1. Tɛnɛ mɛ elengbi ti yengɔ lo ni nɛ, wa na lo nɛ?

 NGOI mɛ mɔ ndo hũ akpale mɛ ndo ɔ ndɛ ge lɛ gigi ko, mɔ ndo da bɛ mɔ ya, kpale na dɛ̃ngɔ gbanda? Ta mangbi ti nzɔ̃ni di dɛ ka popo tɛ azi ti ndasewa ma. Ndɛ lo mɛ ko, azi ati awa kakulu lo, azi mɛndo gi bo nzɔ̃ kpale tɛ la nvɛ̃ni, nga azi ti mɔbulu. Wa ta azi dɛ kpã bɛ la na ndo agbia ma. Kanda gbɛ̃ngɔ ti akpale niko, alengbi ti tongɔ mɔ, mɔ ye ya angbã dã kpale na dɛ̃ngɔ. Na lo nɛ? Na lo mɛ ya seliye mɛ azi na ni ndɛ, ndo fa yangondo tɛnɛ mɛndó prɔfɛsi kɔi tɛnɛ na lo ti “ndagba bi.” (2 Tim. 3:1-5) Ta zo ti mbilimbili kɔi mɛ lengbi ti bɛlɛngɔ ya, tɛnɛ niko ndo ti na seni ndɛ da ma, ni ndo fa nga ya, Yezo ti gbia ti Lo-lengɔ Gbia tɛ Nzapa. Kanda ni du bo kɔi ti ya atɛnɛ mɛ aba Lo-lengɔ Gbia. Ti nɛngɔ ya e ti na loyengɔ ti kpengbani ko, ayɔ ya e ba ambanga aye mɛ ndo ti na seni ndɛ na ngoi tɛ e.

2. Ye mɛ ndɛ e na mandangɔ nɛ, wa na lo nɛ? (Ĩ kambisa limɔ ti koko mbeti.)

² Na ya tɛnɛ mɛ, e na bangɔ ndɛ akpale taa. Ti (1) ye kɔi mɛ ndo za e ya e hĩnga ngoi mɛndó Lo-lengɔ Gbia tɛ Nzapa abanda lingɔ kwa, ti (2) aprɔfesi mɛ ndo za e ya e gbɔ̃ ndani ya Yezo banda lɛngɔ Gbia ka ndozu wɛ, wa ti (3) aprɔfesi mɛ ndo fa se mɛ na kpɔngɔ na awa kula ti Lo-lengɔ Gbia tɛ Nzapa. Aprɔfesi niko adu mabere abriki mɛ ndo kí na da, se adɔngɔ ni kɔi kɔi na ndo tɛ lo ko, ni si na mirɛ ti da, kwɛ kɔi se e bombi aprɔfesi niko ndoni kɔi ko, ni lengbi ti zangɔ e ya e hĩnga  ngoi mɛ e da na bangɔ kalandrier tɛ Yehova.

3. Prɔfesi mɛ atɛnɛ tɛnɛ ni kaya mbeti ti Daniel 7:13, 14 mɛ aba Gbia ti Lo-lengɔ Gbia tɛ Nzapa nɛ?

³ Tɛnɛ mɛ kaya mbɛti ti Danyele 7:13, 14 apa hɛ̃ e ya, Nzapa pɔnandó zo mɛ lengbi ti nɛngɔ ya lo du gbia ti Lo-lengɔ Gbia tɛ lo, zo niko la du Yezo. Azi ti kɔdɔrɔ zu na “lingɔ kwa hɛ̃ lo” na dengɔ bɛ, wa ta zo mɛndɛ̃ na mungɔ lo-gbia ti lo ma. Prɔfesi mɛndɛ̃ mɛ kaya mbeti ti Danyele atɛnɛndó ya, na hɛ̃ngɔ Yezo Lo-lengɔ Gbia na nda ngoi mbala mbala ti yika yika. Ayɔ ya e hĩnga ngoi mɛndó kpale niko ti ngbondoni ali tɛrɛ lo?

4. Kambisa se mɛ mbeti ti Daniel 4:10-17 aza e, e hĩnga bulu mɛndó Yezo ti na ni gbia. (Ba tɛnɛ ti gbɛ nda pajɛ.)

⁴ Di Danyele 4:10-17. “Angoi mbala mbala” ndo fa abulu 2 520. Ngoi niko bandandó na bulu ti 607 U.N.E. Na ngoi mɛndó azi ti Babilonɛ anwɔ̃ na gbia ti ndani mɛndó ka ndo ngɛndɛ gbia tɛ Yehova ka Yeruzalɛmɛ. Nda ni kɔndó na bulu ti 1914 N.E. Ngoi mɛndó Yehova kpã Yezo “zo mɛ ndia hɛ̃ lo lége”​—ya, lo du Gbia ti Lo-lengɔ Gbia tɛ Nzapa. *—Ezk. 21:25-27.

5. Ye mɛ Prɔfesi mɛ aba “ngoi mbala mbala” ndo to e ya, e ye lo ni nɛ?

⁵ Ngasia la elengbi ti luangɔ nzɔ̃ kpale na ndo Prɔfesi mɛ nɛ? “Angoi mbala mbala” ndo za e, e hĩnga ya, Yehova ndo li ya kapa tɛ lo ati na seni na ngoi mɛ alengbi. Lo lindó ya Lo-lengɔ Gbia tɛ lo abanda lingɔ kwa na ngoi mɛ alengbi, kwɛ kɔi lo nga na lingɔ ya atɛnɛ ti ya aprɔfesi ati na seni na landangɔ bi mɛ lo kpã. Adu biani ya ta bi tɛ Yehova na gangɔ “na pɛ ngoi mɛ lo kpã ma!”​—Hab. 2:3.

6. (a) Aye mɛ e ndo hũ mɛ ndo fa ya Yezo ti gbia ka ndozu wɛ nɛ? (b) Tɛnɛ mɛndó Yezo tɛnɛ hɛ̃ toma Yoanɛ mɛ kaya mbɛti ti Suma 6:2-8 nɛ?

⁶ Na ngoi mɛndó angbã dã kwa tɛ lo ge lɛ sese wɛ ko, Yezo kambisandó hɛ̃ ava lo ye mɛ na lingɔ tɛrɛ lo ge lɛ gigi mɛ na fangɔ ya, lo banda lengɔ gbia ka ndozu. Lo tɛnɛndó tɛnɛ ti ato, gwɛ̃ nga na yengingɔ ti sese. Lo tɛnɛ ngandó ya, asiɔ ngã na yangɔ, “na lɛ sese zu”​—ngã ti COVID-19 adu nga kɔi ti alo ni. Alo mɛ e ndo hũ ndɛ ge lɛ gigi ko, ni kaya “lo mɛ ndo fa gangɔ tɛ [Kristo].” (Mat. 24:3, 7; Luka 21:7, 10, 11) Abulu ɔngɔ 60 na pɛ kwá nga na pɛ diringɔ tɛ Yezo ka ndozu ko, lo tɛnɛndó hɛ̃ toma Yoanɛ ya, alo niko zu na tingɔ na seni. (Di Suma 6:2-8.) Bandangɔ la Yezo ti gbia na bulu ti 1914 ko, alo ndɛ̃ ndɛ̃ ndɛ̃ mɛndó Yezo tɛnɛ ya na lingɔ tɛrɛ lo ndo ti na seni ndɛ.

7. Nda mɛ azi ndo hũ pɛnɔ̃ bandandó la Yezo ti gbia ka ndozu nɛ?

⁷ Nda mɛ akpale ti gigi olo ndo gbɛ̃ bo gbɛ̃ngɔ bandandó la Yezo ti gbia nɛ? Suma 6:2 ahɛ̃ e gbinya ti ngbondoni kɔi na ndo hũnda olo​—kumba ti uzu mɛ Yezo na ni na ya Lo-lengɔ Gbia tɛ lo adu tiringɔ to. Na ana? Na Satana ná ademɔ̃ tɛ lo. Na bangɔ mbeti ti Suma shapitrɛ ti 12, anwɔ̃ndó Satana ná ademɔ̃ tɛ lo ka ndozu, wa abindó la ge lɛ sese. Na ngɔnzɔ zu, lo ndo si na pɛnɔ̃ hɛ̃ azi, ni la ndo li ya “kota siɔ lo” ati na azi ge lɛ sese.​—Suma 12:7-12.

8. Ngasia la kpale niko lengbi ti zangɔ e na ngoi mɛ e ndo hũ se mɛ prɔfesi mɛ aba Lo-lengɔ Gbia ndo ti na seni nɛ?

⁸ Ngasia la elengbi ti luangɔ nzɔ̃ kpale na ndo prɔfesi mɛ nɛ? Gbɛ̃ngɔ ti aseliye tɛ azi nga na akpale ti siɔni mɛ ndo ɔ ge lɛ gigi, ndo za e, e gbɔ̃ ndani ya, Yezo banda lengɔ gbia ka ndozu wɛ. Na lo ni la, na se lɛ kpãngɔ lɛ e na ndo  aseliye tɛ azi mɛ ndo gbɛ̃ bo gbɛ̃ngɔ ko, ayɔ ya e hĩnga ya ni ndo kokisa tɛnɛ ti ya Ngbangɔ. Lo-lengɔ Gbia banda lingɔ kwa wɛ! (Nz. 37:1) Kpale ti gigi olo na gbɛ̃ngɔ bo gbɛ̃ngɔ tee ka Armagedona ga na ni. (Mar. 13:8; 2 Tim. 3:13) Ta mɔ hũ ya, ayɔ ya e hɛ̃ To e mɛ ka ndozu mɛ lo sĩ na songo sia kɔli na lo mɛ ya, lo za e ti nɛngɔ ya, e hĩnga nda mɛ pɛnɔ sĩ ge lɛ gigi ma?

9. Ngasia la profesi mɛ kaya mbeti ti Daniel 2:28, 31-35 akambisa ndangba lo gbia ti ngunu ti lɛ sese zu nɛ, Wa ni bandandó ngasia?

⁹ Di Danyele 2:28, 31-35. E ndo hũ ndɛ se mɛ tɛnɛ ti Prɔfesi mɛ ndo ti na seni. Suma mɛndó Nebukadezare hũ ko, ni fandó ye mɛ na lingɔ tɛrɛ lo “na ngoi ti ndangba bi,” na pɛ tingɔ tɛ Yezo gbia. Na ngoi niko ko, kɔi tɛ awa kula tɛ Yezo ge tise na dungɔ gbia ti kɔdɔrɔ mɛ ɔ na ngunu ti lɛ sese zu mɛ profesi mɛ atɛnɛ tɛnɛ ni, ni la ahaka ni na “gɛrɛ ngbilondo mɛ du kpondo mɛ abombi ni na nwã.” Lo gbia ti ngunu mɛ elo ti tɛnɛngɔ tɛnɛ ni, ni ndo le gbia ndɛ. Abandandó lengɔ gbia na ngoi ti to ti kozo ni ti lɛ gigi zu na ngoi mɛ Grande-Bretagne li ndó mangbi na Etats-Unis, ni la asi na lo gbia ti ngunu ti Angleterre ná Amɛrika. Kanda na ya suma mɛndó Nebukadenezare hũ ko, lo tɛnɛndó ya, lo lengɔ gbia ti ngunu niko na ɔngbingɔ na alo lengɔ gbia mɛndɛ̃ na ya alo bere sɛ.

10. (a) Na bangɔ prɔfesi mɛ kaya mbeti ti Danyele, ye mɛ lindó ya lo gbia ti Angleterre ná Amerika a ɔngbi na alo lengɔ gbia ti ngunu mɛndɛ̃ zu nɛ? (b) Wa sɔ̃ mɛ ayɔ ya e kpɛ ni nɛ? (Ba ãkadre “ Ta mɔ zi lége ya kpondo handa mɔ ma!”)

¹⁰ Ti uzu, Na ɔngbingɔ na alo lɛ-ngɔ gbia mɛndɛ̃ ti ngunu ti gigi zu mɛ atɛnɛ tɛnɛ ni  kaya suma mɛ ko, ta ahaka lo-lengɔ gbia ti Angleterre ná Amerika bo na nwã kɔi gɛgɛrɛ, bere wɔlo na palata ma, kanda ahaka ni na nwã mɛ abombi tɛrɛ lo ná kpondo. Kpondo ndo fa “ayangambi tɛ azi,” bere azi ti lɛ gigi. (Da. 2:43.) Nga ma se mɛ e ndo hũ na ni ndɛ, ta azi mɛ ndo lɛ gbia kaya lo lɛngɔ gbia ti ngunu ti gigi zu ndo koka lingɔ kwa tɛ la na seni ma, na lo mɛ ya, ta azi ndo hɛ̃ la lége ya ala li kwa tɛ la na seni ma, abɛse du na ngoi ti vɔtɛ, bere na lége ti kampanyɛ ti batangɔ lotomo tɛ azi (droits de l’homme), nga na lége tɛ azi ti sɛ̃ndika.

11. Nda mɛ lo le-ngɔ gbia ti Angleterre ná Amɛrika lengbi ti tongɔ e ya, e ye na bɛ e kɔi ya e na ndangba bi nɛ?

¹¹ Ti sɛ, na lo mɛ ya a haka lo le-ngɔ gbia ti ngunu ti Angleterre ná Amɛrika na gɛrɛ ngbilondo ko, afa ya ni la du ndangba lo le-ngɔ gbia ti ngunu ti lɛ gigi zu mɛ atɛnɛ tɛnɛ ni. Ta guvɛrnɛma mɛndɛ̃ ti gigi na mungɔ ndo ti lo le-ngɔ gbia mɛ ma. Lo le-ngɔ Gbia tɛ Nzapa la na gbɛ̃ngɔ ni ndoni kɔi na aguvɛrnɛma zu tɛ azi na ngoi ti to ti Armagedona. *​—Suma 16:13, 14, 16; 19:19, 20.

12. Tɛnɛ mɛ prɔfesi tɛ Danyele tɛnɛ nɛ, wa ngasia la ni ndo wamba bɛ e, ndo hɛ̃ nga e nzɔ̃ dangɔ bɛ nɛ?

¹² Nzɔ̃ kpale mɛ elengbi ti luangɔ na ndo Prɔfɛsi mɛ nɛ? Prɔfɛsi tɛ Danyele kambisa hɛ̃ e aye mɛ ndo fa ya e na ndangba bi. Aɔ ndɛ bulu 2 500, profeta Danyele piandó pa ya, na pɛ lo le-ngɔ gbia ti Babilonɛ ko, ambanga lo le-ngɔ gbia mɛndɛ̃ siɔ na singɔ wa ala na hɛ̃ngɔ awakwa tɛ Nzapa pɛnɔ. Lo tɛnɛ ngandó ya, lo le-ngɔ gbia ti ngunu ti gigi zu ti Angleterre ná Amɛrika la na dungɔ ndangba lo le-ngɔ gbia ti ngunu ti lɛ gigi zu. Tɛnɛ niko azu na bɛ e, wa ni to nga e, e ye ya angbã dã Lo le-ngɔ Gbia tɛ Nzapa na onzingɔ lo lɛ-ngɔ gbia tɛ azi zu, wa ni na bandangɔ le-ngɔ gbia na ndo lɛ sese zu.—Da. 2:44.

13. “Gbia ti mwambe” nga na “agbia sui kɔi,” mɛ mbɛti ti Suma 17:9-12, atɛnɛ tɛnɛ tɛ la adu ana, wa prɔfɛsi mɛ atindó na seni ngasia?

¹³ Di Suma 17:9-12. Ye mɛndó ali tɛrɛ lo na ngoi ti to ti uzu ti lɛ gigi zu ko, ni kokisandó mbanga prɔfɛsi kɔi mɛ aba ndangba bi. Agbia ti politikɛ gba ndo gindó kpãngɔ siriri ge lɛ sese. Ala kpãndó Societes des nations na nzɛ ti Kɔi bulu ti 1920, kanda na Nzɛ ti Sui Kɔi 1945 ko, ni tindó ONU. Linɔ̃ niko la ni tindó “gbia ti mwambe.” Kanda ta ni du lo le-ngɔ gbia ti ngunu ti lɛ gigi zu ma. Ngunu tɛ lo ndo lo ka tɛ agbia mɛ ndo hɛ̃ lo ti. Ngbangɔ ndo haka aguvɛrnɛma mɛ ndo hɛ̃ lo ti mabere “agbia sui kɔi.”

14-15. (a) Tɛnɛ mɛ mbɛti ti Suma 17:3-5 tɛnɛ mɛ aba “Babilonɛ mɛ kota kɔdɔrɔ” nɛ? (b) Ye mɛ ndo si ndɛ na asambela ti nvɛ̃nɛ nɛ?

¹⁴ Di Suma 17:3-5. Na lége ti nyingɔ vúru ko toma Yoanɛ hũndó suma mɛ aba wali ti ngbabo kɔi, “Babilonɛ mɛ kota kɔdɔrɔ,” mɛ ni ndo fa asambela zu ti nvɛ̃nɛ. Suma niko fa nɛ? Ndo gã asambela ti nvɛ̃nɛ ndo hɛ̃ ti la hɛ̃ agbia ti guvɛrnɛma, wa ni ndo sulu nga ala. Angbã dã Yehova na kpãngɔ ka bɛ agbia niko ya ala li “ye mɛ Nzapa separa lingɔ.” Wa ye mɛ na singɔ nɛ? Agbia ti guvɛrnɛma niko, afa “agbia sui kɔi,” na tiringɔ to na asambela ti nvɛ̃nɛ, wa ala na gbɛ̃ngɔ ni ti bwai.​—Suma 17:1, 2, 16, 17.

¹⁵ Ngasia la e hĩnga ya angbã dã agbɛ̃ Babilonɛ nɛ? Ti nɛngɔ ya e hɛ̃ gbinyã ti hũnda olo mɛ ko, ayɔ ya e hĩnga ya na ngoi ti gã, ngu ti Efrata mɛndó gini Babilonɛ la ndo batandó ni. Mbeti ti Suma ndo haka nga amiliɔ̃ tɛ azi mɛ ndo hɛ̃ ti la hɛ̃ Babilonɛ na “ngu.” mɛ ndo bata ni. (Suma 17:15) Kanda mbeti ti Suma di tɛnɛ ya, ngu niko na ‘ulɛngɔ,’ ni fa ya azi mɛ  ndo hɛ̃ ti la hɛ̃ Babilonɛ na kpɛngɔ lo. (Suma 16:12) Adu ye mɛ ndo li tɛrɛ lo ndɛ la: azi gba ndo si kaya asambela ti nvɛ̃nɛ, wa ala ndo gwe ti gingɔ agbinya ti ahũnda tɛ la ka ndo mɛndɛ̃.

16. Singɔ ti ONU ná kɛ̃ngɔ hɛ̃ngɔ ti hɛ̃ asambela ti nvɛ̃nɛ ndo fa nɛ, wa nda mɛ ni du ye ti sangɔ ngunu bɛ nɛ?

¹⁶ Nzɔ̃ kpale mɛ elengbi ti luangɔ na ndo Aprɔfɛsi nɛ? Singɔ ti ONU nga na se mɛ azi ndo kɛ̃ hɛ̃ngɔ ti la kaya asambela ti nvɛ̃nɛ, ndo fa ya e na ndangba bi. Abɛse du ya angu ti yika yika ti Babilonɛ ndo ulɛ ko, ta ni la na kɔngɔ nda sambela ti nvɛ̃nɛ ma. Ma se ko la e lo ti tɛnɛngɔ na ni ko, Yehova na kpãngɔ ka bɛ “agbia sui kɔi”​—nga na agbia ti guvɛrnɛma mɛ ndo hɛ̃ ti la hɛ̃ ONU ya ala li​—“ye mɛ Nzapa separa lingɔ.” Lo ni ko na butangɔ asambela ti nvɛ̃nɛ butangɔ wa ni nga na kamwisangɔ azi ti lɛ sese zu. * (Suma 18:8-10) Kpale niko na yengingɔ gbanda sese, wa ni nga na singɔ na apɛnɔ̃ gba. Kanda e awakwa tɛ Yehova na dungɔ na tina na sɛ mɛ ni na lingɔ ya, e ma dengɔ bɛ. Ta wa kula tɛ Nzapa ti pɛ yɔngɔrɔ ngoi na dungɔ da bwai na bwai ma, wa  angbã dã na tɔ̃ngɔ e na ya pɛnɔ ti gigi olo!​—Luka 21:28.

17-18. (a) Ngasia la elengbi ti lingɔ ya loyengɔ tɛ e ati kpengbani nɛ? (b) Ye mɛ e na tɛnɛngɔ tɛnɛ ni na pɔsɔ mɛ na gangɔ nɛ?

¹⁷ Profeta Danyele piandó tɛnɛ ya “bɛta hĩngangɔ ndo” na “tingɔ gba.” Ni ndo ti na seni nvɛ̃ni! Ndɛ lo mɛ ko, e ndo gbɔ̃ nda aprɔfesi mɛ aba ngoi mɛ e da. (Da. 12:4, 9, 10) Se mɛ prɔfɛsi mɛ ndo ti na seni ndɛ ko, ni ndo to e ya e ti na tɔndɔngɔ ka mbage tɛ Yehova nga na Tɛnɛ tɛ lo. (Yis. 46:10; 55:11) Na lo ni ko, ngbã lá kwɛ mandangɔ Ngbangɔ, kpã nga tɛnɛ mɛ mɔ ndo manda na kwa na ya dungɔ lɛ ngɛ̃́ tɛ mɔ, wa ndo za nga azi mɛndɛ̃ ya ala ti akwa Yehova. Lo na batangɔ azi zu ko la ndo kpã bɛ la zu ka ndo lo wa lo na hɛ̃ngɔ la “siriri ngoi zu.”​—Yis. 26:3.

¹⁸ Na pɔsɔ mɛ na gangɔ ko, e na mandangɔ tɛnɛ ti prɔfesi mɛ aba bombi tɛ awakristo na ngoi ti ndangba bi. Nga ma se mɛ e na hũngɔ na ni ko, ni ndo fa ya e na olo na ndangba bi. E nga na hĩngangɔ se mɛ Yezo mɛ Gbia tɛ e ndo kokisa na gwɛ̃ tɛ ava lo ti mbilimbili.