Yezo tɛnɛndó ya, ayɔ ya awakristo mu batisimɔ. (Di Matie 28:19, 20.) Kanda batisimɔ du nɛ? Wa ye mɛ zo lengbi ti lingɔ ti nɛngɔ ya lo mu batisimɔ nɛ?

1. Batisimɔ du nɛ?

Tɛnɛ mɛ “batisimɔ” alo na yanga ti grɛkɛ mɛ ndo fa “yɔlɔngɔ” ka gbɛ ngu. Ngoi mɛndó ahɛ̃ Yezo batisimɔ ko, ayɔlɔ ndó lo kaya ngu ti Yɔlɔdani, na gesi lo lo “ka ya ngu [lo] ko gegi.” (Marko 1:9, 10) Kwɛ kɔi, ando hɛ̃ abɛta awakristo batisimɔ na yɔlɔngɔ la, tɛrɛ la zu kaya ngu.

2. Mungɔ batisimɔ ndo fa nɛ?

Se zo mu batisimɔ ko, afa ya lo hɛ̃ dungɔ lɛ ngɛ̃́ tɛ lo hɛ̃ Yehova. Zo ndo hɛ̃ dungɔ lɛ ngɛ̃́ tɛ lo hɛ̃ Nzapa ngasia? Uzu ti nɛngɔ ya zo mu batisimɔ, lo ndo pa hɛ̃ Yehova na ya sambela mɛ lo li ya, lo ye hɛ̃ngɔ dungɔ lɛ ngɛ̃́ tɛ lo hɛ̃ Yehova bwai na bwai. Zo niko ndo ko kapa hɛ̃ Yehova ya lo na vɔrɔngɔ bo lo, wa lingɔ gwɛ̃ tɛ Nzapa na dungɔ ye ti ngbondoni na ya dungɔ lɛ ngɛ̃́ lo. Lo “zia dangɔ bɛ lo na tɛrɛ lo nvɛ̃ni . . . wa lo ngbã lá kwɛ landangɔ” tɛnɛ mɛndó Yezo ha nga na pa gɛrɛ lo. (Matie 16:24, NWT) Na ngoi mɛ zo hɛ̃ dungɔ lɛ ngɛ̃́ tɛ lo hɛ̃ Nzapa, wa lo mu nga batisimɔ ko, lo ndo ti na mangbi ti kpengbani ná Yehova nga na awakwa tɛ lo mɛndɛ̃.

3. Ye mɛ ayɔ ya zo li uzu ti nɛngɔ ya lo mu batisimɔ nɛ?

Uzu ti nɛngɔ ya mɔ mu batisimɔ ko, ayɔ ya mɔ manda hĩngangɔ Yehova nzɔ̃ni wa mɔ ti nga na loyengɔ ti kpengbani ka mbage tɛ lo. (Di Aebreo 11:6.) Se mɔ hĩnga alo gba mɛ ba Yehova wa mɔ ti na loyengɔ gba ka mbage tɛ lo ko, mɔ na yengɔ lo gba. Ta kitɛ da ma mɔ na tingɔ na gwɛ̃ ti pangɔ nzɔ̃ pa wa mɔ na bandangɔ tɔndɔngɔ andia tɛ lo na ya dungɔ lɛ ngɛ̃́ tɛ mɔ. (2 Timɔte 4:2; 1 Yoanɛ 5:3) Na ngoi mɛ zo ndo “li ye zu mɛ ndode bɛ [Yehova]” ko, lo lengbi ti hɛ̃ngɔ dungɔ lɛ ngɛ̃́ tɛ lo hɛ̃ Nzapa wa lo mu nga batisimɔ.​—Kɔlɔsɛ 1:9, 10. a

 GI HĨNGANGƆ LO MƐNDƐ̃

4. Elengbi ti luangɔ wangɔ na ndo batisimɔ tɛ Yezo

Di Matie 3:13-17 ti nɛngɔ ya mɔ hĩnga alo mɛndɛ̃ mɛ ba batisimɔ tɛ Yezo. Wa na pɛni hɛ̃ gbinya ti ahũnda olo mɛ:

• A hɛ̃ndó Yezo batisimɔ na ngoi mɛndó lo dɛ bebe?

• A hɛ̃ndó lo batisimɔ ngasia? A sandó ngu bɛ li lo sangɔ?

Na pɛ batisimɔ tɛ lo ko, lo bandandó lingɔ kwa mɛ Nzapa hɛ̃ lo ya lo li ge lɛ sese. Di Luka 3:21-23 nga na Yoanɛ 6:38, wa na pɛni hɛ̃ gbinya ti hũnda olo mɛ:

• Kwa mɛndó Yezo kpã ni na ndo ti uzu na pɛ batisimɔ tɛ lo nɛ?

5. Mɔ lengbi ti mungɔ batisimɔ

Na ebandeli, tɛnɛ ti hɛ̃ngɔ tɛrɛ hɛ̃ Nzapa nga na mungɔ batisimɔ alengbi ti hɛ̃ngɔ mɔ mbɛtɔ. Kanda se mɔ ngbã lá kwɛ mandangɔ alo mɛ ba Yehova ko, ni na zangɔ mɔ ya mɔ mu ekateli niko ti ngbondoni. Ti nɛngɔ ya mɔ hĩnga se mɛndó azi mɛndɛ̃ amu na ekateli ti mungɔ batisimɔ ko, ba VIDEO.

Di Yoanɛ 17:3 nga na Zaki 1:5, wa na pɛni hɛ̃ gbinya ti hũnda olo mɛ:

• Ye mɛ lengbi ti zangɔ zo ya lo mu batisimɔ nɛ?

1. Hɛ̃ngɔ dungɔ lɛ ngɛ̃ hɛ̃ Yehova afa tɛnɛngɔ hɛ̃ lo ya, mɔ ye lingɔ kwa hɛ̃ lo bwai na bwai

2. Mungɔ batisimɔ ndo fa na gbɛlɛ azi zu ya zo hɛ̃ dungɔ lɛ ngɛ̃́ tɛ lo hɛ̃ Yehova

 6. Mungɔ batisimɔ ndo li ya zo li kaya ndasewa tɛ Yehova

Mungɔ batisimɔ ndo li ya e li kaya ndasewa tɛ awakwa tɛ Yehova ti lɛ gigi zu mɛ na mangbi. Abɛse du ya e ndo du ka ando ndɛ̃ ndɛ̃ ndɛ̃, bere e na mimɛsɛnɔ mɛ akɛsɛnɛ ko, e ndo du bo na loyengɔ kɔi wa e zu e ndo tɔndɔ ndia mɛ lo kaya Ngbangɔ. Di Nzembo 25:14 nga na 1 Pɛtro 2:17, wa na pɛni hɛ̃ gbinya ti hũnda olo mɛ:

• Ye mɛ mungɔ batisimɔ ndo li na mangbi mɛ zo na ni na Yehova nga na awakwa tɛ lo mɛndɛ̃ nɛ?

 NA NDUNU NI

Yezo tɛnɛndó ya, ayɔ ya awakristo mu batisimɔ. Ti nɛngɔ ya mɔ mu batisimɔ, ayɔ ya mɔ ti na loyengɔ ti kpengbani ka mbage tɛ Yehova, mɔ tɔndɔ andia tɛ lo wa mɔ hɛ̃ nga dungɔ lɛ ngɛ̃́ tɛ mɔ hɛ̃ lo.

Bozongeli

• Batisimɔ du nɛ, wa nda mɛ du ngbondoni ya mɔ mu ni nɛ?

• Mangbi mɛ ka popo ti hɛ̃ngɔ dungɔ lɛ ngɛ̃́ hɛ̃ Nzapa ná mungɔ batisimɔ nɛ?

• Ye mɛ ayɔ ya zo li uzu ti nɛngɔ ya lo hɛ̃ tɛrɛ lo hɛ̃ Nzapa wa lo mu nga batisimɔ nɛ?