Toma Polo sundó mbeti to hɛ̃ awakristo ti Tɛsalonikɛ ya: Se zo kɛ̃ tɔndɔngɔ alo mɛ e su na ya mbeti olo ko, ‘ĩ kpã elembo tɛrɛ lo.’ (2 Tɛs. 3:14) Ndó uzu, e ndo tɛnɛndó ya, ni du kumba tɛ abiazi. E ndo pandó ya, se zo kɔi ngbã lá kwɛ kongɔ nyɔ ndia tɛ Yehova na sãna abɛse ahɛ̃ lo wangɔ fãni gba ko, abiazi na lingɔ diskur ti kebisangɔ hɛ̃ ayata ti ya bombi na lo ti seliye tɛ lo. Ta ayata lengbi ti dungɔ ndoni kɔi na zo mɛ akpã elembo tɛrɛ lo ma.

Kanda ayɔ ya, e gbinyangbi akpale mɛndɛ̃. E gbɔ̃ ndani ya, wangɔ tɛ Toma Polo aba ekateli mɛ wakristo kɔi kɔi lengbi ti mungɔ na ya kpale mɛ lo tengbi na ni. Na lo ni la, ta tina ti nɛngɔ ya, abiazi li diskur ti kpãngɔ zo elembo da ma. Nda mɛ gbinyangbi niko li tɛrɛ lo nɛ? Zia e ba nda mɛndó toma Polo hɛ̃ wangɔ niko.

Polo mandó ya, ambanga azi ti ya bombi ti Tɛsalonikɛ ndó na “dɔngɔ nɔ ti kilikili.” Lo hɛ̃ndó ala wangɔ mɛ lo kaya Ngbangɔ kanda ala kɛ̃ndó mangɔ ni. Na ngoi mɛndó lo gwe ti bangɔ ala uzu ti tongɔ mbeti tɛ lo ti sɛ ko, lo pandó hɛ̃ la ya: “se ta zo le kwa ma ko, ta lo tɛ ye ma.” Ti biani abɛse ambanganindó na makoki ti lengɔ kwa ko, ala ndo kɛ̃ndó lingɔ ni. Hãngɔ ni zingɔ ala ndo yɔrɔndó tɛrɛ la na ya kpale tɛ azi mɛndɛ̃. Ngasia la awakristo lengbindó ti lingɔ kpale tɛrɛ azi mɛ na dɔngɔ nɔ ti kilikili nɛ?​—2 Tɛs. 3:6, 10-12.

Polo tɛnɛndó ya, “akpã azi niko elembo.” Tɛnɛ ti grɛkɛ mɛ agbinyangbi ni na kpãngɔ elembo alengbi na gingɔ hĩngangɔ zo niko nga kpãngɔ lɛ na ndo lo ti nɛngɔ ya, ta seliye tɛ lo ti siɔni agbɛ̃ azi mɛndɛ̃ ma. Polo hɛ̃ndó wangɔ niko hɛ̃ ayata zu ti ya bombi, kanda ta na lo tɛ abiazi kɔi ma. (2 Tɛs. 1:1; 3:6) Na lo ni la adu kumba tɛ wakristo kɔi kɔi ti gingɔ hĩngangɔ ya, nyita kɔi ngaso ndo ko nyɔ ndia tɛ Nzapa na sãna nga pɔnangɔ “kɛ̃ngɔ dungɔ ndoni kɔi” na zo mɛ ndo li ye ti kilikili.

Afa ya, lo na bandangɔ hũngɔ nyita niko mabere zo mɛ ahã lo kaya bombi? Ipɔ, Polo pa ya: “Ĩ ngbã lá kwɛ kebisangɔ lo ngama nyita.” Na lo ni la, abɛse awakristo kpã elembo tɛrɛ nyita mɛ ndo li ye ti kilikili ko, ala na ngbãngɔ lá kwɛ lingɔ akpale mɛndɛ̃ ndoni kɔi na lo, mabere lingɔ bombi nga na singɔ kwa ti fangɔ tɛnɛ. Kanda ta ala na lekisangɔ ngoi gba na lo na ya akpale mɛndɛ̃ mabere mungɔ mbó bere lengɔ wele ma. Na lo nɛ? Polo pa ya, “ti nɛngɔ ya, lo ma kamɛnɛ.” Se ala kpã elembo tɛrɛ lo wa ala kɛ̃ nga dungɔ na mangbi na lo na ya kpale ti ngaso ko, lo na mangɔ kamɛnɛ na lo ti aye mɛ lo ndo li.​—2 Tɛs. 3:14, 15.

Elengbi ti landangɔ wangɔ niko ndɛ ngasia? Ti uzu ayɔ ya, e hũ yangondo ya zo na dɔngɔ nɔ ti kamɛnɛ biani” ngama se mɛ Polo tɛnɛ na ni. Ta lo ndo tɛnɛndó tɛnɛ tɛ zo mɛ ndo li ye mɛ akɛ̃sɛnɛ na tɛ e bere zo mɛ bingangɔ li tɛ lo ahɔngbi na tɛ e ma. Ta lo ndo tɛnɛ ngandó tɛnɛ tɛ zo mɛ ali ye mɛ ahɛ̃ e pɛnɔ ma. Kanda Polo ndo tɛnɛndó tɛnɛ tɛ azi mɛ ndo kɛ̃ landangɔ na sãna awangɔ mɛ alo ka tɛ Nzapa.

Bandangɔ ndɛ, se e hũ ya nyita kɔi na seliye ti kilikili mɛ ndo ko nyɔ ndia tɛ Nzapa ko, a zo na zo na mungɔ ekateli ti kɛ̃ngɔ dungɔ ndoni kɔi na lo na ya kpale mabere lengɔ wele ná mungɔ mbó. Na lo mɛ ya, ni du ekateli tɛ zo na zo ko, se nyita kɔi mu ekateli ti ngaso ko, ta lo na pangɔ ni hɛ̃ azi mɛndɛ̃ ma, lo na pangɔ ni bo hɛ̃ azi ti ndasewa tɛ lo. Wa e na ngbãngɔ lá kwɛ lingɔ bombi ná kwa ti fangɔ tɛnɛ ndoni kɔi na lo. Se lo gbinyangbi seliye tɛ lo ko, e na diringɔ lingɔ akpale mɛndɛ̃ ndoni kɔi na lo fãni mɛndɛ̃.