WANGƆ 5
Dangɔ bɛ tɛ nzapa na ndo sese adu nɛ?
1. Nzapa lindó sese lo nɛ?
Yehova hɛ̃́ndó sese hɛ̃́ akɔli na awe. Ni du ndo tɛ e. Ta alindó kɔli na wali ti uzu, Adamu na Eva ya, ala du ka ndozu ma. Nzapa piandó li a angɛlo ya ala du ka ndozu. (Yobo 38:4, 7) Nzapa kpãndó kɔli ti uzu ka lɛ paradizo, yaka mɛ nzɔ̃ni bwaí, ili yaka ni la Edɛnɛ. (Ebandeli 2:15-17) Yehova hɛ̃́ndó lo na azi mɛ na gangɔ pɛko lo dangɔ bɛ ti sepalangɔ na du ti kaka ge lɛ sese.—Di Nzembo 37:29; 115:16.
Uzu ndó ko, bo yaka ti Edɛnɛ ndó la adu paradizo. Ale gegi sĩndó na ayangambi mɛ kɔli na wali ti uzu a dũ la. Na gesi, ale ala dũndó, lɛ sese a sĩ ngbɔ̃ na azi, ati nga paradizo. (Ebandeli 1:28) Ta sese na gbɛ̃ngɔ ma, na ngbãngɔ bwaí ndo tɛ azi.—Di Nzembo 104:5.
Ba video Nzapa lindó lɛ sese na lo nɛ?
2. Nda mɛ ta sese du ndɛ paradizo ma nɛ?
Adamu na Eva kɛndó mangɔ nyɔ̃ Nzapa, ndani la Yehova toma ala ka pɛ yaka. Ndó la paradizo agere, ta zo kɔi mɛ ndó alengbi ti diringɔ na ni da ma. Ngbangɔ pa ya “azia sese na yamba ti siɔ zo.”—Yobo 9:24; Di Ebandeli 3:23, 24.
Bɛ Yehova ali na dangɔ bɛ mɛ ndó lo na ni uzu na lo tɛ azi? Ipɔ! Lo du lombe. Ta tɛnɛ tɛ lo ndo gwe gɛgɛrɛ ma. (Yisaya 45:18) Lo na lɛkɛngɔ azi na se mɛ ndó lo ye ya ala du na ni.—Di Nzembo 37:11, 34.
3. Paradizo na diringɔ ngasia?
Sese na diringɔ Paradizo ngoi mɛ Yezo banda lengɔ Gbia ka ya lo-gbia tɛ Nzapa. Na ngoi to ti Armagedona Yezo na gbɔ̃ngɔ li to na aangɛlo tɛ Nzapa ti kpɔngɔ azi zu mɛ ndo kɛ̃ Nzapa. So pɛni, Yezo na gbɔ̃ngɔ Satana ka da mbingo ti buru 1 000. Ava Nzapa na ngbãngɔ lɛ la ngɛ̃́ na ngoi ti to ni ko na lo mɛ ya Yezo na dɔngɔ ala na nɔ̃ lo nga na batangɔ ala. Ala na dungɔ na dɛngɔ bɛ na lɛ ngɛ̃́ ti bwaí ka paradizo ge lɛ sese.—Di Suma 20:1-3; 21:3, 4.
4. Pɛnɔ̃ wɛ gbanda lawa?
Nzapa onzi gbanda siɔ lo ge lɛ sese la wa? Yezo fandó alɛ “lo” mɛ ndo fa ya ndangba bi a dɛ dã. Alo mɛ ndo ɔ ndɛ ge lɛ gegi ndo gia du tɛ azi, ndo fa nga ya e si na ngoi ti ‘kɔngɔ nda a lo mɛ na ngoi mɛ.’—Di Matie 24:3, 7-14, 21, 22.
Ngoi mɛ Yezo na lengɔ gbia buru 1 000 ka ndozu ko, lo na onzingɔ pɛnɔ̃ ge lɛ sese. (Yisaya 9:6, 7; 11:9) Se e kpã katɛ lo-gbia tɛ lo ko, lo na lingɔ ngama Kota Nganga-Nzapa ti hongɔ siɔ ye tɛ azi mɛ ndo ye Nzapa. Na lége tɛ lo, Nzapa na onzingɔ ngã, tingɔ bange, nga na kwá.—Di Yisaya 25:8; 33:24.
5. Zo mɛ na dungɔ ka paradizo mɛ na gangɔ na?
Ka ya Da Lo-lɛngɔ Gbia, mɔ na tengbingɔ na azi mɛ ndo ye Nzapa, ala ndo manda nga se ti dengɔ na bɛ lo
Azi mɛ ndo ma nyɔ Nzapa na dungɔ ka paradizo. (1 Yoanɛ 2:17) Yezo tondó awa kalasi tɛ lo ya ala gi azi mɛ ndo zu na tɛrɛ la, ko ala ha azi ni na ye mɛ ala lengbi ti lingɔ wa Nzapa ye ala. Ndɛ ko, Yehova ndo lɛkɛ amiliɔ tɛ azi ya ala du ka ya paradizo mɛ na gangɔ ge lɛ sese. (Sefania 2:3) Ka Da Lo-lengɔ Gbia tɛ Atɛmwɛ tɛ Yehova ko, azi ndo manda dungɔ anzɔ̃ akɔli bere anzɔ̃ to, nga ti dungɔ anzɔ̃ awe bere anzɔ̃ ta. Ayangambi na awa dũngɔ ala ndo vɔrɔ Nzapa ndoni kɔi, ala ndo manda nga se ti lwangɔ mbana gɛrɛ ti nzɔ̃ pa tɛ Nzapa.—Di Mika 4:1-4.
