Tɛ tɛ ambo tɛ mbi
NICK, mɛ ndo du kaya kɔdɔrɔ ti Oregon mɛ kaya États-Unis atɛnɛ ya, “Na ya bulu ti 2014, mbi bandandó kpɔtɔngɔ na ambo tɛ mbi sɛ kaya gbata mɛndó mbi ka da. Ngoi zu mbi ndo hũndó Atɛmwɛ tɛ Yehova ndo lo na gɛrɛ la so gunda shario tɛ la. Ala ndo yundó bɔngɔ nzɔ̃ni, wa ala ndo barangandó azi zu mɛ ndo ɔ so gbɛlɛ la na dengɔ bɛ.
“Ta Atɛmwɛ ndo fa bondó nzɔ̃ bɛ na azi kɔi ma, kanda ala ndo fa ngandó nzɔ̃ bɛ na ambo tɛ mbi. Lá kɔi ko, Elaine, mɛndó so gunda shario ahɛ̃ndó ye ti tɛngɔ hɛ̃ ambo tɛ mbi sɛ. Na gesi, ngoi zu ko la, mbi ndo ɔ ti lége ko wa se mbi dɔ dã na shario ko, ambo tɛ mbi ndo kpɛndó kpɛ ti nɛngɔ ya, ani si iɔ ka ndo mɛ na Atɛmwɛ da ti nɛngɔ ya, ala hɛ̃ ani ‘ye yakere ani tɛ.’
“Na pɛ anzɛ gba ko, ambo tɛ mbi ndo sepalandó na tɛ tɛ la, wa mbi ndo sepalandó na tɛnɛ mɛndó mbi ná Atɛmwɛ tɛ Yehova e ndo tɛnɛ na pɛ ndunu ngoi. Kanda ta mbi ndo yendó tɛnɛngɔ tɛnɛ na ala gba ma. Mbi ndó na bulu ɔngɔ 70, wa ta mbi hĩngandó na seni aye mɛ Atɛmwɛ tɛ Yehova ndo ye lo ni ndo ha nga ni ma. Na lo mɛ ya, asambela gba mɛndó mbi li da anzɛ̃ndó na mbi ko, mbi hũndó nzɔ̃ni ya, mbi nvɛ̃ni mbi manda Ngbangɔ.
“Na ya ngoi niko ko, mbi hũndó Atɛmwɛ tɛ Yehova ndo pa nzɔ̃ pa na lége ti shario na ando ndɛ ndɛ̃ ndɛ̃ so ya kɔdɔrɔ. Ala ngandó na songo gba. Wa e ná ala e tindó na mangbi na lo mɛ ya, ala ndo hɛ̃ndó mbi gbinya ti ahũnda tɛ mbi na lége ti Ngbangɔ.
“Bi kɔi ndó ko, Elaine hũndandó mbi ya, ‘Mɔ ndo hĩnga ya, asa adu anzɔ̃ ye mɛ Nzapa li hɛ̃ azi?’ Mbi hɛ̃ndó lo gbinya ya, ‘seni la!’ Elaine dindó hɛ̃ mbi mbeti ti Yisaya 11:6-9. Ni gbinyangbindó dangɔ bɛ tɛ mbi abɛse ta mbi dɛndó mbi ye mungɔ ambeti tɛ Atɛmwɛ ma.
“Na gesi, mbi tɛnɛndó tɛnɛ gba na Elaine ná kɔ lo Brent na pɛ ndunu ngoi, wa atɛnɛ niko agbɔ̃ndó bɛ mbi gba. Ala pandó hɛ̃ mbi ya, mbi di Ngbangɔ bandangɔ na mbeti ti Matie tee na mbeti tɛ Awa Pangɔ kwa, ti nɛngɔ ya, mbi hĩnga bere dungɔ wakristo ti mbilimbili alengbi na nɛ. Wa ye mɛndó mbi li la. Ngoi yakere na gesi, mbi yendó mandangɔ Ngbangɔ ndoni kɔi na Brent ná Elaine. Adundó na ya bulu ti 2016.
“Mbi ndo yendó mandangɔ Ngbangɔ nga na gwengɔ bombi kaya da ti Lo-lengɔ Gbia. Mandangɔ aye mɛ Ngbangɔ ndo ha ndo hɛ̃ndó mbi dengɔ bɛ gba. Bulu kɔi na ndambu, mbi mundó batisimɔ, mbi ti Tɛmwɛ tɛ Yehova. Ndɛ lo mɛ ko, mbi na bulu 79, wa mbi hĩnga ya, mbi li na ya sambela ti mbilimbili. Yehova sulu mbi na ndenge mɛ lo za mbi ya, mbi ti kɔi tɛ azi ti ndasewa tɛ lo mɛ na lɛ gigi zu.”
