Na ngoi mɛndó Yezo ndoni kɔi ná atoma tɛ lo kaya shambrɛ ti ndozu ko, lo tɛnɛndó hɛ̃ la ya: ‘Ĩ zu na dɔngɔ mbi ziangɔ na bi ti ndɛ.’ Petro tɛnɛndó hɛ̃ lo ya: ‘Ta mbi ma! Abɛse ala mɛndɛ̃ zu dɔ mɔ zia ko, ta mbi na dɔngɔ mɔ ziangɔ bɛ gbɔ ma.’ Kanda Yezo tɛnɛndó hɛ̃ Petro ya: ‘Uzu ti kɔndɔ tongɔ mbela ko, mɔ bɛrɛ ndɛ fãni ta ya, ta mɔ hĩnga mbi ma.’

Na ngoi mɛndó asoda gbɔ̃ Yezo gwe na ni ka yada tɛ Kaifa ko, atoma gba kpɛlɛndó. Kanda atoma tɛ Yezo sɛ landandó lo ndoni kɔi na butu butu tɛ azi. Kɔi ka popo ni dundó Petro. Lo lindó kaya ngbo ti da tɛ Kaifa wa lo dundó so kpɛngɔ wá. Ngoi mɛndó wá za ka lɛ lo wa kwa tɛ Kaifa ti wali hũndó lɛ Petro, la lo tɛnɛndó hɛ̃ lo ya: ‘Mbi hĩnga mɔ! Mɔ ndo hɔ ngandó ndoni kɔi na Yezo!’

Petro tɛnɛndó ya: ‘Ipɔ, ta mbindó ndoni kɔi na lo ma! Ta mbi hĩnga nda tɛnɛ mɛ mɔ ndo tɛnɛ ma!’ So pɛni, lo lo so ya ngbo ni lo gwe lo ka nyɔ gbágbá. Kanda na gesi wali mɛndɛ̃ mɛ kɔi tɛ awa kwa di hũndó lo wa lo tɛnɛndó hɛ̃ azi zu mɛndó so ndoko ya: ‘Kɔli olo du nga kɔi tɛ ava Yezo!’ Petro tɛnɛndó ya: ‘Ta mbi hĩnga Yezo bɛ yakere ma!’ Kɔli kɔi tɛnɛndó ya: ‘Mɔ du kɔi tɛ ava Yezo biani! Se ti tɛnɛngɔ tɛnɛ tɛ mɔ ndo fa ya mɔ du zo ti Galile ngama tɛ Yezo.’ Kanda Petro fandó seleka ya: ‘Ta mbi hĩnga lo ma!’

Bo na ngoi niko, kɔndɔ tondó mbela. Petro hũndó Yezo sãna tɛrɛ lo ba lo. Lo dandó bɛ lo na tɛnɛ mɛndó Yezo tɛnɛ hɛ̃ lo, wa lo sindó ka gigi lo banda tongɔ to kpengbani nvɛ̃ni.

Na ngoi niko, azi ti Sanedrina bombindó tɛrɛ la ka yada tɛ Kaifa so sambisangɔ Yezo. Ala mundó ekateli ti hongɔ Yezo wɛ, kanda na ngoi niko ala ndo gigindó rɛzɔ̃ ti lingɔ ni. Kanda ta ala luandó lo na ye kɔi ti siɔni ma. Ngbĩi, Kaifa nvɛ̃ni hũndandó Yezo ya: ‘Mɔ du Nyi Nzapa?’ Yezo tɛnɛndó ya: ‘Ĩi mbi Nyi lo.’ Kaifa tɛnɛndó ya: ‘Ta tina ti gingɔ aye mɛndɛ̃ da ma, lo guru Nzapa!’ Azi zu ti Sanedrina  tɛnɛndó ya: ‘Kɔli olo dɛ̃ na kwá.’ Ambanga azi kuku solo tɛrɛ Yezo, agbe lɛ lo na bɔngɔ, asɔ̃nɔ lo na gɔbɔ, ala ahũnda lo ya: ‘Se mɔ du prɔfeta ko, di zo mɛ sɔ̃ mɔ!’

Na ndãtu, ala gwendó na Yezo ka Sanedrina wa ala di hũndandó lo ya: ‘Mɔ du Nyi Nzapa?’ Yezo hɛ̃ndó la gbinya ya: ‘Ĩ nvɛ̃ni ĩ tɛnɛ ya, mbi du Nyi Nzapa.’ Ala hũndó ya lo guru Nzapa ni la, ala mundó lo gwe na ni ka tɛ Ponse Pilato mɛ guvɛrnɛr ti Roma. Ye mɛndó li tɛrɛ lo na gesi nɛ? E na mandangɔ ni na ya wangɔ ti gesi.