1-2. (a) Ye mɛndó Yezo li na ndɔ niko uzu ti nɛngɔ ya, lo kpi nɛ? (b) Ahũnda mɛ e na hɛ̃ngɔ gbinya ni na ya tɛnɛ mɛ nɛ?

 NA NDƆ ti bi kwa siɔ ti 14 Nisana 33 N.E. ndó la abi buba tɛrɛ Yezo, afa ngbanga bi li lo, agbɔ̃ lo, asɔ̃ lo, wa aho nga lo. Lo londó ti onzingɔ Tɛ tɛ Gbia ndoni kɔi na atoma tɛ lo ti mbilimbili ka shambrɛ ti ndozu. Na pɛ tɛngɔ tɛ tɛ Gbia ko, Yezo tɛnɛndó tɛnɛ ti sangɔ ngunu bɛ hɛ̃ atoma tɛ lo ti mbilimbili. Wa uzu ti nɛngɔ ya ala zu gwe ka shambrɛ ti ndozu ko, Yezo lindó sambela kɔi mɛ ngbondoni. Elengbi ti dingɔ tɛnɛ ti sambela niko kaya mbeti ti Yoanɛ shapitrɛ 17.

² Na ya tɛnɛ mɛ, e na hũngɔ aye mɛ elengbi ti mandangɔ na ndo sambela tɛ Yezo nga na ye mɛndó bɛ lo ndo sɔ na lo ni uzu ti lo kpingɔ. Ngasia la sambela niko ndo fa ya, ni du ye ti ngbondoni ka tɛ lo na ngoi mɛndó lo ndo fa tɛnɛ ge lɛ sese nɛ? Zia e hɛ̃ gbinya ti ahũnda niko.

“MBI LI YA ALA HĨNGA ILI MƆ”

3. Tɛnɛ mɛndó Yezo tɛnɛ na ndo ili Yehova nɛ wa ni lengbi na nɛ? (Yoanɛ 17:6, 26)

³ Na ya sambela tɛ lo ko, Yezo pandó ya: “Mbi li ya azi hĩnga ili mɔ.” E hĩnga ya, sambela niko dundó ngbondoni na lo tɛ Yezo na lo mɛ ya lo tɛnɛndó ni hɛ̃ ava lo fãni sɛ. (Di Yoanɛ 17:6, 26.) Lo yendó tɛnɛngɔ ya nɛ? Lo yendó kambisangɔ hɛ̃ ava lo ya, ili Nzapa la Yehova? Ava Yezo dundó azi ti Yuda, wa ala hĩngandó ya ili Nzapa la Yehova. Asu ili Yehova kaya mbeti ti Ebre fãni 7000. Ni la Yezo yendó tɛnɛngɔ  hɛ̃ la bere Yehova du Nzapa mɛ ngasia. Lo zandó ava lo ya ala hĩnga Yehova nzɔ̃ni, afa ya ala hĩnga dangɔ bɛ tɛ Yehova na ndo sese, azi, ye mɛ lo li, ye mɛ lo na lingɔ nga na seliye tɛ lo, bo Yezo la hĩnga Yehova nzɔ̃ni.

4-5. (a) Ngasia la ili zo lengbi ti tingɔ ngbondoni na lo tɛ e nɛ? Hɛ̃ se lɛlo kɔi (b) Ngasiandó la ava Yezo hĩnga ili Yehova nɛ?

⁴ E mu ndakisa mɛ, da bɛ mɔ ya biazo kɔi ti ya bombi tɛ ĩ mɛ ili lo la Davidi du mɔnganga. Mɔ hĩnga nyita niko na ya abulu gba. Bi kɔi ko dungɔ lɛ ngɛ̃́ tɛ mɔ ti na ya kaka wa mɔ ye ya mɔnganga kɔi za mɔ. Ni la mɔ gwe ka da yɔrɔ mɛ nyita niko ndo le kwa ka da, wa lo hɛ̃ mɔ yɔrɔ ti nɛngɔ ya aso na dungɔ lɛ ngɛ̃́ tɛ mɔ. Ta ili nyita niko lengbi ti tingɔ ngbondoni ka tɛ mɔ ma? Biani alengbi ti dungɔ ngaso! Ta Davidi di dɛ biazo mɛ mɔ hĩnga lo ma, kanda lo ti mɔnganga mɛ na songɔ na dungɔ lɛ ngɛ̃́ tɛ mɔ.

⁵ Kwɛ kɔi ava Yezo piandó hĩnga ili Yehova wɛ. Ila niko tindó ngbondoni na lo tɛ la na ya kwa ti fangɔ tɛnɛ na lo mɛ ya, Yezo zandó ala ya ala hĩnga Yehova nzɔ̃ni. Nda mɛ e tɛnɛ ngaso nɛ? Na lo mɛ ya Yezo landandó se lɛlo tɛ To lo na ya kpale zu mɛndó lo ndo tɛnɛ nga na ye mɛndó lo ndo li. Ni la atoma “hĩngandó” Yehova nzɔ̃ni na mangɔ tɛnɛ mɛndó lo ndo tɛnɛ nga na se mɛndó ala hũ kwá mɛndó lo kpi na lo tɛ azi.—Yn. 14:9; 17:3.

“MƆ HƐ̃ MBI BƐTA ILI MƆ”

6. Nda mɛndó Yezo tɛnɛ ya, Yehova fa mbi na ili lo nɛ? (Yoanɛ 17:11, 12)

⁶ Na ya sambela tɛ lo, Yezo tɛnɛ ya: “Bata ala na lo ti ili mɔ mɛ mɔ hɛ̃ mbi.” (Di Yoanɛ 17:11, 12.) Afa ya na hĩngangɔ Yezo na ili Yehova? Ipɔ. Ngoi mɛ Yezo tɛnɛ tɛnɛ na lo ti ili Yehova ko, lo tɛnɛ ya “ili mɔ.” Ni la, ta ili Yehova gbinyangbindó ti ili Yezo ma. Yezo yendó tɛnɛngɔ ya nɛ na ngoi mɛndó lo pa ya, ahɛ̃ndó mbi ili Nzapa nɛ? Ti uzu Yezo ndo fandó ya Yehova la to lo wa lo ndo tɛnɛ ngandó tɛnɛ mɛ aba To lo. Lo ga ngandó na ili To lo wa lo li ngandó aye ti kpɛ̃nɛ na ili lo. (Yn. 5:43; 10:25) Ti sɛ ili Yezo ndo fa ya, “Yehova du wa songɔ azi na kwá.” Biani nda ili Yezo mangbi na ili Yehova.

7. Nda mɛndó Yezo lengbi ti tɛnɛngɔ tɛnɛ mɛ aba Yehova nɛ? Hɛ̃ se lɛlo kɔi.

⁷ E mu ndakisa tɛ zo kɔi mɛ gbia to lo ti nɛngɔ ya, lo li ye kɔi ngaso na pɛnda ni, lo lengbi ti tɛnɛngɔ tɛnɛ na ili gbia niko. Ni la tɛnɛ tɛ zo niko ndo fa nga ndima tɛ gbia mɛ wa tongɔ lo. Kwɛ kɔi Yezo du zo mɛ Yehova to lo wa lo tɛnɛ ngandó tɛnɛ hɛ̃ azi na ili Yehova.—Mat. 21:9; Luka 13:35.

8. Ngasia la ili Yehova ndó ka “ndo” Yezo uzu ti nɛngɔ ya lo ga ge lɛ sese nɛ? (Kobima 23:20, 21)

⁸ Ngbangɔ ili Yezo ya, “tɛnɛ”, na lo mɛ ya Yehova salelandó lo ti nɛngɔ ya, lo pa tɛnɛ nga na ndia tɛ Nzapa na ndenge ti nzɔ̃ni hɛ̃ aangelo mɛndɛ̃ nga na azi. (Yn. 1:1-3) Yezo ndó mabere angelo mɛndó Yehova to lo ya, lo gwe bata aya Izraɛlɛ na ngoi mɛndó ala ka bɛ nyama. Ngoi mɛndó lo pa ya, aya Izraɛlɛ tɔndɔ angelo ko, lo pandó hɛ̃ ala nda mɛ ala lengbi ti lingɔ ni, Yehova tɛnɛndó ya: “Na lo mɛ ya ili mbi la na ndo lo.” a (Di Kobima 23:20, 21.) Yehova tɛnɛ, na lo mɛ ya Yezo tɛnɛndó tɛnɛ na ili lo, wa lo la du zo mɛ fa ya, Yehova la li aye zu na ndenge ti nzɔ̃ni wa lo nga santo.

 “TATA LI YA ILI MƆ LUA GONDA”

9. Ngasia la ili Yehova ndó ngbondoni ka tɛ Yezo nɛ? Kambisa.

⁹ Ngama se mɛ e lo ti tɛnɛngɔ na ni abɛse uzu ti nɛngɔ ya Yezo ga ge lɛ sese ko, ili Yehova dundó ngbondoni ka tɛ lo. Ta kitɛ da ma ya, ili Yehova mangbindó na aye zu mɛndó Yezo li ge lɛ sese! Na nda kwa tɛ lo ti fangɔ tɛnɛ ko Yezo yɔndó ya: “Ili To mbi lua gonda.” Mbala kɔi To lo hɛ̃ndó gbinya na legɔ̃ kɔi ti ndozu ya: “Mbi hɛ̃ ili mbi gonda wa mbi na hɛ̃ngɔ ili mbi fãni mɛndɛ̃ gonda.”—Yn. 12:28.

10-11. (a) Ngasia la Yezo lindó ya ili Yehova lua gonda nɛ? (Ba nga limɔ.) (b) Nda mɛndó ayɔ ya, ili Yehova ti santo wa atɔndɔ nga ni nɛ?

¹⁰ Yezo gondandó ili To lo. Ngasia? Lége kɔi mɛndó lo li na ni adu na kambisangɔ hɛ̃ azi mɛndɛ̃ seliye ti nzɔ̃ni nga na aye ti kpɛ̃nɛ mɛndó To lo li. Kanda lo di li ngandó ye mɛndɛ̃. Yezo ndó na gwɛ̃ ti fangɔ ya, Yehova la li aye zu ti nzɔ̃ni wa ili lo du nga santo. b Yezo fandó ya ni du ngbondoni na ngoi mɛndó lo ndo ha ava lo se ti lingɔ sambela. Lo pa ya: “To e mɛ ka ndozu zia ya ili mɔ ti santo.”—Mat. 6:9.

¹¹ Nda mɛndó ayɔ ya ili Yehova ti santo wa atɔndɔ nga ni nɛ? Na lo mɛ ya Satana Zabolo tɛnɛndó nvɛ̃nɛ na ili Yehova Nzapa ka yaka ti Edɛnɛ. Satana hũ tɛ lo ndó ya Yehova du wa nvɛ̃nɛ wa lo ɔndɛ Adamu ná Eva na aye ti nzɔ̃ni. (Eb. 3:1-5) Satana di tɛnɛ ya ta Yehova ndo li ye na ndenge ti nzɔ̃ni ma. Na lo mɛ ya Satana le nvɛ̃nɛ na ili Yehova ko,  ngoi mɛndɛ̃ azi mɛndɛ̃ hũ ya Yehova du Nzapa ti siɔni. Na pɛni na ngoi tɛ Yobo Satana tɛnɛ ya azi ko la ndo le kwa hɛ̃ Yehova ko, ala ndo li bo ni ti nɛngɔ ya ala lua ye ka ti lo. Nvɛ̃nɛ nikondó lo tɛnɛ la ndo li ya, azi zia vɔrɔngɔ Yehova na ngoi mɛ ala tengbi na kpengba kpale wa ala ndo tɛnɛ nga ya, ta lo ndo ye ani ma. (Yobo 1:9-11; 2:4) Ni yɔndó ya, amu ngoi ti fangɔ ya, Satana bere Yehova la wa nvɛ̃nɛ.

“MBI HƐ̃ DUNGƆ LƐ NGƐ̃́ TƐ MBI”

12. Ye mɛndó Yezo ye lingɔ na lo mɛ ya lo ndó na songo na lo ti ili Yehova nɛ?

¹² Na lo ti songo tɛ lo na ndo Yehova, Yezo yendó lingɔ zu mɛndó lo na ngunu ti lingɔ ni ti nɛngɔ ya, ili To lo ti santo wa lo kambisa nga ili Yehova hɛ̃ azi. Yezo pa ya “Mbi hɛ̃ndó dungɔ lɛ ngɛ̃́ tɛ mbi.” (Yn. 10:17, 18) Biani lo ye ngandó kpingɔ na lo ti ili Yehova. c Akotara e sɛ mɛndó na tɛrɛ ti lengbingɔ, Adamu ná Eva akɛ̃ndó tɔndɔngɔ Yehova wa ala dirindó ka ndali Satana. Na ɔngbingɔ, Yezo yendó gangɔ ge lɛ sese ti fangɔ songo tɛ Yehova. Yezo lindó ni na ngoi mɛndó lo ngbã mbilimbili na ya dungɔ lɛ ngɛ̃́ tɛ lo ge lɛ sese na ya akpale zu mɛndó lo li nga na ya atɛnɛ tɛ lo. (Aeb. 4:15; 5:7-10) Lo batandó mbilimbili tɛ lo tee ka kwá wa aho ngandó lo ka ndo kɛkɛ ti pɛnɔ. (Aeb. 12:2) Lo fa ngandó songo tɛ lo n ambage tɛ Yehova nga na lo ti ili lo.

13. Nda mɛndó Yezo ngbã bo na mbage kɔi ti fangɔ ya, Satana du wa nvɛ̃nɛ nɛ? (Ba nga limɔ.)

¹³ Na ya ye zu mɛndó Yezo li ko, lo fandó yangondo ya, Satana la du wa nvɛ̃nɛ ta Yehova ma! (Yn. 8:44) Yezo hĩngandó Yehova nzɔ̃ni abɛse na ngoi mɛndó ta azi na dungɔ lɛ ngɛ̃́ ma. Se dundó ya, ambanga mbilimbili ndó kaya nvɛ̃nɛ mɛndó Satana ndo tɛnɛ na ili Yehova ko, Yezo lengbindó ti hĩngangɔ ni. Kanda Yezo mundó ekateli ti pangɔ ili Yehova nga na ndima tɛ lo. Abɛse alindó mabere ya Yehova zia lo ko, Yezo ndó dã ti kpingɔ wa lo ngbã ngandó mbilimbili na nɛngɔ ya lo kɛ̃ tɔndɔngɔ To lo ti songo.—Mat. 27:46. d

“KWA MƐ MƆ HƐ̃ MBI YA MBI LI KO, MBI KƆ NDA NI KPƐKƐLƐ”

14. Ngasia ndó la Yehova hɛ̃ Yezo mbana gɛrɛ na lo ti mbilimbili tɛ lo nɛ?

¹⁴ Tɛnɛ mɛndó Yezo tɛnɛ na ya sambela mɛndó lo li uzu ti lo kpingɔ ko, lo pandó ya: “Kwa mɛ mɔ hɛ̃ mbi ya mbi li ko, mbi kɔ nda  ni kpɛkɛlɛ.” Lo kpãndó bɛ lo na ndo Yehova ya, lo na hɛ̃ngɔ lo mbana gɛrɛ na lo ti mbilimbili tɛ lo. (Yn. 17:4, 5) Yezo ndó na rɛzɔ̃ ti kpãngɔ bɛ lo na ndo To lo. Ta Yehova ziandó ya lo ngbã kaya du ti kwá ma. (Aw. 2:23, 24) Lo sondó na lo kaya kwá wa lo kpãndó lo na ndo ti ngbondoni ka ndozu. (Fil. 2:8, 9) Na ndani, Yezo banda lengɔ Gbia mabere Gbia kaya Lo-lengɔ Gbia tɛ Nzapa. Ye mɛ Lo-lengɔ Gbia niko na lengɔ nɛ? Yezo hɛ̃ndó gbinya ti hũnda niko na ngoi mɛndó lo ha na ava lo se ti lingɔ sambela, lo pa ya: “Zia ya Lo-lengɔ Gbia tɛ mɔ ga. Zia ya azi li se bɛ mɔ ge lɛ sese nga ma se mɛ ndo li na ni ka ndozu.”—Mat. 6:10.

15. Ye mɛndɛ̃ mɛ Yezo na lingɔ nɛ?

¹⁵ Na bi mɛ na gangɔ ko, Yezo na tiringɔ to na awa kula tɛ Nzapa wa lo nga na gbɛ̃ngɔ ala na lége ti to ti Armagedona. (Suma 16:14, 16; 19:11-16) Na pɛ ngoi yakere lo na lingɔ iɔ ti bingɔ Satana kaya “du” mɛ na lingɔ ya, ta lo di li bɛ ye kɔi ma tee kwá tɛ lo. (Suma 20:1-3) Ngoi mɛ Yezo na lengɔ gbia na pɛ bulu koto kɔi ko, na lingɔ ya, siriri du ge lɛ sese wa lo nga na zangɔ azi ya ala ti na tɛrɛ ti lengbingɔ. Lo nga na diringɔ na azi mɛ kpili lɛ la ngɛ̃́ fãni mɛndɛ̃. Lo nga na lingɔ ya lɛ sese ti paradizo. Kapa tɛ Yehova na tingɔ na seni!—Suma 21:1-4.

16. Ye mɛ na lingɔ tɛrɛ lo na nda bulu koto ti Lo-lengɔ Gbia tɛ Yezo nɛ?

¹⁶ Ye mɛ e ndo kũ ya ali tɛrɛ lo na nda bulu ti koto nɛ? Siɔ kpale ná zangangɔ lengbingɔ tɛ azi na wɛngɔ. Ta azi na dungɔ na gwɛ̃ tɛ azi 144000 ya ala du anganga bere ala na dungɔ na gwɛ̃ tɛ Yezo ya lo du kota nganga tɛ ani ti nɛngɔ ya, ani du na mangbi na Yehova ma. Wa lo nga na gbɛ̃ngɔ “kwá mɛ wa kula ti ndani ti bwai.” Ya du ti kwá na ngbãngɔ gɛgɛrɛ. Azi mɛ kpili na diringɔ dungɔ lɛ la ngɛ̃́ fãni mɛndɛ̃. Azi zu na dungɔ na tɛrɛ ti lengbingɔ ge lɛ sese.—1 Kɔr. 15:25, 26.

17-18. (a) Ye mɛ na lingɔ tɛrɛ lo nan da bulu koto ti Lo-lengɔ Gbia nɛ? (b) Ye mɛ Yezo na lingɔ na ngoi mɛ nda Lo-lengɔ Gbia tɛ lo na kɔngɔ nɛ? (1 Kɔrinto 15:24, 28) (Ba nga limɔ.)

 ¹⁷ Ye mɛndɛ̃ mɛ na lingɔ tɛrɛ lo nda bulu koto nɛ? Ngoi mɛndɛ̃ ye kɔi ti ngbondoni na lingɔ tɛrɛ lo. Ta zo kɔi na dɛngɔ kitɛ ya, Yehova du Nzapa mɛ santo wa lo nga mbilimbili ma. Na lo nɛ? Ka yaka ti Edɛnɛ ko, Satana tɛnɛndó yangondo ya Yehova du wa nvɛ̃nɛ wa ta lo na lengɔ Gbia na ndo azi na songo ma. Fãni gba, azi zu ko la ndo vɔrɔ Yehova ndo fa ya, lége tɛ lo zu du nzɔ̃ni. Na nda bulu koto ti Lo-lengɔ Gbia ko, ili Yehova na tingɔ santo. Zangangɔ kitɛ, lo na fangɔ ya ni du To ti ndozu mɛ na songo.

¹⁸ Na nda bulu koto ti Lo-lengɔ Gbia azi na hĩngangɔ ya, atɛnɛ zu mɛndó Satana tɛnɛ na ili Yehova du nvɛ̃nɛ. Ye mɛ Yezo na lingɔ na ngoi mɛ lo na onzingɔ Lo-lengɔ Gbia tɛ lo nɛ? Lo na landangɔ se lɛlo tɛ Satana wa lo nga na tɔmbɔgɔngɔ tɛrɛ Yehova? Ipɔ! (Di 1 Kɔrinto 15:24, 28.) Yezo na diringɔ na Lo-lengɔ Gbia hɛ̃ To lo. Lo na dungɔ na zungɔ na tɛrɛ ka gbɛ Lo-lengɔ Gbia tɛ To lo. Biani na ɔngbingɔ na Satana ko, Yezo na ziangɔ aye zu na lo mɛ ya lo na songo na lo tɛ Yehova.

19. Ili Yehova fa nɛ ka tɛ Yezo nɛ?

¹⁹ Ta du ye ti kamwangɔ ma ya Yehova na hɛ̃ngɔ Yezo ili lo! Yezo na fangɔ na ndenge ti lengbingɔ ya ni la ni mu pɛnda To ni. Ili Yehova fa nɛ ka tɛ Yezo nɛ? Ni fa ya, aye zu du na lo tɛ lo. Lo ndó dã ti kpingɔ na lo ti ila niko, wa lo nga na dungɔ dã ti kambisangɔ akpale zu hɛ̃ Yehova na nda Lo-lengɔ Gbia ti bulu koto kɔi. Ngasia la elengbi ti landangɔ se lɛlo tɛ Yezo nɛ? E na hɛ̃ngɔ gbinya ti hũnda niko na pɔsɔ ti gesi.