Nzapa ye ya azi adu nzɔ̃ni ge lɛ sese. Lo lindó lɛ sese nga na aye kwɛ́ mɛ ka dazu na lo mɛ ya lo ye azi. Angbã dã, lo na lingɔ ye kɔi ya azi ti lɛ gegi zu adu nzɔ̃ni na ngoi mɛ na gangɔ. Lo na bɛngɔ ye zu mɛ ndo hɛ̃́ e pɛnɔ̃ katɛ.​—Di Yirimia 29:11.

Ta lo-gbia kɔi mɛ alengbi onzingɔ zaga, ngã, bere kwá da ma. Kanda ba nzɔ̃ pa lomɛ: Angbã dã, Nzapa na bɛngɔ lo-gbia tɛ azi katɛ. Lo na kpãngɔ tɛ lo nvɛ̃ni. Ava lo na dungɔ na siriri nga na nzɔ̃ tɛrɛ.​—Di Yisaya 25:8; 33:24; Danyele 2:44.

Pɛnɔ̃ na wɛngɔ bo na ngoi mɛ Nzapa na onzingɔ asiɔ zi ge lɛ sese. (Sefania 2:3) Asi gbanda lawa? Tɛnɛ tɛ Nzapa apiandó tɛnɛ gã́ aye mɛ ndo hɛ̃́ azi pɛnɔ̃ ndɛ. Asiɔ kpale ni ko ndo fa ya ngoi tɛ Nzapa ti onzingɔ na siɔlo adɛ dã.​—Di 2 Timɔte 3:1-5.

E manda hingangɔ Nzapa na lége ti tɛnɛ tɛ lo, Ngbangɔ. Buku ni adu ma bere mbeti mɛ to ti songo ato hɛ̃́ e aya lo. Ando pa hɛ̃́ e se mɛ e sepala na olo na bɛta lége ti ya du nga na se mɛ e na sepalangɔ na du ti kaka ge lɛ sese na ngoi mɛ na gangɔ. Biani, ta azi mɛ ndɛ̃́ na yengo ya mɔ manda Ngbangɔ ma. Kanda ta mɔ zi lége zo gbanzi mɔ na lwangɔ nzɔ̃ du ti ngoi mɛ na gangɔ ma.​—Di Masese 29:25; Suma 14:6, 7.