Yehova ye ya, azi mɛ dungbi adu na dengɔ bɛ, wa mangbi ti kpengbani abombi ala bwai na bwai. (Mat. 19:4-6) Se mɔ ye lingɔ libala, ngasia la mɔ lengbi ti luangɔ wali bere kɔli ti nzɔ̃ni nɛ? Na lo mɛ ya, Yehova la du Wa lingɔ e ko, lo hĩnga aye mɛ elengbi ti lingɔ ti nɛngɔ ya, e du na libala ti dengɔ bɛ. Se du ya, e ndo kpã andia mɛ lo ndo hɛ̃ e na kwa ko, e na luangɔ anzɔ̃ kpale gba. E ba ambanga andia ni.

Ti uzu, ayɔ ya, e hĩnga ya: “Bɛ zo ndo handa zo gba aɔ aye mɛndɛ̃ zu, wa ni du nga siɔni sĩ.” (Yir. 17:9) Ngoi mɛ azi sɛ mɛ aye lingɔ libala ndo bangbi tɛrɛ la ko, songo mɛ ndo du ka popo tɛ kɔli na wali alengbi ti maingɔ iɔ, wa ni lengbi ti gbanzingɔ ala ti nɛngɔ ya, ala du na bingangɔ li ti nzɔ̃ni. Se ala li ye na landangɔ bo se mɛ zo na zo ndo ma na tɛrɛ lo na lo tɛ fɔ̃ lo ko, ta ala na mungɔ ekateli ti nzɔ̃ni ma. (Mas. 28:26) Ni la, ta adu ye ti ndara piangɔ tɛnɛngɔ hɛ̃ zo ya, mɔ ndo ye lo bere kongɔ kapa hɛ̃ lo ya, mɔ na dungɔ na lo zangangɔ ya mɔ hĩnga lo nzɔ̃ni ma.

Masese 22:3 atɛnɛ ya: “Zo mɛ na kpengba lɛ ndo hũ kpengba kpale ka gbɛ lɛ lo ko lo kpɛ, kanda zo mɛ zanga ndara ndo gwɛ̃ bo tɛ lo na ndo li lo, wa lo tengbi na pɛnɔ.” Akpengba kpale mɛ gingɔ wali bere gingɔ kɔli na lége ti internet alengbi ti singɔ na ni nɛ? Na vundu zu, ambanga awakristo a hũ ya, azi mɛ ta ani hĩnga la ma, mɛndó ani tengbi na la kaya internet ala handandó ani. Na ya kpale mɛndɛ̃, azi ti poloso alindó compte ti siɔni ti nɛngɔ ya, ani nzĩ na falanga tɛ azi mɛ ta la na kpengba lɛ ma. Ngoi mɛndɛ̃ azi niko ndo pa ya, ani du nga Atɛmwɛ tɛ Yehova.

Zia e ba siɔ kpale mɛndɛ̃. Asitɛ ti internet mɛndɛ̃ ndo salela aprɔgramɛ ti ya ordinateur ti nɛngɔ ya, ani hĩnga kɔli mɛ alengbi na wali mɛ bere wali mɛ alengbi na kɔli mɛ. Kanda ta ye mɛ ndo fa ya salelangɔ kɔdɛ niko ndo du biani da ma. Ni du nvɛ̃ni ye ti ndara kpãngɔ bɛ e ya, prɔgramɛ mɛ azi li ni aza e ya, e mu ekateli ti ngbondoni na omɛ aba lingɔ libala? Prɔgramɛ ti Mathematiques alengbi ti dungɔ nzɔ̃ni gba ɔngɔ andia ti ya Ngbangɔ?​—Mas. 1:7; 3:5-7.

E lua andia mɛndɛ̃ kaya Masese 14:15: “Zo mɛ zanga kpengba lɛ, lo ndo ye tɛnɛ zu mɛ atɛnɛ, kanda zo mɛ na kpengba lɛ, lo ndo du na kpengba lɛ na ya nɔ tɛ lo.” Ayɔ ya mɔ hĩnga zo nzɔ̃ni uzu ti nɛngɔ ya, lo ti ya mɔ bere kɔ  mɔ. Kanda na dungɔ kpengbani ya, mɔ hĩnga zo na lége ti site ti internet. Abɛse mɔ ndo to afoto hɛ̃ lo, lo ndo to nga afoto hɛ̃ mɔ, bere ĩ ndo solola gba na lége ti amɛsajɛ, mɔ lengbi ti tɛnɛngɔ ya, mɔ hĩnga lo nzɔ̃ni? Ambanga azi mɛndó ndo da bɛ la ya, ani lua wali bere kɔli ti ani dungɔ na ni ko, na ngoi mɛndó ala hũ wali ni bere kɔli ni na lɛ la, wa ala hĩnga nga kpale mɛ aba la ko, li la hulundó.

Davidi wa sungɔ bia atɛnɛ ya: “Ta mbi ndo nɔ̃ nɔ̃ na azi ti nvɛ̃nɛ ma, wa mbi ndo kpɛ azi mɛ ndo ɔndɛ ndenge tɛ la.” (Nz. 26:4) Azi ngba ndo hũ nzɔ̃ni lengɔ nvɛ̃nɛ ka lɛ profil tɛ la ti nɛngɔ ya, ani benda likebi tɛ azi na ndo ani. Azi mɛndɛ̃ alengbi ti hɔndɛngɔ aseliye tɛ la ti siɔni bere ta azi mɛndɛ̃ lengbi ti hũngɔ aseliye niko ti siɔni na ngoi mɛ ala ndo solola na lége ti internet ma. Zo lengbi ti tɛnɛngɔ kaya internet ya, ni du Tɛmwɛ tɛ Yehova, kanda lo mu batisimɔ? Lo du wakristo mɛ kpengbani na nyingɔ? Azi ti ya bombi mɛ lo ka da ndo hɛ̃ lo ndima? Bere lo zo mɛ lo du ndakisa ti siɔni bere lo du siɔ kwa? (1 Kɔr. 15:33; 2 Tim. 2:20, 21) Wa Ngbangɔ hɛ̃ lo lége ya, lo di li libala? Ayɔ ya, mɔ hĩnga agbinya na ndo hũnda ko. Kanda se adu ya, ta mɔ ndo lua lége ti tɛnɛngɔ tɛnɛ na Atɛmwɛ tɛ Yehova mɛ ahĩnga zo ni nzɔ̃ni ma ko, na dungɔ pɛnɔ ya, mɔ lua agbinya ni. (Mas. 15:22). Biani ta wa kwa tɛ Yehova ti mbilimbili alengbi ti dungɔ na kɔli bere wali mɛ “ta wa kristo ma.”​—2 Kɔr. 6:14; 1 Kɔr. 7:39.

Na bangɔ akpengba kpale mɛ gingɔ kɔli bere wali na lége ti site ti internet ndo si na ni ko, a du nzɔ̃ni ya, zo gi ndenge mɛndɛ̃ ti nɛngɔ ya, lo hĩnga zo mɛ na tingɔ gbanda ya lo bere kɔ lo. Kanda mɔ lengbi ti luangɔ kɔli bere wali mɛ mɔ ye dungɔ na lo kawa? Tɛmwɛ tɛ Yehova alengbi ti gingɔ ya, ni hĩnga wali bere kɔli mɛ ni na dungɔ na lo na lége ti abombi, yakere bombi, nga na akota bombi na ngoi mɛ e ndo tengbi ti lingɔ ni.

Na ngoi mɛ ta akpale ti gigi mɛ ndo hɛ̃ e lége ti lingɔ bombi nga ma se mɛ e ndo li na ni uzu ma, na ndakisa na ngoi ti siɔ ngã ti COVID-19, e ndo li bombi na lége ti video, ye mɛ alengbi ti hɛ̃ngɔ mɔ lége ti nɛngɔ ya, mɔ tengbi na nyita kɔli bere nyita wali mɛ mɔdo la. Mɔ lengbi ti mangɔ ala na ngoi mɛ ala ndo li diskur, bere ala ndo li devoir, bere na ngoi mɛ ala ndo hɛ̃ agbinya na ngoi ti bombi. (1 Tim. 6:11, 12) Na lége ti aprɔgramɛ mɛ ndo za zo ya, lo ndo hũ zo mɛ lo ndo solo la na lo ko, mɔ lengbi ti tɛnɛngɔ tɛnɛ na ayata wali na ayata kɔli na pɛ bombi. Na ya ngoi niko mɛ ayata ndo tengbi na lége ti video so tɛnɛngɔ tɛnɛ ko, mo lengbi ti bangɔ sɛ mɛ zo mɛ mɔ ndo sepala na lo ndo li na kpale tɛrɛ azi mɛndɛ̃, ni na zangɔ mɔ ya, mɔ hĩnga seliye tɛ lo nzɔ̃ni (1 Pet 3:4). Na ngoi mɛ mɔ ndo manda hĩngangɔ lo nzɔ̃ni ko, mɔ na hĩngangɔ bere ĩ na lo na mɔkanɔ kɔi, wa mɔ nga na hĩngangɔ bere lo du zo mɛ lo lengbi na mɔ ti nɛngɔ ya, ĩ na lo ĩ du na libala ti dengɔ bɛ.

Na ngoi mɛ azi mɛ ta dɛ li libala ma ndo salela ndia ti Ngbangɔ ti nɛngɔ ya, ani lua wali bere kɔli ko, ala na dungɔ na nzɔ̃ tangɔ li gɛrɛ gba, wa libala tɛ la nga na dungɔ na dengɔ bɛ. Tɛnɛ mɛ kaya mbeti ti Masese na tingɔ na seni ka tɛ la: “Zo mɛ lua nzɔ̃ wali [bere nzɔ̃ kɔli] ko, lo lua wɔlɔ, wa Yehova na sepalangɔ na lo.”​—Mas. 18:22.