Na pe bi yakere mɛndó Yezo si gbɛlɛ atoma ko, Petro mundó ekateli ti gwengɔ sangɔ gbanda kaya tɛ ti Galile. Toma, Yakobo, Yoanɛ, ná ava Yezo mɛndɛ̃ gwendó ndoni kɔi na lo. Ala sandó gbanda bi niko zu kanda ta ala gbɔ̃ndó susu ma.

Na ndãtu, ala hũndó kɔli kɔi ka nyɔ tɛ. Lo hũndandó ala ya: ‘Ta ĩ gbɔ̃ susu ma?’ Ala dirindó na gbinya hɛ̃ lo ya: “Ipɔ!” Lo tɛnɛndó hɛ̃ la ya: “Ĩ sa gbanda ka ndo ti ĩ ti kɔti.” Na ngoi mɛndó ala lini ko, gbanda tɛ la sĩndó na asusu wa ala handó singɔ na ni gba. Mbala kɔi, Yoanɛ hĩngandó ya kɔli niko du Yezo wa lo tɛnɛndó ya: “Adu Gbia!” Petro tindó ya ngu mbala kɔi wa lo bandandó sɔ̃ngɔ ngu tee ka nyɔ tɛ. Ava Yezo mɛndɛ̃ landandó lo na masuwa.

Ngoi mɛndó ala si ka nyɔ̃ tɛ ko, ala hũndó mapa ná susu ka lɛ wá. Yezo tɛnɛndó hɛ̃ la ya, ĩ ga na susu mɛndɛ̃ mɛ ĩ gbɔ̃ ĩ kpã ndoni. Na gesi lo tɛnɛndó hɛ̃ la ya: ‘Ĩ ga e tɛ ye.’

 Na pɛ tɛngɔ ye, Yesu hũndandó Petro ya: ‘Mɔ ndo ye mbi hɔ gingɔ susu?’ Petro gbinyandó hɛ̃ lo ya: ‘Ĩi Gbia, mɔ hĩnga ni nzɔ̃ni.’ Yezo pandó hɛ̃ lo ya: ‘Hɛ̃ tɛ hɛ̃ aya ngasã gbaga tɛ mbi.’ Yezo di hũndandó lo fãni mɛndɛ̃ ya: ‘Petro mɔ ndo ye mbi?’ Petro gbiyandó hɛ̃ lo ya: ‘Gbia mɔ hĩnga nzɔ̃ni ya mbi ndo ye mɔ.’ Yezo tɛnɛndó hɛ̃ lo ya: “Kã aya ngasã gbaga tɛ mbi.” Yezo dirindó hũnda lo bo na ndo niko ti fãni taa. Petro mandó vundu nvɛ̃ni. Lo gbinyandó hɛ̃ lo ya: ‘Gbia, mɔ hĩnga nzɔ̃ni ya mbi ndo ye mɔ.’ Yezo tɛnɛndó hɛ̃ lo ya: “Hɛ̃ tɛ hɛ̃ aya ngasã gbaga tɛ mbi.” Lo dirindó tɛnɛ hɛ̃ Petro ya: “Ngbã lá kwɛ landangɔ mbi.”