Mary ná kɔ lo John, a ndo dundó ka kɔdɔrɔ kɔi mɛ azi ti Philippines gba ndo gwe kai na lo ti kwa, wa ala ndó na dengɔ bɛ ti pangɔ nzɔ̃ pa hɛ̃ ala. Na ngoi ti siɔ ngã ti COVID-19 ko, Mary bandandó mandangɔ Ngbangɔ na azi ta bo kaya kɔdɔrɔ mɛ lo ndo du ka da ma, kanda nga kaya akɔdɔrɔ mɛndɛ̃. Lo lindó ni ngasia?

Mary ndo hũndandó azi mɛ lo ndo manda na ala Ngbangɔ ya, “Ĩ hĩnga azi mɛndɛ̃ mɛ na gwɛ̃ ti mandangɔ Ngbangɔ?” Se ala ye ko, lo ndo hũnda ala ya, “Ĩ lengbi ti zangɔ mbi ya mbi solola na ala?” Ahũnda niko ti woni ndo hɛ̃ alé ti nzɔ̃ni. Na lo nɛ? Na lo mɛ ya, azi ko la ndo ye tɛnɛ tɛ Nzapa ndo du na dengɔ bɛ ti kambisangɔ ye mɛ ala ndo manda hɛ̃ azi ti ndasewa tɛ la nga na akwa la ti kpɔ̃ bɛ la. Ngasia la azi mɛndó Mary ndo manda na ala Ngbangɔ ahɛ̃ndó lo gbinya ti hũnda niko nɛ?

Jasmin mɛndó Mary ndo manda na lo Ngbangɔ agandó na azi siɔ afa na lo ti nɛngɔ ya lo manda na ala Ngbangɔ. Kɔi ka popo tɛ la ili lo la Kristine, lo sepelandó mbala kɔi na mandangɔ Ngbangɔ wa lo yɔngandó ka ti Mary ya, ani banda mandangɔ Ngbangɔ fãni sɛ na ya pɔsɔ. Ngoi mɛ Mary hũnda nga lo ya, bere lo hĩnga azi mɛndɛ̃ mɛ na yengɔ mandangɔ Ngbangɔ ko, Kristine hɛ̃ lo gbinya ya, “Ĩĩ, mbi na fangɔ na mɔ akwa mbi.” Apɔsɔ yakere so pɛni, Kristine fa Mary na akwa lo siɔ mɛ ye mandangɔ Ngbangɔ. Na gesi, Kristine di fa lo na afɔ̃ lo mɛndɛ̃, afɔ̃ lo niko afangandó na Mary afɔ̃ la mɛndɛ̃.

Kristine ye ngandó ya azi ti ndasewa tɛ lo mɛ ndo du ka Philippines amanda kpale mɛ aba Ngbangɔ. Wa lo sololandó na nyi lo Andrea. Na ebandeli, Andrea tɛnɛ hɛ̃ lo ya, ‘Atɛmwɛ tɛ Yehova adu azi ti sambela kɔi mɛ ta ala ndo ye lo tɛ Yezo ma, wa ala ndo salela bo Makomami ya Ebre kɔi.’ Na pɛ mandangɔ Ngbangɔ bo fãni kɔi ko, lo hũndó ya, dangɔ bɛ mɛndó lo ndo du na ni na ndo Atɛmwɛ tɛ Yehova ko, adundó ti nvɛ̃nɛ. Na ngoi ti mandangɔ Ngbangɔ lo ndo tɛnɛ ya, “Se Ngbangɔ tɛnɛ ngaso ko, afa ya ni du biani!”

Na pɛ ngoi yakere, Andrea fandó na Mary akwa lo sɛ nga na fɔ̃ lo kɔi ti kwa mɛ abanda mandangɔ Ngbangɔ. Andrea ndó na womba tɛ lo kɔi mɛ wa ziba ili lo la Angela, wa lo ndo landandó Mary ná Andrea na ngoi mɛndó ala ndo manda Ngbangɔ, kanda ta Mary hĩngandó ma. Lá kɔi, Angela pa hɛ̃ Andrea ya lo fa ni ka tɛ Mary wa lo hũnda ka ti lo ya, Mary banda nga mandangɔ na lo Ngbangɔ. Angela ndo yendó ye mɛ lo ndo manda. Bo na ya nzɛ kɔi, lo gbɔ̃ndó avɛrse gba ka li lo wa lo yendó ya e banda mandangɔ Ngbangɔ fãni siɔ na ya pɔsɔ kɔi! Andrea zandó lo ya, lo banda landangɔ abombi zu na lége ti vidéo bere intɛrnɛt.

Ngoi mɛ Mary hũ ya, Joshua mɛ kɔ Kristine ndo du ngoi zu dã na ala wa lo ndo landa ndenge  mɛ ala ndo manda na Ngbangɔ ko, Mary hũndandó lo ya, bere lo lengbi nga ti yengɔ ya ni manda na lo Ngbangɔ. Joshua pa ya, “Mbi ye bo mangɔ tɛnɛ mɛ mɔ ndo ha, kanda ta mɔ hũnda mbi na ando ma; se mɔ hũnda mbi na ando ko, mbi na ziangɔ mangɔ mɔ.” Bo na ya miniti kũ gɛgɛrɛ na ngoi mɛ ya lo ndo manda Ngbangɔ ko, lo hũnda ando gba ɔngɔ Kristine wa lo ye ngandó mandangɔ Ngbangɔ.

Ahũnda ti woni mɛndó Mary ndo hũnda zindó lége ya lo banda mandangɔ Ngbangɔ na azi gba. Lo lindó ebongiseli ti nɛngɔ ya, ayata mɛndɛ̃ banda mandangɔ Ngbangɔ na ambangani. Na lo mɛ ya, Mary ndo hũndandó ando ti woni ko, ni lindó ya, lo banda mandangɔ Ngbangɔ na azi 28 kaya akɔdɔrɔ mɛndɛ̃ siɔ.

Jasmin, zo ti uzu mɛndó mbi manda na lo Ngbangɔ mɛ fale e tɛnɛ tɛnɛ tɛ lo ka uzu mundó batisimɔ na 04/2021. Kristine mundó batisimɔ na 05/2022 wa lo dirindó ka Philippines ti dungɔ ndoni kɔi na azi ti ndasewa tɛ lo. Azi sɛ ka popo tɛ akwa Kristine mɛndó lo fa ala na Mary amu ngandó batisimɔ. Angela mundó batisimɔ nzɛ yakere so pɛni, wa lo ndo li kwa na olo ngama wa sungɔ lége ti ngoi zu. Joshua kɔ Kristine ná nyi la Andrea nga na awa mandangɔ Ngbangɔ mɛndɛ̃ gba ndo ngbã bo lá kwɛ mandangɔ Ngbangɔ wa ni ndo li ya, ala ndo dɔ dã na Yehova.

Na ngoi tɛ Yezo ná tɛ atoma, azi ndo pandó nzɔ̃ pa mɛ ba Yezo hɛ̃ azi ti ndasewa tɛ la ná akwa la. (Yn. 1:41, 42a; Aw. 10:24, 27, 48; 16:25-33) Nda mɛ ta mɔ lengbi ti hũndangɔ azi mɛ mɔ ndo manda na ala Ngbangɔ ná azi mɛ ye mandangɔ Ngbangɔ ya, “Mɔ ka hĩnga zo mɛndɛ̃ mɛ ye mandangɔ Ngbangɔ?” Se mɔ ndo hũnda ando niko ti ngaso ti woni ko, ngoi mɛndɛ̃ ni na lingɔ ya, mɔ lua azi gba mɛ na yengɔ mandangɔ Ngbangɔ?