1. Na bangɔ 1 Tɛsalonikɛ 5:11, kwa mɛ e zu e ndo hɛ̃ ti e da nɛ?

 AKĨNDÓ bere abongisandó Da tɛ ĩ ti Lo-lengɔ Gbia wɛ? Se du ngaso ko, ta kitɛ da ma ya, mɔ ndo da bɛ mɔ na bi ti uzu mɛndó ĩ banda lingɔ bombi ka da. Mɔ hɛ̃ndó Yehova sia kɔli na lo ni. Ngoi mɛndɛ̃ mɔ tondó to na dengɔ bɛ zu, ta mɔ ndo kokandó yengɔ bia ti ebandeli ma. Ada ti Lo-lengɔ Gbia tɛ e ti nzɔ̃ni ndo gonda ili Yehova. Kanda, e ndo gonda lo fãni mɛndɛ̃ mawoma na ndenge mɛ e ndo hɛ̃ tɛrɛ gba na kĩngɔ ada na ndenge mɛndɛ̃. Kwa ni ɔ akwa ti kĩngɔ ada mɛndɛ̃ zu. Kwa ni ndo sa ngunu bɛ azi mɛ ndo ga so vɔrɔngɔ Yehova so ndo ti bombi ni. Na ndenge ti yika yika,Toma polo ndo bingandó li lo na ndo kwa niko na ngoi mɛndó lo su tɛnɛ mɛ kaya 1 Tɛsalonikɛ 5:11, mɛ agbɔ̃ bɛli tɛnɛ tɛ e.​—Di.

2. Aye mɛ e na tɛnɛngɔ tɛnɛ ndoni so ya tɛnɛ mɛ ndɛ nɛ?

² Toma Polo dundó nzɔ̃ lɛlo tɛ zo mɛ ahĩnga se ti sangɔ ngunu bɛ ayata lo awa kristo. Lo ndo kpãndó tɛrɛ lo na ndo tɛ azi. Na ya tɛnɛ mɛ, e na mandangɔ se mɛndó lo za na ayata kɔli ná ayata wali ya. Ti (1) ala gbe bɛ la na ya tara, ti (2) ala du na mangbi na azi mɛndɛ̃, wa ti (3) ala li ya, loyengɔ tɛ la na mbage tɛ Yehova ati kpengbani. Zia e ba se mɛ elengbi ti landangɔ se lɛlo tɛ lo, nga na se mɛ elengbi ti sangɔ ngunu bɛ ayata kɔli ná ayata wali ndɛ.​—1 Kɔr. 11:1.

3. Ngasia la, Polo kpãndó kpale ti mi, ná kpale ti nyingɔ na ndo tɛ lo nɛ?

³ Polo ndo yendó ayata lo mawoma. Lo nvɛ̃ni tengbi ngandó na akpale ti pɛnɔ gba, ni la lo lengbindó ti mangɔ vundu tɛ ayata lo awakristo, wa lo kpã nga tɛrɛ lo na ndo tɛ la na ngoi mɛ ala ndo tengbi na tara. Na ya ngoi kɔi ndó ko, ta Polo ndó na falanga  ma wa lo lindó kwa ti nɛngɔ ya, lo za na tɛrɛ lo, lo za nga na ayata mɛndɛ̃. (Aw. 20:34) Lo ndo kindó ahema na lo mɛ ya, ni dundó kwa mɛ lo ndo li. Ngoi mɛndó lo si ka Kɔrinto ko, lo lindó kwa ti kĩndó ahema ndoni kɔi na Akila ná Prisile. Kanda ‘na la ti sabata zu’ lo ndo pandó tɛnɛ hɛ̃ azi ti Yuda ná azi ti grɛkɛ. Na gesi ngoi mɛ Silasi ná Timɔte aga tã lo ko, “Polo amu ngoi tɛ lo zu so hangɔ azi na lingɔ kwa tɛ Yehova. (Aw. 18:2-5) Polo ziandó ndakisa ti nzɔ̃ni na lo mɛ ya, lo ndo lendó kwa ti mi ná ti fangɔ tɛnɛ na ge ge ge ko, londó na likoki ti sangɔ ngunu bɛ ayata kɔli ná ayata wali. Lo dandó bɛ la ya, ta la hɛ̃ lége ya, pɛnɔ ti ya dungɔ lɛ ngɛ̃́ tɛ la, nga na kokisangɔ gwɛ̃ ti ndasewa tɛ la ali ya, ala zia “aye mɛ ngbondoni sĩ, nwt” mɛ adu akpale zu mɛ aba sambela tɛ Yehova ma.​—Fil. 1:10.

4. Polo ná Timɔte azandó ayata la awakristo ya, ala gbe bɛ la na ya botemeli ngasia?

⁴ Ngoi mɛndó azi bombi ti Tesalonikɛ ko, awakristo niko ti fãna ni atengbindó na botemeli mɛ kpengbani. Ngoi mɛndó ala ĩ gi Polo ná Silasi gba ko, ala gbɔ̃nɔndó “ambanga awa Kristo mɛ ndɛ̃ agwe na la ka gbɛlɛ agbia kɔdɔrɔ,” [ala] dɛrɛ kɔngɔ ya: “Azi olo zu ndoli ye mɛ ndia tɛ kota gbia ti Roma akɛ̃.” (Aw. 17:6, 7) Da bɛ mɔ na mbɛtɔ mɛndó awakristo niko ti fãna ni ma na ngoi mɛndó ala hũ ya, azi ti ya kɔdɔrɔ tɛ la ndo hɛ̃ la pɛnɔ! Ge ge ge tɛ la na ya kwa tɛ Yehova lengbindó ti zungɔ, kanda ta Polo yendó ya, adu ngaso ma. Abɛse Polo ná Silasi alondó kaya kɔdɔrɔ niko si ko, ala gindó hĩngangɔ ya, bere na batangɔ bombi niko ti fãna ni nzɔ̃ni. Ni la, Polo dandó bɛ azi ti Tɛsalonikɛ ya: “E to Timɔte nyita e . . . , [ka tɛ ĩ] ya, lo sa nguru bɛ ĩ, lo wa ĩ, ya ĩ ngbã na yengɔ lo tɛ Yezo Kristo, wadila ta zo kɔi na popo tɛ ĩ adɔ lege tɛ Gbia Yezo azia, na lo ti apɛnɔ mɛ ĩ ndohũ ma.” (1 Tɛs. 3:2, 3) Ta kitɛ da ma ya, Timɔte tengbindó na botemeli kaya kɔdɔrɔ tɛ lo ti Listrɛ. Lo hũndó ndenge mɛndó Polo sa na ngunu bɛ ayata kaya kɔdɔrɔ ni. Na hũngɔ ndenge mɛndó Yehova salisa na Polo ko, Timɔte lengbindó ti sangɔ ngunu bɛ awakristo niko ti fãna ni aye da ya, kpale tɛ la zu na ɔngɔ nzɔ̃ni.​—Aw. 14:8, 19-22; Aeb. 12:2.

5. Ngasia la, nyita kɔi mɛ ili lo la Bryant luandó nzɔ̃ kpale na ndenge mɛndó biazo kɔi za lo nɛ?

⁵ Ye mɛndɛ̃ mɛndó Polo li ti nɛngɔ ya, lo sa ngunu bɛ ayata lo awakristo nɛ? Ngoi mɛndó ala diri gwe ka Listrɛ, Ikoniumu ná Antiokia ko, Polo ná Barnabasi “na ya Eklezia kɔi kɔi ko, ala asara ndo [abiazi] akpã la ya, ala bata azi ti ya Eklezia.” (Aw. 14:21-23) Ta kitɛ da ma ya, azi kondó akpã la abiazi ko, ala fandó ya, ala du abiazi mɛ ndo sa ngunu bɛ ayata ti ya bombi nga ma se mɛ abiazi ndo li na ni ndɛ̃. Ma tɛnɛ mɛ nyita mɛ ili lo la Bryant tɛnɛ, lo pa ya: “Ngoi mɛndó mbi na bulu 15”, ko, to mbi ziandó e aɔ, abi ngandó ta mbi gigi. Mbi hũndó ya, mbi ngbã na bɛ mbi, wa mbi tindó na nzɛ̃ngɔ nvɛ̃ni.” Ye mɛndó aza Bryant ya, lo gbe bɛ lo na ngoi ti pɛnɔ niko nɛ? Lo tɛnɛ ya: “Biazo kɔi mɛ ili lo la Tony, ndo tɛnɛndó tɛnɛ ngoi zu na mbi ka bombi, nga na ya ngoi mɛndɛ̃. Lo kambisa hɛ̃ mbi tɛnɛ tɛ azi mɛ atengbindó na atara, abɛse ngaso ko, ala ndó na dengɔ bɛ. Lo dindó hɛ̃ mbi mbeti ti Nzembo 27:10 wa ngoi zu lo ndo tɛnɛndó hɛ̃ mbi tɛnɛ tɛ Hizikiya mɛndó ali kwa hɛ̃ Yehova na mbilimbili zu abɛse ta to lo dundó se lɛlo ti nzɔ̃ni na omɛ aba vɔrɔngɔ Yehova ma.” Nzɔ̃ kpale mɛndó Bryant lua na ndenge mɛndó biazo kɔi za lo nɛ? Lo tɛnɛ ya “Tɛnɛ ti sangɔ ngunu bɛ mɛ Tony tɛnɛ hɛ̃ mbi ko, azandó mbi, wa mbi bandandó lingɔ kwa tɛ wa sungɔ lége ti ngoi zu, kwa niko ndo hɛ̃ mbi kota dengɔ bɛ.” Abiazi, ĩ kpã lɛ ĩ ti zangɔ azi mɛ mabere Bryant mɛ ala lengbi ti dungɔ na gwɛ̃ ti “nzɔ̃ tɛnɛ” ti nɛngɔ ya, asa ngunu bɛ la.​—Mas. 12:25.

6. Ngasia la, Polo salela pandɛ ti dungɔ lɛ ngɛ̃́ tɛ awa vɔrɔngɔ Yehova na ngoi ti gã ti nɛngɔ ya, lo sa na ngunu bɛ ayata kɔli ná ayata wali nɛ?

 ⁶ Polo dindó da bɛ ayata lo awaristo ya, “atɛmwɛ ni ko butu butu” agbendó bɛ la na lo mɛ ya, Yehova hɛ̃ndó ala ngunu. (Aeb. 12:1) Polo hĩngandó ya, tɛnɛ ti dungɔ lɛ ngɛ̃́ tɛ azi ti gã mɛndó anwɔ̃, agbe nga bɛ la na ya pɛnɔ ndɛ̃ ndɛ̃ ndɛ̃ alengbi ti zangɔ ti nɛngɔ ya, ahɛ̃ ayata lo ti kɔli ná ti wali ngunu, alengbi nga ti zangɔ ala ya, ala kpã lɛ la na ndo “kɔdɔrɔ tɛ Nzapa mɛ lɛ lo ngɛ̃́.” (Aeb. 12:22) Tɛnɛ niko ndo za nga e ndɛ. Se zo di ndenge mɛndó Yehova za na Gideona, Barake, Davidi, Samuele, nga na azi mɛndɛ̃ ko, ta ni lengbi ti sa ngunu bɛ lo ma? (Aeb. 11:32-35) Wa se lɛlo tɛ azi ti loyengɔ ti ngoi tɛ e aba mɔ na nɛ? Ayata kɔli ná ayata wali ndo su ambeti to hɛ̃ buro ti kotani tɛ atɛmwɛ̃ tɛ Yehova ti kambisangɔ se mɛ loyengɔ tɛ la ati kpengbani, na ngoi mɛ ala ndo di apandɛ ti dungɔ lɛ ngɛ̃́ tɛ atɛmwɛ tɛ Yehova ti mbilimbili ti ngoi tɛ e.

7. Na bangɔ mbeti ti Roma 14:19-21 wangɔ mɛ e lua na ndo wangɔ mɛndó Polo hɛ̃ ayata ti Roma nɛ?

⁷ E ndo sa ngunu bɛ ayata kɔli ná ayata wali na ngoi mɛ e ndo tɛnɛ tɛnɛ, e ndo li nga aye mɛ ando kpã siriri kaya bombi. Ta e zi lége ya, bingangɔ li tɛ e mɛ akɛ̃sɛnɛ na tɛ afɔ̃ e akangbi popo tɛrɛ e ma. Wa ta e kpã bo lɛ e na ndo likoki mɛ e na ni se ta kpale kɔi mɛ e li ako nyɔ ndia ti Ngbangɔ ma. E mu se lɛlo kɔi. Bombi ti Roma ndó na awakristo ti yuda ná azi mɛ ta ayuda ma. Ngoi mɛndó akpã ndia tɛ Moise ko, akpale mɛndó ndia niko yɔ ti tɛngɔ aye mɛndɛ̃ ko, ta ni dɛndó na tina ma. (Mar. 7:19) Agwe tee ko, ahɛ̃ndó Ayuda mɛ awakristo lége ti tɛngɔ aye zu. Kanda Ayuda mɛndɛ̃ mɛ awakristo ahũndó ya, ta du nzɔ̃ni ti tɛngɔ aye niko ma. Na lo ti tɛnɛ niko ko, bombi kangbi. Kanda Polo tɛnɛndó yangondo nda mɛ ayɔ ya, ala kpã siriri, lo tɛnɛ ya, “Ye mɛ nzɔ̃ni la, ale ta mɔ tɛ sa, bere mɔ nyɔ kana, bere mɔ li ye mɛ ndɛ̃ mɛ alengbi ti tongɔ nyita mɔ wa Kristo ya, lo li siɔ ye ma” (Di Roma 14:19-21.) Ni la, Polo zandó ayata lo awakristo ti nɛngɔ ya, ala hũ se mɛ gbangbingɔ tɛrɛ ti ngaso alengbi ti singɔ na siɔ kpale na ndo azi, nga na ndo bombi. Lo ngandó na gwɛ̃ ti gbinyangbingɔ bingangɔ li tɛ lo ti nɛngɔ ya, ta lo li ye mɛ alengbi ti tongɔ ayata lo awakristo ya, ala li siɔ kpale ma. (1 Kɔr. 9:19-22) Elengbi nga ti sangɔ ngunu bɛ azi mɛndɛ̃, wa e kpã nga siriri, se e kɛ̃ gbangbingɔ tɛrɛ e na lo ti aye mɛ e ndo ye ni mawoma.

8. Ngoi mɛndó kpale kɔi mɛ alengbi ti kangbingɔ siriri ti ya bombi si ko, ye mɛndó Polo li nɛ?

⁸ Polo ziandó se lɛlo ti nzɔ̃ni na omɛ aba kpãngɔ siriri ka popo tɛrɛ e ná azi mɛ e na la e luangbi tɛnɛ. Na ndakisa, awakristo mɛndó kaya bombi na siɛklɛ ti uzu ndo babandó ya, azi ti gigi mɛndó ati awakristo ko, ayɔ ya ala fa ganzá, ngoi mɛndɛ̃ ala ndo lindó ngaso ti kɛ̃ngɔ ya, ta Ayuda tɛnɛ siɔni na lo tɛ la ma. (Gal. 6:12) Polo temelandó bingangɔ li ti ngaso, kanda na se lɛ nɛngɔ ya, ala ye dangɔ bɛ tɛ lo ko, na zungɔ na tɛrɛ zu, lo mundó tɛnɛ ni lo gbangbi na Atoma ná abiazi mɛ ka Yerusalɛmɛ. (Aw. 15:1, 2) Na lingɔ ngaso, Polo zandó awakristo ti nɛngɔ ya, ala bata dengɔ bɛ ná siriri tɛ la kaya bombi.​—Aw. 15:30, 31.

9. Ngasia la, elengbi ti landangɔ se lɛlo tɛ Polo nɛ?

⁹ Se kpale ti gbangbingɔ tɛrɛ kɔi si ko, ale e ndo kpã siriri na ngoi mɛ e ndo gi litambwisi tɛ azi mɛ Yehova kpã la ti nɛngɔ ya, ala bata bombi. Ngoi gba, kaya ambeti tɛ e bere wangɔ mɛ linɔ tɛ Yehova ndo hɛ̃ e la, e na luangɔ litamwisi mɛ ndo lo kaya ndia ti ya Ngbangɔ. Se e landa malako niko nzɔ̃ni, na se lɛ kpãngɔ lɛ e na ndo bingangɔ li tɛ e nvɛ̃ni ko, e na lingɔ ya, siriri du kaya bombi.

10. Kpale mɛndɛ̃ mɛndó Polo li ti nɛngɔ ya, siriri du kaya bombi nɛ?

 ¹⁰ Polo lindó ya, siriri du kaya bombi na ngoi mɛndó lo ndo tɛnɛ tɛnɛ ti se lɛlo ti nzɔ̃ni tɛ ayata kɔli ná ayata wali, kanda ta lo ndo tɛnɛndó tɛnɛ ti siɔliye tɛ la ma. Na ndakisa, kaya mbeti tɛ lo ti ndani mɛndó lo su to hɛ̃ azi ti Roma ko, Polo dikɔndó ili ayata gba, wa na gesi lo di tɛnɛndó tɛnɛ ti seliye tɛ la ti nzɔ̃ni, nga na akpale ti yakere yakere mɛ aba zo kɔi na kɔi. Elengbi ti landangɔ se lɛlo tɛ Polo na ngoi mɛ e ndo tɛnɛ tɛnɛ ti seliye ti nzɔ̃ni tɛ ayata kɔli ná ayata wali. Se e li ngaso ko, e na lingɔ ya, mangbi ná songo ati kpengbani ka popo tɛrɛ ayata ti ya bombi.

11. Ngasia la, elengbi ti kpãngɔ siriri na ngoi mɛ tɛnɛ si ka popo tɛrɛ e nɛ?

¹¹ Ngoi mɛndɛ̃, abɛse awakristo mɛ kpengbani na nyingɔ ala lengbi nga ti luangɔ tɛnɛ bere gbangbingɔ tɛrɛ na azi mɛndɛ̃. Ni si ngandó na Polo ná kwa lo ti kpɔ̃ bɛ lo Barnabasi. Akɔli niko zu sɛ apandó pa kpengbani na lo tɛ Marko, kɔi tɛnɛndó ya, lo landa ani na ya kwa ti misiɔnɛrɛ na bi mɛ na gangɔ, wa kɔi kɛ̃ndó. Ala “pandó pa kpengbani” ka popo tɛrɛ la, ni lindó ya, ala ti na kangbi ka popo tɛrɛ la, wa zo na zo mundó lége tɛ lo. (Aw. 15:37-39) Kanda, Polo, Barnasi, na Marko adirindó na siriri ka popo tɛrɛ la, ti fangɔ ya, siriri ná mangbi mɛndó kaya bombi nindó ngbondoni ka lɛ la. Na gesi, Polo tɛnɛndó tɛnɛ ti nzɔ̃ni na lo tɛ Barnabasi ná Marko. (1 Kɔr. 9:6; Kɔl. 4:10) Elengbi nga ti onzingɔ tɛnɛ zu mɛ e na ni ná ayata mɛndɛ̃ ti ya bombi, wa na gesi elengbi ti kpãngɔ lɛ e lá kwɛ na ndo seliye tɛ la ti nzɔ̃ni. Se e li ngaso ko, e na kpãngɔ siriri ná mangbi.​—Ef. 4:3.

12. Akpengba kpale mɛ ayata kɔli ná ayata wali ndo tengbi na ni nɛ?

¹² E li ya, loyengɔ tɛ ayata kɔli ná ayata wali ati kpengbani na ngoi mɛ e ndo tɛnɛ tɛnɛ tɛ Yehova hɛ̃ la. Ambanga ndo tengbi na siɔ tɛnɛ mɛ azi ti ndasewa tɛ la, afɔ̃ la ti kwa, afɔ̃ la ti kalasi mɛ ta la Atɛmwɛ tɛ Yehova ma ndo tɛnɛ tɛnɛ so gbɛ̃ngɔ na varɛ tɛ la. Ambanga na pɛnɔ ti kpengba ngã, bere ala ti na bingangɔ li ti siɔ ni. Ala mɛndɛ̃ mu batisimɔ ali ndɛ abulu gba, wa ala ndo kũ na ya abulu gba ya, nda kpale ti ya gigi mɛ kɔ. Kpale niko alengbi ti kpãngɔ loyengɔ tɛ awakristo ndɛ na tara. Awakristo mɛndó kaya bombi na siɛklɛ ti uzu ko, ala tengbingandó na kpengba kpale ti ngaso. Ye mɛndó Toma Polo li ti nɛngɔ ya lo sa ngunu bɛ ayata kɔli ná ayata wali nɛ?

13. Ngasia la, Polo zandó azi mɛ ando sambwisa la na lo ti loyengɔ tɛ la nɛ?

¹³ Polo ndo sandó ngunu bɛ ayata kɔli ná ayata wali na lége ti Ngbangɔ. Na ndakisa, ngoi mɛndɛ̃ ambanga Ayuda mɛndó ati awakristo ko, ala zangandó tɛnɛ ti tɛnɛngɔ hɛ̃ ayata la ti ndasewa mɛndó ta ala awakristo ma, mɛndó ndo gu li bɛ ya, sambela tɛ Ayuda aɔ tɛ awakristo. Ta kitɛ da ma ya, mbeti mɛndó Polo su to hɛ̃ azi ti Ebre asandó ngunu bɛ awakristi niko. (Aeb. 1:5, 6; 2:2, 3; 9:24, 25) Ala lengbindó ti salelangɔ bingangɔ li ti nzɔ̃ni mɛndó Polo salela ti nɛngɔ ya, ala kanga yanga azi ti ndasewa tɛ ala mɛndó ndo temɛla ala. Ndɛ mɛ ko, elengbi ti salisangɔ ayata e awakristo mɛ azi ndo samwisa ala ya, ala salela awangɔ mɛ ndo kambisa tɛnɛ ti ya Ngbangɔ ti nɛngɔ ya, ala kambisa nda mɛ ala ndo ye hangɔ lo ti ngaso. Wa se ando sambwisa apalanga na lo mɛ ya, ala ndo ye hangɔ lo mɛ ndo pa ya, Nzapa la li aye zu ko, elengbi ti zangɔ la ti nɛngɔ ya, ala lua tɛnɛ mɛ ala na tɛnɛngɔ kaya buku, La vie a-t-elle été créée? Ná Cinq questions à se poser sur l’origine de la vie ti fangɔ nda mɛ ala ndo ye ya, ali dungɔ lɛ ngɛ̃́ lingɔ.

14. Abɛse Polo ndó na kwa gba ti lingɔ na ya kwa ti pangɔ nzɔ̃ pa na hangɔ ni ko, ye mɛndó lo li nɛ?

 ¹⁴ Polo sandó ngunu bɛ ayata kɔli ná ayata wali ya, ala fa songo na “ya anzɔ̃ kwa.” (Aeb. 10:24) Ta lo zandó ayata kɔli ná ayata wali bo na tɛnɛ ma, kanda na kwa. Na ndakisa, ngoi mɛndó gwɛ̃ kɔi mɛ kpengbani aya na mbage tɛ ayata lo awakristo ti Yudea ko, Polo gwendó hɛ̃ ala aye ti mi mɛ ala na gwɛ̃ ni. (Aw. 11:27-30) Ti biani, abɛse londó na kwa gba ti lingɔ na ya kwa ti fangɔ tɛnɛ nga na hangɔ ni ko, lo ndo gindó ngoi zu ndenge mɛ lo lengbi ti zangɔ na azi mɛ azanga ye ti mi. (Gal. 2:10) Ngoi mɛndó lo li ngaso ko, lo ndo zandó ayata lo awakristo ya, ala kpã bɛ la ya, Yehova na kokisangɔ gwɛ̃ tɛ la. Ndɛ lo mɛ ko, na ngoi mɛ e ndo hɛ̃ ngoi, ngunu, nga na ye tɛ e ti mi ti nɛngɔ ya, aza na ayata na ngoi ti kpengba kpale mɛ ndo si na bɛ lo ko, e nga na sangu ngunu na ndo loyengɔ tɛ ayata kɔli ná ayata wali. E ndo li ngaso na ngoi mɛ e ndo hɛ̃ tisa ti nɛngɔ ya, aza kwa ti fangɔ tɛnɛ na lɛ gigi zu. Na ndenge mɛndɛ̃, e ndo za ayata kɔli ná ayata wali ti nɛngɔ ya, ala kpã bɛ la ya, ta Yehova na ziangɔ la bɛ fãni kɔi ma.

15-16. Elengbi ti zangɔ azi mɛ loyengɔ tɛ la nzɛ̃ na lo ti kpengba kpale mɛ ala ndo tengbi na ni ngasia?

¹⁵ Polo ngbã bondó lá kwɛ zangɔ azi mɛ anzɛ̃ na ya nyingɔ. Lo ndo kpãndó tɛrɛ lo na ndo tɛ azi, wa lo ndo tɛnɛ ngandó tɛnɛ hɛ̃ azi na dengɔ bɛ nga na ndenge ti nzɔ̃ni. (Aeb. 6:9; 10:39) Na ndakisa, kaya mbeti mɛndó lo su to hɛ̃ ayata ti Ebre ko, ngoi zu lo ndo salelandó tɛnɛ mɛ “e” ti fangɔ ya, lo nvɛ̃ni ndo tɔndɔ ngandó wangɔ niko. (Aeb. 2:1, 3) Mabere Polo, ayɔ ya, e ngbã bo lá kwɛ zangɔ azi mɛ anzɛ̃ na ya nyingɔ. E ndo sa ngunu bɛ la na ngoi mɛ e ndo kpã likebi tɛ e na ndo la. Lingɔ ngaso ndo fa ya, e ndo ye ala. Tɛnɛngɔ tɛnɛ na legɔ̃ ti songo, nga na se ti nzɔ̃ni, alengbi ti sangɔ ngunu bɛ la.

¹⁶ Polo ndo tondó ayata kɔli ná ayata wali aye ya, Yehova ndo hũ kwa tɛ la ti nzɔ̃ni. (Aeb. 10:32-34)  Elengbi nga ti lingɔ ngaso na ngoi mɛ e ndo za azi mɛ loyengɔ tɛ la nzɛ̃. Elengbi ti yɔngɔ ka ti ala ya, ala kambisa hɛ̃ e se mɛndó ala hĩnga mbilimbili, bere sangɔ ngunu bɛ ala ya, ala binga li la na ndo aye mɛndó Yehova li ti zangɔ ala. Elengbi nga ti salelangɔ ngoi niko ti zangɔ ala ya, ta bɛ Yehova li na denge mɛndó ala ndo ye na lo ma, wa ta lo nga na ziangɔ ala bɛ fãni ni kɔi na bi mɛ na gangɔ ma. (Aeb. 6:10; 13:5, 6) Ngoi mɛndɛ̃ atɛnɛ ti ngaso alengbi ti sangɔ ngunu bɛ ala ti nɛngɔ ya, ala ngbã lá kwɛ lingɔ kwa hɛ̃ Yehova.

17. Aye mɛ elengbi ti lingɔ ti nɛngɔ ya, e ti na makoki gba nɛ?

¹⁷ Nga ma se ko la, zo ko la mɛsɛnɛ na kĩngɔ da ndo ti na makoki gba ko, elengbi nga ti kolisangɔ makoki tɛ e ti sangɔ na ngunu bɛ azi mɛndɛ̃. Elengbi ti zangɔ azi mɛndɛ̃ ya, ala ti kpengbani na omɛ aba gbengɔ bɛ na ya pɛnɔ, na ngoi mɛ e ndo kambisa hɛ̃ la se lɛlo tɛ azi mɛndó agbe bɛ la na ya pɛnɔ na ngoi ti gã. Elengbi ti kpãngɔ siriri na ngoi mɛ e ndo tɛnɛ tɛnɛ ti aye ti nzɔ̃ni mɛ e hũ ka tɛ ayata mɛndɛ̃, wa e bata nga siriri na ngoi mɛ e hũ ya aga gbɛ̃, wa e diri na siriri na ngoi mɛ tɛnɛ si. Ngoi mɛndɛ̃ elengbi ti ngbãngɔ lá kwɛ sangɔ ngunu na ndo loyengɔ tɛ ayata kɔli ná ayata wali, na ngoi mɛ e ndo tɛnɛ tɛnɛ ti ngbondoni mɛ kaya Ngbangɔ hɛ̃ la, ngoi mɛ e ndo za la na ndenge mɛ alengbi, nga na zangɔ azi mɛ loyengɔ tɛ la anzɛ̃.

18. Ye mɛ ayɔ ya, e ngbã lá kwɛ lingɔ nɛ?

¹⁸ Azi mɛ ndo le kwa ti kĩngɔ ada ti ti Lo-lengɔ Gbia ko, ala ndo du na dengɔ bɛ nvɛ̃ni. Elengbi nga ti dungɔ na dengɔ bɛ na ngoi mɛ e ndo za ayata kɔli ná ayata wali ti nɛngɔ ya, loyengɔ tɛ la ati kpengbani kaya bombi. Tee na tee, da mɛ ayata ndo kĩ na gbɛ̃ngɔ, kanda kwa tɛ e ti sangɔ ngunu bɛ azi mɛndɛ̃ na ngbãngɔ bo bwai na bwai! “Ale ĩ [ngbã lá kwɛ wambangɔ nga na sangɔ nguru bɛ] ĩ.”​—1 Tɛs. 5:11.