Yosua dɔndó azi tɛ Nzapa na nɔ na pɛ bulu gba, kanda lo kpindó na ngoi mɛ lo na bulu 110. Ngoi zu ti ya dungɔ lɛ ngɛ̃́ tɛ lo, aya Izraɛlɛ ndo vɔrɔndó Yehova. Kanda na ngoi mɛndó Yosua kpi ko, aya Izraɛlɛ bandandó vɔrɔngɔ angbilondó ngama tɛ azi ti Kanana. Na lo mɛ ya, ala ziandó vɔrɔngɔ Yehova ko, lo zindó lége hɛ̃ gbia ti Kanana mɛ ili lo la Yabine ya lo hɛ̃ ala pɛnɔ. Ala demandó tɛrɛ la hɛ̃ Yehova ya, lo za ani. Ni la, Yehova hɛ̃ndó la Barake mɛ wa dɔngɔ ala na nɔ ti fãnani. Ayɔndó ya, Barake za azi ti nɛngɔ ya, ala diri na mangbi ti nzɔ̃ni na Yehova.

Debora mɛ prɔfeta ti wali tondó azi ya, aili Barake ga. Lo kambisandó hɛ̃ lo tɛnɛ mɛ Yehova tɛnɛ hɛ̃ lo ya: ‘Mu akɔli 10000 wa gwe mɔ tiri to na Yabine ka tɔ̃nda ngu ti Kishon. Mɔ na longangɔ Sisera mɛ gbia tɛ asoda tɛ Yabine.’ Barake tɛnɛndó hɛ̃ Debora ya: ‘Mbi na gwengɔ bo se du ya, mɔ gwe ndoni kɔi na mbi.’ Lo tɛnɛndó ya: ‘Mbi na gwengɔ ndoni kɔi na mɔ. Kanda hĩnga ya, ta mɔ la na hongɔ Sisera ma. Yehova tɛnɛ ya, wali la na hongɔ lo.’

Debora gwendó ndoni kɔi na Barake ná asoda tɛ lo ka ndo ngomba ti Tabore so tiringɔ to. Na ngoi mɛndó Sisera ma ngaso ko,  lo bombindó anwa ti to, apusupusu ti to ná asoda tɛ lo ka gbɛ gɛrɛ ngomba ti Tabore. Debora tɛnɛndó hɛ̃ Barake ya: ‘Yehova na lingɔ ndɛ ya, mɔ nwɔ to.’ Barake ná azi tɛ lo 10000 zundó ka ndo ngomba ti Tabore so tiringɔ to na asoda ti ngunu tɛ Sisera.

Yehova lindó ya ngu ti Kishon sĩ. Likalo tɛ Sisera gbandó kaya bɔtɔngɔ. Sisera zundó kaya likalo tɛ lo wa lo kpɛndó kpɛ na gɛrɛ lo. Barake ná azi tɛ lo nwɔndó asoda tɛ Sisera wa Sisera nvɛ̃ni kpɛndó! Lo gwendó bele kaya hema tɛ wali kɔi mɛ ili lo la Yaele. Lo hɛ̃ndó lo miliki ya lo nyɔ, wa lo vindó lo na dra. Soda niko mɛ wa nwɔngɔ to landó langɔ ti kpengbani. Yaele hindó tɛrɛ lo dã na lo wa lo gɔngɔndó pike kaya ma lo wa lo kpindó.

Barake ndo gindó Sisera. Yaele sindó gbɛ gofa tɛ lo wa lo tɛnɛndó hɛ̃ lo ya: ‘Ga mbi fa mɔ na kɔli mɛ mɔ ndo gi lo.’ Barake lindó kaya hema wa lo hũndó kinda tɛ Sisera. Barake ná Debora gondandó Yehova na bia na se mɛ lo li ya aya Izraɛlɛ nwɔ to. Azi ti Izraɛlɛ dundó na siriri na ya bulu 40 na gesi.