Azi gba banda hũngɔ siɔni hongɔ asa na lo ti tɛngɔ bere na lo ti lingɔ na aye mɛndɛ̃.

•   “Véganisme du se ti dungɔ lɛ ngɛ̃́ mɛ zo ndo pɔna ti lingɔ zu mɛ lo lengbi ti lingɔ ti nɛngɔ ya lo kɛ̃ seliye zu ti hɛ̃ngɔ asa pɛnɔ ngama se mɛ azi mɛndɛ̃ ndo li na ni so hongɔ asa na lo ti tɛngɔ, lingɔ na bɔngɔ bere aye mɛndɛ̃.”—The Vegan Society.

 Azi mɛndɛ̃ ndo kɛ̃ tɛngɔ sa ta bo na lo ti mangɔ vundu tɛ asa ma, ambanga ni ndo kɛ̃ tɛngɔ sa na lo ti ndo mɛ ala da, na lo ti batangɔ sãte tɛ ala nga na lo ti sambela mɛ ala ka da.

•   “Ɔngbingɔ na kɛ̃ngɔ tɛngɔ aye mɛndɛ̃, azi ndo hũ ya kɛ̃ngɔ tɛngɔ sa du kɔdɛ ti nzɔ̃ni ti filozofi, gbanzingɔ tɛrɛ na ndo aye gba ti nzɔ̃ni, nga ekateli kɔi ti nzɔ̃ni mɛ lengbi ti lingɔ ya dungɔ lɛ ngɛ̃́ ti nzɔ̃ni na ndo bi mɛ na gangɔ.”—Britannica Academic.

 Kɛ̃ngɔ tɛngɔ sa bere kɛ̃ngɔ salelangɔ ye zu mɛ alo na ndo sa na lingɔ ya gigi dɛ̃? Tɛnɛ mɛ Ngbangɔ tɛnɛ nɛ?

 Ngbangɔ pa ya wa lingɔ e Yehova Nzapa a ndo hũ azi ya ala du ngbondoni aɔ asa wa na lo ni la lo hɛ̃ndó azi lo-lengɔ gbia na ndo asa. (Ebandeli 1:27, 28) Yɛkɛ yɛkɛ, Nzapa hɛ̃ndó azi lége ti tɛngɔ asa. (Ebandeli 9:3) Kanda ta lo ndo sepala hũngɔ ya azi ndo hɛ̃ asa pɛnɔ ma.—Masese 12:10.

 Na bangɔ tɛnɛ mɛ kaya Ngbangɔ, tɛngɔ bere kɛ̃ngɔ tɛngɔ sa du kpale mɛ ba ekateli tɛ zo na zo. b Ta ekateli tɛ e na ndo kpale niko la na lingɔ ya e ti anzɔ̃ azi ka lɛ Nzapa ma. (1 Kɔrinto 8:8) Ta zo kɔi lengbi ti tɛnɛngɔ siɔni na lo ti ekateli mɛ zo mɛndɛ̃ mu ti tɛngɔ bere kɛ̃ngɔ tɛngɔ sa ma.—Roma 14:3.

 Ngbangɔ pa ya, ta ekateli mɛ e ndo mu la na lingɔ ya, kpale ti lɛ gigi olo ti nzɔ̃ni ma. Apɛnɔ mɛ ndɛ ge lɛ gigi alo na ndo akpale ti politikɛ, se ti dungɔ lɛ ngɛ̃́ tɛ azi nga na akpale mɛ aba nkita, wa ta zo kɔi lengbi ti lɛkɛngɔ ni ma. Ngbangɔ pa ya:

•   “Ta alengbi ti lonzingɔ ye mɛ sã ma.”—Mosakoli 1:15.

 Wa lingɔ e na onzingɔ apɛnɔ mɛ e ndo tengbi na ni ndɛ. Ngbangɔ salela yanga ti yika yika so kambisangɔ aye mɛ lo na lingɔ.

•   “So pɛ ni, mbi hũ fãna ndozu na fãna sese. Ndozu ti uzu na sese ti uzu amina ndo wɛ, ta kota ngu ti dɛ ngandó da ma.”—Suma 21:1.

 Nzapa na hãngɔ lo-lengɔ gbia tɛ azi bere “ndozu ti gã,” wa lo na kpãngɔ “ndozu ti fãna ni” Lo-lengɔ Gbia tɛ lo ti ndozu Lo-lengɔ Gbia tɛ lo na hãngɔ “sese ti gã,” mɛ afa asiɔ azi, wa ni na lengɔ gbia na ndo lɛ “sese ti fãna ni,” bere azi mɛ ndo tɔndɔ Lo-lengɔ Gbia tɛ lo na songo ti bɛ la zu.

 Bo ka gbɛ Lo-lengɔ Gbia tɛ Nzapa la azi na mandangɔ se ti nzɔ̃ni ti dungɔ ndoni kɔi na asa nga na se ti nzɔ̃ni ti batangɔ sese.—Yisaya 11:6-9.