Gbia tɛ azi ti Siri mɛndó ili lo la Bene-hadade ngbãndó lá kwɛ tiringɔ to na aya Izraɛlɛ. Gbia ti Izraɛlɛ ndo kpɛndó asɔ̃ tɛ gbia ti Siri na lo mɛ ya, prɔfeta Elisha ndo pandó hɛ̃ lo ngoi zu kpale niko uzu ti nɛngɔ ya, ali tɛrɛ lo. Ni la, Bene-hadade mundó ekateli ti gbɔ̃ngɔ prɔfeta Elisha. Lo mandó ya, Elisha ndo du ka kɔdɔrɔ ti Dotane ni la, lo tondó asoda ti Siri kai ti nɛngɔ ya, ala gbɔ̃ lo.

Asoda ti Siri sindó ka Dotane na bi. Na ndapelele, na ngoi mɛndó wa kwa tɛ Elisha si ko, lo hũndó butu butu tɛ asoda agini kɔdɔrɔ zu. Lo mandó mbɛtɔ wa lo dɛndó kɔngɔ ya: ‘Elisha, ye mɛ e na lingɔ nɛ?’ Elisha tɛnɛndó hɛ̃ lo ya: ‘Azi mɛ ndoni kɔi na e adu gba ɔngɔ azi mɛ ndoni kɔi na ala.’ Bo na ngoi niko, Yehova lindó ya wa kwa tɛ Elisha hũ butu butu tɛ apunda nga na alikalo ti wá mɛndó ka ndo ngomba mɛ agini ala.

Na ngoi mɛndó asoda ti Siri gi lége ti gbɔ̃ngɔ Elisha ko, lo lindó sambela, lo tɛnɛndó ya: ‘Yehova, mbi yɔ ka ti mɔ se mɔ ye, li ya ala ti awa ziba.’ Na mbala kɔi, abɛse ala ndo hũndó ndo ko, ta ala ndo  hĩngandó ndo mɛ ala da ma, li la hulundó. Elisha tɛnɛndó hɛ̃ asoda niko ya: ‘Ta ĩ ge kɔdɔrɔ ti nzɔ̃ni ma. Ĩ landa mbi, mbi na gwengɔ na hĩ ka tɛ kɔli mɛ ĩ ndo gi lo.’ Ala gwendó ndoni kɔi na Elisha tee ka Samaria, kɔdɔrɔ mɛndó gbia ti Izraɛlɛ ndo du.

Asoda ti Siri hĩngandó ndo mɛ ala da na gesi. Gbia ti Izraɛlɛ hũndandó Elisha ya: ‘Mbi lengbi ti kpɔngɔ ala?’ Mɔ da bɛ mɔ ya, Elisha hũndó ya, adu nzɔ̃ tangɔ li gɛrɛ ti diringɔ na siɔ kpale hɛ̃ azi mɛndó ndo gi lége ti lingɔ lo siɔni? Ipɔ. Elisha tɛnɛndó ya: ‘Ta mɔ kpɔ ala ma. Hɛ̃ ala tɛ ti tɛngɔ, wa zia ala gwe.’ Ni la, gbia lɛkɛndó fɛtɛ kɔi ti kotani na lo tɛ ala, na gesi lo zindó ala ya, ala diri ka tɛ ala.