Mɔ na mangɔ ngasia se du ya kwa mɔ hɛ̃ mɔ nzɔ̃ ye kɔi ngaso mɛ nɛ? Mɔ na mangɔ dengɔ bɛ nvɛ̃ni wa mɔ nga na fangɔ na lo ya mɔ sepala na ni. Yehova na Yezo a hɛ̃ e nzɔ̃ ye mɛ aɔ aye mɛndɛ̃ zu. Nzɔ̃ ye niko adu nɛ, wa ngasia la elengbi ti hɛ̃ngɔ la siakɔli na lo ni nɛ?

1. Ngasia la elengbi ti fangɔ ya e ndo sepala na ye mɛndó Yehova na Yezo ali na lo tɛ nɛ?

Ngbangɔ ko kapa ya “se zo aye lo tɛ [Yezo] ko,” lo na luangɔ dungɔ lɛ ngɛ̃́ ti bwai na bwai. (Yoanɛ 3:16) Dungɔ na loyengɔ alengbi na nɛ? Ta afa bo yengɔ lo tɛ Yezo ma. Kanda elengbi ti fangɔ ni na ya ekateli mɛ e ndo mu nga na ya kwa mɛ e ndo li. (Zaki 2:17) Se e fa loyengɔ na ya kwa tɛ e nga na ya tɛnɛ tɛ e ko, e na tingɔ na mangbi ti kpengbani na Yezo nga na To lo Yehova.​—Di Yoanɛ 14:21.

2. Ngoi mɛ nvɛ̃ni e ndo lua lége ti hɛ̃ngɔ Yehova na Yezo siakɔli na lo ti ye mɛ ala li hɛ̃ e wa?

Na ndɔ ti ndani uzu ti nɛngɔ ya lo kpi ko, Yezo kambisandó hɛ̃ ava lo ndenge mɛndɛ̃ ti hɛ̃ngɔ siakɔli na ndo tɔ̃ngɔ azi. Lo tondó nda lo kɔi mɛ ngbondoni mɛ Ngbangɔ ndo ili ni ya “Tɛ tɛ Gbia,” bere dangɔ bɛ na bí ti kwá tɛ Yezo. (1 Kɔrinto 11:20) Lo niko hɛ̃ndó atoma na awakristo zu ti mbilimbili lége ya ta bɛ la li na ni ma ya Yezo kpindó na lo tɛ azi. Na ndɔ nikondó ko, Yezo pandó hɛ̃ la ya: “Ale ĩ li so, so dangɔ bɛ ĩ na mbi.” (Luka 22:19) Na ngoi mɛ mɔ ndo gwe bombi ti dangɔ bɛ na bí ti kwa tɛ Yezo ko, mɔ ndo fa ya mɔ ndo hɛ̃ siakɔli hɛ̃ Yehova na Yezo na lo ti kota songo mɛ ala fa na lo tɛ mɔ.

 GI HĨNGANGƆ LO MƐNDƐ̃

3. Mɔ fa ya mɔ ndo hɛ̃ la siakɔli ngasia?

Da bɛ mɔ ya zo kɔi sara mɔ na ya kwá. Na dungɔ kpengba ni ya bɛ mɔ li na ye mɛ zo niko li tɛrɛ mɔ, ta seni la ma? Mɔ na gingɔ lége ti hɛ̃ngɔ lo siakɔli na lo mɛ ya lo sara dungɔ lɛngɛ̃́ tɛ mɔ

Na lo tɛ Yehova la e na dungɔ lɛ ngɛ̃́. Di 1 Yoanɛ 4:8-10, wa na pɛni hɛ̃ gbinya ti ahũnda olo mɛ:

• Nda mɛ tɔ̃ngɔ azi adu nzɔ̃ ye mɛ aɔ aye zu nɛ?

• Ngoi mɛ mɔ ndo da bɛ mɔ na ye mɛ Yehova na Yezo li na lo tɛ mɔ, mɔ ndo ma tɛrɛ mɔ ngasia?

Wa mɔ hɛ̃ siakɔli na lo ti tɔ̃ngɔ azi ngasia? Di 2 Kɔrinto 5:15 nga na 1 Yoanɛ 4:11; 5:3. Na pɛ dingɔ vɛrsɛ kɔi kɔi ko, hɛ̃ gbinya ti hũnda olo mɛ:

• Elengbi ti fangɔ ya e ndo hɛ̃ siakɔli ngasia?

4. Landa pagɛrɛ Yezo

Kɔi ti alége mɛ e ndo fa ya e ndo hɛ̃ siakɔli adu landangɔ pagɛrɛ Yezo. Di 1 Pɛtro 2:21, wa na pɛni hɛ̃ gbinya ti hũnda olo mɛ:

• Na alo mɛ wa la mɔ lengbi ti landangɔ pagɛrɛ Yezo nzɔ̃ni wa?

• Aye mɛ ndo ɔ ka bombi ti dangɔ bɛ na bí ti kwá tɛ Yezo nɛ?

 NA NDUNU NI

E ndo fa ya e ndo hɛ̃ siakɔli na ndo ye mɛndó Yezo li na fangɔ loyengɔ nga na gwengɔ bombi ti dangɔ bɛ na bí ti kwá tɛ lo.

Bozongeli

• Dungɔ na loyengɔ na lo tɛ Yezo afa nɛ?

• Ye mɛ mɔ li ti fangɔ ya mɔ ndo hɛ̃ siakɔli na lo ti ye mɛ Yehova na Yezo li na lo tɛ mɔ nɛ?

• Nda mɛ adu ngbondo ni ya mɔ ndo gwe bombi ti dangɔ bɛ na bí ti kwá tɛ Yezo nɛ?