Ndɛ lo mɛ ko, abɛse azi mɛ ndo pa ya, ani du awakristo ko, ala ndo hũ ya, andia ti ya Ngbangɔ na omɛ aba bombingɔ tɛrɛ uzu ti libala adu ndia ti gã, mɛ ta ni dɛ na tina ma. Ti nɛngɔ ya, azi amɛsɛnɛ na kpale niko, agbia ti sambela gba agbinyangbi hangɔ lo tɛ ala na ndo kpale mɛ aba aye ti nzɔ̃ni ná aye ti siɔni. Ta andia tɛ Nzapa na omɛ aba aye ti nzɔ̃ni ná siɔni di dɛ na valɛrɛ ma? Ipɔ. Tɛnɛ mɛ na zangɔ e ya, e hĩnga ni.

 Alindó azi ti nɛngɔ ya, Nzapa tambwisa ala. Ngbangɔ pa ya: “Ta zo nvɛ̃ni lengbi fangɔ tɛrɛ lo na lége ma.” (Yirimia 10:23) Abɛse Yehova lindó e na ndenge mɛ elengbi ti pɔnangɔ aye mɛ e ye lingɔ ko, ta lo hɛ̃ndó e lége nga na ngunu ti kpãngɔ andia na ndo tɛrɛ e nvɛ̃ni omɛ aba aye ti nzɔ̃ni ná ti siɔni ma. a Na lo ni la Yehova ye ya, e kpã bɛ e na ndo lo.—Masese 3:5.

 Elengbi ti luangɔ andia tɛ Nzapa na omɛ aba aye ti nzɔ̃ni ná ti siɔni kaya Ngbangɔ. Zia e ba aye sɛ mɛ ndo fa ya, andia ni du ngbondoni na lo tɛ e.

•   Nzapa la li e. (Nzembo 100:3) Na lo mɛ ya, Nzapa la du Wa lingɔ e ko, lo hĩnga nzɔ̃ni aye mɛ alengbi ti lingɔ ya, e du na sãte ti nzɔ̃ni, e du na bingangɔ li ti nzɔ̃ni nga na dengɔ bɛ. Lo hĩnga nga akpale mɛ alengbi ti singɔ na e se du ya, e kɛ̃ tɔndɔngɔ andia tɛ lo. (Galatia 6:7) Yehova ye ya, e du na dungɔ lɛ ngɛ̃́ ti nzɔ̃ni, ni la Ngbangɔ ndo ili Nzapa ya, lo du ‘Wa hangɔ e na ye na lo ti nzɔ̃ kpale tɛ e nvɛ̃ni, nga zo mɛ ndo fa e na lége mɛ elengbi ti hɔngɔ da.’—Yisaya 48:17.

•   Agwɛ̃ tɛ e nvɛ̃ni alengbi ti handangɔ e. Azi gba do hũ tɛ la ya, ala lengbi kpãngɔ ndia na ndo akpale ti nzɔ̃ni ná ti siɔni na bangɔ gwɛ̃ ti bɛ la. Ngbangɔ pa ya, “Bɛ zo ndo handa zo hɔngɔ aye mɛndɛ̃ zu, wa ta ni du ye ti lengɔ na wele ma.” (Yirimia 17:9) Se du ya, ta bɛ e alanda awangɔ ti ndara tɛ Nzapa ma ko, ni na tongɔ e ya, e li aye mɛ alengbi ti hɛ̃ngɔ e pɛnɔ na gesi.—Masese 28:26; Mosakoli 10:2.

 Ĩi! Ngbangɔ ndo tɛnɛ mbilimbili na ndo kpale mɛ aba Nzapa nga na aye mɛ ndo hɛ̃ lo dengɔ bɛ. (1 Kɔrinto 6:9-11; Galatia 5:19-23) Lo ye ya, azi zu ahĩnga mbilimbili ni. (1 Timɔte 2:3, 4) Ayɔ ya, agbia ti sambela ndo ha tɛnɛ mɛ Ngbangɔ ndo tɛnɛ.—Tito 1:7-9.

 Azi gba mɛ ndo kɛ̃ landangɔ andia tɛ Nzapa ko, ala ndo gi wangɔ ka tɛ agbia ti sambela na lo mɛ ya, ala ndo ha na azi ‘aye mɛ ala na gwɛ̃ ti mangɔ ni.’ (2 Timɔte 4:3) Ngbangɔ pa ya: “Vundu na azi ko la ndo pa ya, nzɔ̃ ye adu siɔni, wa siɔ ye adu nzɔ̃ ye.” (Yisaya 5:20) E hũ yangondo ya, Nzapa na sambisangɔ agbia ti sambela na lo mɛ ya, ta ala ndo ha mbilimbili tɛ Nzapa na omɛ aba aye ti nzɔ̃ni ná siɔni ma.

 Ipɔ. Azi mɛ ndo ye hɛ̃ngɔ Nzapa dengɔ bɛ ko, ala ndo landa sɛ lɛlo tɛ Yezo. Lo pandó hɛ̃ ava lo ya, ta ala fa ngbanga tɛ azi mɛndɛ̃ ma, kanda ala ye azi zu, atɔndɔ nga ala.—Matie 5:43, 44; 7:1.

 Ayɔ ya, ava Yezo atɔndɔ andia tɛ Nzapa na ya akpale zu ti dungɔ lɛ ngɛ̃́ tɛ la. Kanda ale ala ye nga ya, azi mɛndɛ̃ apɔna dungɔ lɛ ngɛ̃́ mɛ bɛ ala nvɛ̃ni ye. (Matie 10:14) Ta Yezo hɛ̃ndó lége hɛ̃ ava lo ya, ala gbɔ̃ azi na ndo ngunu na lége ti politikɛ bere na lége ti kpale mɛndɛ̃ ya, ala tɔndɔ andia ti ya Ngbangɔ ma.—Yoanɛ 17:14, 16; 18:36.

 Se e ndo li kpengbani ti tɔndɔngɔ andia tɛ Nzapa na omɛ aba aye ti nzɔ̃ni ná ti siɔni ko e na luangɔ nzɔ̃ sulu ndɛ nga na bi mɛ na gangɔ. (Nzembo 19:8, 11) Ba ambanga anzɔ̃ sulu ni:

•   E na dungɔ na dengɔ bɛ gba.—Masese 29:6.

•   E na dungɔ na mangbi ti nzɔ̃ni ná Nzapa.—Masese 3:32.

•   Nzapa na zangɔ e na ngoi ti pɛnɔ.—Masese 11:8.

•   E na dungɔ na nzɔ̃ dangɔ bɛ ti luangɔ dungɔ lɛ ngɛ̃́ ti kaka.—Nzembo 37:29.