengbi ti hĩngangɔ dengɔ bɛ mɛ na olo mbi na ni ma!” Ta mɔ hũ ya, Yehova lengbi nga ti zangɔ mɔ se mɔ tengbi na kpale ti ngaso ma?
16. Na bangɔ Roma 8:31, 32 nda elengbi ti yengɔ ya, Yehova na sulungɔ ge ge ge mɛ e ndo li na lo ti dangɔ bɛ na bi ti kwá tɛ Yezo nɛ?
16 Yehova ndo mu ge ge ge mɛ e ndo li ti nɛngɔ ya, e da bɛ e na bi ti kwá tɛ Yezo ya, adu ngbondoni. Elengbi ti yengɔ na bɛ e kɔi ya, Yehova na sulungɔ e na ngoi mɛ e ndo li ge ge ge ti hɛ̃ngɔ lo sia kɔli na lo ti aye mɛndó lo li na lo tɛ e. (Di Roma 8:31, 32.) Zia ya, e du na ekateli ti gwengɔ bombi ti dangɔ bɛ na bi ti kwá tɛ Yezo na bulu mɛ, wa e li nga zu mɛ elengbi ti lingɔ na bangɔ ngunu tɛ e ti nɛngɔ ya, e hɛ̃ ti e na ge ge ge zu na ya kwa ti nyingɔ na ngoi ti dangɔ bɛ na bi ti kwá tɛ Yezo.
BIA 18 Tózala na botɔndi mpo na lisiko
a Na bi kwa sɛ, bi nzɛ ti siɔ bulu ti 2023, amiliɔ̃ tɛ azi ti lɛ gigi zu na da bɛ la na bi ti kwá tɛ Yezo. Na lo tɛ azi gba na dungɔ mbala ti uzu ti la lingɔ ni. Azi mɛndɛ̃ mɛndó azia vɔrɔngɔ Yehova, wa ali nga abulu gba ta ala dɛ da bɛ la na kwá tɛ Yezo ma ko, ala na gangɔ ti nɛngɔ ya, e na ala e da bɛ e na bi ti kwá tɛ Yezo. Ambanga ni ndo du na akpale gba mɛ alengbi ti gbanzingɔ ala ya, ta ala ga ma, abɛse ngaso ko, ta ala ndo ngbã ma. Abɛse kpale ti ya dungɔ lɛ ngɛ̃́ tɛ mɔ adu ngasia ko, mɔ lengbi ti yengɔ na bɛ mɔ kɔi ya, Yehova ndo sepala na ge ge ge mɛ mɔ ndo li ti gwengɔ bombi ti dangɔ bɛ na bi ti kwá tɛ Yezo.
b Awakristo niko ndo ye ya, ngoi mɛ ani ndo li yenga ti dangɔ bɛ na bi kwá tɛ Yezo ko, mapa ná vinyɔ ndo gbinyangbi ndo ti nvɛ̃nɛ tɛrɛ Yezo nga na mɛ̃nɛ tɛrɛ lo. Na bangɔ dangɔ bɛ niko ko, Yezo ndo hɛ̃ tɛrɛ lo ná mɛnɛ tɛrɛ so tɔ̃ngɔ azi ngoi zu ko la zo ndo li yenga niko.
c E hɛ̃ ala ila mɛndɛ̃.
d Ba nga kaya jw.org na bɛli tɛnɛ mɛ tɛnɛ ya, “Ekaniseli ya liwa ya Yesu 2021.”
e KAMBISANGƆ NDA ALIMƆ: Abandandó singɔ na papier ti ilingɔ azi ka bombi ti dangɔ bɛ na bi ti kwá tɛ Yehova na bulu ti 1960. Bandangɔ so ndoko, adi alɛkɛ papier ti invitasiɔ̃ nzɔ̃ni nvɛ̃ni, na olo ko, zo lengbi nga ti mungɔ ni kaya telefɔnɛ.
f KAMBISANGƆ NDA ALIMƆ: Nga ma se mɛ limɔ fa na ni, ayata kɔli ná wali ndo li bombi ti dangɔ bɛ na bi ti kwá tɛ Yezo na ngoi ti to.
