1. Ambanga akado mɛ Yezo hɛ̃ na lo tɛ e nɛ?

 TA ZO kɔi ti lɛ gigi mɛ lengbi ti fangɔ songo ngama tɛ Yezo da ma. Ngoi mɛndó lo ge lɛ sese ko, lo salelandó ngunu tɛ lo na ndenge ti kamwangɔ ti nɛngɔ ya, lo za azi mɛndɛ̃. (Luka 9:12-17) Lo hɛ̃ dungɔ lɛ ngɛ̃́ tɛ lo ngama likabo kɔi ti kotani na lo tɛ e. (Yn. 15:13) Na pɛ songɔ kwá tɛ lo ko, Yezo ngbãndó lá kwɛ fangɔ songo tɛ lo. Ngama se ko la lo ko kapa hɛ̃ e ko, lo hũnda ka ti Yehova ya, lo hɛ̃ e nyingɔ vurú ti nɛngɔ ya, aha e na akpale wa awamba nga bɛ e. (Yn. 14:16, 17; 16:13) Na lége ti bombi ko, Yezo ndo ngbã lá kwɛ hɛ̃ngɔ e aye mɛ e na gwɛ̃ ni ti nɛngɔ ya e za na azi ya, ala ti ava lo ge ndo lɛ gigi zu.​—Mat. 28:18-20.

2. “Likabo mɛ du azi” mɛ atɛnɛ tɛnɛ ni kaya Efɛzɛ 4:7, 8 adu ana?

² E ba likabo mɛndɛ̃ mɛ Yezo hɛ̃ e. Toma Polo su ya, na pɛ diringɔ tɛ Yezo ka ndozu ko, ‘lo hɛ̃ likabo mɛ du azi.’ (Di Efɛzɛ 4:7, 8.) Polo kambisa ya, akɔli niko mɛ Yezo hɛ̃ ngama likabo na zangɔ na akwa ndɛ̃ ndɛ̃ ndɛ̃ kaya bombi. (Ef. 1:22, 23; 4:11-13) Ndɛ lo mɛ ko, ‘likabo mɛ du azi’ du awa zangɔ na kwa, abiazi ti ya bombi, nga na awa bangɔ ndo kɛlɛ kɛlɛ. a Biani, akɔli niko du azi ti zangangɔ lengbingɔ, ni la ala lengbi ti yungɔndo. (Zaki 3:2) Kanda Gbia tɛ e Yezo Kristo ndo salela ala ti nɛngɔ ya, ala za e; ala du nvɛ̃ni likabo na lo tɛ e.

3. Kambisa se mɛ e zu elengbi ti hɛ̃ngɔ ti e na ya kwa tɛ “likabo mɛ du azi.”

³ Yezo hɛ̃ kumba hɛ̃ ‘likabo mɛ du azi’ ti nɛngɔ ya, ala le kwa kpengbani na omɛ aba sangɔ ngunu bɛ ayata ti ya bombi. (Ef. 4:12) Kanda e zu elengbi ti zangɔ ala ti nɛngɔ ya, ala kokisa kumba niko ti ngbondoni na seni. Na ndakisa: ambangani so popo  tɛ e lengbi ti hɛ̃ngɔ ti la na ya kwa ti kĩngɔ ada ti Lo-lengɔ Gbia. Ambangani lengbi nga ti hɛ̃ngɔ ti la na ndo kwa ti hɛ̃ngɔ tɛ, ti transpɔrt, ná akwa mɛndɛ̃. Kwɛ kɔi, e zu elengbi ti hɛ̃ngɔ ti e na ge ge ge ti nɛngɔ ya, e za awa zangɔ na kwa, abiazi ti ya bombi nga na awa bangɔ ndo kɛlɛ kɛlɛ na lége ti aye mɛ e ndo li ná atɛnɛ mɛ e ndo tɛnɛ. Zia e ba se mɛ elengbi ti luangɔ nzɔ̃ kpale na lo ti kpengba kwa tɛ la nga na se mɛ elengbi ti fangɔ na ala ná Yezo wa hɛ̃ngɔ “likabo mɛ du azi” ya, e ndo sepala na ala.

AWA ZANGƆ NA KWA NDO “LE KWA TI ZANGƆ AFƆ̃ ALA”

4. Ngasiandó la awa zangɔ na kwa aza azi mɛndɛ̃ na siɛklɛ ti uzu nɛ?

⁴ Na siɛklɛ ti uzu, aponandó ambanga ayata kɔli ngama awa zangɔ na kwa. (1 Tim. 3:8) Ni lengbi ti dungɔ ala ndó la ndo “le kwa ti zangɔ afɔ̃ la” mɛndó Polo su ni kaya 1 Kɔrinto 12:28. Awa zangɔ na kwa ndo lendó kwa ti kpengbani mɛndó ndo zi lége hɛ̃ abiazi ya, ala kpã lɛ la na ndo kwa ti hangɔ tɛnɛ nga na kwa ti batangɔ angãsa gbaga. Na ndakisa, awa zangɔ na kwa ndo za ngandó ti nɛngɔ ya, ali akopi ti Ngbangɔ bere ala vɔ̃ awã ti kwa ti nɛngɔ ya, ali na akopi ni.

5. Ngasia lá awa zangɔ na kwa ti ngoi tɛ e ndo li kwa kpengbani ti zangɔ na azi mɛndɛ̃ ti ya bombi nɛ?

⁵ Gbɔ̃ li mɔ na ndo ambanga aye ti ngbondoni mɛ awa zangɔ na kwa ndo li kaya bombi mɛ mɔ ka da. (1 Pet. 4:10) Apɔna ambangani ti nɛngɔ ya, ala ba kpale mɛ aba tisa mɛ ayata ndo hɛ̃ kaya bombi bere teritwarɛ ti fangɔ tɛnɛ, ambangani ndo lɛkɛ nga kangbingɔ ambeti, ambangani ndo le kwa ka audio video, ambangani ndo hɛ̃ ndo ti dungɔ na ni ka bombi, wa ambangani ndo za ti nɛngɔ ya, ayɔ ya da ti Lo-lengɔ Gbia. Akwa ni ko zu ti ngbondoni ndo li ya, bombi ɔ na dengɔ bɛ wa alɛkɛ nga kwa ti pangɔ nzɔ̃ pa na seni. (1 Kɔr. 14:40) Hãngɔ ni zingɔ, ambanga awa zangɔ na kwa ndo lua akumba mɛndɛ̃ kaya bombi dungɔ lɛ ngɛ̃́ nga na kwa tɛ awakristo ná diskur tɛ azi zu. Ando pɔna nga awa zangɔ na kwa ti nɛngɔ ya, ala du agbɛ nyɔ awa bangɔ ndo grupɛ. Na ya ngoi mɛndɛ̃, wa zangɔ na kwa mɛ na makoki lengbi nga ti zangɔ abiazi ti nɛngɔ ya, ala gwe sa ngunu bɛ nyita kɔi ti ya bombi kaya da tɛ lo.

6. Ambanga aye mɛ ndo to e ya, e sepala na kpengba kwa mɛ awa zangɔ na kwa ndo li nɛ?

⁶ Ngasia la kwa tɛ awa zangɔ na kwa ndo hɛ̃ nzɔ̃ kpale hɛ̃ ayata ti ya bombi nɛ? Nyita wali Beberly b mɛ ndo du ka Bolivie tɛnɛ ya: “Mbi ndo hɛ̃ sia kɔli hɛ̃ awa zangɔ na kwa ti ya bombi tɛ e, mbi na dengɔ bɛ ti landangɔ bombi na lo mɛ ya, kwa tɛ la ndo li ti nɛngɔ ya, mbi ye bia, mbi hɛ̃ gbinya, mbi landa diskur, mbi ba avideo nga na alimɔ. Ala ndo bata e wa ala ndo li nga zu ti nɛngɔ ya, ayata mɛ ta ala na likoki ti gangɔ bombi ma ko, ala ndo landa prɔgramɛ ni kaya da tɛ la na lége ti intɛrnɛt. Na pɛ bombi ko, ala ndo mbo da ti bombi, ala ndo ba kɛsi ti tisa, wa ala ndo li zu ti nɛngɔ ya, ala hɛ̃ e ambeti mɛ e na gwɛ̃ ni. Mbi hɛ̃ ala sia kɔli na lo ti kwa tɛ la!” Leslie mɛ ndo du ka Colombie nga ya biazo kɔi tɛnɛ ya: “Kɔ mbi ndo du na gwɛ̃ ya, awa zangɔ na kwa aza lo. Se du ya ta ala du da ma ko, lo lengbi ti dungɔ na kwa gba ti lingɔ, ni la mbi ndo hɛ̃ la sia kɔli gba na lo ti ge ge ge tɛ la nga na zangɔ tɛ la.” Dangɔ bɛ mɛ mɔ na ni na lo ti kwa tɛ awa zangɔ na kwa ti ya bombi tɛ mɔ nɛ?​—1 Tim. 3:13.

7. Ngasia la elengbi ti fangɔ yangondo ya, e ndo sepala na kwa tɛ awa zangɔ na kwa nɛ? (Ba nga limɔ.)

⁷ Abɛse du ya e ndo sepala ka gbɛ bɛ e na kwa tɛ awa zangɔ na kwa ko, Ngbangɔ sa ngunu bɛ e ya: “ale e ndo hɛ̃ sia kɔli.” (Kɔl. 3:15) Krzysztof, biazo kɔi ti Finland fa se mɛ lo ndo  sepala na kwa tɛ la na tɛnɛngɔ ya: “mbi ndo to ambeti bere amesajɛ mɛ na vɛrse kɔi ti ya Ngbangɔ ti nɛngɔ ya, mbi sa na ngunu bɛ awa zangɔ na kwa bere mbi hɛ̃ la sia kɔli na lo ti nzɔ̃ kwa tɛ la.” Pascal ná Jael, mɛndó ndo du ka Nouvel Caledonie, ndo li sambela na lo tɛ awa zangɔ na kwa. Pascal kambisa ya: “Na ya bi mɛ ko, e li sambela ti nɛngɔ ya, apɔna ambanga ayata kɔli wa ala lua kumba ge ya bombi tɛ e.” Yehova mandó asambela tɛ e, wa bombi luandó nzɔ̃ kpale na ndoni.​—2 Kɔr. 1:11.

ABIAZI TI YA BOMBI NDO “LE KWA KPENGBANI SO POPO TƐ E”

8. Nda mɛndó Polo su na lo tɛ abiazi ti siɛklɛ ti uzu ya, ala ndo lendó “kwa mɛ kpengbani” nɛ? (1 Tɛsalonikɛ 5:12, 13)

⁸ Abiazi ti siɛklɛ ti uzu lendó kwa kpengbani kaya bombi. (Di 1 Tɛsalonikɛ 5:12, 13; 1 Tim. 5:17) Ala ndó la ndo “tambwisa akpale” kaya bombi, ala ndo tambwisa bombi wa ala ndo mu ekateli ngama bombi tɛ abiazi. Ala ndo hɛ̃ nga “wangɔ ti songo” hɛ̃ ayata kɔli ná ayata wali ti nɛngɔ ya, ala ngbã lá kwɛ kpengbani na ya loyengɔ. (1 Tɛs. 2:11, 12; 2 Tim. 4:2) Biani, akɔli niko ndo le kwa kpengbani ti nɛngɔ ya, ala za ndasewa tɛ ala wa ala za nga ayata ti ya bombi ti nɛngɔ, ala ngbã lá kwɛ kpengbani na ya nyingɔ.​—1 Tim. 3:2, 4; Tito 1:6-9.

9. Ambanga akumba mɛ abiazi ndo li ni ndɛ nɛ?

⁹ Abiazi ti ndɛ nga na akwa gba ti lingɔ. Ala du awa pangɔ nzɔ̃ pa. (2 Tim. 4:5) Ala du ase lɛlo ti nzɔ̃ni na omɛ aba pangɔ nzɔ̃ pa na ge ge ge, ala ndo lɛkɛ kpale ti nɛngɔ ya ayata pa nzɔ̃ pa na seni kaya teritwarɛ tɛ la, ala ndo hɛ̃ nga formasiɔ̃ ti nɛngɔ ya, ayata pa nzɔ̃ pa wa ala ha nga tɛnɛ na seni. Ala ndo le kwa ti fangɔ ngbanga na bɛ ti vundu zangangɔ ya, ala pɔna lɛ. Ngoi mɛ wakristo kɔi li siɔ kpale ti kotani ko, abiazi ndo li kpengbani ti nɛngɔ ya, ani za lo wa lo lɛkɛ nzɔ̃ mangbi tɛ lo na Yehova. Na ya ngoi niko, ala ndo du na kpengba lɛ ti nɛngɔ ya, bombi ngbã lá kwɛ vuruni. (1 Kɔr. 5:12, 13; Gal. 6:1) Uzu ti ye zu, abiazi du awa batangɔ angãsa gbaga. (1 Pet. 5:1-3) Ala ndo lɛkɛ adiskur ti ya Ngbangɔ wa ala ndo li nga ni na seni, ala ndo li kpengbani ti nɛngɔ ya, ala hĩnga zo kɔi kɔi ti ya bombi, wa ani le kwa ti batangɔ angãsa gbaga na seni. Ambanga abiazi ndo hɛ̃ ti la na ya kwa ti kĩngɔ nga batangɔ ada ti Lo-lengɔ Gbia, ala ndo bongisa ambanga akota bombi. Ala ndo le nga kwa ka kɔmite ti dungɔ na mangbi ná amɔnganga nga na gwengɔ bangɔ azi mɛ tɛrɛ la ndo sɔ, hãngɔ ni zingɔ ala nga na akumba mɛndɛ̃. Abiazi ndo le nvɛ̃ni kwa kpengbani na lo tɛ e!

10. Ambanga aye mɛ ndo to e ya, bɛ e de na lo ti kpengba kwa tɛ abiazi tɛ e nɛ?

¹⁰ Yehova tɛnɛ ya, awa batangɔ ngãsa gbaga na batangɔ e na seni, ni la “ta e na dungɔ na mbɛtɔ bere na sɔngɔ bɛ ma.” (Yir. 23:4) Johanna, nyita wali kɔi mɛ ndo du ka Finland, aye mbilimbili niko na ngoi mɛndó tɛrɛ mama tɛ lo sɔ kpengbani. Lo tɛnɛ ya: “Abɛse du ya, mbi ndo hũndó kpengbani kambisangɔ dangɔ bɛ tɛ mbi hɛ̃ azi mɛndɛ̃ ko, biazo kɔi mɛndó ta mbi hĩnga lo nzɔ̃ni ma fandó yɔngɔrɔ bɛ na mbage tɛ mbi, lo lindó sambela ndoni kɔi na mbi, wa lo tɛnɛ ngandó hɛ̃mbi ya, Yehova ndo ye mbi gba. Ta mbi dɛ da bɛ mbi na tɛnɛ mɛndó lo tɛnɛ hɛ̃mbi ma, kanda mbi hũndó ya, ta mbi dɛ na mbɛtɔ ma. Mbi hũndó ya, Yehova la to lo ti nɛngɔ ya, lo ga lo za mbi na ngoi mɛ alengbi.” Ngasia la abiazi ti ya bombi tɛ mɔ ndo za nga mɔ nɛ?

11. Ngasia la elengbi ti fangɔ yangondo ya, e ndo hɛ̃ sia kɔli hɛ̃ abiazi nɛ? (Ba nga limɔ.)

¹¹ Gwɛ̃ tɛ Yehova du ya e fa yangondo ya, e ndo hɛ̃ sia kɔli hɛ̃ abiazi na lo ti kwa mɛ ala ndo li.” (1 Tɛs. 5:12, 13) Henrietta, mɛ ndo du ka Finland tɛnɛ ya: “Abiazi ndo za azi na songo zu, kanda ta ni fa ya, ala na ngunu bere na ngoi mɛ aɔ tɛ azi mɛndɛ̃ zu ma, ta ala ndo zanga nga  tengbingɔ na kpengba kpale na ya dungɔ lɛ ngɛ̃́ tɛ la ma. Na ya ngoi mɛndɛ̃ mbi ndo tɛnɛ hɛ̃ la ya, ‘Mɔ hĩnga ni? Mɔ ndo du biazo ti nzɔ̃ni. Gwɛ̃ tɛ mbi du ya, mɔ hĩnga ni.’” Sera nyita wali kɔi mɛ ndo du ka Turkie tɛnɛ ya: “Abiazi na gwɛ̃ ya, asa ‘ngunu bɛ la’ ti nɛngɔ ya, ala ngbã lá kwɛ lingɔ kwa tɛ la. Ni la elengbi ti sungɔ mesajɛ tongɔ hɛ̃ la, ili ngɔ ala ka ya da tɛ e ti nɛngɔ ya, e tɛ ye ndoni kɔi, bere singɔ kwa ti fangɔ tɛnɛ ndoni kɔi na ala.” Mɔ ka hĩnga biazo kɔi mɛ ndo le kwa kpengbani kaya bombi tɛ mɔ? Gi lége ti hɛ̃ngɔ lo sia kɔli na lo ti kpengba kwa mɛ lo ndo li.​—1 Kɔr. 16:18.

CAWA BANGƆ NDO KƐLƐ KƐLƐ NDO SA NGUNU BƐ AYATA

12. Grupɛ tɛ akɔli mɛndɛ̃ mɛndó Yezo hɛ̃ ngama likabo ti nɛngɔ ya, ala ga sa ngunu bɛ ayata ti ya bombi ti siɛklɛ ti uzu du ana? (1 Tɛsalonikɛ 2:7, 8)

¹² Yezo Kristo hɛ̃ bombi “likabo mɛ du azi” mɛ ala ndo le kwa na ndenge mɛndɛ̃. Na gbɛ Lo-lengɔ Gbia tɛ lo, abiazi ti Yeruzalɛmɛ tondó Polo, Barnabasi, nga na azi so lengɔ kwa ti bangɔ ndo kɛlɛ kɛlɛ. (Aw. 11:22) Na lo nɛ? Kɔi ti arɛsɔ̃ ni du pɔnangɔ akɔli mɛ alengbi ti lengɔ kwa ngama awa zangɔ na kwa nga na abiazi ti nɛngɔ ya: ala sa ngunu bɛ ayata ti ya bombi. (Aw. 15:​40, 41) Akɔli niko kɛ̃ gingɔ aye ti gigi mɛ wa ala hɛ̃ dungɔ lɛ ngɛ̃́ tɛ la na lo ti hangɔ tɛnɛ nga na sangɔ ngunu bɛ azi mɛndɛ̃.​—Di 1 Tɛsalonikɛ 2:7, 8.

13. Ambanga akumba mɛ awa bangɔ ndo kɛlɛ kɛlɛ ndo du na ni nɛ?

¹³ Awa bangɔ ndo kɛlɛ kɛlɛ ndo li vuayajɛ ngoi zu. Ambanga avuayajɛ ni lengbi ti dungɔ akilomɛtrɛ ɔngɔ 100 ka popo tɛ abombi kɔi kɔi. Pɔsɔ kɔi kɔi, awa bangɔ ndo kɛlɛ kɛlɛ ndo li adiskur gba, ala ndo gwe ka lɛ kwa ti batangɔ angãsa gbaga, ala ndo tambwisa bombi tɛ awa sungɔ lége, bombi tɛ abiazi, nga na bombi tɛ awa lengɔ kwa ti ngoi zu. Ala ndo lɛkɛ wa ala  ndo li nga adiskur ka kota bombi ti kɛlɛ kɛlɛ nga na abombi mɛndɛ̃. Ala ndo ha kalasi tɛ awa lengɔ kwa ti ngoi zu, ala ndo lɛkɛ bombi tɛ awa fangɔ tɛnɛ ti ngoi zu nga na tɛ awa bangɔ ndo kɛlɛ kɛlɛ, ala ndo ba nga akpale mɛndɛ̃, na ya ambanga ngoi Bethel ndo hɛ̃ la akumba mɛndɛ̃.

14. Ambanga arɛsɔ̃ mɛ ndo to e ya, e sepala na kpengba kwa tɛ awa bangɔ ndo kɛlɛ kɛlɛ nɛ?

¹⁴ Ngasia la abombi ndo lua nzɔ̃ kpale na lo ti kwa tɛ awa bangɔ ndo kɛlɛ kɛlɛ nɛ? Na omɛ aba kwa ti bangɔ ndo kɛlɛ kɛlɛ ko, nyita kɔli kɔi mɛ ndo du ka Turkie tɛnɛ ya: “Ngoi zu ko ala ndo ga ti bangɔ e ko, ala ndo sa ngunu bɛ mbi ti nɛngɔ ya, mbi lekisa ngoi tɛ mbi gba na lo ti zangɔ ayata kɔli ná ayata wali. Mbi tengbi na awa bangɔ ndo kɛlɛ kɛlɛ gba kanda ta kɔi ka popo tɛ la kɛ̃ sololangɔ na mbi bere lo tɛnɛ hɛ̃ mbi ya, ni na akwa gba da ma.” Johanna, mɛ fale e tɛnɛ tɛnɛ tɛ lo ka uzu sindó kwa ti fangɔ tɛnɛ ndoni kɔi na wa bangɔ ndo kɛlɛ kɛlɛ, kanda ta ala tãndó zo kɔi kaya da ma. “Ni la” lo tɛnɛ ya, “Mbi ndo da bɛ mbi ngoi zu na bi niko. Ayata mbi ti wali sɛ alo ti gwengɔ ka ndo mɛndɛ̃, kanda ni hɛ̃ndó mbi sɔngɔ bɛ. Wa bangɔ ndo kɛlɛ kɛlɛ sandó ngunu bɛ mbi wa lo za ngandó mbi, mbi hũ ya lengɔ kwa tɛ Yehova ka yɔngɔrɔ ni adu kpale ti ndunu ngoi, kanda ka lɛ gigi ti fãnani ko, e na luangɔ nzɔ̃ tangɔ li gɛrɛ ti nɛngɔ ya, e lekisa ngoi ndoni kɔi.” Kwɛ kɔi azi gba so popo tɛrɛ e ndo du na dengɔ bɛ na ngoi mɛ ala ndo da na bɛ la na lisalisi tɛ awa bangɔ ndo kɛlɛ kɛlɛ​—Aw. 20:37–21:1.

15. (a) Na bangɔ 3 Yoanɛ 5-8, ngasia la elengbi ti fangɔ ya e ndo sepala na kwa tɛ awa bangɔ ndo kɛlɛ kɛlɛ nɛ? (Ba nga limɔ.) (b) Nda mɛ elengbi ti hɛ̃ngɔ sia wali hɛ̃ awoti akɔli mɛ na kumba kaya bombi nɛ, wa ngasia la elengbi ti lingɔ ni nɛ? (Ba Ãkadre “ Da bɛ mɔ na awoti ala.”)

¹⁵ Toma Yoanɛ sa ngunu bɛ Gayusi ya, lo fa songo na ayata kɔli ko la ndo ga so bangɔ bombi wa lo “diri na ala na se ko la bɛ Nzapa ndo ye.” (Di 3 Yoanɛ 5-8.) Lége kɔi mɛ elengbi ti  lingɔ na ni du ilingɔ awa bangɔ ndo kɛlɛ kɛlɛ ya, ala ga e tɛ ye ndoni kɔi kaya da tɛ e. Lége mɛndɛ̃ mɛ elengbi ti fangɔ na ni adu hɛ̃ngɔ ti e na ya kwa ti fangɔ tɛnɛ na ngoi mɛ ala ga so bangɔ bombi tɛ e. Leslie mɛ fale e tɛnɛ tɛnɛ tɛ lo ka uzu, hɛ̃ ngandó sia kɔli hɛ̃ la na lége mɛndɛ̃. Lo tɛnɛ ya: “Mbi ndo lindó sambela hɛ̃ Yehova ti nɛngɔ ya, lo kokisa gwɛ̃ tɛ la. Mbi ná kɔ mbi e ndo sundó mbeti e to hɛ̃ la, kaya mbeti ni e ndo tɛnɛ hɛ̃ la ya, vizitɛ tɛ ala zandó e mawoma.” Hĩnga ya, awa bangɔ ndo kɛlɛ kɛlɛ ndo tengbi nga na akpengba kpale ngama tɛ e. Na ya ngoi niko, tɛrɛ ala lengbi ti sɔngɔ, ala lengbi ti dungɔ na sɔngɔ bɛ, wa ala lengbi nga ti nzɛ̃ngɔ. Ngoi mɛndɛ̃ tɛnɛ tɛ mɔ ti songo nga na kado tɛ mɔ lengbi ti dungɔ gbinya ti sambela tɛ awa bangɔ ndo kɛlɛ kɛlɛ!​—Mas. 12:25.

E NA GWƐ̃ TI “LIKABO MƐ DU AZI”

16. Na bangɔ Masese 3:27, ambanga ahũnda mɛ ayata kɔli lengbi ti hũndangɔ na tɛrɛ la nɛ?

¹⁶ Ge ndo lɛ gigi zu, e na gwɛ̃ tɛ akɔli gba ti nɛngɔ ya, ala le kwa ngama “likabo mɛ du azi.” Se du ya, mɔ du nyita kɔli mɛ mu batisimɔ wɛ ko, mɔ dã ti “salelangɔ ngunu tɛ mɔ ti zangɔ na azi mɛndɛ̃”? (Di Masese 3:27.) Mɔ lengbi ti kpãngɔ mɔkanɔ ti lengɔ kwa ngama wa zangɔ na kwa? Mɔ lengbi ti kokisangɔ gwɛ̃ tɛ ayata ti ya bombi ngama se ko abiazi ndo li na ni? c Mɔ lengbi ti lɛkɛngɔ kpale tɛ mɔ ti nɛngɔ ya, mɔ gwe kalasi tɛ awa fangɔ tɛnɛ ti Lo-lengɔ Gbia? Kalasi niko na hɛ̃ngɔ mɔ formasiɔ̃ wa ni nga na zangɔ mɔ ti nɛngɔ ya, asalela mɔ gba kaya kwa tɛ Yezo. Se du ya ta mɔ lengbi ti lengɔ kwa niko ma ko, li sambela hɛ̃ Yehova. Hũnda ka ti lo ya, lo za mɔ na nyingɔ vurú ti nɛngɔ ya, mɔ le na akwa zu ko la na hɛ̃ngɔ mɔ.​—Luka 11:13; Aw. 20:28.

17. Ye mɛ “likabo mɛ du azi” ndo fa na lo tɛ Yezo Kristo mɛ Gbia tɛ e nɛ?

¹⁷ Ayata kɔli ko la Yezo hɛ̃ ala kumba ngama “likabo mɛ du azi” ndo fa yangondo ya, Yezo ndo tambwisa kpale na ya ndangba bi mɛ e da. (Mat. 28:20) Elengbi ti hɛ̃ngɔ sia kɔli na lo ti songo tɛ Gbia tɛ e mɛ hĩnga gwɛ̃ tɛ e, wa lo hɛ̃ ayata kɔli mɛ na makoki ti nɛngɔ ya, ala za e. Ni la ndo gi ngoi zu alége ti nɛngɔ ya, mɔ hɛ̃ sia kɔli na lo ti kpengba kwa mɛ akɔli niko ndo li. Wa ta bɛ mɔ li nga na hɛ̃ngɔ Yehova mɛ wa lɛkɛ ye zu sia kɔli ma, na lo mɛ ya “anzɔ̃ aye ná akado zu ndo lo ka tɛ lo.”​—Zaki 1:17.