Ngbangɔ tɛnɛ yangondo ya, Yehova na ngunu ti pangɔ aye mɛ na lingɔ tɛrɛ lo na bi mɛ na gangɔ. (Yis. 45:21) Kanda ta Ngbangɔ kambisa akpale zu na ndo se mɛ lo ndo salela na ngunu niko nga na ngoi mɛ lo ndo gi hĩngangɔ akpale mɛ na gangɔ ma. Ni la, ta elengbi ti hĩngangɔ aye zu na omɛ aba ngunu mɛ Yehova na ni ti kambisangɔ aye mɛ na lingɔ tɛrɛ lo na bi mɛ na gangɔ ma. Kanda e hĩnga nga bo ambanga aye ni. Zia e ba ni.

Yehova lengbi ti lingɔ aye zu mɛ bɛ lo ye, kanda ngoi mɛndɛ̃ lo ndo kɛ̃ nga lingɔ aye mɛndɛ̃. Na lége ti ndara tɛ lo mɛ ta na maka ma ko, lo lengbi ti kambisangɔ akpale zu mɛ na lingɔ tɛrɛ lo na bi mɛ na gangɔ. (Roma 11:33) Na lo mɛ ya, lo du gbia ti tɛrɛ lo nvɛ̃ni ko, ngoi mɛndɛ̃ lo lengbi ti kɛ̃ngɔ hĩngangɔ akpale mɛ na lingɔ tɛrɛ lo na bi mɛ na gangɔ.​—Yisaya 42:14.

Yehova ndo li ya, dangɔ bɛ tɛ lo ti na seni. Ngasia la ni lengbi ti zangɔ e ya, e hĩnga nzɔ̃ni kpale mɛ aba ngunu mɛ lo na ni ti pangɔ aye mɛ na lingɔ tɛrɛ lo na bi mɛ na gangɔ nɛ? Yisaya 46:10 tɛnɛ ya: “Na ebandeli mbi ndo kambisa se mɛ nda kpale na kɔngɔ na ni, mbi ndo pa nga akpale mɛ ta adɛ li tɛrɛ lo ma. Mbi tɛnɛ ya, ‘Dangɔ bɛ tɛ mbi na tingɔ na seni, wa mbi na lingɔ aye zu mɛ bɛ mbi ye.’”

Kɔi ti aye mɛ alengbi ti tongɔ Yehova ya, lo kambisa akpale mɛ na gangɔ, adu ya, lo na ngunu ti lingɔ ya, akpale mɛ ta adɛ li tɛrɛ lo ma ali tɛrɛ lo. Ta Yehova na gwɛ̃ ti gingɔ hĩngangɔ aye mɛ na lingɔ tɛrɛ lo na bi mɛ na gangɔ nga ma se mɛ zo ndo lekisa filmɛ bere video kɔi iɔ iɔ tee ka ndani ti nɛngɔ ya, lo hĩnga se mɛ ndani na kɔngɔ na ni ma, se adu ngaso, na singɔ mabere ya, akpale zu mɛ na gangɔ alindó tɛrɛ lo wɛ, wa Yehova ndo ba bo se mɛ ni na ɔngɔ na ni na lɛ lo. Kanda Yehova na ngunu ti lingɔ ya, ye kɔi li tɛrɛ lo na ngoi mɛ lo ye, wa se ngoi ni alengbi ko, lo lengbi ti lingɔ ya, ni li tɛrɛ lo.​—Kob. 9:5, 6; Mat. 24:36; Aw. 17:31.

Na lo ni ko, ti kambisangɔ se mɛ Yehova lengbi ti lingɔ ya, akpale mɛndɛ̃ ali tɛrɛ lo na bi mɛ na gangɔ ko, Ngbangɔ ndo salela tɛnɛ mɛ, “lɛkɛngɔ,” “kpãngɔ” nga na “yengɔ lingɔ kpale kɔi.” (2 Ba. 19:25; Yis. 46:11) Atɛnɛ niko mɛ agbinyangbi ni, alo na tɛnɛ ti ya Ngbangɔ mɛ amangbi na tɛnɛ mɛ ando fa,“wa sɔ̃ngɔ ta.” (Yir. 18:4) Nga ma se mɛ wa sɔ̃ngɔ ta mɛ ahĩnga kwa tɛ lo nzɔ̃ni alengbi ti mungɔ kpóndo ti sese ti nɛngɔ ya, lo gbinyangbi ni ati ta ko, Yehova lengbi nga ti gbinyangbingɔ bere lingɔ ye zu ti nɛngɔ ya, lo kokisa na dangɔ bɛ tɛ lo.​—Ef. 1:11.

Yehova ndo zia ya, zo na zo pɔna ye mɛ lo ye lingɔ. Ta Yehova pia kpã ye mɛ na singɔ na ya dungɔ lɛ ngɛ̃́ tɛ zo kɔi kɔi ma. Ta lo ndo to nga anzɔ̃ azi ya, ala li aye mɛ na tongɔ ala na kwá ma. Lo zi lége ya, zo na zo pɔna lége mɛ bɛ lo ye, wa lo ndo yɔ ka ti e ya, e pɔna lége mɛ nzɔ̃ni.

Zia e ba ase lɛlo mɛ. Se lɛlo ti uzu adu tɛ azi ti Ninive. Yehova piandó tɛnɛ ya, ni na gbɛ̃ngɔ kɔdɔrɔ niko na lo ti siɔ kpale mɛ ka da. Kanda ngoi mɛndó azi ti kɔdɔrɔ niko agbinya bɛ la ko, Yehova “ziandó hɛ̃ngɔ ala tumbu mɛndó lo pa ya, ni na hɛ̃ngɔ ala, ta lo lindó ni ma.” (Yona 3:1-10) Yehova ziandó lingɔ ye mɛ lo pa ya, ni na lingɔ na azi ti Ninive na lo mɛ ya, ala gbinyangbindó seliye tɛ ala na ngoi mɛndó ala ma likebisi tɛ Lo. Ala salelandó likoki tɛ la ti pɔnangɔ lingɔ ye so gbinyangbingɔ bɛ la.

Zia e ba se lɛlo ti sɛ: Adu prɔfesi mɛ aba gbia Siruse mɛndó lo na zingɔ azi ti Yuda ka gbɛ mbɛ ti Babilɔnɛ, wa lo yɔ ka ti ala ya, ala diri kĩ tepelo tɛ Yehova. (Yis. 44:26–45:4) Gbia Siruse ti Perse alindó ya, prɔfesi niko ti na seni. (Ezr. 1:1-4) Kanda ta Siruse ndo vɔrɔndó Nzapa ti mbilimbili ma. Yehova salelandó Siruse ti nɛngɔ ya, lo kokisa prɔfesi tɛ lo, kanda lo zindó lége hɛ̃ Siruse ya, lo nvɛ̃ni lo pɔna ye mɛ bɛ lo ye, bere nzapa mɛ lo lengbi ti vɔrɔngɔ lo.​—Mas. 21:1.

Ti tɛnɛngɔ bɛta tɛnɛ ko, aye mɛ e lo ti bangɔ ni, ta alengbi ti zangɔ e ya, e kambisa na seni se mɛ Yehova ndo salela na ngunu mɛ lo na ni ti hĩngangɔ aye mɛ na lingɔ tɛrɛ lo na bi mɛ na gangɔ ma. Ta zo kɔi lengbi ti hĩngangɔ na seni nvɛ̃ni se mɛ Yehova ndo li na akpale tɛ lo ma. (Yis. 55:8, 9) Abɛse adu ngasia, aye mɛ e hĩnga na lo tɛ Yehova ndo za e ya, e du na loyengɔ ti kpengbani ya, aye zu mɛ lo ndo li ko, ni ndo du ngoi zu mbilimbili. Wa ngoi mɛ lo ndo tɛnɛ tɛnɛ ti aye mɛ na lingɔ tɛrɛ lo na bi mɛ na gangɔ ko, ni ndo du nga mbilimbili.