Bulu kɔi so pɛ ni, apandó hɛ̃ ayata ti ndasewa ti Bethel ti Canada ya, Bethel ti Afrique du Sud na gwɛ̃ tɛ avɔlɔ̃tɛrɛ ti nɛngɔ ya, ala gwe li kwa ka ndo ti machine ti singɔ na ambeti ti fãnani mɛndó akpã ni. Mbi hɛ̃ndó ili mbi, wa mbi mandó dengɔ bɛ na ndenge mɛndó apɔna mbi. Apɔna ngandó ayata mɛndɛ̃ taa ti Bethel ti Canada​—Ken Nordin, Bill McLellan, ná Dennis Leech. A tɛnɛndó hɛ̃ e ya, e na mungɔ lége ti woni ti nɛngɔ ya, e si kai iɔ!

Mbi ilindó mama tɛ mbi na Telefɔnɛ, mbi pa hɛ̃ lo ya: “Mama, mbi na nzɔ̃ pa ti pangɔ hɛ̃ mɔ. Mbi ga mbi gwe Afrique du Sud!” Mama tɛ mbi dundó wali kɔi mɛ ta lo ndo tɛnɛ tɛnɛ gba ma, kanda lo ndó wali ti loyengɔ, lo ngandó na mangbi ti kpengbani na Yehova. Abɛse ta lo tɛnɛndó tɛnɛ gba ma ko, mbi hĩngandó ya, lo na zangɔ mbi. Abɛse awa dũngɔ mbi amandó vundu gba na lo mɛ ya, mbi ga gwe ka ndo mɛ yɔngɔrɔni na ala ko, ta ala kɛ̃ndó ekateli mɛndó mbi mu ma.

Ka Bethel ti Brooklyn, e zu siɔ e luandó formasiɔ̃ ti nzɛ taa ti nɛngɔ ya, e li kwa ka ndo ti machine ti fãnani ti singɔ na ambeti. Ni la, e mundó masuwa ti kotani mɛ aga gwe ka kɔdɔrɔ ti Cap. Mbi ndó na bulu 20. Na ngoi mɛndó e si ka kɔdɔrɔ ti Cap ko, e mundó train na ndɔ ti nɛngɔ ya, e gwe ka Johannesburg. E dɔndó e lo kaya yakere kɔdɔrɔ ti Karoo, mɛndó ni ka bɛ nyama (semi-désertique). Kɔdɔrɔ niko ndó na butu ná gbingɔ. E zu siɔ e bandó ndo ge gigi ti lɛ fɛnɛtrɛ wa e hũndandó tɛrɛ e na ndo ya, e na olo ka wa! E na olo so ya nɛ? Abulu mɛndɛ̃ na gesi, ngoi mɛndó e diri e gwe kai ko, e hũndó ya, kɔdɔrɔ niko ti yakere adundó kɔdɔrɔ ti nzɔ̃ni nga ti siriri.

Na ya abulu gba, mbi lindó kwa ka ndo ti machine ti singɔ na ambeti mɛ ili ni la linotype, machine mɛ ta adu wele ti lingɔ ni na kwa ma. Mbi ndo kpãndó na mɔlɔngɔ alɛ mbeti mɛ ali ni na plomb ti nɛngɔ ya, machine asi na ambeti. Bethel ti Afrique du Sud ndo sindó na ambeti na ayanga gba ti afrika, ta bo na yanga ti Afrique du Sud kɔi ma, kanda na ayanga mɛ ando tɛnɛ ni kaya akɔdɔrɔ mɛndɛ̃ ti Afrika. Fãna machine ti singɔ na mbeti mɛndó e ga na ndombali ni ando lindó kwa gba!

Na gesi, mbi lindó kwa ka Buro ti singɔ na mbeti, mɛ ni ndo bandó kwa mɛ aba singɔ na ambeti, tongɔ ambeti nga na kwa ti gbinyangbingɔ ambeti. Mbi ndo lindó akwa gba, ni ndo lindó ya mbi du na dungɔ lɛ ngɛ̃́ ti dengɔ bɛ.

Na bulu ti 1968, mbi dundó na nyi wali kɔi mɛ wa sungɔ lége ti ngoi zu, mɛ ili lo la Laura Bowen, lo ndo dundó so gunda Bethel. Lo ndo su ngandó mbeti na machine (dactylographie) ka ndo ti gbinyangbingɔ ambeti. Na ngoi kondó ko, azi ko la ndo li kwa ka Bethel se la ali libala ko, ta ala lengbindó ti ngbãngɔ ka Bethel ma, ni la ahɛ̃ndó e kumba ti fãnani mabere awa sungɔ lége ti kotani. Ni hɛ̃ndó mbi sɔngɔ bɛ na lo mɛ ya, mbi lindó bulu Sui kɔi ka Bethel, kaindó ko, ando hɛ̃ndó e ndo ti langɔ na ni nga na tɛ ti tɛngɔ. E na lingɔ ngasia ti nɛngɔ ya, e kokisa agwɛ̃ tɛ e ti bi zu na falanga yakere mɛndó ando hɛ̃ awa sungɔ lége ti ngoi zu nɛ? Zo kɔi kɔi na luangɔ falanga 25 rand na ya nzɛ (na ngoi kondó ni lengbi na 35$.) se du ya, lo kokisa ngoi mɛndó ayɔ ka ti lo ya, lo li ni, lo kokisa nga nɔ̃mbrɛ tɛ azi mɛndó ayɔ ya lo diri lo ba ala, wa lo kangbi nga ambeti gba. Bo na ya falanga ko la, e na futangɔ da ti langɔ na ni, vɔ̃ngɔ tɛ ti tɛngɔ, futangɔ lége (transport), futangɔ nga da yɔrɔ tɛ e nvɛ̃ni nga na aye mɛndɛ̃ mɛ e na gwɛ̃ ni.

A tondó e ka grupɛ ti yakere mɛ so gunda kɔdɔrɔ ti Durban ka tɛrɛ Océan Indien. A Indien ndó kaya kɔdɔrɔ niko mawoma, azi ni gba, adundó atara azi mɛ ala ndo lindó kwa kaya sosiete ti lingɔ sikrɛ na ya abulu 1800. Ndɛ lo mɛ ko, ala ndo li akwa mɛndɛ̃, kanda ala bata kutimɛ nga na tɛ ti kɔdɔrɔ tɛ la, kɔi ti tɛ ni adu omɛ a ndo ili ni ya, currys. Wa ala ndo tɛnɛ ngandó anglais, ni la adundó woni ti nɛngɔ ya, e na ala tɛnɛ tɛnɛ.

Na ngoi kondó ko, ando yɔndó ya, awa sungɔ lége ti kotani ahɛ̃ ngoi 150 na ya nzɛ kɔi kɔi. Ni la, mbi ná Laura e mangbindó ti lingɔ ngoi Mana na bi ti uzu mɛndó e si na ya kwa ti fangɔ tɛnɛ. Gbingɔ ná dé ndó da gba. Ta e ndó na zo kɔi mɛ elengbi ti diringɔ bangɔ lo ma, ta e ngandó na zo ti mandangɔ na lo Ngbangɔ ma. Ni la e lindó ngoi mana na ya kwa ti fangɔ tɛnɛ nyɔ da na nyɔ da. Yakere na pɛ bandangɔ kwa ti fangɔ tɛnɛ ko, mbi bandó ngoi, kanda e li bondó miniti 40 gɛgɛrɛ bandangɔ la e si na ya kwa ti fangɔ tɛnɛ! Ni la, mbi hũndandó tɛrɛ mbi na ndo ya, e na lingɔ ngasia ti nɛngɔ ya, e kokisa ngoi mabere tɛ awa sungɔ lége ti kotani nɛ?

Zangangɔ diringɔ na kpale gesi, e kpãndó prɔgramɛ ti aye mɛ e na lingɔ. Bi zu e ndo gwendó na tɛrmusɛ ti kafe ná agato tɛ e. Na ngoi mɛndó e ndo ye wɔngɔ tɛrɛ e yakere ko, e ndo kpãndó kamiɔ̃ tɛ e ka gbɛ dé ti kɛkɛ. Ngoi mɛndɛ̃, anzɔ̃ ayangambi tɛ a Indien, ndo gindandó e, ala ndo ba ngandó e na zema zu nvɛ̃ni! Na pɛ ngoi yakere e ga e hĩnga ya, se ndã dé wa aɔ sa sɛ bere sa taa ko, na pɛko ni ta bi ndo ninga ko avu ma.

Adundó kota dengɔ bɛ na mbage tɛ e ti pangɔ mbilimbili ti ya Ngbangɔ hɛ̃ azi ti ya kɔdɔrɔ niko mɛndó awa songo. Ala dundó awa yambangɔ azi, awa tɔndɔngɔ azi, ala ndo kpɛ ngandó Nzapa. Azi gba ti sambela ti Hindu, ala ndo yendó tɛnɛ ti ya Ngbangɔ mɛ e ndo pa hɛ̃ ala. Ala ndo yendó mandangɔ kpale mɛ aba Yehova, Yezo, tɛnɛ ti ya Ngbangɔ, nzɔ̃ dangɔ bɛ ti dungɔ kaya gigi ti fãnani, nga na nzɔ̃ dangɔ bɛ na lo tɛ azi mɛ akpili. Na pɛ bulu kɔi, e tindó na azi 20 mɛ e ndo manda na ala Ngbangɔ. Bi zu e ndo sepalandó tɛngɔ ye ndoni kɔi na ndasewa kɔi tɛ azi mɛndó e na la e ndo manda Ngbangɔ. E ndó na dengɔ bɛ nvɛ̃ni.

Na gesi ahɛ̃ndó e kumba mɛndɛ̃ ti fãnani, a tondó e mabere awa bangɔ ndo kɛlɛ kɛlɛ ka tɛrɛ Océan Indien. Pɔsɔ kɔi kɔi, e ndo e gwendó so bangɔ ayata ti ya bombi, e ndo fandó tɛnɛ ndoni kɔi na ala, wa e ndo sa ngandó ngunu bɛ ala. E tindó mabere azi ti ndasewa tɛ ala, e ndo lendó wele na ayangambi tɛ ala, nga na asa mɛndó kaya lopango tɛ la. E lindó bulu sɛ ti dengɔ bɛ na ya kwa niko. Lá kɔi ayata ti Bethel a ilindó mbi, ala pandó hɛ̃ mbi ya, “E ye ya, mɔ diri ge Bethel.” Mbi pandó hɛ̃ la ya, “Ĩ hĩnga ya, e tɛ e na dengɔ bɛ ge ndo mɛ e da.” Abɛse ngaso ko, e yendó lingɔ kwa hɛ̃ Yehova ka ndo zu mɛ lo ye tongɔ e da.

Ka Bethel atondó mbi ka Departema ti Service, kai mbi luandó nzɔ̃ tangɔ li gɛrɛ ti lingɔ kwa ndoni kɔi na ayata mɛ ala kpengbani na ya nyingɔ, wa ala hĩnga nga kwa nzɔ̃ni. Na ngoi kondó ko, se wa bangɔ ndo kɛlɛ kɛlɛ ahonzi bangɔ bombi kɔi ko, lo ndo tondó mbeti mɛ aba bombi niko ka Biro, na gesi, Biro ndo tondó mbeti hɛ̃ ayata ti ya bombi niko na bangɔ mbeti mɛ wa bangɔ ndo kɛlɛ kɛlɛ ato hɛ̃ la. Mbeti niko adundó ti sangɔ ngunu bɛ ayata nga na hɛ̃ngɔ ala malako ti yangondo mɛ ala lengbi ti landangɔ ni. Ni ndo lindó ya, asɛkrɛtɛrɛ tɛ e ndo li  kwa kpengbani na lo mɛ ya, ala ndo gbinyangbi ambeti mɛ asu na yanga ti Xhosa, Zulu, nga na ayanga mɛndɛ̃ na anglais, wa ala ndo gbinyangbi ngandó ambeti mɛ asu ni na anglais na ayanga niko. Mbi ndo sepalandó mawoma na ayata mɛndó ndo li kwa ti kpengbani ti gbinyangbingɔ ambeti niko na lo mɛ ya, ala zandó mbi ti nɛngɔ ya mbi hĩnga akpengba kpale mɛndó ayata e mɛ ambina azi ndo tengbi na ni.

Na ngoi kondó ko, kpale ti kangbingɔ ambunzu ná ambina azi (apartheid) nindó kpengbani ka Afrique du sud. Ta ambunzu na ambina azi alengbindó ti dungɔ so ya kartier kɔi ma, ni la ta ambuzu ná ambina azi ndo lekisandó ngoi ndoni kɔi ma. Ayata e mɛ ambina azi ndo tɛnɛndó yanga tɛ la nvɛ̃ni, ala ndo fandó tɛnɛ na yanga tɛ la nvɛ̃ni, ala ndo gwe ngandó bombi ti yanga tɛ nvɛ̃ni.

Ta mbi ná ayata gba mɛ ambina azi e hĩngangbindó ma, na lo mɛ ya, mbi ndo fa bondó tɛnɛ kaya teritoirɛ mɛ ando tɛnɛ bo anglais. Kanda na olo, mbi lua nzɔ̃ tangɔ li gɛrɛ ti mandangɔ kpale gba ti kɔdɔrɔ tɛ ayata e mɛ ambina azi, nga na kutimɛ tɛ la. Mbi manda ngandó kpengba kpale mɛ ala tengbi na ni na lo ti kutimɛ nga na lo ti siɔ dangɔ bɛ mɛndó azi ti ya kɔdɔrɔ tɛ la ndo ye ni. Na lo mɛ ya, ala ndo tengbindó na botemeli mɛ ando lo ka tɛ azi ti ndasewa ná azi ti ya kɔdɔrɔ tɛ la ko, ayɔndó ge ge ge ti nɛngɔ ya, ala zia landangɔ akutimɛ mɛ ta ni mangbi na tɛnɛ ti ya Ngbangɔ ma, wa ala kɛ̃ nga lingɔ aye mɛ ni na mangbi na asiɔ nyingɔ. Ka ndo kɔdɔrɔ, azi gba adundó awa yɛlɛ, ni la ta azi gba alindó kalasi ma, kanda ala ndo tɔndɔndó Ngbangɔ.

Mbi le ngandó kwa ka ndo mɛ ando ba kpale ti andia mɛ a zi lége hɛ̃ zo ya, lo vɔrɔ Nzapa na ndenge mɛ bɛ lo ye, nga na kpale mɛ aba kɛ̃ngɔ yɔrɔngɔ tɛrɛ na ya kpale ti politikɛ. Ando falandó ayangambi tɛ Atɛmwɛ tɛ Yehova ka kalasi na lo mɛ ya, ala ndo kɛ̃ndó yɔrɔngɔ tɛrɛ la na ya kpale ti sambela bere yengɔ abia mɛ ndo gonda kɔdɔrɔ tɛ la. Ge ge ge ná mbilimbili tɛ ayangambi niko alindó ya, loyengɔ tɛ mbi ati kpengbani.

Kaya kɔdɔrɔ ti Swaziland (mɛ ando ili ni ndɛ ya, Eswatini) ayata atengbi ngandó na kpengba kpale mɛndɛ̃. Na ngoi mɛndó gbia Sobhuza kpi ko, ayɔndó ka ti azi ti ya kɔdɔrɔ zu ya, ala tɔndɔ kutimɛ ti kɔdɔrɔ mɛ ando li ni na lo ti kwá tɛ zo. Ayɔndó ya, akɔli ambó kwa li la, awali afala nga kwa li la. Ayata kɔli ná ayata wali gba mɛndó akɛ̃ tɔndɔngɔ kutimɛ niko mɛ na mangbi na sambela tɛ akotala ko, ala tengbindó na botemeli tɛ azi ti ya kɔdɔrɔ tɛ la.  Hũngɔ mbilimbili tɛ la na mbage tɛ Yehova agbɔ̃ndó bɛ e mawoma! E mandandó akpale gba na mbage tɛ ayata e ti afrika, mbilimbili, gbengɔ bɛ ná yɔngɔrɔ bɛ tɛ ala alindó ya, loyengɔ tɛ e ati kpengbani.

Na bulu ti 1981, atɛnɛndó hɛ̃ mbi ya, mbi hɛ̃ ti mbi na ya se ti fãnani ti singɔ na ambeti tɛ e na lége ti ordinateur. Ni la mbi dirindó ka ndo mɛ ando si na ambeti. Adundó ngoi kɔi ti dengɔ bɛ nvɛ̃ni! Se ti singɔ na ambeti agbinyangbi ndó nvɛ̃ni. Nyita kɔi ahɛ̃ndó e machine ti fãnani mɛ ili ni la photocomposeuse ya, e tara ni. Ni lindó ya, e kpã a photocomposeuse kũ ti fãnani na pɛnda amachine gumbaya ti gã mɛ ili ni la linotype. E kpã ngandó fãna machine mɛndɛ̃ ti singɔ na ambeti mɛ ili ni la offset. E bandandó singɔ na ambeti gba na ndenge mɛ ta e dɛndó e si na uzu ma!

Singɔ na ambeti na lége ti ordinateur alindó ya, e si na prɔgramɛ ti fãnani ti singɔ na ambeti mɛ ili ni la MEPS, ni ndo za ti nɛngɔ ya asi na ambeti na ayanga gba. Tɛkinoloji agbinyangbindó akpale gba bandangɔ la ayata siɔ ti Bethel ti Canada aga so lingɔ kwa na machine ti linotype mɛndó ando li kwa yɛkɛ yɛkɛ ka Bethel ti Afrique du Sud! (Yis. 60:17) E zu e dundó na awali mɛ awa sungɔ lége ti ngoi zu, mɛndó ala ndo ye tɛrɛ Yehova gba. Mbi ná Bill e ngbãndó ka Bethel. Ken ná Dennis, adũndó ayangambi wa ala du ngandó so dã na Bethel.

Bi zu, kwa mɛndó ando yɔ ya, Bethel tɛ e ali ni, ando ti bondó gba. Ayanga mɛndó e ndo gbinyangbi na Ngbangɔ, e ndo e si nga na ni ando ti bondó gba bi zu, wa e ndo to ngandó ni ka Bethel ti akɔdɔrɔ mɛndɛ̃. Ayɔndó ya, e lua ada mɛ kotani nvɛ̃ni. Ni la ayata akĩndó ada mɛndɛ̃ ti fãnani ka ouest ti Johannesburg, wa e bandandó salelangɔ ni na bulu ti 1987. Adundó kota dengɔ bɛ na mbage tɛ mbi ti hũngɔ na lɛ mbi se mɛndó kwa tɛ e amai na ni ka Afrique du Sud, nga na lingɔ kwa ka Kɔmite ti filiale abulu gba.

Na bulu ti 2001 a ilindó mbi ya, mbi ga mbi li kwa ka ya Kɔmite ti filiale ti États-Unis mɛ alo ti singɔ fãnani. Abɛse ngaso ko, ahɛ̃ndó e vundu na ndenge mɛ e na ziangɔ kwa mɛ e ndo e li nga na akwa e mɛ e mɛsɛnɛ na ala ka Afrique du Sud, kanda, bɛ e bondó ndozu ti bandangɔ dungɔ lɛ ngɛ̃́ ti fãnani kaya ndasewa tɛ ayata ti Bethel ti États-Unis.

E ngandó na sɔngɔ bɛ na lo tɛ mama tɛ Laura, lo tindó kangba, se e du ka Étatat-Unis yɔngɔrɔ ni ko, ta e na zangɔ lo nvɛ̃ni na seni ma. Ayata Laura taa ti wali ayendó ya, ani na bangɔ ndo lo, wa ani nga na zangɔ lo na falanga. Ala tɛnɛndó ya, “Ta elengbi ti lingɔ kwa ti ngoi zu ma, kanda se e bata mama ko, ĩ lengbi ti ngbãngɔ lá kwɛ lingɔ kwa hɛ̃ Yehova ka Bethel.” E ndo hɛ̃ la sia wali mawoma.

Nyita mbi ti kɔli ná ya lo mɛ ala ndo du ka Toroto, ala fa ngandó seliye ti ngaso, ala yendó batangɔ mama tɛ mbi mɛ lo ti wɛ mwa bulu ɔngɔ 20 ka tɛ la. Mbi ndo hɛ̃ ala sia kɔli mawoma na ndenge mɛndó ala bata lo na songo zu tee kwá tɛ lo, na pɛ nyi ngoi yakere mɛndó e si ka New York. Adu nzɔ̃ sulu nvɛ̃ni dungɔ na azi ti ndasewa mɛ ala ndo ye lingɔ zu ti batangɔ awa dũngɔ ala mɛ ati akangba, ye mɛ ta lingɔ ni adu woni ma!

Ka États-Unis, mbi lindó kwa abulu yakere ka ndo mɛ ando si na ambeti, kwa kɔi mɛ akpale ni gba angbã bondó lá kwɛ gbinyangbingɔ tɛrɛ lo nga na tingɔ woni. Na gesi mbi lindó kwa ka Departema ti vɔ̃ngɔ aye. Adu ye ti dengɔ bɛ nvɛ̃ni dungɔ kaya ndasewa niko ti kotani na pɛ bulu 20, ndasewa ti Bethel mɛ ni na azi dã na 5 000 nga na avɔlɔ̃tɛrɛ 2 000 mɛ ta ala ndo du ka Bethel ma!

Ali ndɛ bulu 60, ta mbi hĩngandó ya, dungɔ lɛ ngɛ̃́ ti nzɔ̃ni mɛ ngaso ando kũ mbi ma. Na ya abulu ko zu, Laura ngbã bondó so gunda mbi ti zangɔ mbi. E ndó na dungɔ lɛ ngɛ̃́ ti nzɔ̃ni nvɛni! Ta bɛ e ndo li na anzɔ̃ kpale zu mɛndó e lua na ya kwa mɛndó e li ma, ayata kɔli ná ayata wali ti songo mɛndó e na ala e li kwa ndoni kɔi, nga na azi mɛndó e na ala e tengbi kaya Abethel na ngoi mɛndó e ndo gwe ka ndo mɛ ato e da. Na olo, mbi na bulu ɔngɔ 80, ta mbi dɛ mbi le kwa kpengbani nga ma se ti uzu ma, na lo mɛ ya, apalanga gba alua formasiɔ̃, ala na olo la ndo li kwa ni.

Wa sungɔ bia kɔi atɛnɛndó ya: “Dengɔ bɛ na kɔdɔrɔ ko la Yehova du Nzapa tɛ lo.” (Nz. 33:12) Ni du biani! Mbi ndo hɛ̃ Yehova sia kɔli na ndenge mɛ lo li ya, mbi lua dengɔ bɛ mɛ awa kwa tɛ lo ndo lua.