Bulu zu na bi nzɛ ti 14 nisan ayuda ndo lindó yenga ti hɔngɔ. Fɛtɛ niko ndo dandó na bɛ la se mɛndó Yehova hã ala ka gbɛ mbɛ ti Ezipito wa lo gwe na ala ka kɔdɔrɔ ti kapa. Na ya bulu ti 33 ti N.E, Yezo ná atoma tɛ lo lindó yenga ti hɔngɔ ka Yeruzalɛmɛ kaya da ti etajɛ. Ngoi mɛndó ala tɛ ye ni wɛ ko, Yezo tɛnɛndó ya: ‘Zo kɔi so popo tɛ ĩ na tɛkɛngɔ mbi.’ Atoma mandó sɔngɔ bɛ nvɛ̃ni, wa ala hũndandó lo ya: ‘Zo ni la na?’ Yezo tɛnɛndó hɛ̃ la ya: ‘Adu zo mɛ mbi ga hɛ̃ lo mapa.’ Na pɛni, lo hɛ̃ndó mapa hɛ̃ Yudasi Mokeriota. Mbala kɔi, Yudasi sindó wa lo ziandó la kaya da, lo gwe.

Na gesi, Yezo lindó sambela, lo karandó ya mapa ni yakere yakere wa lo hɛ̃ndó ni hɛ̃ atoma tɛ lo. Lo tɛnɛndó hɛ̃ la ya: ‘Ĩ tɛ mapa olo, ni fa mi tɛrɛ mbi mɛ mbi na hɛ̃ngɔ ni na lo tɛ ĩ.’ Lo di lindó sambela fãni mɛndɛ̃, lo mu vinyɔ wa lo hɛ̃ atoma. Lo tɛnɛndó hɛ̃ ala ya: ‘Ĩ nyɔ vinyɔ olo, ni fa mɛnɛ tɛrɛ mbi mɛ na sangɔ so kangɔ lɛ na ndo siɔ kpale tɛ ĩ. Mbi kokapa hɛ̃ ĩ ya, ĩ na dungɔ agbia ndoni kɔi na mbi ka ndozu. Ĩ ngbã lá kwɛ lingɔ ngaso bulu zu so dangɔ bɛ ĩ na mbi.’ Ava Yezo ndo lindó bombi ti dangɔ bɛ la na bi ti kwá tɛ lo ndoni kɔi bulu zu. Ando ili ni ndɛ ya, tɛ tɛ Gbia.

Na ngoi mɛ ala honzi tɛngɔ ye, atoma bandandó lɔngbingɔ nyɔ la so gingɔ zo mɛ ɔ afɔ̃ lo. Kanda Yezo tɛnɛndó hɛ̃ la ya: ‘Zo mɛ aɔ  afɔ̃ lo bere zo mɛ na ndima gba adu zo mɛ ndo hũ tɛrɛ lo ngama nyingambi, bere ndo bi tɛrɛ lo.’

‘Ĩ du akwa mbi. Mbi ndo tɛnɛ hɛ̃ ĩ tɛnɛ zu mɛ To mbi ye ya mbi tɛnɛ hɛ̃ ĩ. Angbã dã mbi gwe ka tɛ To mbi ka ndozu. Wa ĩ na ngbãngɔ ge tise, azi na hĩngangɔ ya ĩ ava mbi se ĩ du na songo ka popo tɛ ĩ. Ĩ yengbi ngama se mɛ mbi ye na ĩ.’

Na gesi, Yezo lindó sambela, lo yɔndó ka ti Yehova ya, lo bata atoma wa lo zanga ala li kwa ndoni kɔi na siriri. Lo lindó nga sambela ya, ili Nzapa lua gonda. Na pɛni Yezo ná atoma tɛ lo yendó bia ti gondangɔ na Yehova wa na gesi ala sindó. Angbãndó dã ti nɛngɔ ya, agbɔ̃ Yezo.